Газета № 48

Межведомственный комиссиядин заседанидал…
"Кьурагь район" муниципальный тешкилатдин кьил З.Азизован кабинетда райондин межведомственный комиссиядин гегьенш совещание хьана.
Совещанидин кIвалахда хуьрерин администрацийрин кьилери, райадминистрациядин работникри, ОГБДД-дин Россиядин МВД-дин Кьурагь районда авай отделдин начальник Р.Мусаева, Россиядин МВД-дин Кьурагь районда авай ОВД-дин начальникдин везифаяр тамамарзавай С.Селимова, Россиядин ФНС-дин РД-да авай 2-нумрадин межрайонный инспекциядин 1-нумрадин камеральный ахтармишунрин отделдин гьукуматдин налоговый кьилин инспектор С.Къарахановади иштиракна.
Анал "Кьурагь район" муниципальный тешкилатдин консолидированный бюджетдиз къвезвай налогрин къазанжидин пландин делилар кьиле тухунин месэладиз килигна.
З.Азизова вири хуьрерин администрацийрин кьилериз 20-ноябрдалди гьар са налогдай план кьилиз акъудун тагькимарна.
---------------------------------------------------------------------------------------------

Оргкомитетдин заседанидал
11-ноябрдиз райадминистрацияда Виридуьньядин набутрин Йикъаз,Яшлубурун Йикъаз ва Дидейрин Йикъаз талукь яз тухвай мярекатриз гьазурвал акунин ва кьиле тухунин гьакъиндай оргкомитетдин заседание кьиле тухвана. Оргкомитетдин членрихъ галаз заседание оргкомитетдин председатель, "Кьурагь район" муниципальный тешкилатдин администрациядин кьилин везифаяр тамамарзавай М.Хариева кьиле тухвана.
Заседанидал мярекатриз гьазурвал акунин кIвалах авай гьал веревирд авуна.
М.Хариева оргкомитетдин вири членриз мярекатриз гьазурвал акун патал талукь тир буйругъар гана.
---------------------------------------------------------------------------------------------

Кар алай проектар- уьмуьрдиз!
АТК-дин заседанидал важиблу месэлайриз килигна
12-ноябрдиз "Кьурагь район" муниципальный тешкилатдин кьилин кабинетда террористриз акси комиссиядин заседание хьана.
Заседание райондин кьил З.Азизова кьиле тухвана. Анин кIвалахда "Кьурагь район" муниципальный тешкилатдин администрациядин кьилин везифаяр тамамарзавай М.Хариева, Россиядин МВД-дин Кьурагь районда авай отделдин начальникдин везифаяр тамамарзавай С.Селимова, хуьрерин администрацийрин кьилери иштиракна.
Заседанидал кьве месэладиз килигна: "Райондин агьалийри РФ-дилай къеце жезвай законсуз вооруженный кIватIалрин крара иштирак тавун патал профилактикадин алава серенжемар кьиле тухунин, гьакIни дяведин гьерекатар кьиле физвай Сириядай хтайбурухъ галаз предупредительно-профилактикадин кIвалах тамам кьиле тухунин гьакъиндай", "Райондин агьалийрин, обществодин гьакIни жегьилрин диндин, организацийрин, райондин исполнительный властдин векилрин иштираквал аваз, РФ-дин руководстводи международный терроризмдихъ галаз чIугвазвай женг ва международный террористический организацийра иштиракиз физвай жегьилар пислемишунин кIвалахда куьмек гунин мураддалди хуьрера гуьруьшар тухунин гьакъиндай".
Сад лагьай месэладай Россиядин МВД-дин Кьурагь районда авай отделенидин начальникдин везифаяр тамамрзавай С.Селимов рахана.
З.Азизова лагьана: "Хуьрерин администрацийрин кьилерини хуьрерин мискIинрин имамри санал кIвалах авуна кIанда, хуьрера агьалийрихъ галаз гъавурда тунин гуьруьшар тешкилна кIанда, школайра профилактикадин кIвалах тухвана кIанда, РФ-дилай къеце пата законсуз вооруженный кIватIалра иштиракиз тефин патал виликамаз пад кьуна кIанда.
Гьар са хуьряй законсуз вооруженный кIватIалра иштирак ийиз фейибур хьайитIа хуьруьн администрациядин кьили талукь органриз хабар авун лазим я".
---------------------------------------------------------------------------------------------

Абдула Семедов,
Кьурагьрин сад лагьай нумрадин юкьван школадин дидед чIалан муаллим.

Муаллимдин трибунадай
Дидед чIал халкьдин медениятдин ва культурадин диб я
Тарихди гьар са халкьдиз вичин шад ва бахтлу уьмуьр тухудай мумкинвал гана: санал яшамиш хьун, жуван хсуси адетар хуьн, абурукай тамамвилелди менфят къачун, абур акьалтзавай несилдив жумартвилелди агакьарун, уьмуьрда ва тарихда хьанвай хъсан крар рикIелай ракъур тавун ва жуван халкь патал цIийи крарин женгчияр хьун.
Саки са асирдин идалай вилик, 1928-йисуз, сифте яз чи хайи дидед чIалал "ЦIийи дуьнья" газет акъатуни ва анжах лап са тIимил вахтундилай Москвада кьилин учебный заведенийра кIелзавай лезги студентри "Лезги шаиррин шиирар" сифте яз лезги чIалал ктаб акъудуни дагъви халкьарин арада лезгийрин уьмуьрдани цIийи уьмуьр башламиш хьайиди тестикьарна ва и кIвалах тарихда цIийи девир яз гьатун миллетдин культурадин рекьяй яратмишунрин диб кутун хьана. Гуьгъуьнин сад-кьве йисалай башламишна савадсуз дагъвияр патал, гьа жигьетдай яз лезги миллет патални, ликбезар (ликпунктар) (ликвидация безграмотности) махсус школаяр кардик кутуна. Гьатта чеб чIехи хизанрин иесияр хьанвай итимар ва дишегьлиярни кваз ихьтин школадиз физ, чпиз кIелиз-кхьиз чирна. Лезгийрин 7-8 йиса авай аялриз школада партайрихъ ацукьна кIелдай мумкинвал хьана. Гьа и девирда дидед чIалал цIийи ктаб, журнал, газет акъатуни санлай савадсузвилихъ галаз женг чIугвадай мумкинвал гана. Зияудин Эфендиева, Алибег Фатагьова, Абдулла Искендерова, Къияс Межидова ва хейлин маса писателрини шаирри чпин таъсирлу яратмишунралди халкьдин гегьенш къатар савадлувилихъ финиз гегьенш рекьер ачухна. Чебни …гьихьтин яратмишунралди!
Акьалтзавай несилдин фикир жуван хайи дидед чIал хуьнин ва адан майданар генани гегьеншарунин кардал желб авун патал школайра лезги чIалан муаллимрин хиве еке ва жавабдар везифаяр ава. Инал заз школайра дидед чIалан вири месэлайрал гуьзчивалзавай чIалан махсус институтрин векилрин фикир кIевелай са кардал желб ийиз кIанзава. Сифте нубатда махсус учебный заведенийра гьазурзавай муаллимар чпихъ и рекьяй хъсан чирвал авай пешекарар хьун лазим я. Вучиз чна и месэла кьетIендаказ къейд ийизва? Себебни ам я хьи, гьатта лезги чIалахъ галаз гьич са жуьрединни алакъа авачир ва я тахьай, я, лугьудайвал, вичиз лезги чIала туькIуьр хьанвай шумуд гьарф аватIани течир "муаллимди" 9-10-классра аялриз сложный предложенидикай чирвал гузва. И кIвалах заз жуван вилералди жув лезги чIалан тарсар гунин кIвалах ахтармишиз фейила са шумуд школада акуна. И татугай гьалдикай за райондин образованидин управленида хьайи совещанидални лагьанай. Гьич са жуьрединни дегишвал авач. Кьвед лагьайди, чIехи классра кIелзавай аялри тарс бегьемвилелди тагузвай муаллимрилай наразивал ийизва. Журнал къачуна классдиз финалди ва тарсуна аялдиз цIийи са вуч ятIани чир тавуна "тарс гана хтай" муаллимдиз аялри гьихьтин къимет гуда?" Бес чна ихьтин татугай гьалариз рехъ гайитIа, чавай чи чIалан месэлаяр гележегда гьялиз жедани?
Садазни сир туш хьи, алай вахтунда аялри школайра менфят къачузвай лезги чIалан литературада гьатнавай яратмишунар гьам мана-метлебдин жигьетдай, гьам туькIуьр хьунин жигьетдай кьадарсуз зайифбур я. Жуван уьмуьр гьамиша дидед чIалахъ галаз алакъалу тирвиляй, зи рикIел сифте классрилай эгечIна кIелай эсерар лап хъсандиз алама. И яратмишунар а вахтунда аялри лап рикI алаз кIелдай ва а яратмишунрикай гегьеншдаказ менфят къачудай. Алай вахтунда лагьайтIа саки вири ктабра гьатнавай эсеррин таъсирлувиликай икI лугьуз жедач. Лап чIехи эсеррай къачунвай кIусарин манайрин гъавурда неинки аялар, гьакI муаллимарни акьазвач. Инал заз са-кьве мисал гъиз кIанзава. 9-10-классрин литературада авай Агьед Агъаеван "Лезгияр", "Пад хьайи рагъ", Межид Гьажиеван "Им къван, имни терез", Къурбан Акимован "Ракъинин муг", Ханбиче Хаметовадин "СтIал ва къван" романрай кIусар ва поэмадай чIукар кIелайла, аялар, гьакI муаллимарни гьич са куьнинни гъавурда гьатзавач. Хизгил Авшалумован "Чинаррин кIаник" повестдин тIвар, ана иштиракзавай геройрин тIварар дегишарнава. Повестдай къачунвай чIукни ахьтинди я хьи, ам 10-классда авай аялар алай чкадал кIелиз хьун мумкин кар туш.
Ругуд лагьай класс патал акъуднавай "Лезги литературадин чирагъ" ктабда гьатнавай эсерар саки вири таржумаяр я. Бес чахъ, лезгийрихъ, таъсирлу гъвечIи эсерар тIимил авани? Ваъ, гьелбетда, кIани кьадар ава. КIанзавайди абур аялрив агакьарна, абурукай менфят къачуз тун я.
Гьеле алатай асирдин эвел кьилера Бакуда фялеяр яз кIвалахзавай ахцегьви жегьилри хуьруьз ял ягъиз хтайла хуьруьн агьалийриз тамашаяр къалурун патал чпин хсуси театр тешкилнай. Тажуб жедай кар ам тир хьи, сегьнеда дишегьли къугъун кутуг тавур кар яз гьисабзавайвиляй, дишегьлидин ролрани итимар къугъвадай. ИкI, зун гъалатI тушIа, ахцегьрин жегьилри, кьиле Идрис Шамхалов аваз, кьуд пьеса сегьнеламишна: "Периханум", "Буржали", "Эрекь фитIинзавайбур" ва "Зи папан гъуьл". Ингье сифте яз лезгийрин уьмуьрдиз лезги театр атана. Са тIимил вахтундилай, 1935-йисуз, театр Дербентдиз хкана ва вири районрин агьалийриз театрдиз килигдай мумкинвал хьана. Гуьгъуьнлай СтIал Суьлейманан тIварунихъ галай лезгийрин музыкальный драматический театр михьиз Дагъустандиз машгьур хьана. Бажарагълу режиссерар тир Идрис Шамхалова, Багъиш Айдаева, Эседуллагь Наврузбегова, Мирзабег Мирзабегова, бажарагълу артистар тир Мурадхан ва Шамсикъемар Къухмазоври, абурун пуд руша, Абдулкъадир Сайдумова, Абдул Гьабибова, Ибрамхалил Рамазанова ва цIудралди маса артистри тамамарай ролар тикрар техжедайбур хьайиди чавай кьетIендаказ къейд ийиз жеда.
Алатай асирдин пудкъад-кьудкьад лагьай йисара лезгийрин уьмуьрда радиоди кьетIен чка кьазвай. Саки гьар йикъан нянихъ Махачкъаладай гузвай лезги передачайрихъ ва гьакI лезги манийрихъ чна еке гьевесдивди яб акалдай. Мукьвал-мукьвал микрофондихъ лезги театрарни жедай. Ислен йикъан нянихъ гудай "Истивут" радиопередачадихъ яб акалун низ хуш тушир кьван?! Харубегани ЦIарубега (Айдунбег Камилов ва Ризабала Агъабалаев) чпин зарафатралдини ягьанатрал гьикьван идарайрин ва майишатрин руководителрин чIуру кIвалахар дуьздал акъуддай ва абур истивутди хьиз кудай. Ибур вири, гьелбетда, искусство халкьдин гегьенш къатарихъ галаз лап мукьувай таниш хьуни арадал гъизвай мумкинвилер тир.
Хизанда чун шегьерра хьайитIани, дидед чIалалди рахунихъ кьетIен метлеб ава. Белки, куьрпеди вичин сивяй сифте гаф дидед чIалал "диде" лагьана акъудзава жеди. Шаксуз, гьакI я. Ингье гьа и легьзедилай башламишна хизанда, обществода аялди вичиз тайин тир чка кьазва, кIвалин, хизандин баркаллу крарал амал ва дамах ийизва, вич диде-бубадиз чешне яз къалуриз чалишмиш жезва.
Акьалтзавай несил бубайрин ва чIехи бубайрин девирда машгьур хьайи сеняткарвилерихъ галаз акьалтзавай несил танишарунихъ кьетIен метлеб ава. Саки лезги вири районрин хуьрерин агьалияр яшайишда герек тадаракар акъудунал машгъул тир ва а тадаракрикай чпи гегьеншдаказ менфятни къачузвай, гьа са вахтунда са шей маса шейинихъ галаз дегишариз, чпин яшайиш вилик тухузвай. Месэла, бязи хуьрерин агьалияр чатун устIарралди , харат устIарралди, къванцин устIарралди, маса хуьрерин агьалияр лагьайтIа хъенчIин къапар, гимишдин, буьруьнждин безекар гьазурунал машгьур тир. Иллаки ризкьи-къуьл, мух, кIахар, гергер майишатда герек жедай алатрихъ галаз дегишарун вирида чарасуз кар яз гьисабзавай.
Алай вахтунда лагьайтIа гьич са жуьредин сеняткарвилел машгъул жедай касни амач. Гьайиф.
Алатай асирдин юкьвара алим ва этнограф Сарият Агъашириновадин "Лезгийрин тарих" монография чапдай акъатнай ва халкьдин гегьенш къатари лап еке гьевесдивди адакай менфят къачунай. Анай чаз алатай асирдин эвел кьилера саки вири лезги хуьрерин ацукьун-къарагъун, меденият, культура ва са жерге маса хийирлу адетар ачухдаказ акуна. Амма, лап гьайиф жедай кар ам хьана хьи, ктаб чаз гьич са библиотекадайни гьат хъийиз- мач, гьа гьисабдай яз гьа вахтунда акъатай "Лезгийрин антология" ктабни. Гена рагьметлу Саидов Тажидин Гьамидович муаллимди аялар дагъвийрин тарихдихъ ва адетрихъ галаз танишарун патал "Дагъустандин халкьарин тарих ва культура" ктаб кхьена, чав агакьарна. Ингье эхиримжи саки 10-12 йисан девирда 4,8,9,10 ва 11-классрин аялри ва муаллимри и ктабдикай менфят къачузва.
Эхиримжи йисара чи са жерге лезги шаирри ва писателри чпин хсуси такьатрихъ чпин ва я маса шаирдин шиирар "кIватI" хъувуналди, ктабар чапдай акъудзава.
Амма, лап гьайиф къведай кар ам я хьи, бязи ктабра гьатнавай эсерар мана-метлебдин жигьетдай акьван зайиф я хьи, бур гьич кIелизни кIан жезвач. Кьвед лагьайди, а ктаб, сифте сигнальный экземпляр акъудна кIелна, адакай гъалатIар хкудун лазим тир. Амма и кIвалахдиз гила ерли фикир гузвач. Гаф атай чкадал лугьун лазим я лугьудайвал, са 7-8 йисан идалай вилик Рамазанов Селимбеган ва Садко Гьажиеван "КьепIир Айисат" ва "КIири Буба" раманар чапдай акъатуни, чак, художественный литература кIелунал рикI алайбурук, еке гьевес кутунай. Делилрал асаслу яз кхьенвай и кьве эсерни чун патал еке савкьват тир жеди. Эхь, шаксуз гьакI я. Амма заз инал кIелзавай касдин фикир квел желб ийиз кIанзава? Сифте нубатда къейд ийин хьи, кьве романдани кьилин геройрин гьерекатар са артух гьакъикъатдихъ галаз кьадайбур туш. Иллаки "КIири Буба" романда. Абурун гьерекатар авторриз кIандайвал кьиле физва. Ктабдин сифте гафуна С.Гьажиева къейд ийизвайвал, алатай асирдин 60- йисара кхьиз башламишай и роман КIири Буба чидай ксарин рикIел хкунар ва гьакI "КьепIир Айисат" романдани Айисат гьакъикъатда чидай кьепIирвийрин ва къугъванвийрин рикIел хкунар фикирда кьуна кхьенвайбур тир. И кIвалахар гьакъикъатдихъ галаз ерли кьазвач. Мадни "КIири Буба" романда авторди КIири Бубадин Дербентда са чIуру гьерекат акьван "устадвилелди" ачухарзава хьи, чун ктаб акьалтзавай несилди кIел тавун патал абурухъай чуьнуьхуниз мажбур жезва. Мад, за винидихъ къейд авурвал, ктабра авай гъалатIрин сан-гьисаб авач. "КьепIир Айисат" романдин редактор-корректор, "Лезги газетдин" жавабдар секретарь Даир Бейбалаев къалурнава. Зун инанмиш я хьи, Д.Бейбалаева ам гьич гъилени кьунвач. Бес ихьтин эсерар акьалтзавай несилдив чавай гьикI агакьариз жеда.
Белки, и авторри гьеле алатай асирдин 60-йисара акъатай З.Эфендиеван "Муькъвел гелер", Эскендер Къазиеван "Смоленский чилел", Къияс Межидован "Кьашкьа духтур" эсерар кIелнач жеди.
Гьа гьисабдай яз чи хайи дидед чIалал акъудзавай "Самур", "Кард", "Дагъустандин дишегьли" журналрани, районрин хсуси газетрани чап ийизвай макъалайризни яратмишунриз, бегьем фикир тагуз, кIелзавайдан гуьгьуьл дериндай хазва. Предложенияр дуьз туькIуьр тавун, гафара сан-гьисаб авачир кьван гъалатIар хьун, пунктуациядин лишанрал ерли амал тавун адетдиз элкъвенва. Бес чна, муаллимри, ихьтин татугайвилериз рехъ гайитIа, чавай акьалтзавай несилдин фикир дидед чIал чирунал кIевелай желб ийиз жедани? Ваъ, гьелбетда. Гена и рекьяй чавай чи "Лезги газет" и винидихъ тIварар кьур журналризни районрин газетриз чешне яз къалуриз жеда.
Хайи дидед чIал хуьн, адал майданар гегьеншарун, чIалан важиблу месэлаяр акьалтзавай несилдив агакьарун чи умуми везифа я. ЧIал, тарих, культура, адетар-вири санлай чи общество вилик тухунин карда жанлу яракьар я. Пашман жедай кар ам я хьи, чавай, гьакI акьалтзавай несилдивайни художественный литературадикай, газет-журналдикай, радиодикай менфят къачуз жезмач. Анра кIвалахзавай пешекаррин кIвалахдикайни разивилин гафар лугьуз жедач. Чеб я яратмишунрин, я лезги чIалан грамматикадин истемишунрин гъавурда ерли авачир пешекарар и кIвалахрал машгъул хьунал абуру дамах авун аламат жедай кар я.
Са жерге алимри, писателри, шаирри, искусстводин терефдарри, гьакI яратмишунрал машгъул хьайи векилри чаз хъсан ирс туна. Эхиримжи йисара чIалан месэлайриз талукь яз мукьвал-мукьвал тухузвай конференцийрин таъсирлувални кьетIендаказ къейд ийиз жеда. Эгер чна вирида сад хьана гъил-гъиле кьуна кIвалахайтIа, чавай, гьич са рахуни алачиз хайи дидед чIал хуьз, адан таъсирлувал хкажиз, Дагъустандин халкьарин арада хайи дидед чIалав лайихлу чка кьаз таз жеда. Чун патал им еке ва куьтягь тежер девлет я.

---------------------------------------------------------------------------------------------

Ф.Абдурагьманова.
Спорт
Кьуршахар кьунай турнир
Виридаз малум тирвал, РФ-да 10-ноябрь къенепатан крарин органрин сотрудникрин Югъ яз тайинарнава. Гьа и йикъаз талукьарна Кьурагьрин центрдал алай Спортдин дворецда 4-сефер яз, райондин хуьрерин школайрин 26-63 кг-дин заланвал авай аялрин арада азаддиз кьуршахар кьунай турнир кьиле фена.
И турнир райондин физкультурадинни спортдин ва жегьилрин крарин рекьяй отделдини райондин ОВД-дин отделдин работникри санал тешкилна кьиле тухвана.
Лугьун лазим я, алай йисуз и турнирда 75 жегьил спортсмендихъ галаз 66 кг-дин заланвал авай чIехи борецрини иштиракна.
Санлай къачурла, турнирдин призовой фондунин кьадар 65 агъзур манат тир. Спортдин рекьяй ихьтин мярекат кьиле тухунин кьилин макьсад районда азаддиз кьуршахар кьунин къайдаяр пайда авун, спортсменрин арада дуствилин алакъаяр мягькемарун ва акьалтзавай несил ватанпересар яз тербияламишун тир. Районда кьиле тухузвай и турнирдин мярекатдал, жегьил спортсменриз мубарак авун патал, "Кьурагь район" муниципальный тешкилатдин администрациядин кьилин везифаяр тамамарзавай Махач Хариев рахана.
Гуьгъуьнлай акъажунар башламишна ва абур геждалди кьиле фена.
ИкI, 26 кг-дин заланвал авайбурун арада: 1-чка А.Исаева, 2-чка Б.Ражабова, 3-чка Ш.Шамхалова, 29 кг-дин заланвал авайбурун арада: 1-чка А.ТIагьирова, 2-чка К.Мусаева, 3-чка М.Гьасанова. 32 кг-дин заланвал авайбурун арада: 1-чка У.Урдиханова, 2-чка М.Бугъаева, 3-чка М.Османова, 35 кг-дин заланвал авайбурун арада: 1-чка И.Бабаева, 2-чка Ш.Рагьимова, 3-чка Ф.Семедова, 38 кг-дин заланвал авайбурун арада: 1-чка В.Агьмедова, 2-чка К.Кьасумова 3-чка Ш.Абдулгьалимова, 42-кг-дин заланвал авайбурун арада: 1-чка З.Бабаева, 2-чка Э.Магьамдалиева, 3-чка Р.Къурбанова, 46-кг-дин заланвал авайбурун арада: 1-чка И.Мамедова, 2-чка Д.Алимирзоева, 3-чка А.Мегьамедова, 50 кг-дин заланвал авайбурун арада: 1-чка И.Акимова, 2-чка Б.Будайчиева, 3-чка Г.Мельникова, 54 кг-дин заланвал авайбурун арада: 1-чка Р.Мусаева, 2-чка Б.Абдурагьманова, 3-чка Р.Апаева, 58 кг-дин заланвал авайбурун арада: 1-чка С.Гьамидова, 2-чка А.Фейзулаева, 3-чка А.Гьамидова, 63 кг-дин заланвал авайбурун арада 1-чкаяр Н.Уьрдихановани И.Хайирбекова, 2-чкаяр А.Рамазановани А.Мегьамедова, 3-чкаяр М.Алиевани З.Апаева, 66 кг-дин заланвал авайбурун арада: 1-чка Р.Гьашумова, 2-чка Г.Къурбанова, 3-чкаяр А.Адиловани М. Магьамдалиева кьуна. Турнирдин гуьгъуьнлай акъажунра хъсандиз иштирак авур ва кIвенкIвечи чкаяр кьурбуруз медалар, грамотаяр, пулдин ва маса рикIел аламукьдай пишкешар гана. Мярекатдин эхирдай рахай ФС ДМ-дин отделдин начальник Рамиз Рамазанова и турнир кьиле тухуз куьмек гайи Россиядин МВД-дин Кьурагь районда авай ОВД-дин начальник АбутIалиб Фатуллаеваз рикIин сидкьидай чухсагъул лагьана ва гьакIни, вири борецрихъ спортда генани еке агалкьунар жедайдак умуд кутазвайди къейдна.

---------------------------------------------------------------------------------------------

Мисалар
Хабар кьуна: «вун гьинай я?» «Эвленмиш хьайила жаваб гуда» -,лагьана.
Хажалатдиз килигай накъварни авахьда.
Хазинайриз къимет гуз жеда, гафуниз ваъ.
ХапIа хъсан я: са юкъуз-чина, са юкъуз-куьна.
ХапIа хъсанзава, къаб куьлуь я.
Хва бубадиз гуьмбет я.
Хва- дестек, руш -безек.
Хеб хьиз къалурмир, жанавурри тухуда.
Хизан -бахтунин куьлег я.
Хозяйкадиз килигай къажгьанни жеда.
Хуьруьн аваданвал гумадалди чир жеда.
Хъвачайни цуьквер экъечlда.
Хъипрез кlерецар хаз иштягь ава: сарар авач.
Хъсан балкlанди вичин тlуьн, писда вичиз лаш артухарда.
Хъсандан вилик-писди, писдан вилик -хъсанди.
Хьел ахъайнани, чIемерук чуьнуьх ийимир,
---------------------------------------------------------------------------------------------

Муниципальное образование "Курахский район" сообщает о реализации на аукционе следующего муниципального имущества
№ п/п     Наименование объекта аукциона                Нач.цена,руб
1.Автомобиль ГАЗ-3102, регистрационный                           29800,0
номер М 088 ОО 05 rus
4. Шаг аукциона-5% от начальной цены, 1490,500 руб.
5. Прием заявок: с 19.11.2015 г. по 21.12.2015 г. 10.00 по адресу
6. Дата проведения аукциона: 21.12.2015 г. 10.00 ч. по адресу заказчика:
с.Курах, ул.Назаралиева 1, Администрация МО "Курахский район".
Официальный сайт- www/mo-kurah/ru

---------------------------------------------------------------------------------------------

Муниципальное образование "Курахский район" сообщает о реализации на аукционе следующего муниципального имущества
№ п/п  Наименование объекта аукциона                  Нач.цена,руб
1.Автомобиль ChevroIet Niva 212300, регистрационный    40000.0
номер К 966 ОУ 05 rus
4. Шаг аукциона-5% от начальной цены, 2000,0 руб.
5. Прием заявок: с 19.11.2015 г. по 21.12.2015 г. 10.00 по адресу
6. Дата проведения аукциона: 21.12.2015 г. 10.00 ч. по адресу заказчика:
с.Курах, ул.Назаралиева 1, Администрация МО "Курахский район".
Официальный сайт- www/mo-kurah/ru

---------------------------------------------------------------------------------------------

Комментарии (0)

Нет комментариев. Ваш будет первым!