Газета №43

Гьафтедин нетижаяр кьуна
13-октябрдиз райадминистрациядин актовый залда райондин руководителри гьафтеда авунвай кIвалахдин нетижаяр кьадай совещание хьана. Совещанида "Кьурагь район" муниципальный тешкилатдин кьил З.Азизова, райондин идарайрин руководителри иштиракна. Совещание "Кьурагь район" муниципальный тешкилатдин администрациядин кьил С.Гьамидова кьиле тухвана.
С.Гьамидова алатай гьафтеда Дербентда приоритетный проектрин гьакъиндай муниципальный тешкилатдин кьилерихъ галаз совещание хьайиди, абуру анал авур кIвалахдин гьакъиндай гьахъ-гьисаб авурди, дагълух районрикай чи район 3-чкадал алайди, 741 агъзур манатдин кьадарда аваз пулдин пишкеш гайиди лагьана.
Гуьгъуьнлай ада са жерге руководителривай гьафтеда авунвай кIвалахдикай информация гун тIалабна.
Райадминистрациядин хуьруьн майишатдин чилеринни ва ихтияррин алакъайрин отделдин начальник С.Селимова лагьайвал, хсуси майишатрин лапагар перегонда рекье ава, муькуь майишатрин лапагар гьеле чкайрал алама, 160 гектардин майданра зулун магьсулар кутунва.
ЦРБ-дин кьилин духтур А.Акимова диспансеризациядин кIвалах йигиндаказ тухузвайди гьафтеда 2 сеферда хуьрериз физвайди, аранда авай агьалияр диспансеризация авунвайди, Хпежрин, Гелхенрин дереда авайбур диспансеризациядиз текъвезвайди, 14-октябрдилай гьар юкъуз хуьрериз физ, кIвалера диспансеризация ийидайди, ЦРБ-диз сентябрдин вацран мажибар ганвайди, перифериядин августдин вацран мажибдин бурж кумайди лагьана.
Образованидин управленидин начальник Р.Катибова къейд авурвал, цIаяр хъийидай сезондиз гьазурвал аквазва, 12-октябрдиз урус чIалай, технологиядай, историядай олимпиада тухвана, ДЮСШ-дин аялри Дербентда волейболдай кьиле фейи акъажунра 4-чка, Хивда кьиле фейи кьуршахар кьунай акъажунра 1-чка кьуна.
Совещанидал гьакI УСЗН-дин начальник С.Жамалдинов, финансрин управленидин начальник Б.Ибрагьимов, ветеринарный управленидин пешекар М.Сефералиев рахана.
С.Гьамидова гьар са месэла веревирд авуна, авай кимивилер къалурна ва абур арадай акъудун тагькимарна.

--------------------------------------------------------------------------------------------------

Райадминистрацияда
Санал тир заседанидал
14-октябрдиз райадминистрациядин актовый залда "Кьурагь район" муниципальный тешкилатдин администрациядин, райондин депутатрин Собранидин депутатрин санал тир заседание хьана.
Заседанида "Кьурагь район" муниципальный тешкилатдин администрациядин аппаратдин работникри, депутатрин Собранидин депутатри, хуьрерин администрацийрин кьилери, организацийрин, учрежденийрин хуьруьн майишатдин руководителри, ветеранринни агъсакъалрин Советдин председателди, "Кьурагь район" муниципальный тешкилатдин кьил З.Азизова иштиракна.
Заседание "Кьурагь район" муниципальный тешкилатдин администрациядин кьил С.Гьамидова кьиле тухвана.
Анал вад месэладиз килигна:
1. "Кьурагь райондин учрежденияр, организацияр, агьалияр стабильный ва ери авай электроэнергиядалди таъминарунин гьал хъсанарунин патахъай кьабулзавай серенжемрин гьакъиндай".
2. "Сельсовет Шимихюрский" муниципальный тешкилатдин социально-экономический рекьяй вилик тухунин карда хуьруьн администрациядин кьили авунвай кIвалахдин гьакъиндай".
3. "2014-йисан 23-сентябрдиз 2014- йисуз Кьурагь районрин консолидированный бюджетдиз къвезвай налогдин къазанжидин ва налог кIватI авунин кIвалах хкаж авунин рекьяй кьабулзавай серенжемрин гьакъиндай".
"Кьурагь район" муниципальный тешкилатдин администрациядин кьилин 97-нумрадихъ акъуднавай къарар кьиле тухунин гьалдин гьакъиндай".
4. "Кьурагь район" муниципальный тешкилатдин Уставда дегишвилер ва алававилер хтунин гьакъиндай".
5. "Кьурагь район" муниципальный тешкилатдин жува-жув идара ийидай органрин муниципальный къуллугъдал ва муниципальный къуллугъдал алайбуруз гьукуматдин пенсиядал гьар вацра алава хъийизвай выплата ва къалурнавай къайдадин Положение тестикьарунин гьакъиндай".
Сад ва кьвед лагьай месэладай райадминистрациядин эменидин алакъайрин ва экономикадин начальник И.Муслимов рахана.
Пуд лагьай месэладай С.Гьамидова информация гана.
Кьуд лагьай месэладихъ галаз депутатар райадминистрациядин хуьруьн майишатдин чилеринни ихтияррин алакъайрин отделдин начальник С.Селимова танишарна.
Вад лагьай месэладайни С.Селимов рахана.
Гьар са месэладай З.Азизова кIвалахда авай кимивелерал акъвазна ва авай кимивилер арадай акъуддай рекьер къалурна.
Анал къарагъарай месэлайрай депутатри сесер гуналди Уставда дегишвилер тунин месэла ва муниципальный къуллугъчидин пенсиядал гьар вацра къвезвай выплтайрин Положение разивилелди кьабулна.
Заседанидал алай месэлайрай тайин тир къарар кьабулна.
-------------------------------------------------------------------------------------------

Штул Сабир Эфендиев.
Шаирдин 90 йисан юбилейдиз талукь яз
Эхь, чилин винел девирар гзаф хьана. Советрин гьукумат. Советрин девирдин чахъ хьайиди я эхир! Советрин Ватан. Советрин меденият. Советрин литература.
Чахъ, дагъви халкьарихъни-дагъустандин литература,ЧIехи Октябрдин бала, дагъви халкьарин тарихда цIийи эра ачухар авур, революцияда арадиз атай Советрин Союз. Адан экономикади ва культуради зурба ва баркаллу рехъ тухвана, инсаният экуь ва шад уьмуьрдин сагьибар авуна, яратмишунрин къуватар вилик тухунин карда руьгьдин къуватри цуьк акъуддай мумкинвилер арадиз гъана. Чи республикадани, тарихда садрани тахьай хьтин, яратмишунрин интелегенция арадиз атана. Уьмуьр йигиндиз вилик физвай и девирда лезгийрин литературани адан жуьреба-жуьре хилера виниз тир ашкара агалкьунрив агакьна. Чахъ, лезгийрихъни, къенин юкъуз девлетлу, гужлу, милли литература хьанва.
Винидихъ чна лагьай хьтин милли лезги литература арадиз атунин карда чпин лайихлу пай кутурбурукай сад Эфендиев Мегьамедсалигь Магьмудович я. Ам 1924 лагьай йисуз Кьурагь райондин Штул хуьре хана. Кьуд лагьай классдал кьван ада хайи хуьре, ахпа Бакуда школайра кIелна. Эвелдай Буйнакскдин ва Дербентдин педучилищеяр, гуьгъуьнлай Дагъустандин гьукуматдин университет акьалтIарай ада саки вичин яшда, 55 йисуз галатун тийижиз, Кьурагь ва Дербент районра муаллимвал авуна. Гьа са вахтунда ада лезги литературадикни вичин пай кутуна.
Мегьамедсалигь Эфендиеван шиирар республикадин, райондин газетриз ва журналриз акъатна. Адан шиирар гьа вахтара гьакI школаяр патал туькIуьрнавай хрестоматийрани гьатнава. Мегьамедсалигь Эфендиева вичин шаирвилин рехъ гьеле школада кIелзавай вахтарилай башламишна. Адахъ азербайжан чIалал кхьей шиирарни ава, абур гьеле Бакуда школада кIелзавай вахтара газетриз чапна, бязи шиирар Н. Гребнева, Я. Козловскийди, Безымянскийди ва масабуру урус чIалаз таржумаяр авуна, "Жегьил Дагъустан", "Дагъустандин шаирри комсомолдиз" тIварар алай жегьил шаиррин кIваталризни акъатнай.
М-С. Эфендиев 1947- йисан 26- июлдиз Махачкъалада кьиле фейи Виридагъустандин писателрин совещанидин, 1949 лагьай йисан 4-июндиз тухвай Дагъустандин писателрин отчетно-выборный собранидин ва маса мярекатрин иштиракчини тир. Ам гьа чIавара вилик жергейра хьайи чеб шаирар ва писателар тир Р. Гьамзатовахъ, А. Муталибовахъ, Ш. Къафлановахъ, Ш-Э. Мурадовахъ, З. Эфендиевахъ ва масабурухъ галаз са жергера авай.
Дагъустандин жегьил писателрин совещанидиз талукьарнавай 1947- йисан 25- июндин "Дагъустандин правда" газетда чапнавай обком ВЛКСМ-дин секретарь А. Эфендиеван, гьа и нумрадин "Жегьил Дагъустандин литература" кьил ганвай С. Малыгинан ва 1950-йисан 12-апрелдин литературадиз талукьарнавай чина чапнавай Камиль Султанован "Жегьил писателрин яратмишунар" кьил ганвай статьяйра икI кхьенва: "…Произведенияр анжах гьа и мукьвара печатдиз акъатиз башламишнаватIани, абуру кIелзавайбурун фикир чпел желбнава.
Абур Расул Гамзатов, Ибрагьим Керимов, Абдурагьман Хамамов, Мирза Мегьамедов, Жамалутдин Алижанов, Мегьамедсалигь Эфендиев я…" "…Чи республикадин общественностди лезгийрин кхьинар арадиз атана 20 йис тамам хьун къейдзавайла, чнани квехъ галаз Виридагъустандин жегьил писателрин совещанида иштиракзава. Абурун арада чпихъ бажарагъ авай лезги халкьдин векилрини ина иштиракзава. Абур Шагьэмир Мурадов, Жамалутдин Алижанов, Мухтар Рамазанов ва Кьурагь райондай тир Мегьамедсалигь Эфендиев ва масабур я…".
"…Дагъустандин жегьил писателри чпин виридалайни хъсан эсерар социалист ватандиз, баркаллу большевикрин партиядиз ва адан чIехи регьберриз-Лениназни Сталиназ бахшзава.
Лезгийрин шаир-комсомолец Мегьамедсалигь Эфендиева регьбер Сталинакай вичин фикирар яз икI кхьизва:
Над Родиной зажег ты свет,
Ты нас ведешь путем побед.
Для нас людей любимей нет.
Чем ты, великий Сталин!

Ты нас от черной доли спас,
Полон счастья каждый час.
Ты позаботился о нас.
Ты сделал жизнь счастливей, Сталин!

Мы к коммунизму держим путь
Ни бой, ни гром, ни ветер в грудь
Нас не заставят повернуть-
Тому порукой, Сталин.

И в годы битвы грозовой
Со словом Сталин шли мы в бой,
И мы на подвиг трудовой
Идем со словом Сталин.

…Жегьил шаирар тир Ш.Къафланова, М-С.Эфендиева,…Р.Рашидова,..чпин эсерар советрин халкьарин яратмишунрин зегьмет къалурун патал кхьизва…"
Мегьамедсалигь Эфендиеван эсерар иллаки Кьурагь райондин "ЦIийи уьмуьр" (гуьгъуьнай ва исятда ам "Дагъдин булах" тIвар алаз акъатзава) газетдиз акъатна. "ЦIийи уьмуьр" газетда "Чумахъ гвай Магьмуд" тIвар алай рубрика кардик кутурди ва адан регьбер хьайидини, гьа чIавара вичикай РК ВЛКСМ-дин школайрин ва пионеррин отделдин заведующий хьайи М-С.Эфендиев я.
Зи вилик дяведин йисара акъатнавай Кьурагь райондин "ЦIийи уьмуьр" тIвар алай са шумуд газет ква. Абурукай сада, №19 (925), "Жегьил шаиррин сесер" макъалада кхьенва: "…Чи жегьил шаирри чпин лап хъсан чIалар…Красный Армиядикай, зегьметдин ва дяведин игитрикай туькIуьрзава. Жегьил шаиррикай Эфендиев Мегьамедсалигьахъ лап хъсан устадвал ва бажарагъ ава. Мегьамедсалигьа Ватандин ЧIехи дяведин йисара вичин шиирралди халкьдиз фронт патал, гъалибвал патал женгиниз эвер гана. Адан "Красный Армия", "ЧIехи Сталиназ", "Чи Игитриз" шиирар пара мана квайбур я…".
М-С.Эфендиеван дяведин вахтарин яратмишунрай чаз чи халкьдихъ авай гужлу руьгь, адан патай душмандиз авай нифрет, душман кукIварун патал халкьдихъ авай къаст, са рахунни алачиз душмандин винел гъалибвал къачудайдахъ, ислягь пакадин йикъахъ халкьдихъ авай инанмишвал, уьлкведин регьберрихъ политикадин жигьетдай авай мягькемвал аквазва. Гьеле 1942-йисан ноябрдиз "ЦIийи уьмуьр" газетдиз акъатай Мегьамедсалигь Эфендиеван са шиирдин тIвар "Чун гъалиб жеда" яз хьунни чавай дуьшуьшдин кар я лугьуз жедач. Ада кхьизва:
Эй, азиз тир гуьзел Ватан,
Вал душмандин гъил атана,
Игит халкьди эцигда чан,
Рахкурда ам кьил атIана.

Гитлеран фашистрихъ галаз женг тухузвай чун тек туширди, чахъ мадни дустар авайди лугьузва.
Чун тек туш, мад ава дустар,
Вирибурун сад тир къастар,
Алчах Гитлер авун кукIвар,
Гьам виридан мурад хьана.

"Игит Красный Армиядиз" шиирда чи армиядин гужлувал къалурзава, ам "гьулдандив" гекъигзава. Адахъ "асландин рикI, асландин чин" ава.
Яратмишрай вун, армия, гьулдандин,
Фашистриз зерре мажал тагузвай.
Дяве ийиз тарихра тахьай хьтин,
Чир хьанач ваз я залан, я четин,
Вахъ ава асландин рикI, асландин чин,
Душманд винел йигиндиз физвай.

Душмандал гъалибвилер къазанмишзавай армиядин далудихъ адаз вафалу халкь галайди лугьузва.
Далу пата кIвалахзава датIана,
Ви къуват хуьз я югъ, я йиф талгьана.

Вири инсаниятдин, дуьньядин душман тир Гитлер "пехъи гявурдив" гекъигзава, хлкьдиз ам виляй аватнавайди, "лап беябур хьанвайди" лугьузва.
Гитлер лугьудай пехъи гявур,
Хьанва ам лап беябур.

Мегьамедсалигь Эфендиеван дяведин вахтарин са жерге шиирра фронтдин далу пата зегьмет чIугвазвай халкьдин баркаллувилерикайни раханва, душман кукIварунин карда генани зегьмет чIугун патал адаз эвер гузва. М-С.Эфендиева дяведилай гуьгъуьниз "Чун гъалиб хьана" тIвар алай поэма кхьейдини малум я.
ЦIийи сиясатдин лепедин хураваз лезги шииратдиз атай М-С. Эфендиевани вичин эсерар ислягьвиликай, къагьриманвиликай, халкьарин дуствиликай, муьгьуьббатдикай кхьена. Адахъ гьакI сатирадин ва юмордин эсерарни ава. М-С. Эфендиеван сатира уьмуьрдихъ галаз сих алакъада ава. Шаирди вичин "Эх тежедай тIал", "Мукьувай таквадайди", "Заз ихтияр авазва", "Ялтах", "Жанавуррин хажалат", "Легковой автомобилдин иесидин мани", "Тахьай лекция" ва маса шиирра ялтахвал, фитнекарвал инкарзава, девирдин законрилай къецез кам къачузвай ксарин вилик пад кьуниз, ахьтин ксар такIан хьуниз эвер гузва, инсандин нефсинин къанихвал негьзава:
…Са пуд кило картуфар за ргана,
Чикьиз-чикьиз туна вири руфуна.
Кило чIемиз яхцIур кака ичIирна,
Кас галачиз гьам вири за шуьткьуьрна.
Кьве буханка фу куьткьуьнна шурвадиз,
Кар кьуна за къажгъандавай дулмадиз…

(Эх тежедай тIал).

…Колхозчийри вирида
Хъсан зегьмет чIугвазва.
ТIимил хьун квез лапагар
Вуж тахсир яз аквазва?...

Таквазвайди векилдиз
Вучиз ятIа са кар тир.
Гьар недайла суфрадал
Къвезвайбур куьк якIар тир.
(Мукьувай таквадайди")

Ни лугьуда "чIехибуруз"
Кеф чIугвадай пул ава?
ТахьайтIани пул абуруз,
Ялтах ксар бул ава.

Ингье гьахьтин сад вилик
Акъатна зи харал хьиз.
Кьве чанта ква са гъилик,
Пар чIугвазвай гьамбал хьиз…

("Ялтах")

…-Колхоздин идарада
Гзаф шел-хвал ийизвай,
ТIуьна лугьуз лапагар
Чалай актар кхьизвай…

-Дуьз лагьайтIа, а фендер
Фадлай чизвай тир зазни.
Алахънавай а Элдер
Беябуриз чун шазни.

Са сефер туш абуру
Тахсирар чал ярхариз.
И чуьллера гьахъ амач.
Фена кIанда яргъариз!

("Жанавуррин хажалат")

ГАИ-давай инспектор зи таниш я,
Зи хесетрихъ галаз гьамни вердиш я.
Гьалтай сефер за адаз икI лугьузва:
"Литр коньяк ваз зи патай багъиш я".
Вад манатар, цIуд манатар гъилиз ша!
Пул гзаф гвай пассажирар иниз ша!

("Легковой автомобилдин иесидин мани")
Вахтар къвез алатзава. Дуьньядал несилар, гьукуматар дегиш жезва. Амма чна чи ирс квадарна кIандач. Чи арадай акъатай баркаллу яратмишдай ксарив чун еке гьуьрметдивди эгечIна кIанда. Абур чеб яшамиш хьайи девиррилай, яратмишунрин тематикайрилай аслу тушиз, чна абур гьамиша чи векилар яз гьисаба кьуна кIанда. Ша чна чи эдебият кIватI хъувунин кардик гьар сада жуван лайихлу пай кутан.
Шаир 1996-йисуз кечмиш хьана. ЦIинин йисуз адан 90 йис тамам жедай.

 -------------------------------------------------------------------------------------------------

А.Семедов.
Школайрай хабарар
Шад гьалара къейд авуна
Муаллим! И гафарихъ кьетIен метлеб авайди садазни сир туш. Акьалтзавай несил тербияламишунин ва несилдин чирвилерин дережа хкажунин карда муаллимдин зегьметдиз лайихлу къимет гун са акьван регьят кар туш.
3-октябрдиз Кьурагьрин сад лагьай нумрадин юкьван школада Муаллимдин Йикъаз талукь яз шадвилин мярекат кьиле фена. Йикъан сятдин 11-даз школадин кьилин корпусдин кьвед лагьай мертебадин фойеда вири аялар шадвилин линейкадал акъвазна. Мярекат школадин старший пионервожатый Къазиева Шафигади ачухна ва кIватI хьанвайбуруз и югъ мубарак авун патал гаф школадин директор Мисриев Гьамидаз гана.
-Гьуьрметлу муаллимар, гьуьрметлу аялар,-лагьана Гь.Мисриева,-гьар йисуз чна чи школада чи пак сувар, Муллимдин Югъ, къейд ийизва. Чаз, инал кIватI хьанвай вири юлдашриз, малум тирвал, чи школа вичин баркаллу краралди неинки чи Дагъустанда, гьакI Дагъустандилай къеце патани машгьур хьанва. Чи школа акьалтIарай жегьилри чпин чирвилер чи Ватандин жуьреба-жуьре пипIера тIвар-ван авай кьилин учебный заведенийра давамар хъувуна, гуьгъуьнлай абурун тIварар михьиз алемдиз раиж хьана. Бес вучиз чна ихьтин рухвайрални рушарал дамах ийидач? Бес абуру сифте чирвилер гьа и чи багъри школада къачуначни ва абуруз сифте чирвилер гьа и чи муаллимри ганачни?
Зун а кардахъ инанмиш я хьи, гьуьрметлу аялар, куьне абурун кар давамар хъийида ва абурун жергеяр къалинар хъийида.
Вишни кьве йисан идалай вилик давамар хъувуна вичин рахунар Гь.Мисриева,-чи школади тарихдиз кам вегьена. 1912-йисуз кьве классдикай ибрат тир хсуси кIвале ачухай школа къе къенин девирдин истемишунрив кьадай шартIар яратмишнавай макандиз элкъвенва. Саки вири класс-кабинетар компьютерный техникадалди тадаракламишнавай. Абурукай аялри тамамвилелди менфят къачузва. Чпихъ хъсан чирвилер авай яхцIурдалай виниз муаллимар аялрин къуллугъда акъвазнава.
Жуьреба-жуьре йисара чи школадиз Ибрагьим Алиевича, Мегьамедэмин Абдулнатифовича, Гьалимат Жалаловнади, Иса Муталибовича (рагьмет хьуй чпиз), Муртазали Абдулнатифовича руководство гана. Къе чна еке гьуьрметдивди абурун тIварар рикIел хкизва ва абуруз кьил агъузна икрам ийизва.
Жуван са куьруь рахунра чи школада зегьмет чIугур ва чпи гьакъикъатда акьалтзавай несил патал чпин вири къуватар желб авур вири муаллимрин ахлакьдикай лугьуз хьун мумкин кар туш. Амма са бязи муаллимрин тIварар такьун заз кутуг тавур кар яз аквазва. Назаралиева Жарият, Назаралиев Къагьид, Гьамидова Каинат, Рамазанов Шафи, Фейзуллаев Буба ва хейлин маса муаллимар акьалтзавай несил патал экв гудай чирагъар хьана. Чна абурун баркаллу зегьметдал дамах авун лазим я.
За квез, гьакI чи школада зегьмет чIугур ва чпи алай вахтунда лайихлудаказ ял язавай вири муаллимриз и шад суварин югъ мубарак ийизва.
Гуьгъуьнлай хейлин классрин аялри школадин уьмуьрдиз талукь яз туькIуьрнавай жуьреба-жуьре гъвечIи-гъвечIи сегьнеяр къалурна. КIватI хьанвайбуру абур яргъалди капар ягъуналди тебрикна. Иллаки школадин художественный самодеятельностдин коллективди тамамарай "Лезгинка" кьуьл мярекатдин иштиракчийриз гзаф бегенмиш хьана. Инал гьакI кьуьл авунин карда вичин устадвал къалурай 6-классдин ученик Къазиев Баламирзедизни кIватI хьанвайбурун патай хуш майилар амукьна.
----------------------------------------------------------------------------------------------

З.Саидова.
Спорт
Стрельбадай чемпионат
И йикъара сад лагьай сефер яз Кьиблепатан Дагъустандин тарихда Россиядин МВД-дин штабрин подразделенияр арадал атанвай юкъуз, райондин Гьенек дереда стендовой (олимпийская дисциплина) ва высокоточный (охотничье - прикладная дисциплина) стрельбайрай ачух тир чемпионат кьиле фена.
И чемпионатда Къаякент, Дербент, Магьарамкент, Сулейман-Стальский, Кьурагь районрай ва Махачкъала, Каспийск шегьеррай вишелай виниз лап хъсан стрелокри ва гъуьрчехъанри (охотовод) иштиракна.
И мярекатдин кьилин макьсад жегьилриз ватанпересвилин тербия гун, хъсан стрелокар винел акъудун, Дагъустан Республикада лишанар кьунин спорт гегьенш хьун тир.
Чемпионатдин спонсор Дагъустан Республикадин наркоконтролдин работник хьайи, алай вахтунда ФМС-дин начальник яз кIвалахзавай Исаев Денис Гьасанович тир.
Чемпионатдиз призовой фондунай 170 агъзур манатдилай виниз пул чара авунвай.
И акъажунра стендовой стрельбадай 1-чка райондин администрациядин ГО ва ЧС-дин начальник Мамедов Альбертаз, 2-чка Кьурагьрин хуьруьн агьали Гьашумов Замираз ва 3-чка Аладашрин хуьруьн агьали Манучев Къазимегьамедаз хьана.
Высокоточный стрельбадай 1-чка райондин БТИ-дин отделдин начальник Мисриев Фаридаз, 2-чка "сельсовет Курахский" МО -дин работник Мамедов Шакираз, 3-чка Россиядин Федерациядин МВД-дин Кьурагь районда авай отделдин работник Къазимегьамедов Арсеназ хьана.
ИкI, кьиле фейи акъажунра судейский коллегиядин къарардалди 1-чкаяр кьурбуруз 15 агъзур манат, 2-чкаяр кьурбуруз 10 агъзур манат ва 3-чкаяр кьурбуруз 5 агъзур манат пулдин пишкешар, пневматикадин винтовкаяр, патрумдашар ва туристрин палаткаяр гана. Оргкомитетдин къарардалди виридалайни жегьил стрелок Абдуллаев Исламаз образованидин управленидин начальникдин заместитель Мусаев Надираз школайра кIелзавай аялрин арада ихьтин акъажунар кьиле тухурай лагьана пневматикадин винтовкаяр багъишна.
Паталай атай вири спортсменризни пулдин пишкешар гана.
Чемпионатдин нетижада оргкомитетдин къарар кьабулуналди, Исаев Денисан чIехи буба, Ватандин ЧIехи дяведин иштиракчи ва яргъал йисара Кьурагь райондин ДОСААФ-дин руководитель яз кIвалахай Исаев Мегьамеднабидин руьгьдиз бахшна ихьтин акъажунар гьар йисуз кьиле тухудайди лагьана.
"Кьурагь район" муниципальный тешкилатдин кьил З.Азизова акъажунрин иштиракчийриз ва райондин жегьилриз хуш келимаяр лагьана.
Райондин администрациядин физкультарадинни спортдин ва жегьилрин крарин рекьяй отделдин начальник Р.Рамазанова къейд авурвал, алай йисан сифте кьилелай районда спортдин рекьяй 20 мярекат кьиле фенва, йисан эхирдалди мад ихьтин вад мярекат кьиле тухун планламишнава.
Эхирдай ада атай вири спортсменриз ва мугьманриз виридаз еке чухсагъул ва жегьилрихъ генани еке галкьунар хьурай лагьана.

 ------------------------------------------------------------------------------------------------

Райондин Информациядин ва печатдин управленидин работникри Эмирбекова Тайибатаз стха ХСЕН рагьметдиз финихъ галаз алакъалу яз башсагълугъвал гузва.
------------------------------------------------------------------------------------------------

Кьурагьрин сад лагьай нумрадин юкьван школадин муаллимрин коллективди Катибова Зинаидадиз ва адан мукьва-кьилийриз играми диде РАЗИЯТ рагьметдиз финихъ галаз алакъалу яз башсагълугъвал гузва.
------------------------------------------------------------------------------------------------

Кьурагьрин сад лагьай нумрадин юкьван школадин муаллимрин коллективди Ражабов Магьарамаз уьмуьрдин юлдаш РАЙГЬАНАТ рагьметдиз финихъ галаз алакъалу яз башсагълугъвал гузва.

-----------------------------------------------------------------------------------------------

Ашарин юкьван школадин муаллимрин коллективди Мирзеханов Исамудиназ играми стха БУЛЯМУДИН вахтсуздаказ рагьметдиз финихъ галаз алакъалу яз, дериндай хажалат чIугунивди, башсагълугъвал гузва.

-----------------------------------------------------------------------------------------------

 

Комментарии (0)

Нет комментариев. Ваш будет первым!