Газета №52

"Кьурагь район" муниципальный тешкилатдин кьил З.Азизован тебрик
Гьуьрметлу районэгьлияр! 2015-йисни тарихдиз хъфизва. Акъатзавай йис райондин тарихда лишанлу йисарикай сад яз амукьда. Чи район яшайишдинни экономикадин рекьяй вилик финин карда Дагъустанда дагълух районрин арада пуд лагьай чкадал хьана. Районда хуьрерин поселенийрин кьилер, райондин Собранидиз депутатар хкягъун, райондин кьил хкягъунин сечкияр кьиле фена.
Районэгьлийри шумуд йисуз гуьзлемишзавай "Кьасумхуьр-Кьурагь" рекьиз къир цунин кIвалах акьалтIарна, районда МФЦ-дин дарамат эцигна, и йикъара МФЦ-ди вичин кIвалах башламишда, югъ-къандавай районда тIебии газдикай менфят къачузвайбурун кьадар гзаф жезва, райондиз инвесторар желб авуналди, уьзуьмлухар кутазва, яр-емиш гьасилдай площадкаяр кардик кутазва….
ЦIийи дараматар хкажун, майишатрин кIвалахда дибдай дегишвилер тун, райондин экономика хкажунин кIвалах кIанелай гегьеншарун, районэгьлийрин дуланажагъдин, яшайишдин шартIар хкаж хьун патал серенжемар кьабулун, районда экстремизмдизни терроризмдиз рехъ гун тавун патал вири къуватар желб авун чи гьар йикъан важиблу месэла я.
Гьуьрметлу районэгьлияр! Заз акъатзавай йисуз гьар садан уьмуьрда хьайи такIанвилер эхиримжибур хьана кIанзавайди кьетIендиз къейд ийиз кIанзава. Къуй алукьзавай цIийи йис чаз берекатлу, гьар са хизандиз анжах шадвилер гъидай йис хьурай!
Къуй цIийи йисуз районэгьлийрихъ цIийи агалкьунар, кIвалера бахт, берекат, яшайиш вилик тухунин рекье сагъламвал хьурай!
---------------------------------------------------------------------------------------------

А. Рамазанова.
Райадминистрацияда
Активдихъ галаз гуьруьшмиш хьана
17-декабрдиз райадминистрациядин актовый залда Дагъустан Республикадин Кьилин полномоченный векил Хасбулатов Али Султаналиевичахъ галаз райондин активдин гуьруьш кьиле фена.
Активдин гуьруьшда райадминистрациядин работникри, хуьрерин администрацийрин кьилери, образованидин, культурадин, здравоохраненидин учрежденийрин руководителри, общественный организацийрин векилри иштиракна.
Собрание "Кьурагь район" муниципальный тешкилатдин кьил Замир Азизова ачухна.
Мярекатдал З.Азизова Дагъустан Республикадин Кьил Р.Абдулатипова Хасбулатов Али Султаналиевич Кьиблепатан территориальный округда РД-дин Кьилин полномоченный векил яз хкягънавайдан гьакъиндай Указ кIелна, иштиракчияр А.Хасбулатован биографиядихъ галаз танишарна ва адаз и къуллугъ вичин ва вири районэгьлийрин патай мубаракна.
Собранидин иштиракчийрихъ элкъвена А.Хасбулатова икI лагьана:
"Кьурагь райондин халкь ата бубайрилай атанвай адетриз вафалубур я. Ина заз мукьва гзаф инсанар яшамиш жезва. Кьурагьвийри чпин агалкьунралди инлай виликни чпин тIварар виридаз раиж авуна.
Республикадин Кьил Р.Абдулатипова Кьурагь райондиз еке тир гьуьрмет ийизва. Эхиримжи йисара районда, Дагъустанда гзаф дегишвилер хьанва Р.Абдулатипов властдиз атуникди Дагъустанда террактар тIимил хьана, гьич амач лагьайтIани жеда, инсанар чуьнуьх авунар, флешка гуналди терроризировать авунар арадай акъатна.
Умудзава инлай кьулухъни чун вири сад хьана чи Дагъустанда чIуру кIвалахар амукь тийидайди. Зун квез куьмек гуз гьазур я. Авай вири мумкинвилериз килигна чна кIвалах вилик фидай рекьер жагъурда".
Гуьгъуьнлай анал гьар са отделдин начальникди авунвай кIвалахдикай информация гунин диалог кьиле фена. Ина райадминистрациядин экономический отделдин начальник Идрис Муслимов, финансовый управленидин начальник Бахтияр Ибрагьимов, райондин хуьруьн майишатдин ва чилеринни ихтияррин алакъайрин отделдин начальник Слава Селимов, райадминистрациядин административный комиссиядин секретарь Вадим Рамазанов, райондин образованидин отделдин начальникдин заместитель Надир Мусаев, Россиядин МВД-дин Кьурагь районда авай ОВД-дин начальникдин заместитель Абакар Бубахваев, субсидийрин отделдин начальник Батман Батманов, "село Кабир" муниципальный тешкилатдин кьил Азедин Къазиев ва масабур рахана.
Эхирдай хьайи гуьруьшдин нетижаяр кьуна. Къарагъарай месэлайриз тайин тир жавабар гана.

---------------------------------------------------------------------------------------------

Нубатдин совещанидал
21-декабрдиз райадминистрациядин актовый залда райондин идарайрин руководителри гьафтеда авунвай кIвалахдин нетижаяр кьадай совещание хьана.
Совещание "Кьурагь район" муниципальный тешкилатдин кьил З.Азизова кьиле тухвана.
"Кьурагь район" муниципальный тешкилатдин администрациядин кьилин везифаяр тамамарзавай М.Хариева налогрин гьакъиндай информация гана, ада гьар хуьруьн поселениди гьикьван налог кIватIнаватIа, НДФЛ бес кьадар кIватI тавунвайди, чилерин налогдин 776 агъзур манатдин бес кьадар кIватI тавунвайди лагьана.
Культурадин ва информациядинни печатдин управленидин начальник А.Будаева къейд авурвал, ЦIийи Йисан мярекатдиз гьазурвал аквазвайди, репетиция тухун хъийида, идарада чимивал ава и гьафтеда мажибрин месэла гьялна куьтягьда.
Электросетдин начальник Р.Загьирова экверин линийри къайдадик кваз кIвалахзавайди, чIуру участокар авачирди, гьар йикъуз 2 трансформатор ремонт ийизвайди лагьана.
Финансрин управленидин начальник Б.Ибрагьимова къейд авурвал, мажибрин патахъай проблемаяр авач вири идараяр финансировать авунва, алай вахтунда бюджетдал алахънава.
"Кьурагь район" муниципальный тешкилатдин администрациядин кьилин заместитель Э.Исаевади лагьайвал, подписка вилик физва. 23-декабрдалди федеральный газетрин подписка, 28-декабрдалди райондин ва республикадин газетрин подписка авуна куьтягьун лазим я.
Совещанидал гьакI Пенсионный фондунин отделдин начальник Агьмед Назаралиев, счетный палатадин ревизор Сайдум Сайдумов, централизованный бухгалтериядин главный бухгалтер Роберт Асланов, райадминистрациядин хуьруьн майишатдинни ихтияррин алакъайрин отделдин начальник С.Селимов рахана.
З.Азизова гьар са месэла веревирд ийиз, кимивилер арадай акъуддай рекьер къалурна.

---------------------------------------------------------------------------------------------

А.Рамазанова.
ЦIийи Йис тешкиллувилелди къаршиламишун патал…
22-декабрдиз райадминистрацияда "Кьурагь район" муниципальный тешкилатдин администрациядин кьилин заместитель М.Хариеван кабинетда ЦIийи Йисаз талукь мярекатар тешкиллувилелди кьиле тухун патал райадминистрацияда тешкилнавай тешкиллувилин комитетдин кьвед лагьай заседание хьана.
Заседанидал тешкиллувилин комитетдин членар тир "Кьурагь район" муниципальный тешкилатдин администрациядин кьилин заместитель Э.Исаева, культурадинни информациядин ва печатдин Центрдин руководитель А.Будаев, райондин образованидин отделдин начальник Р.Катибов, райадминистрациядин аппаратдин руководитель Ф.Медетов ва масабуру информация гана.
Анал 28-29-декабрдиз хуьрерин поселенийра ЦIийи Йисаз талукь мярекатар тухудайди, 30-декабрдиз сятдин 11-даз райондин Спортдин дворецда вири идарайрай кIвалахда агалкьунар авай работникриз, райондин администрациядин кьилин теклифдалди, 180 касдиз эвер авуна мярекат кьиле фидайди лагьана.
Заседанидин нетижаяр М.Хариева кьуна, тешкиллувилин комитетдин вири членриз тайин тир буйругъар гана.

---------------------------------------------------------------------------------------------

Ф.Абдурагьманова.
Образование
Чирвилер гуз чалишмиш жезва
Алай вахтунда Штулрин хуьруьн юкьван школада аялрин бажарагъ хкажунин, абур тербияламишунин карда кьиле тухузвай кIвалахрикай и школадин директор Эфендиев Сабир Мегьамедсалигьовичавай лугьун тIалабна.
Куьруь къейд:
Эфендиев Сабир Мегьамедсалигьович, 1951-йисан 23-сентябрдиз Штулрин хуьре дидедиз хьана. 1975-йисуз КIирийрин хуьруьн юкьван школа акьалтIарна. Гуьгъуьнлай Армиядин жергейриз къуллугъ ийиз фена. 1978-йисуз анай хтана, ДГУ-дин филологиядин факультетдик кIелиз экечIна. 1985-йисуз хайи хуьруьн школада сифте гъвечIи классрин муаллим яз кIвалахна, гуьгъуьнлай дидед чIалан тарсар гана.
2001-2008 ва 2011 - йисалай къенин йикъалди Штулрин юкьван школадин директордин везифаяр тамамарзава.
-Сабир Мегьамедсалигьович, куь школа гьи йисалай кардик ква?
Эхиримжи йисара школада гьихьтин дегишвилер арадал гъанва?
-Лугьун лазим я, чи школа 1966-йисуз эцигна. 1968- йисалай ина чирвилер гунин кIвалах башламишна.
Гьар йисуз ина косметический ремонтар кьиле тухузва . 2002 - йисуз школадин дарамат лацу кирпичралди обшивка авуна, рак, дакIар ремонтна.
-Школада вири предметрин муаллимар ва кабинетар авани? Абуру шумуд аялдиз чирвилер гузва? Ктабрин патахъай гьикI я? Техперсонал гьикьван ава?
-Къенин юкъуз чахъ школада 15 муаллим ава. Вири санлай къачурла, абуру 30 аялдиз чирвилер гузва. Техперсоналдин кьадар 9 касдив агакьнава. Предметный кабинетар 4 ава, бес тежезвай ктабар диде- бубайри къачузва.
-Школада цIуз акси система кардик квани? Чимивал ва аялриз чими хуьрекар гунин кIвалах гьикI тешкилнава?
-Лугьун лазим я, чаз школадихъ цIуз акси система, щит ва къецел яд авай бассейн ава. Школа санлай газдалди чими ийизва. ГъвечIи классра чаз 14 аял ава, абуруз зур ставкадал алай 1 ашпазди чими хуьрек вахт-вахтунда гузва.
-Аялри олимпиадайра иштиракзавани? ЕГЭ-рин нетижаяр гьихьтинбур хьана? Терроризмдизни экстремизмдиз акси вуч кIвалах кьиле тухузва?
-Олимпиадайрикай рахайтIа, чи школадин аялри гьам райондин ва гьам републикада кьиле физвай олимпиадайра иштиракзава, призовой чкаяр кьур вахтарни хьана. ИкI, республикада 3 йис идалай вилик дидед чIалай кьиле фейи олимпиадада Назаралиев Гьажиди 5-чка кьуна. ЕГЭ-рин нетижаяр писбур хьанач. 1 аялди "5"-дар ва 4 аялди "4" -дар аваз вахкана. Санлай къачурла чи аялриз виридалайни урус чIалан тарсунай чирвилер къачуз кIан я.
Терроризмдизни экстремизмдиз ва наркотикриз акси кIвалах тухун патал школадиз яш тамам тахьанвайбурухъ галаз кIвалах тухунин рекьяй участковый Цмиханов Алияр мукьвал-мукьвал къвезва. Ада ина аялриз лекцияр кIелзава ва видеороликар къалурзава.
-Школада утренникар кьиле тухузвани?
Алай вахтунда школадихъ гьихьтин кимивилер ава. РикIик авуна кIандай гьихьтин кIвалахар ква?
-Вири суварриз талукьарнавай утренникар чна вахт-вахтунда кьиле тухузва.
Идалайни гъейри, лугьун лазим я, 1926- йисуз чи хуьре сифтегьан школа тешкил хьанай. 2016-йисуз чи школадин юбилейный йис жезва. И кардиз талукь яз, чна мярекатар кьиле тухуда.
Чи кIвалахда кимивилерни авачиз туш, чи школадин рак-дакIар, санузел лап куьгьне хьанва.
Школадин вилик квай гьаятдик даях цлар кутун лазим къвезва.

---------------------------------------------------------------------------------------------

А.Мамедова.
Участковыйдин кIвалахдин гьахъ-гьисаб авуна
18-декабрдиз райондин Культурадин идарада 1-участокдин инспектор Дадашев Чингизан Кьурагьрин хуьруьн агьалийрихъ галаз гуьруьш кьиле фена.
Участковыйрин начальникдин везифаяр тамамарзавай Юзбеков Велибеган иштираквал аваз, ада 2015-йисан кьвед лагьай паюна авур кIвалахдин гьахъ-гьисаб авуна.
-Гьуьрметлу юлдашар, зи участокдик кьве хуьр: Кьурагь ва Хуьрехуьр акатзава,-лагьана ада.
-Алай вахтунда зи участокдик регистрация авунвай 124 кас бейкарар ква, вацра юкьван гьисабдалди 5000 манат мажиб къвезва. Гьукуматда яшайишдин гьал четин хьуниз килигна, бейкарар гзаф хьуникди, жегьилрихъ галаз тербиядин рекьяй кIвалах тIимил тухуникди, ички, бейгьуш ишлемишзавай инсанрин кьадар артух хьуникди, экрандай къалурзавай инсафсузвилер, зулумар себеб яз чи кIвалахдиз кьецI гузва.
Чна тухвана кIанзавай оперативный операцияр тухузва. Еке куьмек чаз райондин администрациядикай ава. 2015-йисуз районда 45, зи гуьзчивилик квай территорияда 13 тахсиркарар винел акъудна. Административный закон чIурунай 31 протокол кхьенва.
Профилактикадин учетда 12 ва 10 кас диндин экстремистар учетда ава. Учетда авай вири чи гуьзчивилик ква. Террористриз акси тир кIвалах тухуниз гьар сада фикир гана кIанда, школада чIехи классра авай аялрихъ галаз профилактикадин кIвалах гужлу авуна кIанда.
Къейд ийин хьи, сифте нубатда террористрин дестейриз гьахьзавайбур яш тамам тахьанвайбур я, жегьилар фад рекьелай алатда, гзаф вахтара гьа рекьиз, тIимил таъмин тир хизанра авай жегьилар физва. Гьавиляй, диде-бубайривай чпин аялрал гуьзчивал тухун тIалабзава.
ГьакIни чи гуьруьшар мискIиндин имамдихъ, школайрин директоррихъ галаз кьиле физва.
Амма лугьун лазим я, хуьруьн агьалийри, полициядин кIвалах вилик фин патал чпин пай кутазвач.
Эхь, жезва ахьтин вахтар шигьидвал ая лагьайла, гзафбуру чпин кьил хкудзава.
Еке тIалабун ава агьалийривай, акур чIуру кар, кIвалах вичин тIвар чуьнуьхна полициядиз хабар гун. Полициядин кIвалах вилик фин патал чпин пайни кутун.

---------------------------------------------------------------------------------------------

Главный специалист Курахского районного отдела статистики Р.Г.Урдихананова.
Уважаемые руководители предприятий и индивидуальные предприниматели Курахского района!
В соответствии с Федеральным законом от 24.07.2007г. № 209-ФЗ "О развитии малого и среднего предпринимательства в Российской Федерации" Росстат в 2016 году проводит Сплошное федеральное статистическое наблюдение за деятельностью субъектов малого и среднего предпринимательства за 2015 год (далее-Сплошное наблюдение)
Разработка государственной стратегии развития малого и среднего бизнеса должна опираться на достоверные и полные статистические данные. Эти данные являются ключевыми для целенаправленной поддержки предпринимательства, реализации адресных государственных программ развития малого бизнеса и инвестиционных проектов.
Участие бизнеса в Сплошном наблюдении -это возможность внести свой вклад в формирование государственной политики по поддержке предпринимательства.
Сплошное наблюдение охватывает все средние, малые и микропредприятия, а также индивидуальных предпринимателей России.
В связи с чем Росстат просит Вас принять участие в Сплошном наблюдении, и предоставить достоверную информацию о результатах Вашей предпринимательской деятельности за 2015 год.
Полученные сведения будут использованы для формирования официальной статистической информации о состоянии сектора малого и среднего бизнеса в 2015 году.
Росстат гарантирует полную конфиденциальность данных, защиту информации, предоставленной участниками Сплошного наблюдения, отсутствие фискального характера Сплошного наблюдения -исключается передача сведений в налоговые и иные государственные органы и контролирующие организации.
Надеемся на Ваше сотрудничество!
Опросные листы наблюдения и указания по их заполнению будут доведены до вас.
По всем вопросам обращаться в районный отдел статистики по адресу: Курахский район, с.Курах, улица Гагарина 23,
Контактный телефон: 8(262) 24-1-35

---------------------------------------------------------------------------------------------

Атлухан Рагьимханов, КIирийрин хуьруьн ветеранрин Советдин председатель.
Чи почтадай
Дуьз крариз халкьди къиметни гуда
Яргъал йисаралди КIирийрин хуьруьн вини кьилиз, кIвалерин пIипI себеб яз, машинариз физ четинзавай, еке пар чIугвадай машинар хуьруьн майдандилай винихъ физвачир, иллаки машинриз хъуьтIуьн вахтунда лап четин жезвай.
И кIвалах кьилиз акъудун патал, рекьин лап четин къвекъуьн алудун патал халкьдин хатур хуьзвай агьалийри хуьруьн вилик и чарасуз, халкь патал лап важиблу кар кьилиз акъудун чарасуз тирди эцигнай.
Амма и кар кьилиз акъуднач. 2015-йисан 26-октябрдиз хуьруьн муниципальный тешкилатдин кьил цIийиз хкяна. Сессияда иштирак авур вири депутатри сес гуналди, Азизов Далгат Играмудиновичакай администрациядин кьил хьана. Чун са кьадар яшлу хуьруьн агьалияр хуьруьн кьилиз вичин цIийи къуллугъ мубарак ийиз фена ва арадал атай суьгьбетда и еке хуьруьн кар алай са шумуд месэла лагьайла, Д.Азизоваз хвеши хьана ва лагьана:
"Куьн хьтин хуьруьхъ рикI кузвайбурун дуьз меслятар чаз гьамиша герек я.
Чна жедай кIвалахар алай йисуз, амайбур, мумкинвилериз килигна, цIийи йисуз кьилиз акъудда". Яргъалди вегьенач кIвалерин иеси Чубанов Чубан СултIановичаз шегьердиз зенг яна, ихтияр къачуна.
Хуьруьз-халкьдиз лазим рехъ авун патал герек чиликай цал кьулухъ хутахна дуьз цал авун меслятна. Халкьдин патай сифте Чубанов Чубаназ еке чухсагъул, сагърай вич!
Тадиз гъиле кьур кIвалах кьилизни фад акъудна. УстIарар тир Сефербеков Салигьа ва Рамазанов Шамила инал еке зегьмет чIугуна, куьмекарни гайибур хьана, вири чеб сагърай! Вири халкьдиз хвеши хьана ва хуьруьн кьилиз сифте авунвай важиблу кIвалахдай еке къимет гана, сагърай вич халкьдин ихтибар кьилиз акъудзавай.
Чаз малум хьайивал, кIвалах кьилиз акъуддай касдиз кризисдикайни, бюджетда пул тахьуникайни, багьна кьаз кIан жедач.
Идалай гъейри, вич хьайи кьве вацран къене михьивилеризни еке фикир гана. Хуьре авай вири зирзибил кIватIзавай хъуртар михьна, къайдадиз гъанва. Амма михьивал са хуьруьн кьиливай жедач, чна вирида авун лазим я.
Заз умуд кутаз кIанзава хуьруьн халкьдин куьмекни галаз вири хуьруьн месэлаяр хуьруьн кьиливай гьялиз жеда.
Бязи "халуйриз" хуьруьн кьиливай хьана агакь тавунмаз чпин хизанриз къуллугъар, чилин участокар кIан жезва. Гьуьрметлу "халуяр" куьне халкьдин кIвалахдикай мус фикирда?
Заз лугьуз кIанзава, инсандиз къимет гудайла вичи авур кIвалахрай, вичи тур дуьз гелерай я. КIвалах авур вахтунай гудач.

---------------------------------------------------------------------------------------------

Комментарии (0)

Нет комментариев. Ваш будет первым!