Газета №46

Ф.Абдурагьманова.
Бейкаррин патахъай кар алай месэлайрал акъвазна
Алай вахтунда чи райондин ЦЗН-ди бейкарар кIвалахдал таъминарун патал кьиле тухузвай кIвалахдикай чна районэгьлияр вахт-вахтунда хабардар ийизва. Центрдин директор Гьажихан Гьажиханова гьар са бейкар кIвалахдал таъминарунин карда жезвай дегишвилерикай газетда вахт-вахтунда информация гуналди хабардар ийизва.
Къенин йикъуз чпин кIвалахда хьанвай дегишвилерикай ва цIийивилерикай лугьун патал чна адан вилик са шумуд суал эцигна.
-Гьажихан Садудинович, куь Центрдин учетда авай бейкарар кIвалахдал таъминарунин рекье гьихьтин дегишвилер хьанва?
-Виридаз малум тирвал, 2013-ймсалай2015-йисалди чи республикадин бейкар агьалияр кIвалахдал таъминардай Центрда авай бейкарар кIвалахдал таъминарунин карда куьмек гунин гьакъиндай РД-да кьилди программа кардик кутунва.
И программадихъ галаз алакъалу яз, чна районда бейкарар кIвалахдал таъминарун патал абуруз гъвечIи карчивилел алахъдай мумкинвилер гана.
И кIвалах чи районда 2013-йисуз хъсандиз кьиле тухвана, адал асаслу яз 250 касдиз гъвечIи карчивал вилик тухуз куьмек гана. Алай 2014-йисуз и кIвалах давамарун патал чна 10 кас кутунвай. Гьайиф хьи, Республикади и рекьиз пулдин такьатар чара тавун себеб яз, алай йисуз и кIвалах вилик тухуз хьанач.
2015-йисуз ам давам хъжедайдак чна умуд кутазва.
Куьне 2011-йисан мартдин вацра райондин руководстводи кьабулнавай РД-дин къарардин бинедаллаз 2011-йисалай 2015-йисалди чи райондин къене авай вири карханайра ва организацийра зегьмет чIугунин шартIар хъсанарун ва и кардал гуьзчивал тухунин гьакъиндай программа кардик кутунай. И программа квевай къайдадик квайвал кьиле тухуз жезвани?
-Лугьун лазим я, и программадал асаслу яз чна кьиле тухузвай кIвалахдикай чна квез февралдин вацра информация ганай. Къенин юкъузни и кIвалах чи гуьзчивилик ква ва ам вилик тухузва.
ИкI, инлай кьулухъ районда авай вири карханайра ва организацийра зегьметдин шартIар хъсанбур хьун, месэла: кIвалахзавай чка куьгьнеди, яни ацахьзавайди тахьун, гьар са кабинет къенез экв аватзавайди, цIуз акси система кардик квайди хьун истемишда. Гьар са организацияда кIвалахзавай работникрин шартIар хъсанарун патал гьа чкадин работникрикай ибарат комиссия тешкилда. И комиссияди гьар кварталда са юкъуз чи работник атай вахтунда чпин организацияда тешкилнавай зегьметдин шартIарихъ галаз танишарда. Авай хъсан ва писвилер арадал акъудда. Чи центрдин работникди и кIвалах ахтармишда, абур арадай акъуддай вахт гуда. Эгер и вахтунда чпин кIвалах хъсанар тавуртIа, чавай и кархана ва организация суддиз вугуз жеда.
-КIвалахдихъ галаз алакъалу яз чун райондин гзаф хуьрериз физва, инсанрихъ галаз суьгьбетарзава. Кьурагьа ва маса хуьрера куь Центрдай чпиз гъвечIи карчивал ачухун патал субсидияр къачурди, и кар себеб яз къенин юкъуз ЦЗН-дин учетда акъваздай мумкинвал тагузвайди лугьузва. Ихьтин бейкарриз квевай вуч лугьуз жеда?
-Лагьана кIанда хьи, и месела къенин юкъуз чи вилик лап хциз акъвазнавай месэлайрикай сад я.
2009-2012-йисара чи Центрдай гъвечIи карчивилел машгъул жез кIанзавай бейкарриз чна инай субсидияр ахъайнай. Абур къачузвай гьар са бейкардихъ галаз икьрар кутIуннай ва субсидияр къачур вахтундалай гуьгъуьниз, абур 10 йисан къене Центрдин учетда эциг хъийин тийидайди гьар сад хабардар авурди тир.
Гьа вахтунда къачунвай субсидиядин кьадар 10 йисуз чи центрдай бейкарриз гузвай пособиядин кьадардиз барабар я. Гьавиляй, гуьгъуьнин 10 йисуз Центрдин учетда акъваздай мумкинвал тежедайдакай абуруз информация ганай.
ГьакIни, субсидияр къачурдалай гуьгъуьниз чна 2 йисуз абуру кьиле тухузвай кIвалахдал гуьзчивал тухванай.
Абуру чпин кIвалахни гегьеншарун, маса бейкарризни кIвалахдай шартIар тешкилун лазим тир. Амма чи гуьзчивиликай хкатай вахтунда гзафбуру чпин кIвалах зайифарна, абурувай ам вилик тухуз хьанач.

---------------------------------------------------------------------------------------------

Приоритетный проектар
З.Саидова.
Чун хатасузвал хуьз гьамиша гьазур я.
Дагъустан Республикадин кьили кьабулнавай къарардин бинедаллаз, республика вилик тухун патал приоритетный проектар кардик кутунва. И приоритетный проектрин са шумуд хел ава. Абурукай сад "Нетижалудаказ сергьятар вилик фин. Хатасуз Дагъустан" я.
Эхиримжи вахтара чаз чизвайвал, неинки чи районда, гьакI республикадани, Россиядани гьатта виридуьньядани секинсуз уьмуьр хьанва.
1990-йисара Дагъустанда терроризмдини экстремизмди кьил хкажнавай. Абуру ислам диндин тIвар кьаз дуьньяда гъулгъула туна, виринра къал-макъал тунай. Алай вахтундани гьеле секинвал авач, са гьихьтин ятIани къалабулух кутадай вакъиаярни кьиле физма.
Алай вахтунда диндин рекьяй чи районда гьихьтин гьал аватIа чирун патал чун Кьурагьрин жуьмя мискIиндин имам Шамиль-Гьажи Омаровахъ галаз гуьруьшмиш хьана ва адаз са шумуд суал гана.
-Шамил стха, Дагъустан Республикадин кьили кьабулнавай къарардин бинедаллаз республика вилик тухун патал приоритетный проектар кардик кутунва. И проектрик "Нетижалудаказ сергьятар вилик фин. Хатасуз Дагъустан"- лугьудай хелни ква. Хатасуз Дагъустан лагьайла, им Дагъустанда секинвал хуьнин гьакъиндай кIвалахна кIанзава лагьай чIал я. Квевай и кардин патахъай, яни алай вахтунда чи районда авай гьалдикай вуч лугьуз жеда?
-Исламдин рекьяй чи районда авай гьалдин патахъай лагьайтIа, "ислам" лагьай гаф им араб чIалалди хатасузвал лагьай гаф я. Ислам лугьудай гафуникай салам гафни хьанвайди, салам имни саламатвал лагьай гаф я.
Сиве салам авай мусурмандин мецикай садазни кичIе хьана кIандач. Диндин патахъай районда авай гьалдикай лагьайтIа, районда къалабулух кутадай гьал авач, амма чун секин хьана жедач. Чун гьамиша районда секинвал хьун патал къайгъудик хьун чарасуз я.
Садазни сир туш, са бязибуруз Россия чукIуриз кIан хьана, са бязибуру наркотикар, яракьар гуз жегьилар чIуру рекьел тухузвай. Гила абуруз диндин рекьяй къал тваз кIанзава.
Чна чи бубайрин къайдайрал амал авуна, абуру чаз чирай рекьяй диндин чирвал къачузва.
Чна тIалабзава акьалтзавай несилдини дуьз рехъ хкяна, дуьз уьмуьр кечирмишун.
-Акьалтзавай несилди чIуру рехъ хкяй тавун паталди куьне гьихьтин кIвалахар кьиле тухузва?
-Чна школайриз физ аялрихъ галаз гуьруьшар кьиле тухвана. Ихьтин гуьруьшар чна мукьвал-мукьвал кьиле тухузвайди я.
-Шамил стха-и чIуру крарал кьил эцигзавай инсанар куь мажбурзава?
-Жегьилри чIуру крарал кьил эциг тавун патал сифтени-сифте диде-бубади аялриз дуьз тербия гана кIанда. Им сад лагьай чкадал алай кар я. Кьвед лагьайди, жегьилриз кIвалах тахьун я. Пуд лагьайдини, диндин рекьяй чирвал тахьун я.
-Са бязи, иллаки капI-тIеат ийизвай инсанри пIирерал дуьаяр авуна кIанзавайди туш лугьузва. Вучиз алай вахтунда ихьтин фикирар арадал къвезва?
-ПIирерал дуьа гьамиша ийизвайди тир, гилани авун лазим я. Мугьаммад Пайгъамбарди (а.с.а) вичи сурарал фейила дуьа ийизвай. Пайгъамбарди чаз виридаз сурарал фидай эмир ганвайди я. ПIирни сур я. ПIирек квайди хъсан кас я. ПIирерал дуьа авун-им Аллагьдиз ширк авун туш. ПIирел дуьа авуна, чна Аллагьдивай тIалабзава.
-Шамиль стха, динда авай дишегьлиди алукIзавай партал, иллаки хиджаб чIулавди алукIна кIанзава лугьузва, им дуьз яни?
-Динда авай дишегьлиди алукIзавай хиджаб чIулавди хьана кIанзавайди лагьай гафар, дуьз гафар туш. Хиджаб гьи рангунинди хьайитIани алукIдай ихтияр ава, гьа жигьетдай яз чIулавди алукIдай ихтиярни ава.
-Чаз ванер къвезва, са бязи чеб динда авай диде-бубайри чпин аялар школадиз ракъур тийизвай дуьшуьшарни ава. И диде-бубаяр дуьз яни?
-Ваъ и диде-бубаяр дуьз туш. Эгер абуру аялар школайриз рахкур тавуна, диндин рекьяй чирвилер гуда лугьузватIа, абур еке гъалатI я. Школадин чирвал авачир аялдиз диндин чирвални жедач. Пайгъамбарди лагьанай "чирвилерихъ галаз къведай са затIни авайди туш. Чирвал къачун гьар са касдин ферз я".
-Алай йисуз чи райондай гьяждал шумуд кас фена? Абур чпин харжидалди фенани? Гьяждал фидайла гьар са касдиз гьикьван пул герек къвезва?
-Алай йисуз чи райондай гьяждал 6 кас фена, абур вири чпин харжидалди фена. Гьяждал физвай гьар са касдиз 110 агъзур манатдилай 130 агъзур манат герек жезва.
-Ингье газет кхьидай вахт алукьнава. Чи районда "Ас-салам" газет кхьизвай агьалияр шумуд жезва? Газетдин къимет дегиш хьанвани?
-Эхь, газетар кхьидай вахт алукьнава. Чнани чи "Ас-салам" газет кхьиз башламишзава. Заз газет кхьизвай вири районэгьлийриз чухсагъул лугьуз кIанзава. Дугъриданни, чи райондин чIехи пай агьалийри "Ас-салам" газет кхьизвайди я.
Газетдин къимет йиса 390 манат хьанва. -Квез газет кIелзавай районэгьлийриз вуч лугьуз кIанзава?
-Заз вирирайонэгьлийриз еке тир чухсагъул лугьуз кIанзава. Къуй куь кIвалера берекат, арада гьуьрмет хьана, квез Сад тир Аллагьди сабур гана яргъал уьмуьр гурай. Амин!
-Квезни чухсагъул, Шамил стха, чахъ галаз суьгьбет авунай.
-----------------------------------------------------------------------------------------

Х.Агьмедов.
Тербиядин вахт гуьзчивилик кутан
Хъсан тербия-хъсан несил я
Диде-бубайрилай муаллимрин педагогический садвал тербиядин рекьяй еке къуват я. Школада муаллимдин куьмекчи хьун-им гьар са диде-бубадин буржи я.
Вири диде-бубайри чпин аялрин патахъай къенин школада сад хьиз чпин везифаяр къанмишзавач. Аял школада 4-6 сятда жезва, амай вахтунда ам кIвале жезва, тарсар гьазурзава, къугъвазва.
Эгер, аялди вичин азад вахт планламишна тухун тийиз, са хийирни тахьана вич вахтунив есирвиле вугайтIа, пис я. Азад вахтни аялдиз вичин фикир, дикъет, майилвал артмишун патал гузва. И кар иллаки тарсарилай азад гьяддин, суварин ва каникулрин йикъара кьатIуз жеда. Гьа и йикъара, гьуьрметлу диде-бубаяр, фад амаз аялдихъ галаз санал вири хизан квел машгъул жедатIа, вахт гьикI акъуддатIа, план туькIуьрна кIанда.
Вири хизандиз мажал авай -им диде-буба кIвалахривай ва аялар тарсаривай азад вахт я. И вахт аялди гьикI акъудзава? Ам аялди нихъ галаз акъудзава?
Хизанда аялри гьихьтин тежриба кIватIзава, мукьвал-мукьвал жув гьабурун вилералди килигна кIанда. АкI тахьайтIа, хизандин къене авай алакъайрин азадвили, къвезвай инсандиз еке таъсир ийизвайди куьн са вахтундани гъавурда гьатдач. ГьакI хьайила, чна мажбури тушиз аялар вири крарик вердишна кIанда: къугъваз, сад-садахъ галаз эдеблудаказ рахаз, санал зегьмет чIугваз, ял ягъиз, дуствал кутIуниз. Вучиз лагьайтIа, чIехибурухъ галаз хизанда хьайи, аялдиз акур а алакъаяр, анлай кьулухъ, ада вичин чIехи уьмуьрдиз тухузва.
Хизанда уьмуьрдикай аялриз гьихьтин чирвилер, абурун арада гьихьтин рафтарвилер аватIа чирун патал за 5-классда кIелзавай аялрив "Гьяддин юкъуз кIвале" кьил гана сочинение кхьиз туна. Ингье, чIехи пай аялри вуч кхьенатIа: "Дидеди кIвал шуткунна, къулал тIуьн эцигна, чун школадиз ракъурун патал гьазурвал акуна. Дах, телевизордиз килигиз, дивандал яргъи хьанвай. Вичиз кимел физ геж жезва лугьуз, ада дидедиз ярх хьанвай чкадилай экъуьгъунар авуна. Диде вичи ийизвай вири кIвалахар акъвазарна, дахдиз тIуьн гьазуриз эгечIна. Вири кIвалахар авуна гьазур хьайила, дах, къарагъна, тIуьнни тIуьна, дидедиз экъуьгъунарни авуна, кимел фена."
Чавай и сочиненидикай гьихьтин нетижа хкудиз жеда? Лап сугъул, дуствал авачир хизан я. Дидеди вири кIвалахар ийизва, аялри чпин вахт бушдаказ акъудзава, буба лагьайтIа, са къайгъуни авачир, тек са вичин къайгъуда авай кас я.
Хабар кьур рушаризни гадайриз чпин дидеярни бубаяр гуьрчег, хуш тIебятдин, регьимлу, вири крар алакьдай, дугъри, дидедиз куьмекдай, аялрихъ галаз сейирар ийидайбур хьана кIанзавай.
И жавабри а кардин гьакъиндай шагьидвалзава хьи, чIехибурухъ галаз гъвечIи инсанарни яшамиш жезва. Абурувай уьмуьр чпин акунралди критика ийиз ва хизанда жезвай вири вакъиайриз чпин вилералди къимет гуз жезва. ГьакI хьайила, чна аял кIвале квел машгъул жедатIа фикир авуна кIанда. Хизанда ял ягъун гьикI тешкилдатIа гьадалай аслу я аялдин физический, акьулдин ва эстетикадин тербия. Ам бажарагълудаказ тешкилна кIанда. Бес къугъун-аялдин рикI аладардай, ял ядай кIвалах тушни? Аялриз спортдин, кат-калтугун, дяведин (къал-макъал квай) юзун квай къугъунрал гзаф рикI жеда.
Гьуьрметлу диде-бубаяр, куьне анжах аялдал кIвалин кIвалахар тухудайла гуьзчивал тухузва, мад ваъ. Аялриз гьикьван кIан жеда чпелай чIехибуру са хъсан мах, шиирар кIелдайла, куьгьне вахтара хьайи крарикай, кьисайрикай ахъайдайла, чна чи багьа тир вахтуникай са тIимил хьайитIани аялар патал жагъурна кIанда.
Аялди ял ядай вахтуник телевизордиз килигдай вахтни акатзава. Гьелбетда, адакай гзаф хийирни ава. Аял куьз хьайитIани дикъетсуз килигда. Бязи вахтара акатай куьз хьайитIани килигзавай аялдивай са бязи затIарикай хийир патал дуьз нетижа хкудиз жезвач, чпин багьа вахт пуч ийизва. Гагь аялди дуьньядикай, дуьньядин гьаларикай фикирдайла, са бязи передачайри чIуру патахъди таъсир ийизва. И кIвалахдал диде-бубайри кьетIен гуьзчивал тухвана кIанда. Аял телевизордин вилик яргъалди ацукьарна виже къведач. ЧIехибур патал къалурзавай, зегьле ракъурдай кичIевал квай кинойриз килигиз туна кIандач. Аялрив чпиз талукь тир передачайриз килигиз туна, килигай кинояр, передачаяр хизанда веревирд авуна кIанда. Чна и кардиз артух фикир гун тийизвайвиляй, аялри чпиз акур чIуру кIвалахрикай хийир гзаф къачузва, хъсан патарихъай абурувай бегьем рахаз жезвач.
Ял ядай вахтарик суварарни акатзава. Ибур инсан хайи йикъар, мехъерар-иллаки аялриз гзаф рикI алай, мярекатар я. Ихьтин шад ва бахтлу йикъара аялризни фикир гана кIанда. Чи фикирди, аялар патал серфзавай вахтуни, аялрин патахъай чIугвазвай къайгъударвили абуруз шадвал, эдеблувал таъминарда.
Хизанда тербиядин кIвалах са бязи вахтара дуьз эциг тавурла, са бязи диде-бубадин патай аялди авур чIуру кIвалахдиз фикир тагунар, япалай тавунар жезва, амма ихьтин крар гел галачиз квахьзавач. Гьар са диде-бубади, муаллимди, тербия гунин кIвалах мукъаятвал хвена, гьар са чIуру кIвалах арадал акъудна кIанда. Аял векъи хьайила, вичивай вич хуьз хъхьун тийидайла, анжах са вич кIан хьунин ва вичиз кIан хьуни, гуя аял чIехи жедайла адан япарихъ галаз ам гъавурда акьада, кьилиз акьул къведа, вири крар чеб-чпелай хъсан жеда лугьуз, яб гузвач. Им еке ягъалмиш хьун я. Вири и винидихъ тIварар кьунвай чIуру ва хъсан хесетар аялдихъ галаз адан беденда чIехи жезва. Ахъаяйла, абурун вилик пад хкьаз четин жезва. ГьакI хьайила, и кар куь арадиз гъизватIа гьадан дувулар жагъурна, абур кьурурун патал женг чIугуна кIанда.
Чи уьмуьр йигин еришралди виликди фирдавай, аял чIехи жезвай шартIарни лап фад дегиш жезва. Къе чаз чи вилералди тербия гудай лап важиблу институт тир хизанда гьихьтин дерин дегишвилер кьиле физватIа, чи вилералди аквазва.
Бязи вахтара диде-бубадиз чпи хкянавай пешеди, са бязи жавабдар кIвалахра, чара авачиз ийизвай гьар жуьредин кIвалахри акажуниз килигна, чпиз хабарни авачиз чIехи ва мягькем жезвай аялдиз фикир гудай, ам гуьзчивилик кутадай мумкинвал ва вахт амукьзавач. Фад чIехи жезвай аял вич-вичин ихтиярда жезва. Са бязи вахтара жегьил диде-бубадивай чеб бегьем гъавурда тахьуниз килигна, аял чIехи жезвайвилихъ галаз адан къилихда кьиле физвай са бязи крар эсиллагь эх ийиз жезвач. И кардини жегьил диде-буба бязи вахтара аялдивай чара ийизва. ИкI, бедендихъ галаз амаларни, гьерекатарни чIехи жезвай аял вич вичин ихтиярда текдиз амукьзава. КIвалахди вири рикIелай ракъурнавай диде-бубадиз уьмуьрда вичел сифте гьалтзавай четин месэлаяр кьиле фидайла, вичин аялдин къене патан дуьньядиз килигдай вахт амукьзавач. Алай аямда общество виликди физвай къайдаяр, са патахъай, ада инсанрин вилик чIехи тIалабунар эцигун, муькуь патахъай, хуьреризни шегьерриз хас къайдадин шартIар атун, гзаф кьадарралди хуьрер дагъдай аранриз куьч хьун, жинсвилин рекьяй аялар фад чIехи хьун ва гъавурдик акатун, кьадардилай артух ван къвезвай гьар жуьредин информацияр-ибур научно-технический революциядин нетижаяр я.
Гьаниз килигна, аялар тербияламишунин рекье къачузвай гьар са къадам цIийиди, цIийи къайдайралди, амалралди, жуьрейралди тербия гудайди хьана кIанда. Им гьар са хизандин тербияда хьана кIанзавай важиблу кIвалах я.
Хизандин тербияда гзаф четинвилер гьамиша сад хьтинбур яз амукьзавач. Абур къвердавай дегиш жезва, артух жезвай тIалабунри чи вилик къвердавай цIийи месэлаяр эцигзава, къенин йикъа тербиядин кIвалах дикъетдивди артухарна кIанзава.
Гьелбетда, шегьердив гекъигайла, хуьрера и кIвалах гуьзчивилик кутаз регьят я. ГъвечIи хуьрера виридаз садаз сад чизва, диде-бубайрин вилик тахьайтIани, са бязи вахтара аял хуьруьнбурун вилик жезва, ам нинди ятIа чизва.
Малум тирвал, школада кIелзавай аялриз обществодикайни тIебиатдикай авай чирвилер гзаф зурба хьуниз килигна, кIелунин программаяр заланарнава. Иниз килигна, школада кIелунни четин хьанва. И четинвилериз килигна, са бязи диде-бубайри аялди анжах хъсандиз кIелрай лугьузва, амай кIвалин кIвалахар чпин хивез къачуз, чеб аялриз къурбандар ийиз, аял кIвалин кIвалахрикай азад ийизва. Ихьтин диде-бубайри цIийиз арадал къвезвай вичин веледдиз анжах зарар гузва. Аял тек са вичин къайгъуда жедай, анжах са вичиз кIан жедай, я вичихъ, я вичин хизандин, я цIийиз тешкилзавай хизандихъ гелкъвез тежедай явакьандиз элкъвезва. Ихьтин кIвалахдикай авай зарардикай диде-бубадиз хабар жезватIани, и кардиз тIимил фикир гузва.
Са бязибуру фикирзава: жуван акьул, фикир серфна ва нервияр эхиз жедайвал кьуна, аялдиз буюрмишдалди, адаз гьамиша къалуриз ва гуьзчивалдалди, вичи адахъай михьун, къаб чуьхуьн регьят я. Им чпи аялрихъай кIвалахар авун, чпин диде-бубавилин мажбурнама кьилиз акъудун яз гьисабзава.
Эхь, хизандин тербиядикай рахадайла, чи уьмуьрда кьиле физвай дегишвилерикай рахун тавуна жедач. Къе илим, техника ва яшайишдин шартIар тежедай кьван виликди фенва. Вири шартIар авай кьилдин кIвал, вири тадаракар алай стол, телефон, компьютер - ибур вири гила чи аялриз сифте лазим затIариз элкъвенва. Къе чна чи аялриз характеристика гайитIа, эхь, дугъриданни, аялар чпин яшариз килигайла, савадлу, акьуллу, карчияр, мурад кьилиз акъуддай, гзаф крарикай хабар авай, савадлубур хьанва. Кьилин кар ам туш, аял хабардар хьун, ам уьмуьрдин вири хилера иштиракдайди, уьмуьр, общество цIийикIа туькIуьриз алакьдайди хьунухь, жуван патахъай обществода са гьихьтин ятIани цIийивал тваз жедайди хьун-гьам чарасуз кIвалах я.
Муькуь патахъай килигайтIа, чи аялрин амай пай тум-кьил авачир информация аватIани, кардиз дериндай фикир тагудайбур яз чIехи жезва. Абуру чпиз къвезвай информация анжах винелай бушдаказ кьабулзава, дериндай аннамишна, веревирдер ийизвач. Чна аялдиз гзаф руьгьдин тIуьн гузва, амма ам адаз пара жедайдак фикир ийизвач. ГьакI хьайила, аялди вичиз хуш хьайи, кIвенкI алай хьтин чкаяр кьазва, амайбур ахъайзава.
Чун аялрал затIар-пек-партал, къаб-къажах ва амай кIвалин эменни хуьн патал алахъзава, анжах аялдин азад вахт-ваъ. Аялар са куьн ятIани герек авачир кIвалахрин таъсирдикай хуьз алахъзавач. Катзавай вахтунихъ гьамиша агакьар хъувуна кIанда. Адаз гьикI катзаватIа килигиз къерехдал акъвазна виже къведач.
Жуван диде-бубавилин везифаяр кьиле тухудайла, чIехибуру аял сад хьиз чIехи хьуниз фикир гана кIанда: акьулдизни, эдебдизни, бедендизни.
Эхь, гилан диде-буба чпиз дарвални гана аялрал хъсандаказ алукIиз алахъзава. Чпи са кепекни къазанмиш тавур аялди диде-бубадилай хъсандиз алукIзава, багьа телефонар, компьютерар къачузва. И рекьяй абур масадбурухъ галаз эвер тавур акъажунра жезва. ГъвечIи чIавуз дуланажагъдин шартIар кьадардилай артух тешкилай аялдин патай диде-бубадиз лап тIимил къайгъударвал хьайи вахтарни чаз чида.
ИкI, зурба къадамралди вилик физвай дуьньядай кьил акъудун, гьелбетда, четин я. Гьар са диде-буба мукъаят хьана кIанда. Эгер бушвал авуртIа, аялар чпин ихтиярда гьатда, ахпа абурун иесивал хъувун гзаф багьаз акъвазда. Эгер диде-бубадивай чпивай дуьньядин дегишвилерайни сирерай кьил акъудиз хьайитIа, абурувай чпин аялар уьмуьрдин шегьре рекьел тамамбур ва гьакъисагъ, халкьдин межлисдиз хийир гъидай гражданар яз акъудиз жеда.
-------------------------------------------------------------------------------------------

Ф.Абдурагьманова.
Дуьньяда тIвар-ван авай спортсмен Курамегьамед Курамегьамедов чи районда
И мукьвара чи райондин КIирийрин хуьруьз спортдин рекьяй зиреквал авай аялриз тешкилнавай юкьван общеоброзовательный школа-интернатдиз неинки чи республикада, гьакIни вири Россияда магьшур спортсмен, азаддиз кьуршахар кьунай вад сеферда Европадин ва кьве сеферда виридуьньядин чемпион хьайи К.Курамегьамедов мугьман хьана.
Ам райондиз атунихъ галаз алакъалу и мярекатдиз неинки чи райондин, гьакIни Сулейман-Стальский райондин спортивный школайрин борецар, Эмин хуьруьн ДСЮШ-дин директор, спортдин рекьяй СССР-дин мастер А.Мегьамедкеримов атанвай.
Школа-интернатда кьиле фейи и мярекатда К. Курамегьамедова вири иштиракчияр патал жегьил спортсменрихъ галаз азаддиз кьуршахар кьунай мастер-классдин тарс кьиле тухвана.
Лугьун лазим я хьи, спортдин рекьяй ихьтин мярекатар чи районда кьиле тухун твуна са кьадар йисар хьанвай. Алай йисуз ам тухунин кьилин себебрикай сад лагьайди, чи районда азаддиз кьуршахар кьунин кIвалах жезмай кьван вилик тухун, кьвед лагьайди, и рекьяй районда тешкилнавай секцийриз жезмай кьван жегьилар ва аялар желб авун, пуд лагьайдини, жегьил спортсменар, гьазурунин карда вердишвилер къачун патал цIийи къайдаяр тун.
Сифте мярекатдал ам тешкил авур райондин физкультурадинни ва спортдин отделдин начальник Р.Рамазанова алай вахтунда, чи республикадин Кеферпатан районрив азаддиз кьуршахар кьунай кIвенкIвечи чкаяр гвайди, и карда чи районни кьулухъ галамукь тавун патал жегьилриз кьуршахар кьунин карда арадал атанвай цIийи къайдаяр чир хьун лазим тирди лагьана.
Гуьгъуьнлай мярекатдал рахай К.Курамегьамедова сифтени-сифте районда аялриз дерин чирвилер къачудай ва гьакIни спортдал машгъул жедай ихьтин дарамат кардик кутунай райондин руководстводиз еке чухсагъул лагьана. Гьар са патахъай хъсан шартIар аваз тешкилнавай ихьтин чкада, аялри чпин чирвилер ва спортдин рекьяй дережа хкажун лазим тирди къейдна.
Вичин рахунрилай гуьгъуьниз гьа инал ада спортсменриз жуьреба-жуьре цIийи приемар къалурна, абур арадал гъидай къайдайрихъ галаз танишарна. КIватI хьанвайбур вири адаз ашкъидивди килигзавай ва дикъетдиви яб акалзавай.
Райондиз мугьман хьанвай зурба спортсменди кьиле тухузвай мастер-классдин мярекатда "Кьурагь район" муниципальный тешкилатдин кьил З.Азизова иштиракна. Ада мярекатдин эхирдай К.Курамегьамедоваз райондиз атунай, жегьил спортсменрихъ галаз тухвай кIвалахдай, Кьибле ва Кеферпатан Дагъустандин халкьарин арада дуствилин алакъаяр мягькемарунай вичин ва районэгьлийрин патай еке чухсагъул лагьана.
ГьакIни районда физкультура ва спорт вилик тухуз куьмек гунай, рикIел аламукьдай аманат яз райондин руководстводин ва вири районэгьлийрин патай Кубачида гьазурнавай гуьрчег тур багъишна.
-------------------------------------------------------------------------------------------------

Муниципальное образование "Курахский район" сообщает о реализации на аукционе следующего муниципального имущества

№ п/п Наименование объекта аукциона
1. Лот №1: Автомобиль ВАЗ-21214, регистрационный номер Е 705 ХВ 05 rus
Нач.цена, руб -16830.0
4. Шаг аукциона-5% от начальной цены, 841, 500 руб.
5. Прием заявок: с 07.11.2014 г. по 08.12.2014 г. 10.00 по адресу
6. Дата проведения аукциона: 08.12.2014 г. 10.00 по адресу заказчика:
с.Курах, ул.Назаралиева 1, Администрация МО "Курахский район".
Официальный сайт-www.mo-kurah.ru
--------------------------------------------------------------------------------------------------

Усарин юкьван школади 2008-йисуз Гьарунов Артур Омаровичан тIварунихъ ганвай 05 АА 0054540-нумрадин аттестат квахьнава. Ам ихтибарда амач.

--------------------------------------------------------------------------------------------------

Комментарии (0)

Нет комментариев. Ваш будет первым!