Газета №48

А.Рамазанова.
Райадминистрацияда
Кьурагь райондиз – пуд лагьай чка
18-ноябрдиз Кьурагь райондиз чи республикадин меркездай РД-дин Гьукуматдин эменни идара авунин рекьяй министрдин заместитель Сурхаев Сурхай Заурбекович, РД-дин эменнидин министерстводин отделдин начальник Пулатов Ферзи Зияудинович, РД-дин эменнидин министерстводин отделдин начальник Гьарунов Арсен Султанович квай делегация атанвай.
Делегация атунин макьсад 2013-йисуз Дагъустан Республикадин муниципальный районрин ва шегьеррин округрин чкадин жува-жув идара ийизвай органрин нетижалу кIвалахдиз дагъдин зонада нетижаяр кьурла Кьурагь райондиз пуд лагьай чка хьана.
Райондин актовый залда райондин активдин, поселенийрин кьилерин, организацийрин, учрежденийрин, хуьруьн майишатдин карханайрин руководителрин иштираквал аваз торжественный собрание кьиле фена.
Собрание "Кьурагь район" муниципальный тешкилатдин администрациядин кьил С.Гьамидова атанвай мугьманриз чухсагъул лугьуналди ачухна.
Гаф РД-дин Кьилин векил яз атанвай С.Сурхаеваз гана. С.Сурхаева райондин агьалийриз, райондин руководстводиз райондихъ хьанвай агалкьун Республикадин Кьилин, Правительстводин, Халкьдин Собранидин патай мубаракна. Экономикадин кьилин хел тир хуьруьн майишат вилик тухунин карда агалкьунар хьуник мадни умуд кутазвайди лагьана. С.Сурхаева З.Азизовав диплом ва 741 агъзур манат пулдин пишкеш вахкана.
Гуьгъуьнлай гьа и залда атанвай мугьманри хуьрерин администрацийрин, хуьруьн майишатдин карханайрин кьилерихъ галаз гражданри эменнидиз ва чилерин участокриз хсусиятдин ихтиярар оформлять авунин месэладин гьакъиндай семинар-совещание кьиле тухвана.
Анал къарагънавай месэладай аранда авай хуьрерин администрацийрин кьилер тир Р.Улубеков, А.Жабраилов. СПК-рин руководителар рахана. Атанвай мугьманриз хейлин суалар гана. Аранда авай чилер отгонный чилер хьуниз килигна, и чилер хсуси ихтияра тестикьардайла "зеленка" ийидайла четин жезвайди лагьана.

--------------------------------------------------------------------------------------------

Ф.Мегьамедова.
Кьвед лагьай чка кьуна
Алай йисуз 15-сефер яз Ахцегьа кьиле тухвай лезгийрин игитвилин "Шарвили" эпосдин суварик «Виридалайни хъсан майдан» тIвар алай сегьнейрин майданрин конкурсда Кьурагь районди 2-чка кьуна.
18-ноябрдиз райадминистрациядин актовый залда "Шарвили" эпосдин сувар тешкилдай комитетдин председателдин заместитель, "Сулейман-Стальский район" муниципальный тешкилатдин кьил Н.Абдулмуталибова "Кьурагь район" муниципальный тешкилатдин кьил З.Азизовав Гьуьрметдин грамотани 50 агъзур манат пулдин пишкеш вахкана, гьакIни райондин край чирдай музейдиз Алкьвадар Гьасанан 180 йисан юбилейдиз талукь яз акъуднавай "Асари Дагъустан" ва "Куьредин ярар" ктабар гана.

-------------------------------------------------------------------------------------------

А.Рамазанова.
Координационный совещанидал
13-ноябрдиз "Кьурагь район" муниципальный тешкилатдин администрациядин кьил С.Гьамидован кабинетда координационный совещание хьана.
Совещанидал С.Гьамидова, райондин администрациядин кьилин заместитель Э.Исаевади, пенсионный фондунин отделдин начальник А.Назаралиева, ЦРБ-дин кьилин духтурдин заместитель О.Гьададова, РФ-дин МВД-дин Кьурагь райондин ОВД-дин начальникдин везифаяр тамамарзавай А.Алидарова ва СМИ-дин работникри иштиракна.
Ихьтин совещание тухунин кьилин макьсад РД-дин Правительстводин ва РД-дин Кьилин Администрациядин Руководителдин заместитель И.Ибрагьимова "Кьурагь район" муниципальный тешкилатдин кьилиз рахкурнавай Чар веревирд авун тир.
Чарче къалурнавайвал, материнский сертификат къачун патал гзаф кьадар законсуз гьазурнавай документар винел акъатнава. Сифте абуру медицинский работникриз, пулдин пишкеш гана, аял хана лагьана, фиктивный справка къачузва. Ахпа хуьруьн администрациядай хайивилин гьакъиндай шагьадатнама къачузва. Гуьгъуьнлай пенсионный фондуна сертификат оформлять ийизва.
Дагъустан Республикада 2012-2014-йисара ихьтин законсуз кIвалахрай 90 уголовное дело къарагъарнава.
Совещанидал рахайбуру чи районда ихьтин кIвалах авачирди лагьана.
С.Гьамидова совещанидин нетижаяр кьуна. СМИ-дин работникри и кIвалахдай профилактикадин кIвалах тухун, и кIвалахдихъ галаз алакъалу структурайри гуьзчивал тухун тагькимарна.
-------------------------------------------------------------------------------------------

Гьафтедин нетижаяр кьуна
17-ноябрдиз райадминистрациядин актовый залда райондин руководителри гьафтеда авунвай кIвалахдин нетижаяр кьадай ва авай кимивилер арадай акъуддай совещание хьана.
Совещание "Кьурагь район" муниципальный тешкилатдин администрациядин кьилин заместитель Э.Исаевади кьиле тухвана.
Анал хейлин идарайрин руководителар рахана.
Райондин ЦРБ-дин кьилин духтур А.Акимова къейд авурвал, октябрдин вацран мажиб ганва, дарманар бес кьадар ава, диспансеризация 56 процент авунва, пака духтуррин бригада Хпеж дередин хуьрериз диспансеризация ийиз фида.
Райондин финансовый управленидин начальник Б.Ибрагьимова лагьайвал, ноябрдин вацран мажиб гьеле хтанвач, буржар алач, мажибар тагай хуьрерин поселениярни ама.
Ветеринарный управленидин начальник Н.Асланова къейд авурвал, перегон куьтягь хьанва, планламишнавай зулун мярекатар кьиле тухузва.
Райадминистрациядин хуьруьн майишатдин чилеринни ихтияррин алакъайрин отделдин начальник С.Селимова лагьайвал, алай вахтунда 700 гектардин майданра зулун магьсулар кутунва. "Курахский" МСП-ди 110 гектарда, "Шам" СПК-ди 160 гектарда, "Кутульский" майишатди 230 гектарда кутунва.
"Сельсовет Курахский" муниципальный тешкилатдин администрациядин кьил С.Къурбанова къейд авурвал, хъуьтIуьз гьазурвал аквазва, зирзибил вегьедай чкаяр, пулдин такьатар авачтIани, кIеви ийиз алахънава, автостанциядал алай канализациядин турбаяр пулдин такьатар авачирвиляй туькIуьр хъжезвач.
Райондин культурадин отделдин заведующий А.Эмирбекова мярекатриз гьазур жезвайди, Культурадин идара "Альянс" фирмади ремонт ийизвайди, абуру чпин кIвалах вахтунда тийизвайди лагьана.
Э.Исаевади рахайбурухъ яб акална, кIвалах вилик тухудай рекьер къалурна, вирида подписка вахтунда авун тагькимарна.
------------------------------------------------------------------------------------------

Нубатдин заседанидал
18-ноябрдиз райадминистрациядин актовый залда райондин администрацияди гьар вацра кьиле тухун адет хьанвай заседание хьана. Ана райондин администрациядин работникри, хуьрерин администрацийрин кьилери, учрежденийрин, хуьруьн майишатдин карханайрин руководителри, общественностдин векилри иштиракна.
Заседание "Кьурагь район" муниципальный тешкилатдин кьил З.Азизова кьиле тухвана. Анал кьуд месэладиз килигна:
1. "Кьурагь райондин гражданский гьалдин актарин записар кьиле тухунин кIвалах гележегда хкаж авунин гьалдин ва серенжемрин гьакъиндай" (Р.Гьажиева-ЗАГС-дин заведующийдин везифаяр вахтуналди тамамарзавай)
2. "2014-йисуз "Кьурагь район" муниципальный тешкилатдин консолидированный бюджетдиз налогар кIватIунилай къвезвай къазанжидин гьал хкажунин ва кьабулзавай серенжемрин гьакъиндай" 2014-йисан 23-сентябрдиз "Кьурагь район" муниципальный тешкилатдин администрациядин кьили акъуднавай 97-нумрадин къарар кьиле тухунин гьакъиндай". (И.Муслимов-эменнидин алакъайрин ва экономикадин отделдин начальник).
3. "Кьурагь район" муниципальный тешкилатдин индивидуальный сектордин хуьруьн майишатдин карханайри гьайванри кьуьд акъудун патал гьазурвал акунин гьалдин гьакъиндай" (С.Селимов-чилеринни ихтияррин алакъайрин хуьруьн майишатдин отделдин начальник)
4. "Физический лицойрин налогрин гьакъиндай" (И.Муслимов -эменнидин алакъайрин ва экономикадин отделдин начальник)
Заседанидал къарагъарнавай месэлайрай тайин тир къарар кьабулна.

---------------------------------------------------------------------------------------------

 Ф.Абдурагьманова.
Приоритетный проектар
Кьилинди хатасузвал я
Малум тирвал, 10-ноябрь чи гьукуматда къенепатан крарин органрин сотрудникрин Югъ яз тайинарнава.
Идалайни гъейри, алай вахтунда республикадин Кьили РД вилик тухунин кар алай проектар кьилиз акъудзавай гьал ахтармишзава ва абурукай халкь гегьеншдиз хабардар авун истемишзава. И важиблу месэлайрикай сад тир "Нетижалудаказ сергьятар вилик фин. Хатасуз Дагъустан" проектдин бинедаллаз чи райондин РФ-дин МВД-дин РОВД-ди тухванвай кIвалахрикай чна анин начальник Фатуллаев АбутIалиб Бабаевичавай лугьун тIалабна.
-АбутIалиб Бабаевич, алай вахтунда "Хатасуз Дагъустан" приоритетный проектдин бинедаллаз райондин къене гьихьтин кIвалахар кьиле тухванва?
-Лугьун лазим я, чна районда и куьне лагьай проект вилик тухуз ва адан нетижаяр хъсанариз алахъзава.
ИкI, алай йисан сентябрдин вацра Кьурагьрин 1 ва 2-нумрайрин юкьван школайра Беслан шегьерда кьиле фейи вакъиайриз, гьакIни терроризмдинни экстремизмдин идеология негь авун патал "ачух тарсар" кьиле тухвана.
Идалайни гъейри, чна тешкилнавай графикдин бинедаллаз райондин вири хуьрера неинки экстремизмдинни терроризмдин вилик пад кьуниз, гьакIни наркотикар терг авуниз, яш тамам тахьанвайбурун тахсиркарвилер тIимил хьуниз еке фикир гуда ва и кардал датIана гуьзчивал тухуда. Къенин юкъуз чна райондин КьепIиррин, Гелхенрин ва КIирийрин хуьрера винидихъ къейд авур кIвалахриз акси профилактикадин кIвалахар тухванва. И вахтунда школайра, хуьрерин администрацийра гуьруьшар тухузва.
Чна районэгьлийрин къайгъу чIугвазва, гьабурувай чпин аялрал гуьзчивал тухун тIалабзава. Икьван гагьди экстремистрин жергейра чIехибур авайтIа, алай вахтунда жегьилар гзаф ава. И карди чак къалабулух кутазва, чи райондайни Сириядиз кьве кас фена. И рекьиз фена экстремистрин гьерекатра иштиракайбуруз чи гьукуматдиз элкъвена хкведай ихтияр гузвач. Эгер диндин рекьяй чирвилер къачуз кIанзаватIа, Москвада, Татарстанда ва Российский Федерациядин маса регионра Исламдин диндин рекьяй чирвилер къачудай мумкинвилер ава.
ГьакIни, алай вахтунда Россияда икьван гагьди раиж тушир, жуьреба-жуьре цIийи наркотический шейэр (спайсар) ва абур ишлемишзавайбур гзаф жезва.
И кIвалахрин эхирни гьихьтинди жезватIа виридаз малум я. Гьар садавай наркотикривай яргъа хьун тIалабзава. Чнани чи районда абур пайда тахьун патал гьар йисуз "Мак" тIвар алаз профилактикадин операция кьиле тухузва.
2014-йисуз октябрдин вацра ихьтин операция кьиле тухвана, и карда наркотикрин рапар язавайбур чаз районда гьеле малум туш. Амма бейгьуш маса къайдайра ишлемишунал, арадал гъизвай ксарни авачиз туш. Абурулай делояр къарагъарзава ва суддиз ракъурзава.
-Эхиримжи вахтара РД-дин Кьили ва Гьукуматди МФЦ-яр (многофункциональный центраяр) арадал гъуниз, вири идарайра электронный къайдада къуллугъ авуниз еке фикир гузва. И кардал асаслу яз куьне вуч кIвалах кьиле тухванва?
-И жигьетдай лугьун лазим я, чна са варз вилик чи райондин ОВД-дин отделдани гьар са агьалидиз гос.услугаяр кьиле тухуз, яни тади гьалда куьмек гун патал яракьриз лицензияр, хсуси къаравулриз шагьадатнамаяр, гьар жуьредин арзаяр гуз жедай кьилдин кабинет тешкилнава. Винидихъ къейд авурвал, кIвалах кьиле тухун патал абурувай иниз атана, туштIа, Интернетдин куьмекдалди электронный къайдада арзаяр кхьена, чкадал госпошлина гана, чпин вилик акъвазнавай месэлаяр кьилиз акъудиз жеда.
И карда са жуьрединни са патахъайни манийвал жедач. Лицензияр туькIуьрун патал гзаф вахтни рекьидач я са касдин гуьгъуьнани экъуьнарни жедач. Ина чкадал база ава, ана гьар са касдин делилар, адан шикил жеда. Эгер са гьихьтин ятIани шак алай кас хьайитIа, адавай больницадай начагъвал авач лагьай справка гъун истемишда.
-Куь профессиональный сувариз куьне гьикI гьазурвал акуна? Ам районда гьи къайдада кьиле тухвана?
-Лугьун лазим я, чи суварин югъ 1-ноябрь чна гьар йисуз шад гьаларивди къейд ийизва. ИкI, районда чна гьар йисуз хьиз, алай йисузни и суварин юкъуз спортдин рекьяй кьуршахар кьунай мярекатар тухвана. Ана гъалиб хьайибур гьевесламишна, спортивный формаяр, грамотаяр ва пулдин пишкешар гана.
И сувар чна районда санал чахъ галаз хейлин йисара кIвалах авур, алай вахтунда пенсияда авай сотрудникрин, чахъ авай Чечнядин, Афгъанистандин гьерекатрин иштиракчияр галаз чна и сувар кьиле тухвана, садни рикIелай алуднач.

------------------------------------------------------------------------------------------

Ф. Мегьамедова.
Мярекатар
«Женнет чи дидейрин кIвачерик ква»
Ихьтин тIвар алай программадик кваз 14-ноябрдиз райондин Культурадин управленидин фойеда Вирироссиядин сувар тир "Дидедин Йикъаз" талукьарнавай шад мярекат кьиле фена. Мярекатдин тешкилатчи райондин Агьалияр яшайишдин рекьяй хуьдай управленидин реабилитационный Центр тир.
Мярекатдиз "Кьурагь район" муниципальный тешкилатдин администрациядин кьилин заместитель Эльмира Исаевадиз, КЦСОН-дин дин директордин везифаяр тамамарзавай Назим Мусаеваз, Кьурагьрин 1 ва 2-нумрайрин юкьван школайрин аялриз, Центрдин учетда авай аялриз ва абурун дидейриз, Культурадин кIвалин артистриз теклифнавай. Сятдин 2 тамам хьайидалай кьулухъ, вири кIватI хьайила, Центрдин работникри атанвай мугьманриз няметар алай столрихъ ацукьун теклифна.
Мярекат реабилитационный Центрдин психолог Марина Султановади ачухна ва кьиле тухвана.
Сувар сифте нубатда дидейриз чIагай парталар алай, чина шадвилин хъвер авай аялри конкурсдин бинедаллаз дидейриз бахшнавай манияр лугьуналди ва шиирар кIелуналди тебрикна.
Мярекатдин иштиракчийрик Культурадин кIвалин гьевескар артистар тир Надир Гьасанова, Равидин Тагъиева дидейриз бахшнавай манийралди ва Кьурагьрин искусствойрин школада чирвилер къачузвай ТIагьир Фаталиева ягъай макьамралди мадни гьевес кутуна. ГьакIни дидейриз сувар реабилитационный Центрдин директордин заместитель Загьидат Назаралиевади мубаракна. Ада дидейриз хуш келимаяр лугьуналди, дидейрин зегьметдикай, шаирри дидейриз туькIуьрнавай цIарарин метлебдикай лагьана.
Мярекат мубарак авун патал гаф Э.Исаевадиз гана. Ада сифте нубатда, "Кьурагь район" муниципальный тешкилатдин кьилин ва райадминистрациядин патай дидейриз сувар тебрикна, гьакIни, дидедин кьакьан дережадикай, диде гафунихъ авай къуватдикай лагьана ва Центрдин работникриз дидейриз и сувар тешкилунай чухсагъул малумарна, гележегдани ихьтин мярекатар тухун патал администрацияди чпивай жедай куьмек гудайди къейдна.
Дидейрин патай рахай райондин край чирдай музейдин работник Тайибат Назаралиевади сувар мубаракна ва мярекатдин тешкилатчийриз чухсагъул лагьана.
Гуьгъуьнлай Центрди тешкилнавай жюридин къарардалди манияр лугьуна ва шиирар кIелуна тафаватлу хьана, призовой чкаяр кьур аялриз дипломарни пишкешар гана ва конкурсдин амай иштиракчияр грамотайралди гьевеслу авуна.
-----------------------------------------------------------------------------------------

М.Агьмедова.
Конкурс
Кьвед лагьай чка хьана
Виридуьньядин психологиядин алимри къейд ийизва: яратмишунри аялриз хъсан таъсир ийизва, яни живописдал, кьуьлерал машгъул тир аялрин фикир ва хиял гегьеншди жезва. Лагьана кIанда, чи райондани искусстводиз кьетIен фикир гузва. Чи искусствойрин школадин аялри республикадин къене жезвай вири мярекатра устадвилелди иштиракна ва гьа и иштиракай конкурсрани абуруз гьамиша кIвенкIвечи чкаяр хьана. Чав и йикъара, 6- ноябрдиз кьиле фейи конкурсда чи райондин искусствойрин школадиз 2- чка ганва лагьай шад хабар агакьна. Гьа и кIвалах фикирда кьуна, чун райондин искусствойрин школадин директор Къазиев Магьарам Жамирзоевичан патав мугьман хьана. ИкI, 6-ноябрдиз РД-дин илимдинни образованидин Министерстводи 4120-нумрадихъ акъуднавай къарардал асаслу яз, аялрин алава образованидин республиканский конкурс кьиле тухвана. Конкурс тухунин мана-метлеб ам тир хьи, алава образованидин учрежденийри педагогикадин тежриба винел акъудун ва пайда авун я.
Гьа и учрежденийри 3 йисан къене тухванвай кIвалахдин, мярекатра иштиракнавай конкурсрин съемкайрин дискар РД-дин илимдинни образованидин министерстводиз ракъурна. Гьа и конкурс 10-сентябрдилай 15-октябрдалди 5 номинациядай: "Дворец", "КIвал", "Центр", "Школа", "Станция" кьиле тухвана.
Ана республикадин 25 территориядай 39 учреждениди иштиракна. Конкурсдин нетижайри къалурайвал, алава чирвилер гузвай педагогрин пайда авун, умумиламишун, алава чирвилер гудай учрежденийра инновационный программаяр мягькемарун я.
Шад жедай кар ам я хьи, и конкурсда "Школа" номинациядай чи райондин искусствойрин школадиз 2-чка ганва.
-------------------------------------------------------------------------------

М.Агьмедова
Райондин олимпиадаяр
И мукьвара райондин Кьурагьрин 1-нумрадин юкьван школада урус чIалай, историядай, технологиядай олимпиада кьиле фена. Олимпиада гьикI кьиле фенатIа чирун патал чун райондин методический центрдин начальник, ЕГЭ-яр, ОГЭ-яр, олимпиадаяр кьиле тухунин рекьяй жавабдар тир Абдулхаликьов Кьасум Абдулхаликьовичан патав мугьман хьана.
Ада гайи информациядай чаз малум хьайивал, алай йисуз олимпиада тухунин къайда дегиш хьанва. Сифте школадин этапдин олимпиадада иштирак авур аялривай, муниципальный этапдин олимпиадайрани иштирак ийиз жезвайтIа, гила школадин этапда кьиле фейи олимпиадайра гзаф баллар къачур аялривай муниципальный олимпиадайра иштирак ийиз жезва.
Олимпиадайра 7-11-классдин аялри иштиракна. Олимпиададин гъалибчийрин нетижаяр чна Махачкъаладин бажарагъ авай аярихъ галаз кIвалах тухузвай центрдиз ракъурзава. Гьанай чаз гзаф баллар хьана, гъалиб хьайи аялрин тIварар хкведа.
Муниципальный этапдин олимпиадада гъалиб хьайи аялар:
Урус чIалай: К.Къайибова (7- кл. Маллакент), У. Рамазанова (8-кл. СОШ №1 Кьурагь), А. Макеева (9-кл. СОШ №1 Кьурагь), Х. Мегьамедова (10-кл. СОШ №1 Кьурагь), Н.Гьезеров (11-кл. Аладаш).
Историядай: Л. Абдулкеримова (7-кл. Хуьрехуьр), Ф. Бабаев (11-кл. СОШ №1 Кьурагь), А.Шамхалова (11-кл. Аладаш).
Технологиядай: А. Гьасретов (7-кл. Гельхен), Ф. Рамазанов (10-кл. Кьурагь), М. Шарифова (11-кл. КIири).
----------------------------------------------------------------------------------------
 

Комментарии (0)

Нет комментариев. Ваш будет первым!