Газета №44

А.Рамазанова.
Республикадин делегация чи районда
7-октябрдиз чи райондиз кьиле РД-дин "Рекьерин гуьзчивал" ГКУ-дин руководитель Шамиль Алиев авай делегация атанвай. Делегациядик РД-дин рекьерин майишатдин ва транспортдин Агенстводин руководитель Шагьбан Мегьамедов, Кьиблепатан Дагъустанда РД-дин Кьилин полномочный векилдин заместитель Махач Алибеков, территориальный рекьер хуьдай ва ремонт ийидай отделдин начальник Гьажибек Гьажибеков, "Дагавтотранс"-дин къурулушдин отделенийрин руководителар, Дербент, Мегьарамдхуьруьн, Сулейман-Стальский районрин ДЭП-рин начальникар ва республикадин СМИ-дин векилар квай. Делегация атунин макьсад "Кьасумхуьр-Кьурагь" рекьиз къир цун, гьа рехъ рабочий къайдада аватIа килигун тир.
Къейд ийин хьи, Кьурагьиз кьван къир цун патал амай 4,5 км рекьиз къир цаз июлдин вацра "Югагропромстрой" ООО-дин рабочияр ва пешекарар башламишнава. 1-сентябрдалди куьтягьда лагьана хиве кьунвай. Амма эхиримжи 300 метр рехъ кьве патайни дамбодалди ва цларалди мягькемарна кIанзавай. Гьа и кардал алай вахтунда "Мостовик" ООО-дин пешекарар машгъул я. Къир цазвай рехъ ахтармишайдалай кьулухъ райадминистрацияда совещание хьана.
Совещанидал рахай Махач Алибекова къейд авурвал, РД-дин Кьилин Кьиблепатан Дагъустандин полномоченный векил Мусаэфенди Велимурадова Кьурагьрин райцентрдал кьван къир цунин кIвалахдикай информация гьар гьафтеда тIалабзавайди я.
Совещанидал рахайбуру авунвай кIвалах веревирд авурдалай кьулухъ гьар садаз тайин тир буйругъар гана, йисан эхирдалди къир цана куьтягьун тагькимарна.
"Кьурагь район" муниципальный тешкилатдин администрациядин кьилин везифаяр тамамарзавай М.Хариева райондин кьил З.Азизован ва гьакIни вичин патай атанвай делегациядиз чухсагъул лагьана.

--------------------------------------------------------------------------------------------

Нубатдин совещание хьана
12-октябрдиз райадминистрациядин актовый залда хьайи, райондин идарайрин руководителри гьафтеда авунвай кIвалахдин нетижаяр кьадай, совещание "Кьурагь район" муниципальный тешкилатдин кьил З.Азизован иштираквални аваз "Кьурагь район" муниципальный тешкилатдин администрациядин кьилин везифаяр тамамарзавай М.Хариева кьиле тухвана.
Райондин казенный ва бюджетный учрежденийрин централизованный бухгалтериядин кьилин бухгалтер Р.Асланова 13-октябрдилай цIивинар райондин вири школайриз ва ясли-бахчайриз хкидайди лагьана.
ЦРБ-дин кьилин духтур А.Азимова къейд авурвал, цIаяр хъувунин сезондиз гьазурвал акунва, мажибар, текущий налогар ганва.
Культурадин ва информациядинни печатдин центрдин начальник А.Будаева котельня куьтягьнавайди, 2 насосни счетчик кIанзамайди, райондин хуьрерин Культурайрин кIвалериз техпаспортар авуна кIанзавайди, Хванахвадин Йикъаз гьазурвал аквазвайди, баннерар хканвайди, электронный къул гьазур тахьун себеб яз, мажибар гуз тахьанвайди лагьана.
З.Азизова гьар са месэла веревирд ийиз, кимивилер арадай акъуддай рекьер къалурна.
--------------------------------------------------------------------------------------------

Райондин активдин заседание хьана
12-октябрдиз райадминистрациядин актовый залда райондин активдихъ галаз РД-дин Халкьдин Собранидин Председателдин заместитель Сейфуллагь Исакьован иштираквал аваз торжественный собрание кьиле фена.
Ана райадминистрациядин аппаратдин работникри, райондин идарайрин руководителри ва работникри иштиракна.
С.Исакьова республикадин Кьиблепатан хуьруьн майишатдин экономикадик чи районди лайихлу пай кутурди къейдна. 2014-йисуз аграрный хиле яшайишдинни экономикадин гьал хъсанарун патал серенжемар кьабулна.
С.Исакьова Дагъустан Республикадин Кьил Р.Абдулатипован, Правительстводин ва РД-дин Халкьдин Собранидин тIварунихъай 2014-йисуз райондихъ яшайишдинни экономикадин рекьяй дагълух районрин арада пуд лагьай чкадиз лайихлу хьунин гьакъиндай диплом вахкана ва ада гьакIни "Дагъустан Республикадин муниципальный тешкилатрин Совет" Ассоциациядин Правленидин Председателдин тIварунихъай «Кьурагь район» муниципальный тешкилатдин кьил З.Азизовавни "Кумухърин хуьр" муниципальный тешкилатдин кьил Р.Улубеговав чкадин самоупарвление вилик финин карда активныдаказ иштирак авунай Грамотаяр вахкана.
Активдин собранидал "Кумукрин хуьр" муниципальный тешкилатдин кьил Р.Улубековни КIирийрин юкьван школадин муаллим Къ.Къайибов рахана.
З.Азизова республикадин руководстводиз райондин зегьмет къейд авунай чухсагъул лагьана ва район вилик финин кар гьар са зегьметкешдин лайихлувал тирди къейдна. Гележегдани район вилик финин карда мадни чалишмишвал артухардайди лагьана.

--------------------------------------------------------------------------------------------

Постановление №56
от 12.10.2015 г.
Об установлении отопительного периода на территории Курахского района
В связи с неблагоприятными погодными условиями, с наступлением ранних холодов на территории МО "Курахский район" и в целях обеспечения соответствующего теплового режима в период отопительного сезона 2015 - 2016 годов в дошкольных образовательных учреждениях, школах, организациях и предприятиях района постановляю:

1. Установить отопительный период 2015-2016 г. на территории МО "Курахский район" с 15.10.2015 г. по 15.04.2016 год.
2. Рекомендовать главам сельских поселений, руководителям организаций и учреждений района издать на местах соответствующие нормативно-правовые акты в начале отопительного периода 2015-2016 годов.
3. Настоящее постановление опубликовать в районной газете "Горный родник".
Глава МО "Курахский район" Азизов З.З.
---------------------------------------------------------------------------------------------

М.Агьмедова.
Мярекатар
Муаллимрин югъ- шад гьалара
Жуьреба-жуьре суварар гзаф ава. Абурун арада лишанлубурукай сад яз гьар йисуз Муаллимрин югъни сувар хьиз къейд авун адет хьанва. И йикъуз чи республикада 50 агъзурдалай виниз муаллимри, кьилин ва юкьван махсус образованидин учрежденийрин преподавателри чпин пешекарвилин сувар къейдда. Кьурагьрин сад лагьай нумрадин юкьван школадани Муаллимдин Югъ шад гьалара кьиле фена. И Йикъаз талукьарнавай шад линейка сятдин 11-даз башламишна. Линейка и школадин директор Мисриев Гьамида ачухна. -Гьуьрметлу тир муаллимар, ихтияр це заз квез и сувар рикIин сидкьидай мубаракдай, - лагьана ада. - Дугъриданни, муаллимдин пак тIвар чи мецел вири уьмуьрда ала, адан камаллу насигьатри, ада гайи чирвилери ва тербияди чун уьмуьрдин тIалрай- хъутIалрай саламатдиз акъудзава. Къуй квехъ куь четин кIвалахда генани еке агалкьунар хьурай.
Муаллимриз и сувар гьакI 5,7,8-классрин аялри манийралди, гъвечIи сегьнейралди ва шииралди тебрикна.

---------------------------------------------------------------------------------------------

Начальник УСЗН
В МО "Курахский район" С.М.Джамалдинов.

Информация
для граждан, получающих ежемесячные денежные выплаты по оплате жилого помещения и коммунальных услуг

УСЗН в МО "Курахский район" информирует, что по состоянию на 15 октября 2015 г. в доставочные учреждения перечислены денежные средства на выплату ЕДВ по ЖКУ следующим категориям граждан:
-ветеранам труда за август-сентябрь месяцы 2015 года.
-реабилитированным лицам за сентябрь месяц 2015 года
-участникам ВОВ за сентябрь месяц 2015 года.
-многодетным семьям за июль-сентябрь 2015 года.
Другим гражданам, пользующимся льготами ЕДВ будут выплачиваться по мере поступления средств из Министерства труда и социального развития РД.

---------------------------------------------------------------------------------------------

Абдурашид Абдурагьманов,
Кьурагьрин хуьр.

Тарих
Кветер
Алимри кхьизвайвал, Гияр шегьер сасанидрин кьушунри чилихъ галаз сад авуна, тармарна. И гъвечIи шегьерда 10агъзур агьали яшамиш жезвай. Гиярвийри чпин хайи чил гадарнач. Абуру Гияр шегьер алай чкадилай са тIимил агъада, къадим заманайрин сурарал цIийи хуьр туькIуьрна ва Кьурагь лагьана тIвар эцигна. Кьурагьвал гзаф хьуниз килигна хуьрелни Кьурагь акьалтна.
1735-1740-йисара Надир шагьдин кьушунар Кьурагь дередиз сухулмиш хьана. Надир шагьди Кьурагь чукIурна ва халкь телеф авурла ана амукьайди, дагъдиз катна чуьнуьх хьайи, тек са Кветерин тухум тир. Абур хизанни галаз Элкъвей кьилера кIеви хьанвай. Абуру гъуьруькай кветер ийиз, ракъинал штIумариз нез хьана.
Иранлуйриз чеб авай чка чир жез кичIела цIай ишлемишзавачир. Элкъвей кьилерик абуру са кьадар вахт акъудна. Ина абурун кьейи аялрин сурарни ава.
Бицер кIамалай Хутадиз фидай рекье Кветен булах ава. Аквар гьаларай абуру ядни и булахдай тухузвай.
Сифте Кьурагьиз хтай тухум Кветер тир. Гуьгъуьнлай Кьурагьиз (Хъухъвазай, Сернегьрай, Юрхвалай, Хъихъен хуьрелай, Цуьцуьхуьрелай, ЧIурухуьрелай инсанар кIватI хъхьана).
Алатай асирра Кьурагьрин жемятдик маса миллетар акатна: яхулар, аварар, даргияр, табасаранар, урусар, гуржияр, агъулар.

Ирид хуьр са бине хъхьай,
Гьар са жуьре миллет авай,
Марфар къвадай, тек-бир цавай,
Гьахьтин чка тир Кьурагьар.

Дарги, авар, яхул, урус,
Гуржиярни хьана са мус.
Чпихъ авай лезги намус,
Гьахьтин чка тир Кьурагьар.

Надир шагь, адан кьушун аваррин Чах хуьре вири Дагъустандин миллетар сад хьана тармарна.

Надир шагьдиз-халкьдин манияр

Деред сиве карвансара,
ЦIай аватна кана эллер.
Ирандихъай атай гавур,
Пехъи я ви кицIин вилер.

Серкер, аман гьарай хьуй ваз,
Рехъ гумир девлер атана.
Къабанарин суьри чIехи,
Къаралмиш кьеркьер атана.

Яргъай чахъди атай къачагъ,
На ивидин вире чан гуй.
Ваз рехъ къалай а Зугьрабан,
Лацу бармак накьвада хьуй.

Члахъ Зугьраб эл маса гай,
Намус квачир арни-хараб.
Вун элкъвена а чархара,
Мус гьатдатIа кицI хьиз яраб.

Лезги, яхул, къарагъ виниз,
Дидейрин мам квез гьалал хьуй.
Вегьа кемен, галчIур душман,
Бес чаз ам вучтин завал хьуй.

Гияр шегьер кузавалда,
Къелед цлав ивид булах.
Гьар-гьар Надир атана гила,
Жуван падур шавлар хъутах.

Кьурагьа са шумуд ханди агъавал авуна: Шагьмардан, Сурхай хан, Асланбек, Аслан хан, Нуцал хан. И ханар сифтедай Юсупов Садудинан кIвалер алай чкадал къеледа яшамиш жезвай. И къеледихъ элкъвена кьакьан пару галай, къене пата гьамамар ва ахъа чкадал гьавизар авай. Ханари чпин вил алукьай дишегьлияр чпиз къачузвай.
Жуьмя юкъуз хан вичин папарни галаз файтунда аваз сердиз экъечIзавай. Эгер рекье инсан гьалтайтIа, юкь агъузна хандиз икрамиз, файтун алатдалди акъвазна кIанзавай. Абдурагьман бегди 1912-йисуз Кьурагьа аялриз тарсар гана. Гуьгъуьнлай ханари Чкъадал кIвалер эцигна, гьана яшамиш жезвай. 1839 - йисалай Гьарунбег, Юсуфбег, Абдурагьманбег хьана. Бикед дагъларихъ жегьилриз мехъерар авурла, гъайи свас сифте йифиз хандин патав физвай ва хандин кIвале пакамдалди амукьзавай.
Ахпа хквезвай вичин юлдашдин патав.
Рагьметлу Кветен Гьасан бубадин 95 йис яшар хьанвай. Садра ада заз ихьтин агьвалат ахъайна.
-Чпин чIехи буба Неби Элкъвей кьилерлай паб ва гадаяр: Шагьсенни Мегьамед галаз эвичIайдалай гуьгъуьниз са шумуд йисалай паб кечмиш хьана. ЧIехи буба Небиди ахпа мехъер хъувуна. Экв жедалди хандин нуькер атана,- ваз ханди вичин патав эверзава,-лагьана. Ам фейила ханди заз векъи гьарайна, эй, ахмакь, вуна вучиз свас зи патав ракъурнач? Ада адаз ихьтин жаваб гана: "Я хан, зун хьтин кесибди гъайи свас ви патав ракъуриз заз утанмиш хьана". Хандай кIевиз гьарай акъатна: "Аквадай гьаларай вун залай акьуллу я ман?" Ахпа нуьквериз эверна, адан кьве гъилни кап-капал эцигна кIевиз кутIуна, капариз масмардин мих яна са гьафтеда дустагъда туна. Ам са гьафтедилай ахъайна. КIвализ хтайла гъилер ахъайна. Гъилерай ирин авахьзавай ада гьа и зулумдик чан гана.
Небидин гада Шагьсеназ кьве эркек велед: Теймур ва ТIийиб хьана.Теймураз эркек веледар ТIавабил, Мажлум, Абумуслим хьана. Адан стха ТIийибаз веледар Неби, Исе, Билал, Хизри хьана.
Теймур ва ТIийиб къванцин устIарар тир. Абуру чпин хваярни галаз Кьасумхуьруьн еке муьгъ, Кьурагьа школа (къванцин корпус), больница, райондин образованидин отдел авай корпус, клуб, Кьурагьрин вацIал алай муьгъ, пекарня ва шумудни са касдиз кIвалер эцигна.
Алай вахтунда Кьурагьрин майдандал алай Гьажихсенрин кIвалер ТIийиба ва и кIвалерин къаншарда битIийриз (столовой алай чкадал) са шумуд мертебадин кьакьан кIвалер Теймура эцигна.
Небидин 2-лагьай гада Мегьамедаз веледар: Гьасан, Гьасе, Гьажи хьана. Гьасана Кьурагьа кьасабчивални ийизвай. Гьаседини Гьажиди чпелай алакьдай гьи кIвалах хьайитIани ийизвай.
Бубайрин вахтунда Кьурагьиз къанлуяр акъудзавайди тир, месэла: ЦIахъарар-ЦIудахъардай, даргийрин хуьряй. Ченедбур -АнкIулай, даргийрин хуьряй. ТIуьхшербур-лакрин тIуьхшердай, Къапучияр-лакрин хуьряй. ЦIахудбур ва Меликбур-Къазикумухдай яхулар-КIахар, Гьажидбур, ЧIанкIуяр, Келар - аваррин Гуниб райондин Чах хуьряй.
Мисридбур-Мудуяр -табасарандай, Къурбалияр-Кумухъай, Кьадидбур-Гьажикъурбанбур, Меликбур- Арабистандай-Поти шегьердай, Муьшкуьрар, Вагьидбур-Цилингай, Алимегьамедар, Назаралидбур, Шамхалаяр -Грузиядай (Аджарар, Абхазар), Салманбур-Питердай.
Дагъустандай Надир-шагь гатаз-гатаз рекье хтурдалай гуьгъуьниз, Кьурагь дереда авай хуьрер харапIайриз элкъвенвай (хуьрерин жемятар кьери хьанвай).

---------------------------------------------------------------------------------------------

А.Э.Эмирбеков,
Начальник ОНД и ПР по Курахскому району

Внимание!
НПО "ЗДРАВООХРАНЕНИЕ-2015"

В Соответствии с планом основных мероприятий УНД и ПР ГУ МЧС РФ по РД на 2015 год и в целях профилактики и укрепления противопожарной защиты объектов здравоохранения.
В период с 15 сентября по 31 октябрь 2015 года на обслуживаемой территории Магарамкентского района проводится надзорно- профилактическая операция "Здравоохранение-2015".
Целью проведения операции "Здравоохранение" является повышение уровня противопожарной защиты на объектах здравоохранения, уделяется особое внимание объектам с круглосуточным пребыванием людей, а также усилению роли и эффективности деятельности органов местного самоуправления по профилактике пожаров. С этой целью на обслуживающей территории Курахского района, проводятся плановые и внеплановые мероприятия по надзору в соответствии с Федеральным законом от 26.12.2008 года № 294-ФЗ "О защите прав юридических лиц и индивидуальных предпринимателей при осуществлении государственного контроля (надзора) и муниципального контроля".
Учитывая, что значительная часть людей, находящихся в лечебных учреждениях не способна самостоятельно, в случае пожара, покинуть горящее здание, вопросы противопожарной безопасности этих учреждений имеют большое значение. Ответственность за противопожарное состояние в лечебных учреждениях возлагается на руководителей, а также на назначенных его приказом ответственных лиц.
В ходе проверок особое внимание уделяется:
-Соответствию путей эвакуации требованиям пожарной безопасности;
-Наличию и состоянию первичных средств пожаротушения, автоматических систем противопожарной защиты, электрических сетей и оборудования, огнезащитной пропитки горючих конструкций;
-Обеспечению условий для беспрепятственного подъезда и установки техники и состоянию наружного противопожарного водоснабжения.
Анализ пожаров в лечебных учреждениях показывает, что причинами их возникновения является:
-Неумелое использование электронагревательных приборов;
-Использование электронагревательных приборов кустарного производства;
-Неисправная электропроводка.
Если все же потребуется помощь, оперативно звоните в "Службу 01":
по номеру с мобильного телефона, звонок бесплатный (даж6е при отрицательном балансе)
ПОЛЬЗОВАТЕЛЯМ: компаний "Мегафон" и "МТС" набирать номер-010,
Компании "БиЛайн" набирать номер 001!

---------------------------------------------------------------------------------------------

П.Магьарамова.
Субботник кьиле тухвана
3-октябрдиз михьивилин вацран сергьятраваз санитариядинни эпидемиологиядин къайдайрал амал авун ва михьивал хуьн патал райондин идарайра ва вири хуьрера субботникар кьиле тухвана.
И юкъуз кьиле тухвай субботникда райондин вири карханайрин, организацийрин работникри, хуьрерин агьалийри иштиракна. Куьчеяр зирзибилдикай михьи авунин кIвалахрик райондин 3 агъзурдалай виниз агьалийри чпин пай кутуна.
Абуру гьар са идарадин къенер ва къецел патар, куьчеяр, рекьин къерехар, чиркин чкаяр зирзибилдикай михьна.
КIватIай зирзибилдиз, куз жедай шейэриз цIаяр яна, амай зирзибил, зирзибилар гадариз кьилди чара авунвай чкадиз тухвана гадарна.
Михьивилин кIвалахар къайдадик квайвал кьиле тухун патал "Кьурагь район" муниципальный тешкилатдин администрациядин кьилин заместитель Эльмира Исаевади гуьзчивал тухвана.
Михьивал сада авуналди жедач, михьивал вирида авуна кIанда. Ша, чна чи уьмуьрдин чешмеяр-гьава, яд, чил-михьиз хуьник гьар сада вичин пай кутан.

---------------------------------------------------------------------------------------------

Атлухан Рагьимханов
Сусариз
Хва хьайила жеда хвеши,
Еке хьайла жеда къунши.
Руш хьайила жеда серин,
ЧIехи хьайла жеда ширин.

Свас гъидайла хциз жуван,
Экъвез жеда сусахъ хъсан.
Беден иер, вични кьакьан,
КIелни авур вичи хъсан.

Авуна хьиз еке харжар,
КIватI авуна вири дустар.
ТуькIуьрна хьиз еке кIвалер,
Сунтунай акъудна къванер.

Тахьун патал векъи ванер,
Машини къачуда мегер.
Юкь какур яз, рехи цIвелер,
Къариди ийиз хьана кьуьлер.

Са йисалай жеда чара,
Шегьерда кIвал кьада багьа.
Къариди ракъурда пулар,
Сусани ийида харжар.

Са вахт фидач арадай икI,
Къаридин къарсазвай рикI.
Мад гуда къаридиз хабар,
Хьанавайди еке буржар.

Чара жедач, чIугваз фикир,
Амукьда гьакI къари факъир.
Хгана хьиз кIвалевай кал
Гьар са нямет жезвай сал.

Пул ракъурна сусаз вири,
Са манатни тушиз кими.
Талукь касдал агакьарна,
Вичин рикIни аладарна.

Суса ийиз еке харжи,
Партал къачуз кIанда вичиз.
КIватIна вичин мукьва-кьили
Харжар ийиз хьана куьллуь.

Йисни жедач, жеда чара,
Итимдин атIуда чара.
Аялни икI жеда етим,
Сусаз кIан жеда маса итим.

Сифте чIур хьайи кIвалах,
Свас тира мад къати чахмах.
Гада хтун жеда хуьруьз,
Вич дидеди хайи кIвализ.

Инсаф ая азиз сусар!
Квез язух ша куь къарияр.
Регьимлу хьухь, ая гьуьрмет!
Яшлу касдиз це тIун къимет.

Акьван хура твамир абур,
Са тIимил кьван хуьха сабур.
Куьни жеда чIехи яшар,
Куьн къарийриз жеда ухшар.

Эй инсанар! Це тIун фикир,
Свас гъидайла тади мийир.
Мад са гаф за лугьун инал,
Куьне кьамир сусар кьамал.
---------------------------------------------------------------------------------------------

Утерянный аттестат о среднем полном образовании за № 05 БВ 00 39120, выданный в 2011 году Курахской СОШ №1 Курахского района на имя Рамазановой Найили Исламовны, считать недействительным.

---------------------------------------------------------------------------------------------

Райондин администрациядин работникри Исаева Эльмирадиз эмедин хва ЖАМАЛДИН рагьметдиз финихъ галаз алакъалу яз, дериндай хажалат чIугунивди, башсагълугъвал гузва.

--------------------------------------------------------------------------------------------

Райондин Культурадинни информациядин ва печатдин работникри Исаева Эльмирадиз эмедин хва ЖАМАЛДИН рагьметдиз финихъ галаз алакъалу яз, дериндай хажалат чIугунивди, башсагълугъвал гузва.

--------------------------------------------------------------------------------------------

Райондин Культурадинни информациядин ва печатдин работникри Уьрдиханова Диларадиз играми стха ЖАМАЛДИН рагьметдиз финихъ галаз алакъалу яз, дериндай хажалат чIугунивди, башсагълугъвал гузва.
---------------------------------------------------------------------------------------------

 

Комментарии (0)

Нет комментариев. Ваш будет первым!