Газета №4

Райадминистрацияда
Нубатдин совещание хьана
19-январдиз райадминистрациядин актовый залда райондин руководителри гьафтеда авунвай кIвалахдин нетижаяр кьадай нубатдин совещание кьиле фена.
Совещание "Кьурагь район" муниципальный тешкилатдин кьил З.Азизова кьиле тухвана.
З.Азизова са жерге руководителривай гьафтеда авур кIвалахдин гьакъиндай информация гун тIалабна.
Райондин образованидин отделдин начальник Р.Катибова 12-январдиз райондин школайра тарсар башламиш хъувурди, анра чимивал авайди, цIивин куьтягь хьайи Хвережрин, Ашарин, Гелхенрин ясли-бахчайриз цIивин хкайди, лазим тир школайризни хкин хъийидайди, отделди отчетар вахканвайди, алатай гьафтеда школада кIелзавай 32 аял Избербашдин "Солнечный берег" лагердиз ракъурайди, мартдин вацра "Орленок" лагердиз 2 путевка авайди лагьана.
Пенсионный фондунин отделдин начальник А.Назаралиева къейд авурвал, отделди пландал асаслу яз кIвалахзава, январдин пенсияр ганва, 1-январдилай пенсияр гунин кIвалахдин гьакъиндай законда дегишвилер жеда, февралдин вацралди пенсияр хкаж жеда, страховой взносар кIватIунин кIвалахдин план хьанва, ЦРБ-дал бурж алама, 20-январдиз Махачкъалада жезвай совещанидиз фида.
Финансовый управленидин начальник Б.Ибрагьимова алай вахтунда алатай йисан отчетрал, 2015-йисан сметайрал машгъул тирди, Финансрин министерстводиз бюджет тухвана кIанзавайди лагьана.
Райондин Культурно-досуговый центрдин начальникдин заместитель Ш.Саруева алатай гьафтеда Кьурагьрилай винидихъ галай хуьрериз, КьепIирдал, КIиридиз фена, Культурадин кIвалерин гьал ахтармишайди, и гьафтеда арандин зонайриз фидайди, 23-февралдин суварин мярекатдиз гьазурвилер аквазвайди лагьана.
Информационный технологийринни печатдин центрдин начальник А.Будаева къейд авурвал, газетдин нубатдин нумра акъуднава, сайтдиз материалар гузва, СМИ-ди кIвалах йисан пландал асаслу яз ийизва.
Совещанидал гьакI райондин хуьруьн майишатдин чилеринни ихтияррин алакъайрин отделдин начальник С.Селимов ва субсидийрин отделдин начальник Б.Батманов рахана.
Совещанидин эхирдай "Кьурагь район" муниципальный тешкилатдин администрациядин кьил С.Гьамидова идарайрин руководителриз вахтунда финансовый управленидиз сметаяр агакьарун буйругъна.
З.Азизова гьар са месэла веревирдна ва авай кимивилер арадай акъудун тагькимарна.

--------------------------------------------------------------------------------------------

Алван Рамазанова.
Чи интервью
Кьилин макьсад секин Дагъустан я
Инсаниятда гзаф асирра гьукуматдин, агьалийрин хатасузвал хуьнин карда кьилди службайри къуллугъзавай. Алатай асирдин сифте кьилерай 2013-йисалди чи гьукуматда хатасузвал хуьнин карда милициядин органди къуллугъзавайтIа,
гила и службадин тIвар полиция хьанва. Россиядин Федерациядин МВД-дин Кьурагь районда авай ОВД-ди алатай 2014-йисуз тухвай кIвалахдин нетижаяр кьун патал чна чи райондин ОВД-дин начальник Фатуллаев АбутIалиб Бабаевичахъ галаз суьгьбет авуна.
Куьруь къейд:
Фатуллаев АбутIалиб Бабаевич 1963-йисан 30-августдиз Сулейман-Стальский райондин Кьулан СтIалрин хуьре дидедиз хьана. 1980-йисуз школа акьалтIарна. 1980-1983-йисара Советрин Армиядин жергейра къуллугъна. 1986-1988-йисара Литва Республикадин Вильнюс шегьердин милициядин школада юкьван махсус образование къачуна. 1992-1995-йисара Ростов шегьердин Россиядин МВД-дин юридический институт акьалтIарна. А.Фатуллаева вичин кIвалахдин рехъ гьеле 1988-1991-йисара Кабардино-Балкариядин Прохладненский ГОВД-да оперуполномоченный, гуьгъуьнлай старший оперуполномоченный яз гатIумна, 1991-1994-йисара ада Кьурагь райондин къенепатан крарин отделда старший оперуполномоченный яз кIвалахна. 1999-2010- йисара Сулейман-Стальский райондин криминалистикадин отделдин начальник хьана. 2013-йисан мартдин вацралай Россиядин МВД-дин Кьурагь районда авай ОВД-дин начальник яз тайинарна. Ам Кавказдин Кеферпатан регионра хьайи вакъиайрин иштиракчи я. Хейлин йисара вичин къуллугъда гьакъисагъ зегьмет чIугунай ам жуьреба-жуьре медалризни лайихлу хьана.
Адахъ уьмуьрдин юлдаш ва пуд аял ава.

-АбутIалиб Бабаевич, 2014-йис тарихдиз хъфена. И йисан нетижаяр гьихьтинбур хьана?
-Алатай 2014-йисуз чи сотрудникри 46 тахсиркарвал винел акъудна. 2013-йисуз 56 тахсиркарвал винел акъуднавай. И тахсиркарвилерикай экономикадин рекьяй хьанвайбурни ава. 2013-йисуз чандиз къаст авунин, кIвалер атIунин тахсиркарвилер хьанвай. Алатай йисуз ахьтин тахсиркарвилер хьаначтIани яракьар маса гунин ва бейгьуш квай шейер пайда авунин тахсиркарвилер 100% -дин гзаф хьанва. Абурукай чIехи пай тахсиркарвилер экономикадин рекьяй я. 46 тахсиркарвиликай 40 экономикадин рекье авунвай тахсиркарвилер я. Абур вири суддиз вугана, делойриз килигзава.
-Тахсиркарвилер авунвайбурун арада яш тамам тахьанвайбур авани?
- И хьанвай тахсиркарвилерикай тек сад Хуьрехуьре школьникди авунвай тахсиркарвал я. Ада са агьалидин кIвал атIанвай.
-Бейгьуш ишлемишзавайбурун ва пайда ийизвайбурун вилик пад кьунин кIвалах гьикI тешкилнава?
-Алай вахтунда спайс тIвар алай бейгьуш квай шейни арадал акъатнава. Чна школайра, яш тамам тахьанвайбурун арада вирироссияда хьиз кIвалах тухузва. Алай вахтунда райондин чIехи школайра кIвалах тухванва, амай школайрани тухун планламишнава. Хуьрерин поселенийра хуьруьн активдихъ галаз суьгьбетар ийизва. Къейд ийин хьи, "Кьиникь маса гузвайдакай зенг ая" тIвар алай Президентдин программа авайди я. Чна гьа программадикай менфят къачуна кIвалах кьиле тухузва. Идалай гъейри, "Мак" тIвар алаз операция кьиле тухузва. Лагьана кIанда, бейгьушдин кулар дагълара, физ четин чкайра, цазва. Чи сотрудникри гьар са чка ахтармишзава.
-Дагъустан Республика вилик тухунин рекьяй Республикадин Кьил Р.Абдулатипован "Хатасуз Дагъустан" кар алай проект кечирмишунин рекьяй вуч кIвалах кьиле тухузва?
-Районда хатасузвал хуьн патал райондиз къвезвай рекьел, яни КьепIиррин хуьруьн къерехдал ва гьакIни райцентрадал видеокамераяр эцигнава. КьепIиррин хуьруьн къерехдал пост эцигнава. Районда дружинникрин кIвалах кардик кутун хъувунва. Чи сотрудникрихъ галаз райцентрадал алай идарайрин работникарни гилигна йифен вахтунда куьчейра экъвезва. Гьайиф хьи, и кIвалахдиз бязи идарайрин работникри зайифдаказ фикир гузва.
-Хуьрерин поселенийра участковыйриз кабинетар тешкил авунвани. Хуьрерин администрацийри куь кIвалахда куьмек ийизвани?
-Участковыйриз кабинетар тешкил авунва, амма абуру лазим тадаракралди таъмин авунвач. Чкайрал абуру агьалияр кьабулзава. Чахъ галаз хуьрерин администрацийрин лазим тир рафтарвал авач. Райондин секинвал са чи сотрудникрилай аслу туш и кIвалахда вири агьалийри куьмекна кIанда.
-Хъсан кIвалахзавай участковыйрин тIварар кьуртIа жедани?
-Чпин кIвалахда тафаватлу жезвайбурукай участковыйрин начальник С.Селимов, участковыяр тир В.Юзбеков, А.Ярметов, А. Алидаров я.
-Эхиримжи йисара чи районда ГАИ-дин штат амачир. Гила и йикъара ГАИ-дин цIийи начальник хтанва. ГАИ-дин кIвалах чи районда гьикI ава?
-Эхь, куьне къейд авурвал, и йикъара ГАИ- дин цIийи начальник хтанва. Райондиз чпин кIвалахдихъ галаз алакъаллу лазим тадаракарни хтанва.
-2013-йисалай чи районда патрулдин кIвалах тешкилнава. Абурун кIвалахда аквадай хьтин агалкьунар авани?
-2013-йисалай чи районда патрулдин кIвалах кардик акатна. И вахтунда районда общественный къайда чIурзавай дуьшуьшар тIимил хьанва. Куьчейра, общественный чкайра пIапIрус чIугвазвай, хъвазвай ксарин кьадар тIимил хьанва. Машин ички хъвана гьалзавайбур винел акъудзава. И кIвалахдани, гьелбетда, агалкьунар ава.
-Ички маса гузвайбур винел гзаф акъуднани? Аялриз ички, пIапIрус маса гузвайбур винел акъуднавани?
-Ички маса гузвайбурукай рахайтIа, маса гузвайбурулай 8 уголовное дело къарагъарнава, 3000 бутылкадилай виниз абурувай кьуна.
ПIапIрусар аялдиз маса гайи са тахсиркарвални арадал акъуднава. Мадни гьакI пиротехника маса гузвайбурулайни делояр къарагъарнава.
-АбутIалиб Бабаевич, алай вахтунда чак виридак къалабулух кутазвай терроризмдин ва экстремизмдин патахъай акси тир кIвалах тухун куь отделда гьикI эцигнава?
-Чна райадминистрацияда кардик квай терроризмдиз акси комиссиядихъ галаз сих алакъада аваз кIвалахзава. Школаяр лап гуьзчивилик кутунва. Райондин гьар са школада администрациядин кьилерихъ, хуьрерин мискIинрин имамрихъ галаз суьгьбетар тухузва. Чи районда алай вахтунда секинвал ава. Амма Сириядиз чи райондай кьве кас фенва.
Абур международный розыскдиз малумарнава. Къейд ийин хьи, аялар кьилин учебный заведенийриз кIелиз шегьерриз фейила, абур чIуру рекьиз тухузва. Алай вахтунда террористрин рекьиз жегьилар гзаф желбзава. ТIалабзава диде-бубайри чпин аялрал гуьзчивал тухун. Чи секинвал чалай гьар садалай аслу я. Къе масана къал-макъал, террактар аватIа, пака чални агакьун мумкин я. Гьавиляй чна вирида сад хьана терроризмдиз лянет авуна кIанда. Чи кьилин макьсад Дагъустанда ислягьвал хьун я.
Чухсагъул чахъ галаз суьгьбет авунай.
Квезни чухсагъул!

--------------------------------------------------------------------------------------------

Ф.Абдурагьманова.
Бейкар агьалийрин къайгъуда
Алатай, 2014-йисан декабрдин вацра чи райондин ЦЗН-дин директор Гьажиханов Гьажихан Садудиновичахъ галаз хьайи суьгьбетда ада чаз чпин центрди бейкар агьалияр кIвалахдал таъминарун патал кьиле тухузвай кIвалахдикай лагьанай.
И кIвалахдин нетижаяр чирун патал чна адан вилик са шумуд суални эцигнай.
-Гьажихан Садудинович, куь Центради бейкар агьалийрин кьадар тIимил хьун патал гьихьтин кIвалах вилик тухузва?
-Лугьун лазим я, 2013-йисалай гатIумна чи республикадин бейкар агьалияр кIвалахдал таъминардай Центрайра регистрация авунвай бейкарар кIвалахдал таъминарунин карда куьмек гунин гьакъиндай РД-да са кьадар программаяр кардик кутунва. Гьа и программайрал асаслу яз Центрадин бейкарар кIвалахдал таъминардай са шумуд хел кардик ква.
Сад лагьайди, кIвалахдал таъмин тушир бейкарар маса регионра кIвалахдал таъминарун я. Къенин юкъуз и кIвалахдиз РД-дин Зегьметдин Министерстводи кьилин фикир гузва.
Чи республикада авай бейкарар кIвалахдал таъминардай кьилди чкаяр тахьуникди, Зегьметдин Министерстводи кIвалахдай карханаяр авай регионрихъ ва областрихъ галаз икьрар кутIунзава ва Министерстводай чаз вакансияр, яни гьиниз гьи жуьредин кIвалахдай рабочияр лазим къвезватIа хабар гудай чарар хквезва. Чна бейкарриз чарарихъ галаз таниш жедай мумкинвал гузва. Алай вахтунда и хиляй хейлин кIвалах кьиле тухванва. Чи Центрадай маса регионриз кIвалахиз 52 бейкар фенва. Кьвед лагьай хилекай рахайтIа, чи Центради маса регионриз кIвалахиз фин ва я куьч хьун акатзава. Ихьтин бейкарризни са кьилин рекьин гьакъи ва сифте 15 юкъуз кирида кьунвай кIвализ суткада 550 манат гун патал пулдин такьатралди куьмек гузва.
Лагьана кIанда, къенин юкъуз чи Центрадин бейкарар кIвалахдал таъминарунин карда чаз еке куьмек гузвай Москва шегьерда авай "Фер Эль-Гам" ООО фирмадихъ галаз чна сих алакъаяр хуьзва.
И фирмадиз чна рекье тур бейкарриз, яшамиш жедай чка, пуд чIавал недай хуьрек ва кIаненди 25 агъзур манат пул гузва. ТIалабун я, кIвалахиз физ кIанзавай ксаривай чи Центрадиз атун. Чна и карда чавай жедай вири куьмекар гуда.
-И кьиле тухузвай программайрал асаслу яз, куь Центрадин бейкаррин кьадар тIимил жезвани? Центрада вацра гузвай пособиядин кьадар артух хьанвани?
-Дугъриданни 2013-йисав гекъигайла, 2014-йисуз чи Центрадин бейкаррин кьадар 50-60 касдин тIимил хьанва.
И кардал чна генани гуьзчивал тухуда, генани гзаф бейкарриз кIвалахдал машгъул жедай рекьер жагъуриз алахъда.
Вацра гузвай пособиядин кьадардикай рахайтIа, гьа авайвал 850 манат яз ама.
------------------------------------------------------------------------------------------
А.Мамедова.
Дербент шегьердин 2000 йис
Дербент шегьердин куьруь тарих
Малум тирвал, къадим Дербент шегьердин 2000 йис тамам хьун Россиядин тарихда лишанлу вакъиайрикай сад я. Кьиблепатан Дагъустандин кьадар-кьисметра, гьакI ана яшамиш жезвай инсанрин уьмуьрда ва яшайишда шегьерди важиблу чка кьуна.
Дербент чи уьлкведин къадим ва лап куьгьне шегьеррикай сад я. Ам мягькем къеле хьиз, Каспий гьуьлуьн РагъакIидай пата экIя хьанва. Дербент шегьердихъ зурба тарих ава.
Шегьердин цлар са шумуд асирра хкажайбур я, абур чкадин агьалийрин зегьметди арадал гъанва.
Жуьреба- жуьре гьукумдарриз Дербент чпин гъиле кьаз кIан хьунин кьилин себеб ам тир хьи, Кавказдин чIехи шегьеррикай сад хьунилай алава, Дербент вичихъ гегьенш порт галай алишверишдин халис центр хьана. Ина Урусат Волгадилай, Дондилай атай рекьери Средний Азиядин вилаятрихъ галаз алакъалу ийизвай. VII-IX асирра иллаки урусрихъ галаз авай алишверишдин алакъаяр мадни мягькем хьана.
И йисара Дербент шегьердин уьмуьрда аваданвилихъ мадни еке дегишвилер кьиле фена. Нетижада ана яшамиш жезвай инсанрин кьадарни хейлин артух хьана. Алай вахтунда лагьайтIа Дербент шегьерда Огни поселокни галаз санлай 70 агъзурдалай виниз агьалияр яшамиш жезва.
Агьалийрин кьадар артух хьунихъ галаз санал, шегьердин юкьва ва адан къерехрани пуд ва кьуд мертебадин яшайишдин цIийи кIвалер эцигзава.
Малум тирвал, къадим шегьер гзаф миллетар санал стхавилин хизанда яшамиш хьуник гуьзел чешне я. Ина дуствилин туькIвей хизанда лезгияр, табасаранар, даргияр, къумукьар, дагъви чувудар, урусар ва маса халкьарин хейлин миллетарни яшамиш жезва. Абуру вирида гьакъисагъвилелди жуьреба-жуьре карханайра, идарайра, совхозра ва колхозра зегьмет чIугвазва.
Вич республикадин чIехи шегьеррикай сад тир Дербент алай аямдин промышленностдин центрайрикай сад я. Гьакикъатда Советрин властдин йисара анаг чешнелу культурадин центрадизни элкъвена.
Алай вахтунда халкьдин образование, культура, хуьруьн майишат ян тагана вилик тухун патал Дербентда педучилище, хуьруьн майишатдин техникум, медучилище, гьакI 2 профтехучилище кардик ква. Анра санлай са агъзурдалай виниз жегьилри ва жаванри чирвилер къачузва. Агьалийрин сагъламвал хуьнин къаравулда са жерге духтурханаяр, дишегьлийриз ва аялриз консультацияр гудай поликлиникаяр кардик ква.
Эхь, йисалай-суз-къадим Дербент шегьер авадан ва абад жезва. Адан куьчеяр къир цана, дуьз къайдадиз гъизва, шегьер къацу махпурдикай либас алукIнавайди хьиз аквазва.
Умудлу я, гележегда шегьер мадни гуьрчег ва вичел фикир желбдайди жедайди.

------------------------------------------------------------------------------------------
Литературадин чин
Сабир Эфендиев
Хкведа зун
РикIиз санал кьарай текъвез,
КIваляй-кIвализ вун захъ къекъвез,
Первана яз вун вал элкъвез,
Ахварай заз шез акуна.

ГьалчIзава циф, аквазмач рагъ,
Вун дакIарда, кьве вилел - нагъв,
Пенжерда, ачухна кьве тах,
Вилер захъ къекъвез акуна.

Акъатна гар, гьатна чайгъун...
Сивел - яйлух, рекьева вун,
Алахьна физ дерин "угьун",
Зи къаршидиз къвез акуна...

Дуьнья ваз хьуй - гудач тIеам
КIанивал тушни ажеб гъам
Меккедихъ хьиз, чIугвазва кам...
Вири тада, хкведа зун.
Фена вахтар - рехи я цIве-
лер...
Вахъ цIигел яз ама вилер.
Вун авачир хуьрни шегьер...
Вири туна, хкведа зун!

ГайитIани дуьньядин мал,
РикIелай фич вун авай кIвал,
Ваз чидачтIа зи рикIин тIал,
Вил гала вахъ, хкведа зун.

Карагзава чинар сирлу,
Чинардай варз, гьетер нурлу,
ЧIулав чIарар ви атирлу...
А ви патав хкведа зун.

Вун зи вири: вун зи дава,
Вун зи нефес, вун зи гьава...
Вун акунихъ, цавай-цавай,
Вил гала зи, хкведа зун!

Шикил туна
Гатуз дагъдай хкведайла
КIватIнай цуьквер вун патал.
Багьишиз ваз, фадлай хвейи
Зи сир ваз лугьун патал.

РикI, куркур хьиз, хура зурзаз,
Зун куь варцив агатнай.
КIунчI къужахда вугайла за,
Валай куьз "ухьт" алахьнай?

Михьна тупIув накъвад стIал,
Вун хъфена виликай,
Шикил туна вилерин ви,
Вуна захъай чуьнуьхай.

Авачир вун…
Къекъвена зун агъзур жуьре еришрив,
Амма зи рикI хьанач завай дегишриз,
Муьгьуьббатдин пас вичел ацукьнавай.
Квев дегишда, лагь, таран хел, цуькнавай?!


Йифен хура гар къекъвезва куьчеда….
Заз эвериз яр къекъвезва куьчеда,
Ви дидардиз тадиз къецел катна зун…
Авачир вун… Авачир вун, авачир,
Зи дак1ардихъ галачир вун, галачир!

Ийир-тийир хьана зун,ахвар хана,
Къеневай рикI чIулав жез, мармар хьана,
Къакъатна, руш… Къакъатна вун, къакъатна…
Чи уьмуьрдин рекьер гьарнихъ акъатна.

Цуьквери табзава
ЧIутра цуьквед пешер атIуз,
Рушан рикIиз кьарай авач.
Тикрарзава анжах кьве гаф,
Анжах кьве гаф: "КIанзава-кIанзавач".

Гьинай ятIани пайда хьайи,
А гьисс вуч я, вичизни чизвач.
Тикрарзава анжах кьве гаф,
Анжах кьве гаф: "КIанзава-кIанзавач".

Им шумуд цуьк атIанва къе,
Шумуд пешер чухванва къе,
СакIани руш жезвач рази:
"Цуьквер, куьне табзава, зи!"

Инсан, вахт ва шикилчи
Са чIавара шикилчидив,
Мег патал гъиз, кьил тик кьаз,
Мажал тагуз:"Шикил ягъа!"-
Лугьудай надинждаказ.

Гила ашкъи- шикилчидиз,
Вун яргъалайни "катзава",
Жегьилвилин амач мешреб
Шикилчидив агатзавач.

Пашман я руьгьер
Хуьруьхъ элкъвена руьгьерин вилер:
"Аламат! ЧкIана жал хуьрер чи?
Кьуьдни залум я... Са гурмагъдани гум авач.
Белки зайиф ятIа, бубаяр, вилер чи?!"
Меслятна руьгьери, ракъурна векилар-
Са шумуд ругь, сурарин кьилихъ галай хуьрел:
"Чира, руьгьер, куьне "Бубайрин гурмагърай
Гум атIумир!" вучиз чIурна и адет?
ГьикI гъана чал, бубайрин руьгьерал,
А зурба леке, а зурба лянет?"
Хтана руьгьер цIийи хабарар гваз, лагьана:
"Чи невеяр акуна чаз чалай акьуллу яз.
Пичера къизмиш тир цIаяр, газдин турбайра,
"ТIуьн-хъун, алукIун-хтIунун акурди туш чаз чи гьунарра..
Амма садан гурмагъдихъайни чаз ван хьанач
"ТIварар дагьви... я зи, я ви... я чи, я куь... ванна кIан тир.
Василий, Петро, Алексей, Бруно - эвериз,
Хуьре-кIвале авайди гьа са ван тир!.."
Мад пашман я руьгьер.

Алексей Эрнестович Гьашумов
Зун, рекьин мугьман, машинда яд рганваз, са хуьруьн къерехда акъвазнавай. Булах алай чка заз чизвачир. Кьакьан хуьр тир, гьавиляй рекьик, мумкин я, артух машин-затIни квачир. Эхир, рекьяй хквез зал са аял гьалтна.
-Я хва! -эверна за адаз, ам яргъалламаз. -Инал ша, чан хва! Ви тIвар вуж я?-хабар кьуна за. Ам зи патав агатна. Салам гана.
-Алексей я, халу.
-Хъсан, чан хва,-лагьана за. -Алексей я ман ви тIвар акайла?
-Эхь, халу,-лагьана гадади.-Алексей.
Вун шегьерра хайиди яни?-хабар кьуна за.
Ваъ, я халу. Шегьерар вучтинбур я. Зун гьа и хуьряй я,- хъуьрена ам заз.
-Диде урус яни?
-Урусар вучтинбур я, я халу. Зи дидени гьа и хуьряй я. Амни лезги я.
Вун нин гада я?-лагьана мадни за,- дахдин тIвар вуж я?
Эрнест,- жаваб гана ада. Зун мадни гададиз килигна.
Гьеле школада ама вун,- лагьана за.- Куь фамилия гьикI тир?
Гьашумов я, халу,-лагьана гадади. Гада ихтилатдик кутаз жедай вижевай гада тир, гьавиляй ада еке ашкъи-гьевес аваз вичиз гайи суалриз жавабар гузвай.
Куь тухумдин гьа "шум" куьне хуьх,-лагьана за гададиз.
Гьашум амайди туш, халу,-лагьана гадади. - Гьашумар амайди яни? Низ чида ам чи гьи буба тиртIа?
Зун гададиз килигна. Хуш аял я. "Эрнестан хва Алексей,-лагьана за адаз килигиз мадни.-Куь тухумда амай гьа "шумдиз" гьуьрмет ая... Алексей Эрнестович! Дахдизни гьакI лагь".
Бес ваз кIандай куьмек-шей, халу?-лагьана заз гадади са тIимил мягьтелвал кваз, за вичиз "гила ахлад" лагьайди хьиз хьана.
-Ви сагъвал, чан,-лагьана за.
-ЯтIа, сагьрай халу. Зун хъфида...
Булахдин лазимвални амачир. За жуван рехъни давамарна. Рехъдини, кIвалени, ахварани зи келледа анжах пуд гаф тикрар жезвай. Алексей Эрнестович Гьашумов...

----------------------------------------------------------------------------------------

"Кьурагь район" муниципальный тешкилатдин администрациядин работникри "Кьурагь район" муниципальный тешкилатдин администрациядин кьилин заместитель Исаева Эльмирадиз играми халу БЛЯМУДИН рагьметдиз финихъ галаз алакъалу яз башсагълугъвал гузва.

----------------------------------------------------------------------------------------

"Кьурагь район" муниципальный тешкилатдин администрациядин работникри Асланов Масаназ ва адан хизандиз играми стха ГЬАСАН рагьметдиз финихъ галаз алакъалу яз башсагълугъвал гузва.

-----------------------------------------------------------------------------------------

Райондин информационный технологийринни печатдин Центрдин работникри Асланов Масаназ ва адан хизандиз играми стха ГЬАСАН рагьметдиз финихъ галаз алакъалу яз башсагълугъвал гузва.

-----------------------------------------------------------------------------------------

Райондин информационный технологийринни печатдин Центрдин работникри Абдуллаева Ашурадиз играми ими ГЬАСАН рагьметдиз финихъ галаз алакъалу яз башсагълугъвал гузва.

-----------------------------------------------------------------------------------------


 

Комментарии (0)

Нет комментариев. Ваш будет первым!