Газета №49

 Нубатдин совещанидал
24-ноябрдиз райадминистрацияда нубатдин совещание хьана. Совещание "Кьурагь район" муниципальный тешкилатдин администрациядин кьил С.Гьамидова кьиле тухвана.
С.Гьамидова жуьмя юкъуз Дербентда приоритетный проектрин гьакъиндай совещание хьайиди, чи район проектар кьиле тухунин карда зайиф тир жергейра авайди лагьана.
Анал чилер ва эменни регистрация авунин кIвалах зайиф тирди, налогар кIватIунин кIвалах бегьемвилелди кьиле тухун тийизвайди, вири кимивилер тади гьалда арадай акъудна кIанзавайди лагьана.
Анал хейлин идарайрин руководителар рахана.
Культурадин отделдин заведующий А.Эмирбекова къейд авурвал, 3-декабрдиз кьиле тухузвай набутрин Йикъан мярекатдиз гьазурвал аквазва, культурадин идара ремонт ийиз башламишнава, цIивин мад хканва.
Райондин хуьруьн майишатдин чилерин ихтияррин отделдин начальник С.Селимова лагьайвал, алай вахтунда 820 гектардин чилер зулун магьсулар кутун патал къарагъарнава,725 гектардин майданда зулун тум кутунва. Эсед Салигьован ва Кумухърин майишатри цан цанвач, гьайванри кьуьд акъудунин гьал пис туш.
ЦРБ-дин кьилин духтур А.Акимова къейд авурвал, алатай гьафтеда БЦЖ авуна, КьепIирдал диспансеризация ийиз духтуррин бригада фена, республикадин аялрин больницадай духтуррин бригада 24-28-ноябрдалди къведа лагьанвай, абуруз алай вахтунда къведай мумкинвал хьанач, гила 1-5-декабрдалди къведа лагьана меслят хьанва.
Райондин финансовый управленидин начальник Б.Ибрагьимова ноябрдин вацран мажибар виридаз ахъайнавайди, экверин пулар гун тавунвайди, образованидин учрежденийрин питанидин тендер кьилиз акъудиз тахьанвайвиляй чара тавунвайди лагьана.
Ветеринарный управленидин начальник Н.Асланова Карагъаждавай ва Гавдандавай гьайванриз шарарин дарманар гайиди, агьалийри гьайванар паталай гьич са справкани галачиз райондиз гъизвайди, и йикъара малар къачуна райондиз гъанвайди, абур азар кватIа ахтармишиз работникар ракъурнавайди къейдна.
"Кьурагь район" муниципальный тешкилатдин администрациядин кьилин заместитель Э.Исаевади лагьайвал, районда подписка зайифдаказ кьиле физва, Мегьарамдхуьруьн почтамтдай делилар гун патал зенг авуна, тайин делилар ракъурун тIалабна, учрежденийри, организацийри мажибар гун тавунизни килигна подписка авунвач.
Совещанидал райондин образованидин кьилин бухгалтер Р.Асланов, рекьерин управленидин начальник Л.Агъабалаев ва масабур рахана. С.Гьамидова вири руководителри подписка авуниз, райондин СМИ-дихъ галаз алакъа хьуниз фикир гун тагькимарна.
------------------------------------------------------------------------------------------

А.Рамазанова.
Рабочий совещанидал
24- ноябрдиз "Кьурагь район" муниципальный тешкилатдин администрациядин кьилин кабинетда Дагъустан Республика вилик финин "Обеление экономики" приоритетный проект районда гьикI кечирмишзаватIа ахтармишунин гьакъиндай совещание хьана.
Совещание "Кьурагь район" муниципальный тешкилатдин администрациядин кьил С.Гьамидова кьиле тухвана. Совещанида "Кьурагь район" муниципальный тешкилатдин администрациядин кьилин общественный хатасузвал хуьнин рекьяй заместитель М.Хариева, хуьруьн майишатдин чилеринни алакъайрин ихтияррин отделдин начальник С.Селимова, райадминистрациядин экономикадин ва эменнидин отделдин начальник М.Муслимова, Кьасумхуьруьн налоговый къуллугъдин пешекар С.Къараханова, Кьурагь районда авай кадастровый палатадин пешекар С.Бабаева, райадминистрациядин крар идара ийидай отделдин заведующий А.Эмирбекова иштиракна.
Анал чилер регистрация авунин карда жезвай месэлаяр веревирд авуна. Чил регистрация авун патал ракъурнавай вири поселенийрин элкъвена хтанвай документра дегишвилер хтуна рахкур хъувун меслятна.
---------------------------------------------------------------------------------------------

Ф.Мегьамедова.
Оргкомитетдин заседание хьана
24-ноябрдиз "Кьурагь район" муниципальный тешкилатдин администрациядин кьилин кабинетда набутрин, яшлубурун йикъариз талукь тир мярекатдиз гьазурвал акунин ва ам кьиле тухунин гьакъиндай оргкомитетдин заседание хьана.
Заседание "Кьурагь район" муниципальный тешкилатдин администрациядин кьил, оргкомитетдин председатель С.Гьамидова кьиле тухвана.
Анал оргкомитетдин членри иштиракна. Заседанидал и йикъариз талукь мярекат кьиле тухунин схема ва Культурадин отдел и мярекат тухун патал вахтунда пулдин такьатралди таъмин авунин кIвалах веревирд авуна. Анал гьакIни набутризни яшлубуруз куьмек яз малумарнавай вацра пландал асаслу яз тухвай серенжемарни веревирд авуна.
-------------------------------------------------------------------------------------------

А.Рамазанова.
Приоритетный проектар
Районда диспансеризация авунин кIвалах давам жезва
Дагъустан Республикадин Кьил Р.Абдулатипован "Сагълам Дагъустан" приоритетный проект кечирмишунин карда районда диспансеризация кьиле физва. Райондин ЦРБ-дин терапевт, педиатр, хирург, гинеколог, окулист, неврапотолог, ЭКГ-дин УЗИ-дин лаборант квай бригада гьар гьафтеда хуьрериз физ диспансеризация ийизва. Алай вахтунда 1900 яш хьанвайбур-61 %, 1532 аял-76 % диспансеризация авунва.
-------------------------------------------------------------------------------------------

Нариман Ибрагьимов.
Илимдин къагьриманар
Инсанвилин ерийриз вафалуди
"Кьурагь райондин вилик къалурай лайихлувилерай" почетный знак гунин гьакъиндай 2014-йисан 12-ноябрдиз акъатнавай 27-нумрадин къарар.
Образованидин хиле къалурай лайихлувилерай, райондин общественный уьмуьрда активныдаказ иштирак авунай, яргъал йисара гьакъисагъ зегьмет чIугунай къарар акъудзава:
Дагъустандин государственный технический университетдин кафедрадин заведующий, профессор Оружев Идрис Абдуллаевичаз "Кьурагь райондин вилик къалурай лайихлувилерай" почетдин знак гун.

З.Азизов, "Кьурагь район" муниципальный тешкилатдин кьил.

Урусрин писатель Федор Глинкадихъ ихьтин гафар ава: "Ялавни экв хьиз уьмуьр ва кIвалахни сад-садахъ галаз гьакьван сихдиз алакъалу я. Гьи шей кузватIа, ада экв гузва, вуж яшамиш жезватIа, ам гьамиша гьерекатда ава". Чаз къе ихтилат ийиз кIанзавай касни датIана гьерекатда ава ва ада халкьдин макьсадар кьилиз акъатунихъ рикI куналди вичин рекьел ацалтайбуруз экв гузва.
Хци, дирибаш башчи
Кьурагьви Абдулан хва Идрисакай заз 1960-йисан юкьвара чир хьана. ВЛКСМ-дин Кьурагь райкомдин сад лагьай секретарь ара-ара хуьруьз къведай, колхоздин, школадин комсомолри кIвалах тухузвай гьалдал гуьзчивалдай. Хуьре комсомолринни жегьилрин арада зегьметдин бегьерлувал хкажуниз, хъсандиз кIелуниз, спортдин, культурадин серенжемра иштиракуниз талукь мярекатар, суьгьбетар тешкилдай.
1963-йисуз Кьурагь район тунач, ам Кьасумхуьруьн райондал эхлянай, 1964-йисуз тешкил хъувунвай. Гьа и са йисуз дагълух районда комсомолдин сифтегьан организацийрин кIвалахни зайиф хьанай. Райцентрадай гуьзчивал амукь тавурла бязи тешкилатар михьиз чкIанвай, чарарал аламайтIани. Идрис Оружев балкIандаллаз Кьурагь райондин вири хуьрериз-КьепIирдилай гатIунна Хвережиз, Хпуькьиз, Бурши Макьаз кьван физ хтана, колхозра, школайра комсомолрин кIвалахдиз цIийи къуват хгана. Комсомолринни жегьилрин бригадаяр артухарна, жегьил малдаррин, чубанрин, лежберрин, магьсулдаррин арада социалистический соревнование гегьеншарна, школайра комсомолдин сифтегьан тешкилатрик гьерекат, ученикрин производственный бригадаяр кардик кутуна.
Сад лагьай секретарь кьиле аваз Кьурагьрин хуьруьн комсомолри, жегьилри Къузадин хъутIалрик террасдин багълар (300 къелем) кутуна, гьайванрикай хуьн патал жугъун чIугуна, къаравулар тайинарна. Райондин банкунин дарамат эцигунал юкьван школадин чIехи классра кIелзавай (тарсарилай гуьгъуьниз) гадаяр желбна. Райондин комсомолри США-дин чапхунчийрихъ галаз женг чIугвазвай Вьетнамдин халкьдиз куьмек гунин, металлолом кIватIунин карда иштиракна: гьар йисуз 7-10 тон куьгьне ракьар вахкузвай. Райцентрада, хуьрера советрин суварар санал ва шаддаказ къейдзавай, республикада кьиле тухузвай мярекатра иштиракзавай. Кьурагь райондин комсомолрин тарифлу крарикай республикадин чIехибурузни хабар хьана. Комсомолринни жегьилрин башчидин алахъунар СССР-дин Верховный Советдин Президиумдин Указдалди "Гьакъисагъ зегьметдай" медалдалди къейд авуна.
Райондин абадвал патал мадни гьевесдивди кIвалахдай ашкъи авай, амма намусдин, ахлакьдин,марифатдин, гьахълувилин уьлчмеяр алцумдай хсуси терезар гвай Идрис Оружев къуллугъдилай элячIна ва кIвалахиз школадиз хъфена.
Илимдин кукIушрихъ ялун
Англиядин писатель, тарихчи Томас Карлейлла кхьена: "Жуван пеше, кар жагъайди хушбахтлу я; къуй ам мад маса лезетлу кардихъ къекъуьн тавурай. Адахъ вичин кар ва уьмуьрдин макьсад ава". Завай лугьуз жеда, Идрис Абдуллаевич вичин кар жагъанвай, датIана уьмуьрдин макьсад намуслувилелди тамамарунихъ ялзавай кас я.
И.Оружев школадин дамах тир, ада мектеб медалдалди куьтягьна. Школа акьалтIарнамазди, Идрис ДГУ-дин тарихдинни филологиядин факультетдик экечIна. Яру диплом къачур жегьилдин руьгь тух хьанач. Ам Кеферпатан Осетиядин госуниверситетдин юридический факультетдик экечIна. Инагни ада яру диплом къачуналди акьалтIарна.
И.Оружева 1972-йисан ноябрдилай вичин уьмуьр Дагъустандин гостехуниверситетдихъ галаз алакъалу авунва.75 йисакай 42 йис. ТIимилни туш.1974-йисуз ада Ростовдин халкьдин майишатдин институтда диссертация хвена ва экономикадин илимрин кандидатвилин тIвар къачуна.
И.А.Оружева кIелунин, тербиядин ва илимдин кIвалах сад хьиз, яни хъсандиз ийизва. Ам лап виниз тир пешекарвал ва чирвилер авай педагог, алим я. КIелзавайбурун арада адаз еке гьуьрмет ава, вучиз лагьайтIа профессорди студентриз гьар са тарс гъавурда акьадайвал ахъайзава ва абурувай дуьзвилелди истемишни ийизва.
И.Оружева 300-далай виниз илимдин макъалаяр, монографияр, гьакIни пособияр, брошюраяр, учебникар кхьенва ва чапнава. Абур преподавателризни, студентризни кIвалахда, кIелунра еке куьмек я. Ам кьиле акъвазай кафедрайра кIвалахар акваз-акваз вилик фидай ва хъсанвилихъ элкъведай. Гилани ада регьбервал гузвай праводин ва таможенный кIвалахдин кафедра университетда лап хъсанбурун жергеда ава. Имни Оружев вичел тапшурмишай гьи кIвалахдив хьайитIани намуслувилелди, жавабдарвилелди эгечIзавайвиляй я.
Идрис Абдуллаевича регьбервал гузвай праводин ва таможенный кIвалахдин кафедрада 28 касди зегьмет чIугвазва ва таможнядин кIвалахдай, суддин экспертизадай, государстводин муниципальный управленидай гьазурзавай пешекарриз лекцияр кIелзава. Ада гражданвилин ва административный праводай, политологиядай саки вири факультетрин студентриз тарсар гузва. Ина сифте яз шегьеррин ва районрин администрацийрин къуллугъчийрин пешекарвал хкаждай курсарни кардик кутунва. Абуруз чкадин самоуправленидин законрикай, чкадин шартIара ишлемишдай къайдайрикай лекцияр кIелзава, семинарар тухузва.
Нурлу йикъарин кьитвал
Жаван чIавуз кIанивилин гьисс кьисмет тахьай, ада лувар кутун тавур кас хьанач жеди. Ашкъидин пияла Идрис Оружевани хъвана, адаз муьгьуьббатдин дертни акуна. Пешедин къуллугъдин иеси хьанвай касдал Дагъустандин мединститут куьтягьна Кьурагьиз кIвалахиз хтай Бесханум (Бэла) Агьмедова гьалтайла, адахъ галаз суьгьбетар авурла, сада-садаз гележегдин мурадар ачухайла, жаванвилин жавабсуз кIанивилин дерт квахьна, адан чкадал цIийи, мадни мягькем, дерин гьисс арадал атана. 1970-йисан апрелдин вацра кьурагьвидини ахцегьви руша чпин муьгьуьббат цIийи хизан кутуналди тестикьарна.
Райондин аялрин сагъламвилин къаравулда акъвазнавай Бэла Мегьамеднабиевна вични галаз-галаз кьуд аялдин (Мурадан, Ренадин, Фуадан, Риадан) диде хьана. Веледри кьве жегьилдин кIанивилин алакъайриз, бахтунин сергьятриз мадни деринвал, гегьеншвал гана. Санал яшамиш жезвай гьа сифте йисара Бэлади кьатIана, Идрисаз са вуч ятIани бес жезвач. Ачухдиз рахайла, ада вичиз аспирантурадик экечIиз кIанзавайдакай лагьана.
-Лап хъсан я,-гьасятда разивал къалурнай камаллу дишегьлиди.-Заз аквазва, ина на вун чкадал алайда хьиз гьиссзавач. Вач, ви гуьгъуьна чунни жеда.
Идрис фена, филолог, юрист яз ДГУ-дин политэкономиядин кафедрада аспирантурадик экечIна, амма цIуд йисуз кьван хизан Кьурагьа амукьна. ЯтIани кьве касди уьмуьрдин, яшайишдин, яргъа хьунин рекьер-хуьлерин (физ-хтунин) четинвилерни эхна, аялриз тарифлу тербияни гана, яшлу дах ва дидени хвена. 1979-йисуз дах Абдул рагьметдиз фена, са йисалай Оружева вичин хизан Махачкъаладиз хкана. Бэлади меркезда вичин пеше давамарна. Хуьруьн деб кьунвай дишегьлидиз сифте йисара шегьерда яшамиш хьун четин акъвазна. Идрис ва вич кIвалахал фин, аялар-школьникар, кIвале гъуьлуьн яшлу диде. ЦIийи кIвалихъай мугьманрин гелни атIанач. Бэлади вичин кайванидин, дидедин, уьмуьрдин юлдашдин ва сусан везифаяр баркала къведайвал кьилиз акъудна. Садан патайни-гъуьлуьн мукьвабурун, къуншийрин, начагъбурун, кIвалахдин юлдашрин туьгьмет къачунач, анжах алхишар, гьуьрмет, кIанивал къазанмишна.
Къе Идрис Абдуллаевича успатзавайвал, Бэла Мегьамеднабиевнади адаз халис бахтунин легьзеяр, нурлу йикъар багъишна.
ГьакI акьуллу, вафалу веледарни. Абуру са вахтундани диде-бубадин чинриз яр акъатдай женжелвилиз, нагьакьан кардиз рехъ ганач. ЧIехибурун гуьзчивилик кваз чешнелудаказ кIелна, къизилдин медалралди школаяр, яру дипломралди вузар акьалтIарна. Мурада физикадинни математикадин, Риада экономикадин илимрин рекьяй кандидатвилин тIварар къачуна.
Дагъларин мулдин цуьк хьтин Ренадикай технолог, Фуадакай духтур хьана.
Диде-бубадин мурад веледар бахтлу хьун я. Идрис, Бэла Оружеври и кар патал зегьметни чIугуна. Руш гъуьлуьз гана, рухвайриз мехъерарна, гъилиз хтуларни атана. Шадвилихъ кьадар авачир. Амма нурлу йикъар чIулав булутри мичIи авуна? И карни фад кьилел къведа лагьай фикир садрани бейнидиз атайди тушир.
2001-йис Идрис Абдуллаевичаз чIулавдаз, мусибатдиндаз, рикIе гъам-дерт турдаз элкъвена. Адан уьмуьрдин шадвал, хъвер, бахт, веледрин диде, багърийрин умуд тир Бэла рагьметдиз фена. Къанажагълу вири уьмуьрда инсанрин сагъламвилин къаравулда акъвазай милайим, регьимлу, намуслу дишегьлидиз вичин сагъламвилин къайгъу чIугвадай вахт амукьначир.
Уьмуьрдин сеферчи, рикIин вафалу дуст къакъатай итимдиз еке гуж хьанай. Багърибуру, ярар-дустари, кIвалахдин юлдашри ва вахтунини адаз залан дерт кьезилариз куьмекна, амма Бэла, рикIин мурад хьтин дишегьли рикIяй акъудун четин я. Адакай ихтилат кватнамазди Идрис муаллимдин сесиник къагьар акатда, вилерал стIалар акьалтда. Вичиз руьгьдин илгьам, нурлу йикъар багъишай дишегьлидин руьгьдиз бахшна Кьурагьа, ЦIахъар магьледа гуьрчег булах туькIуьрна, булахдин цла Бэладин шикил туна. И булах Кьурагьрин дишегьлийрин рикI алай чкадиз элкъвенва.
Эхир нефесдал алайла Бэла Мегьамеднабиевнади веси авунай: "Идрис, заз пара багьа кас, садрани руьгьдай аватмир, тамам уьмуьрдалди ва аялрин бахтар патал яшамиш хьухь"
Идрис Абдуллаевича фад вичивай къакъатай багъри касдин весидиз вафалувал къалурзава. Ам аялар, хтулар патал яшамиш жезва. Гьа са вахтунда адан хци рикIикай, тамам уьмуьрдикай инсанриз, обществодиз хийир хкатзава. Къуй и баркаллу рекьеваз физвай ва 75 йисан юбилей къейдзавай Идрис муаллим мадни еке бегьерри, агалкьунри, хъсанвилери къаршиламишрай!
-------------------------------------------------------------------------------------------

М.Агьмедова.
Мярекат
М.Ю.Лермонтован 200 йисаз талукь яз
И мукьвара Кьурагьрин 1-нумрадин юкьван школада урус чIаланни литературадин муаллим Къазиева Шафига Жалаловнади М.Ю.Лермонтов хайи йикъалай инихъ 200-йис тамам хьуниз талукь яз "Бунтавчивилин уьмуьрдин йикъар" тIвар алаз литературно-музыкальный мярекат шад гьалара кьиле тухвана.
Мярекатда 10 -"а" ва 10 -"б" классрин аялри активныдаказ иштиракна. "Бородино" шиир сегьнеламишна къалурна. Лермонтован ролда И.Акимомов, "Бородино"-дик квай халудин ролда Р.Меликов къугъвана. Аялри М.Лермонтован шиирар устадвилелди кIелна.
Мярекатда иллаки кьетIен фикир М.Лермонтов Кавказда хьайи вахтунал желбнава.
Мярекат шаирдин шиирриз туькIуьрнавай романсрал кIватI хьанвайбуру кьуьлер авуналди акьалтIарна.
--------------------------------------------------------------------------------------------

Н.У.Байрамов,
Прокурор района,
старший советник юстиции.

Прокурор разъясняет:
Прокуратурой района в ноябре месяце проведена проверка соответствия действующему законодательству уставов муниципальных казенных дошкольных образовательных учреждений района. Проверкой установлено, что все без исключения уставы противоречат федеральному законодательству и подлежат приведению в соответствие с законом по следующим основаниям. С 1 января 2014 года вступил в силу федеральный государственный образовательный стандарт дошкольного образования, утвержденный приказом Минобрнауки России от 17.10.2013 г. № 1155, которым предусмотрены обязательные требования к дошкольному образованию и определены цели и задачи для детей дошкольного возраста (3 года-8 лет). Кроме того, в соответствии со ст.67 Федерального закона от 29.12.2012 г. № 273-ФЗ (ред. От 21 07.2014) "Об образовании в Российской Федерации" получение начального общего образования в образовательных организациях начинается по достижении детьми возраста шести лет и шести месяцев при отсутствии противопоказаний по состоянию здоровья, но не позже достижения ими возраста восьми лет. Эти изменения в уставах предусмотрены не были. По результатам проверки прокурором района принесены протесты на предмет приведения уставов муниципальных казенных дошкольных образовательных учреждений в соответствие с действующим законодательством.
---------------------------------------------------------------------------------------------

Спорт
Кьурагьрин команда сад лагьай чкадал
Мукьвал йисара чи районда спорт вилик тухуниз еке фикир гузва. И кардихъ галаз алакъалу яз, жегьил спортсменри гьам районда ва гьамни республикада кьиле физвай жуьреба-жуьре акъажунра иштиракзава.
ИкI, алай йисан 16-17-ноябрдиз Избербаш шегьерда ярх хьана штангаяр хкажунай Дагъустан Республикадин чемпионат кьиле фена.
И чемпионатда иштирак авун патал Махачкъала, Избербаш, Дербент шегьеррай ва Къаякент, Губден, Первомайск, Кьурагь районрай 50 спортсмен атанвай.
Атанвай спортсменрик Россиядин чемпионар, спортдин мастерар, спортдин Международный классдин мастерар, Дагъустан Республикадин рекордсменар квай.
Лагьана кIанда, чи райондин командади ихьтин чемпионатда сад лагьай сефер яз иштиракзавайди тиртIани, ам чаз лап хъсан нетижаяр аваз кьиле фена ва вири командайрин арада фейи акъажунра Кьурагьрин командади сад лагьай чка кьуна.
Чемпионатда 59 кг заланвал авайбурун арада Алибеков Эдгара 95 кг-дин штанга хкажунай 1-чка, гьа и заланвал авайбурун арада 80 кг-дин штанга хкажунай Рамазанов Юсифа 3-чка; 66 кг заланвал авайбурун арада 122,5 кг-дин штанга хкажунай Алиханов Альберта 1-чка ва гьа и заланвал авайбурун арада Оружбеков Рената 117,5 кг къведай штанга хкажунай 2-чка; 74 кг заланвал авайбурун арада 115 кг-дин штанга хкажунай Хидирнабиев Гуьлмегьамеда 3-чка; 83 кг заланвал авайбурун арада 152, 5 кг-дин штанга хкажунай Рамазанов Ислама 2-чка; 105 кг заланвал авайбурун арада 195 кг-дин штанга хкажунай Мегьамедов Назима 1-чка; 120 кг заланвал авайбурун арада 235 кг-дин штанга хкажунай Гуджаев Тагира 1-чка кьуна ва республикадин къене цIийи рекорд эцигна, 120 кг-дилай виниз заланвал авайбурун арада Оружбеков Эдгара 220 кг-дин штанга хкажунай 1-чка кьуна.
Гьа икI, чемпионатда чи командади 5 къизилдин, 1 гимишдин, 3 буьруьнждин медалар къазанмишна.
Иштирак авур вири командайрикай 1-чка Кьурагьрин, 2-чка Махачкъаладин ва 3-чка Избербашдин командайри кьуна.
Кьурагьрин командадин тренер Къулиев Фейруза вичин патай, спортсменриз чпин агалкьунар мубаракна ва чи командадиз вичин вилик эцигнавай мурад-метлеб кьилиз акъуддай мумкинвал хьайиди лагьана. Чпин хсуси рекордар эцигай спортсменрихъ генани еке агалкьунар хьана, амайбурузни чпин кIвалах гегьеншардай, мад сеферда цIийи рекордар эцигдай мумкинвал жедайдахъ инанмиш тирди лагьана.
Гуьгъуьнлай ада - чемпионатда иштирак авун патал, чи командадиз пулдин такьатралди еке куьмек авур "Кьурагь район" муниципальный тешкилатдин кьил Замир Азизоваз, спонсорвал авунай Спартак Манчароваз рикIин сидкьидай чухсагъул лагьана.
Алукьзавай 2015-йисан январдин вацра чеб Махачкъаладин Кубок патал кьиле фидай спортдин мярекатдиз фидайди инани чи командади 1-чка кьуник умуд кутазвайди ва и карда райондин руководстводи чпивай жедай куьмекар гудайдал са шакни алачирди къейдна.
-------------------------------------------------------------------------------------------

Комментарии (0)

Нет комментариев. Ваш будет первым!