Газета №7

 Гьафтедин нетижаяр кьуна
9-февралдиз райадминистрациядин актовый залда гьафтедин нетижаяр кьадай совещание хьана.
Совещание "Кьурагь район" муниципальный тешкилатдин администрациядин кьил С.Гьамидова кьиле тухвана.
Анал хейлин идарайрин работникри чпи алатай гьафтеда авунвай кIвалахдикай информация гана.
Райондин финансовый отделдин начальник Б.Ибрагьимова къейд авурвал, къведай гьафтеда алатай йисан отчетар вахкуда, образованидин учрежденийриз карточкаяр ахъайна кIанзавайвиляй абуруз мажиб гунин месэла са тIимил геж жеда, гила цIийиз дегишвал хьанвайвиляй муькуь идарайрин руководителри кьилди карточкаяр ахъайна кIанзава, харжийрин сметаяр сад-кьве идара квачиз амай са идарадини гъанвач.
Райондин образованидин управленидин кьилин бухгалтер Р.Асланова лагьайвал, образованидин идарайрин харжийрин сметаяр гьазурна куьтягь хьанва, амма тек са директоррин къулар ва печать эциг хъувуна кIанзава, кьилди карточкаяр ахъаюн патал вири директоррин паспортрин делилар чахъ авач.
Райондин образованидин отделдин начальник Р.Катибова къейд авурвал, 1-мартдалди тIебии газ тухвана кIанзавай Центрдал алай идараяр тир Кьурагьрин 1-нумрадин юкьван школадин, кьве ясли-бахчадин проектар гьазурнава, финансрин патахъай четинвал ава, "Виридалайни хъсан классный руководитель" конкурсдиз КIирийрин юкьван школадин муаллимдин документар, кIвалах ракъурнава.
Ветуправленидин пешекар М.Сефералиева аранда кьуьд акъудзавай гьайванрин гьал ахтармишиз фейиди, анра авай гьайванрикай хкатунар авачирди, чIурни хъсанзавайди, алай вахтунда балкIанриз сибирский язвадиз акси рапар язавайди лагьана.
Совещанидал мадни гьакI культурадин управленидин начальник А.Эмирбеков, райондин архивдин отделдин заведующий М.Гераев ва масабур рахана.
С.Гьамидова совещанидал райондин руководителри авунвай кIвалах веревирд авуна, кIвалах вилик тухудай рекьер къалурна.

-------------------------------------------------------------------------------------------

Санал тир заседание хьана
11-февралдиз райадминистрациядин актовый залда "Кьурагь район" муниципальный тешкилатдин администрациядин аппаратдин работникрин, "Кьурагь район" муниципальный тешкилатдин депутатрин Собранидин депутатрин, хуьрерин поселенийрин кьилерин, райондин организацийрин, учрежденийрин руководителрин, "Аладаш хуьр" муниципальный тешкилдатдин организацийрин, учрежденийрин руководителрин, хуьруьн майиштдин руководителрин, агъсакъалрин ва ветеранрин Советдин председателдин иштираквал аваз "Кьурагь район" муниципальный тешкилатдин депутатрин Собранидин ва администрациядин санал тир заседание хьана.
Заседание "Кьурагь район" муниципальный тешкилатдин кьил, райондин депутатрин Собранидин председатель З.Азизова кьиле тухвана. Анал 7 месэладин гьакъиндай гьахъ-гьисаб авуна:
1. «2014-йисуз "Кьурагь район" муниципальный тешкилат яшайишдинни экономикадин рекьяй вилик финин кIвалахдин гьакъиндай райондин администрациядин гьахъ-гьисаб» (С.Гь.Гьамидов, райондин администрациядин кьил).
2. «2014-йисуз райондин бюджет кьилиз акъудунин гьакъиндай» (Б.Б.Ибрагьимов, финансрин отделдин начальник).
3. «2014-йисуз контрольно-счетный палатади авунвай кIвалахдин гьакъиндай гьахъ-гьисаб» (С.С.Сайдумов, счетный палатадин руководитель).
4. «2014-йисуз оперативный къуллугъдин кIвалахдин нетижайрин гьакъиндай Россиядин МВД-дин Кьурагь районда авай отделдин начальникдин гьахъ-гьисаб» (А.Б. Фатуллаев, ОВД-дин начальник).
5. «Райондин майишатра гьайванри кьуьд кечирмишунин гьалдин гьакъиндай» С.А.Селимов ОСХ-дин отделдин начальник).
6. «2014-йисуз Дагъустан Республика вилик финин кар алай проектар райондин сергьятда кьилиз акъудунин гьалдин гьакъиндай (Кьурагь район муниципальный тешкилатдин 2014-йисуз РД вилик финин кар алай проектар кьилиз акъудунин гьакъиндай" 2014-йисан 11-мартдиз акъуднавай 4-нумрадин къарар)» (И.И.Муслимов-экономикадинни эменнидин алакъайрин отделдин начальник).
7. «Муниципальный тешкилат яшайишдинни экономикадин рекьяй вилик фин патал"Аладаш хуьр" муниципальный тешкилатдин кьилин кIвалахдин гьакъиндай» (И.М.Меликов, хуьрерин поселенийрихъ галаз кIвалах тухунин рекьяй уполномоченный).
С. Гь.Гьамидов. «Россиядин Федерацияда чкадин самоуправление тешкилунин умуми принциприн гьакъиндай» 131-нумрадин Федеральный закон кьилиз акъудунин сергьятра аваз, район яшайишдинни экономикадин рекьяй вилик фин патал, агьалийрин уьмуьрдин дережа хкажун патал, цIийи кIвалахдай чкаяр арадал гъун патал, агьалийрин къазанжияр хкажун патал, муниципальный игьтияжрин ери хъсанарун ва гегьеншарун патал ва инсанрик къалабулух кутазвай маса месэлаяр кьилиз акъудун патал тайин кIвалах тухвана. 2014-йисуз "Кьурагь район" муниципальный тешкилатдин администрациядин кIвалахдин итогар кьуналди, асул хъсан нетижаяр налогар гунин, хуьруьн майишатдин продукция гьасилунин, кура-кура товарар гун-къачунин, республикадин автомобилрин рекьин райцентрдив агакьзавай 8 км рекье асфальт тунин, Кьурагьрин хуьре газ тунин кIвалах давамарунин карда хьана. ГьакIни, 2013-йисуз чкадин самоуправленидин органрин ва муниципальный райондин кIвалахдин нетижаяр кьурла, дагълух зонада район 3-чкадиз лайихлу хьана.
Алукьнавай 2015-йисни, алатай йис хьиз вакъиайралди девлетлуди жеда. Имни сифте нубатда, 1941-1945-йисар Ватандин чIехи дяведа чи Халкьдин ЧIехи Гъалибвилин 70 йис тамам хьун я.
Гьар са месэла, депутатри сесер гуналди, разивилелди кьабулна.

 -----------------------------------------------------------------------------------------

З.Саидова.
Зегьметдин ветеранар
Аллагьди гайи уьмуьрдал рази я
Инсан. Дуьньядин винел миллионралди инсанар яшамиш жезва, гьар са инсандиз гьар жуьредин уьмуьр кьисмет жезва. Садбуруз туькьуьл, садбуруз ширин .
Инсан дуьньядиз акъатай декьикьадилай адан кьилел къвезвай пис ва хъсан крар Сад тир Аллагьди кхьизвайди я,-лугьуда чIехи инсанри. Заз чиз икI язни я. Инсан вич яшамиш жезмай кьван зегьмет чIугваз, жегьил вахтунда вичин веледрихъ гелкъвез, вичин диде-бубадиз гьуьрмет ийиз, кIвал кьиле тухуз чалишмиш жезва. Инсанди вичин уьмуьр кечирмишзавай кьван адан вилик гьар жуьредин месэлаяр акъваззава.
Уьмуьр рехъ хьтин затI я. Гагь дуьзен, гагь дагълух, гагьни ккIал квай мензилар гьалтда. Амма и четин мензилрилайни чун викIегьвал авуна, са тIимил рикI кIевиз кьуна элячIна кIанда, и мензилрилай элячIун паталдини сифтени-сифте дидедин рикIиз веледрикай регьят хьана кIанда. Веледрикай рикIиз регьят хьайи диде кьуьзуь жедач.
За зи макъала Хвережрин хуьре яшамиш жезвай, вичин яшар 85 йисав агакьнавай Исмаилова Хадижат Ибрагьимовнадикай кхьизва.
Зун Хадижат дидедал гьикI гьалтна лагьайтIа, чун, газетдин корреспондентар нубатдин сеферда Ашаз, Гелхениз, Усаз ва Хвережиз фена, анра авай ясли-бахчайрин, школайрин, хуьрерин администрацийри авунвай ва хъийизмай кIвалахрикай хабар кьазвай.
Хвережрин ясли-бахчадиз фена хкведайла чи вил, югъ хъуьтIуьнди ятIани рагъ авай чимиди тирвиляй, куьчедал вичин кIвалин ракIарин вилик кIаник хъуьцуьганни кутуна ацукьнавай Хадижат дидеда акурла, чун адан патав фена.
Салам гана хабарар кьурдалай гугъуьниз, чна адаз,-диде куь тIвар вуж я, куьн иниг ацукьнава хьи лагьайла, ада вичин вилерал алай айнаяр туькIуьр хъувуна, вилер атIумарна чаз килигна: "Зи тIвар Хадижат я, кIвале дарих хьайила са геренда инив ацукьайди я диде"-лагьана, гуьгъуьнлай "Чан балаяр лагь куь дерди бала",- лагьана. Чна адаз чун райондин газетдин корреспондентар тирди, разивал гайитIа адан уьмуьрдикай макъала газетриз акъудиз кIандай лагьайла, ада чаз вичин кIвализ атун теклифна.
Къванцин гурарай винел хкаж хьана рак ачухайла, дегьлиздин пата пичина кудай кьадардин кIарасарни купIар харада тунвай. КIвале мад кас авачиз акурла, ам текдиз яшамиш жезвайдал чи шак фена ва жува жувакди, яраб и кьуьзуь хьана вилерин экни зайиф хьанвай Хадижат дидедивай вичихъ гелкъвез жезва жал, лагьана фикирна. Дегьлиздикай кIвализ гьахьайла, пичина авай цIайни хкахьна серин тир.
Хадижат дидеди гъил стулрал туькIуьрна ацукьун теклифна, вич къвалав гвай кроватдал ацукьна суьгьбет ийиз башламишна.
Хадижат диде 1930-йисуз (хайи варз ва югъ адан рикIел аламач, я и делилдикай паспортдани малумарнавач) Кьурагь райондин Хвережрин хуьре дидедиз хьана. Адан буба Ибрагьим совхоздин председатель тир. Ина ада 28 йисуз кIвалахнай, диде Сувар хизандихъ гелкъвез кIвале авайди тир. Хизанда вири 8 аял авай:кьуд рушни, кьуд гада. Афизат, Хадижат, Жамият, Байрамкъиз, Хидирнаби, Хиби, Къурбанисмаил ва гъвечIи стха Хиби, адал чIехи стха рагьметдиз фейила адан тIвар эхцигнавайди тир. Стхайрикайни вахарикай хуьре яшамиш жезвайди Хадижат дидени Хиби стха я.
Хадижат дидедин аял вахтар Ватандин ЧIехи дяведин къизгъин вахтунал гьалтна, иниз килигна а вахтунда аялрини кIвалахиз диде-бубадиз хизан хуьз куьмек гузвай.
Хадижат дидедини дяведин вахтунда совхоздин малар хуьз дяведиз як рекье тваз, гуьлуьтар храз, векьер ягъиз зегьмет чIугурди я.
Хадижат дидени 15 йисан яшда аваз гъуьлуьз фенай. Адал Зияудин буба (амни Хвережрин хуьряй тир) эвленмиш хьана. Эвленмиш жедайла Зияудин бубадиз диде-бубани амачир, абур фад рагьметдиз фенвай. Зияудин буба кIвале чIехи аял хьуниз килигна, адан хиве вичелай гъвечIи вахар ва стхаяр хуьн гьатнавай. Зияудин бубадини Хадижат дидеди абур хвена чIехи авуна, мехъерарни авуна вири чпин кIвалера фаракъатна. Хадижат дидедихъни Зияудин бубадихъ 7 велед авай.
Гила чаз -куьне куь веледрикай суьгьбет авунайтIа кIандай лагьайла, ада вилерал алай айнаяр алудна, гъиле авай яйлухдал вилер михьна. -Чан балаяр дидеди кьве хва сура тунвайди я, за квез вуч лугьурай,- лагьана мад шехьна. Диде Аллагьди гайи йикъал рази я,- лагьана. Зи чIехи хва Исмаил Ростов шегьерда вичин хизанни аваз яшамиш жезва. Нурали Дружбадал яшамиш жезва, адахъни вичин хизан ава. Рамазанни Сулейман (рагьмет хьурай чпиз) дуьшуьшдикди, аварияр хьана рагьметдиз фена. Рушар Укуза, Хвережа ва Бакуда яшамиш жезва. Абурухъни виридахъ чпин хизанар ава,-лагьана ада.
Алай вахтунда Хадижат диде текдиз ава, адахъ Укуза яшамиш жезвай руш Раиса гелкъвезва. Хадижат диде Президиумдин Верховный Советдин Указдалди, "Яргъал тир йисара гьакъисагъвилелди зегьмет чIугунай" ва 1980-йисан 31-октябрдиз Дагъустан АССР-дин "Зегьметдин ветеран" медалрин сагьиб я.
-Чухсагъул, Хадижат диде, чахъ галаз суьгьбет авунай. Къуй куь веледрихъ, хтулрихъ ва птулрихъ яргъи уьмуьр хьана, кIвалера гьуьрмет ва берекат хьурай! Сагърай!
-Квезни чухсагъул, чан балаяр, куь уьмуьрдик берекат акатрай.
-------------------------------------------------------------------------------------------

Ф.Абдурагьманова.
Школайрай хабарар
Эхиримжи йисара гьам Россияда ва гьам чи республикада образованидин хилез кьилин фикир гузва.
Аялриз школайра чирвилер гунин къайдаяр дибдилай дегиш хьанва. И кар себеб яз школьникрал кIелунин карда са кьадар четинвилерни гьалтзава.
Алай 2014-2015-кIелунин йисара чирвилер къачузвай аялриз къайдадик квай гьихьтин шартIар тешкилнаватIа чирун патал чун райондин са кьадар хуьрериз обходар ийиз фена.
И вахтунда кьиле фейи гуьруьшда чи райондин дагълух хуьрерикай сад тир Хвережрин хуьруьн юкьван школадин завуч Базаев Исламудин Асланбековича чаз чпин школадикай са кьадар ихьтин информация гана.
-Чи Хвережрин хуьруьн юкьван школа лугьузва ада, 1968-йисалай кардик ква. 2001-йисуз адахъ алава 6 кабинет гилиг хъувуна ва виридаз санлай 1 сменада чирвилер къачудай мумкинвал хьана. Алай вахтунда, школадин са патак пластикадин дакIарар кутунва. Школада 34 аялди чирвилер къачузва, ибурукай 10 аял гъвечIи классра кIелзавайбур я.
Виридаз 20 муаллимди чирвилер гузва. Техперсоналдикай рахайтIа абур чахъ 13 кас ава.
Къенин юкъуз школада къецепатан тарсар гудай муаллим ва физкультурадин тарсар тухудай спортзал авач. Тарсар тухудай предметный вири кабинетарни анра лазим къвезвай шейэрни чкайрал ала. ГьакIни ина цIуз акси системани кардик ква. Столар, стулар, партаяр вири куьгьне хьана дегишарна кIанзавайбур я. Чирвилер къачузвай ктабрикай рахайтIа, гьабурни бес кьадар авач, кимибур аялрин диде-бубайри къачузва.
ГъвечIи классра авай аялриз школадин столовыйдай йикъа 1 сеферда чими хуьрекни гузва.
Лугьун лазим я, ЦIийи йис алукьдалди вилик кумаз школадиз участковыяр тир Юзбеков Велибег ва Алидаров Алияр мугьман хьана. Абуру чи школадин аялрихъ ва муаллимрихъ галаз гуьруьш кьиле тухвана. Инал школьникривай наркотикрикай яргъа хьун тIалабна, экстремизмдинни терроризмдин идеологияди арадал гъизвай татугайвилерикай суьгьбетар авуна.
Гуьгъуьнлай школьникри гайи жуьреба-жуьре суалриз жавабар гана.
ХъуьтIуьн варцар кечирмишун патал школадиз 2 КамАЗ-да авай цIивин гъана. Анжах ина авай котельня лап куьгьне хьанва, ам 1982-йисалай кардик квайди я. Ада къайдадик квайвал чимивал тагуникди школадин къене мекьи вахтунда лап рекъизва. Гзаф кьадар аяларни муаллимар и кар себеб яз начагъ хьанва.
Умуд кутазва къведай кIелунин йис алукьдалди чавай и карда авай кимивилер къерех ийиз жеда лагьана.
--------------------------------------------------------------------------------------------

З. Саидова.
Ремонтрин кIвалахар
Цин турбаяр дегишарзава
Чна чи газетдин нумрайра идалай виликни Кьурагьрин хуьруьн цин ва канализациядин турбаяр авай гьалдикай, абур ремонт авун чарасуз тирдакай са шумуд сеферда чапнай. Хуьруьн администрациядин кьил Къурбанов Сейфудина са шумуд сеферда совещанийрал райондин администрациядин кьилин вилик и суал эцигнай. И суалдин патахъай райондин руководстводи и кIвалах гъиле кьуна ва тендер малумарна.
Республикадин бюджетдай чи райондин бюджетдиз Кьурагьрин хуьруьн цин линия дегишарун патал пулдин такьатар чара авунва.
Малумарай тендерда Мегьарамдхуьруьн закрытое акционерное общество "Амирус" гъалиб хьана. Абуру Кьурагьрин рабочийрин куьмекдалди и кIвалах гъиле кьуна ва кьиле тухузва.. Абуру Къурбалийрин мягьледин вини кьиле авай бассейнидай Къапудин кьилел алай булахдал кьван цин линия дегишарзава. И чIавалди аник виринра къадагъа авунвай асбестдин турбаяр квай, гила абур хкудна, яцIувилел 100 мм алай ракьун турбаяр кутазва.
--------------------------------------------------------------------------------------------
 

Ф.Абдурагьманова.
Cпорт
Райондин рушарин волейболдин команда кIвенкIвечи чкадал
2015-йисан 7-февралдиз Огни шегьерда Кьиблепатан зонадин рушарин командайрин арада волейболдай Дагъустандин чемпионат кьиле фена. Вири санлай къачурла, и чемпионатда 8 командади иштиракна. Чи райондай и первенстводиз тренер тир Алибеков Эдгара 9-рушакай ибарат тир команда тухвана.
Геждалди кьиле фейи акъажунра Мегьарамдхуьруьн, Къарабудахкент ва Кьурагь районрин командайри кIвенкIвечи чкаяр кьуна.
Чи райондин рушарин команда 3-чкадиз лайихлу хьана. Абур грамотайриз ва 3-дережадин дипломриз лайихлу хьана.Чазни райондин волейбольный командадин рушариз чпихъ хьанвай и еке агалкьун рикIин сидкьидай мубарак ийиз кIанзава.

------------------------------------------------------------------------------------------
Н.У.Байрамов.
Прокурор района, старший советник юстиции

Прокуратура района информирует
Прокуратура района провела проверку исполнения законодательства в сфере оборота отходов производства и потребления. В ходе проверки установлено, что в населенных пунктах Штул и Кабир допускается несанкционированное размещение бытовых отходов. Кроме того, в этих населенных пунктах не налажена планово-санитарная очистка территории, вызов отходов потребления фактически не осуществляется.
В целях обеспечения устранения выявленных нарушений закона прокуратурой района направлены в суд иски с требованием обязать администрации муниципальных образований организовать санитарную очистку территории населенных пунктов от мусора, а также сбор и вызов бытовых и промышленных отходов в границах поселений в соответствии с действующим законодательством.
-------------------------------------------------------------------------------------------

Шамилов Н.А., Инспектор АПК, мастер внутренней службы.
Информационное сообщение
"С 1 ноября 2014 года государственная услуга по выдаче справок о наличии (отсутствии) судимости и (или) факта уголовного преследования либо о прекращении уголовного преследования организуется и по принципу "одного окна" на базе многофункциональных центров предоставления государственных и муниципальных услуг. МВД Дагестана призывает граждан во избежание очередей пользоваться порталом "Госуслуги".
------------------------------------------------------------------------------------------

Кьурагьрин сад лагьай нумрадин юкьван школадин муаллимрин коллективди Бабаева Белладиз ва амай мукьва-кьилийриз буба АБДУРЕГЬИМ рагьметдиз финихъ галаз алакъалу яз башсагълугъвал гузва.

 ---------------------------------------------------------------------------------------

Комментарии (0)

Нет комментариев. Ваш будет первым!