Газета №37

 Райадминистрацияда
Оргкомитетдин совещанидал
2-сентябрдиз райадминистрациядин кьил С. Гьамидован кабинетда "2014-2016- йисара Дагъустан Республикада экстремизмдин ва терроризмдин идеологиядиз акси тир информационный кIвалах тухунин гьакъиндай, РД-дин гьукуматдин программа кечирмишунин гьакъиндай ва 3- сентябрдиз кьиле тухузвай терроризмдиз акси Садвилин Югъ, Бесланда хьайи мусибатдин 10 йис хьунин, Дагъустандал вегьей международный бандформированияр терг авуна 15 йис хьунин гьакъиндай" Кьурагь райондин администрациядин кьили 29-августдиз акъуднавай къарардал асаслу яз, райадминистрацияда тешкилнавай оргкомитетдин совещание хьана.
Совещание " Кьурагь район" муниципальный тешкилатдин администрацидин кьил С. Гьамидова кьиле тухвана.
Анал къарарда къалурнавай пунктар веревирд авуна. С. Гьамидова винидихъ къалурнавай вакъиайриз талукь мярекатар тухун тапшурмишна. Пака райондин вири школайра "Дирибашвилин тарсар" кьиле тухун тагькимарна.

------------------------------------------------------------------------------------------------

А.Рамазанова.
Международный бандитрин десте тергна 15 йис
Игит рикIелай ракъурзавач
Террор, террорист, теракт, хъиткьинарун… И гафари эхиримжи 15 йисуз мукьвал-мукьвал чпикай хабар гузва. И дуьшуьшрик рикIер тIар тахьайбур чи хуьрера бажагьат жеда. Дагъустанвийриз терроризм вуч ятIа, вилералди акуна. Чи рикIелай Къизлерда, Каспийскда, Буйнакскда, Новолакда, Волгоградда, Хасавюртда, Махачкъалада хьайи терактрин хирерин тIалар алатнавач, я садрани алатдач.
Къе заз и макъалада 1999-йисуз Дагъустандин Конституциядин къурулушдал, садвилел гъил яргъи авур международный террористрин кIеретIрикай чи республикадин чил азад авуна 15 йис тамам жезвай вахтунда, абурун хуруз сифте яз экъечIай чи ватанэгьли, Кьурагь райондин Куквазрин хуьряй тир 38 йисан яшда аваз кьейи Султанов Закиракай рахаз кIанзава.
2-август, 1999-йис. Бирдан, секиндиз чпин кеспидал машгъул тир Куквазрин хуьруьз чIуру хабар агакьна. Вири газетра абурун хуруз экъечIай лезги хцикай макъалаяр кхьенай. Кьейидалай кьулухъ адаз РФ-дин Правительстводин Указдалди Дирибашвиляй орден гана.
Султанов Закир Куквазрин хуьре муаллим Куругълидин хизанда дидедиз хьана. Кьурагьа школа акьалтIарна ам 1980- йисуз Дагъустандин пединститутдик экечIна. 1985- йисуз анаг акьалтIарна. Ашарин юкьван школадиз физикадинни математикадин муаллим яз кIвалахиз хтана. Закир муаллимди зазни тарсар гайиди я. Ада школада кIвалахзавай йисара школадин футбольный командади районда 1-чкаяр и кьурди я. З. Султанова вичиз школада аялрин арада хьиз, муаллимрин арада ва гьакIни хуьруьнвийрин арада гьуьрмет къазанмишна. Школадиз муаллимвиле кIвалахиз атай усуви руш Светланадал эвленмиш хьана. Закир рикIел хкунин лишан яз Ашарин юкьван школа адан тIварцихъ янава ва школадин гьаятда Закиран суьрет аваз гуьмбетни эцигнава. Ашарин юкьван школади адан тIварцIихъ гьар йисуз футболдай акъажунар кьиле тухузва. Гила Закиран гьуьрметдай районда футболдай жегьилрин арада турнир тухун адетдиз элкъвенва. Закир кьейи вахтунда санал кIвалахзавай юлдашри адакай икI кхьенвай: "З. Султанов гьамиша, гьина четин ятIа, гьана вилик жергейра жедай. Ватандин ва халкьдин вилик буржи ада кьегьалвилелди тамамарна. Гьина кIвалах авуртIани ам гьакъисагъвилелди рикI гваз кIвалахунив эгечIунал, викIегьвилелди, принципралди тафаватлу жедай. Ада коллективдин арада еке гьуьрмет къазанмишнавай. Еке хажалат чIугунивди, чна адан багърийрин тIал пайзава ва абуруз башсагълугъвал гузва. Чи женгерин юлдаш З. Султанован экуь къамат чи рикIера гьамишалугъ амукьда».
"Кьурагьви хва Гигатль хуьр азаддайла кьена". Ихьтин кьил гана са газетдай атIанвай чIук Ашарин юкьван школадин цлан газетдал алкIурнавай. Макъалада кхьенвай: "Боевикар Чиндих гирведай Гигатль хуьруьз къведай вахт гуьзетзавай. Дагъустандин ОМОН-дин отрядди, Цумададин милиционерри ва гьакIни яракьлу гигатливийри чпин сенгерар генани мягькемарна. Милиционер Давуд Абдулхаликьов ва цIуд кьван жегьил гигатливияр 2-августдиз хьайи мусибатдин шагьидар хьана. Боевикар къвезвай чка патав фена ахтармишдай чка кIанзавай. Гагь инихъ, гагь анихъ физвай, мукьвал-мукьвал ламар катарзавай инсанриз дурбуйрай, мукьвал тир мензилдай, патав фена килигна кIанзавай. Милиционерри чкадин гадайрикай фирай лагьана гъайи теклифдал З. Султанов рази хьанач. Ада икI лагьана: "Абур гьеле и кIвалахда бегьем тежриба тахьанвай жегьилар я". Закира вичихъ галаз кьве ОМОН-вини къачуна, разведкадиз фена. Абур Гланчазул меэр чкадал кьван фена. А чка Чиндихдинни чеб алай чкадин юкьва авай чка тир. Боевикрин амалдарвал дурбуйрай килигайла чир хьана. Абур сад вилик кьудал физ, муькуьда кьулухъай лаш югъуриз физвай. Яргъалай ада лам катарзавайди хьиз аквазвай. Элкъвена хквез кIанзавай арада кIеви хьанвай боевик-снайперрал ацалтна. Абурун арада ягъунар кьиле фена. Нетижада милициядин капитан Закир Султанов кьена ва кьве ОМОН-видал хирер хьана. Милиционерар атакадиз фена.
-Ам халис дагъви тир. Ада чаз гзаф течир крар чирна,-лугьузва Давуд Абдулхаликьова. Гьа куьруь вахтунда адан инсанвилин ва викIегь хесетри чаз вич кIанарна…
Чи хуьре гьамиша Закир Султанов рикIел хкида, адан кьегьалвиликай акьалтзавай несилдиз ихтилатар ийида.
-Гьелбетда Закиран кьегьалвал чна, акьалтзавай несилди рикIелай ракъурна кIандач.
Ам телеф хьайи чкада, искусстводин вири истемишунар фикирда кьуна, РФ-дин лайихлу художник А. Мегьамедова Цумада райондин администрациядин вилик Султановаз, Берщиковаз, Сулеймановаз, Гьусейноваз- Дагъустандин азадвал патал чпин чанар гайи аскерриз памятник эцигнава. Гигатливийри РФ-дин лайихлу художник Мегьамедован рягьбервилик кваз "Аракали" лугьудай заставада, Закира къулугъ авур чкада, сифте кечмиш хьайи аскер З. Султановаз пантеон эцигнава.
-------------------------------------------------------------------------------------------------

 З.Саидова.
Терроризмдиз ваъ!
Терроризмдизни экстримизмдиз акси яз
Алатай асирдин эхиримжи йисара неинки Дагъустанда, гьакIни Россиядани терроризмди кьил хкажна. Низ чида и террористар лугьудай, инсандиз ухшар авай вагьшийри са тахсирни квачир гьикьван инсанар тергнатIа. И мусибатдин вакъиаяр инсанрин рикIелай садрани алатдач. Абур себеб яз телеф хьайи инсанрин кьадардин сан-гьисаб авач. Шумуд хуьруьз, шумуд кIвализ абуру чIулав хабар гъана. Шумуд аялдикай етимар, шумуд сусакай хендедаяр авуна, шумуд дидедивай хва, шумуд вахавай стха къакъуднатIа.
Идалай цIуд йисан вилик, яни 2004-йисан 1-сентябрдиз Кеферпатан Осетиядин Беслан шегьердин школадал террористрин дестеди гьужумнай. Экуьнахъ кIваляй цIийи кIелунин йисан шад суварик атай муаллимар, аялар, сифте школадиз физвай, гьеле муаллимдин ухшар чир тахьанвай бицIекар ва абурун диде-бубаяр, рикIера мурадар аваз атайбур и террористар лугьудай алчахрин къармахра гьатна.
Эхь, 10 йис, им хейлин вахт ятIани, ихьтин мусибат садрани рикIелай фидач.
3-сентябрь терроризмдиз акси Садвилин Югъ яз малумарнава. Иниз килигна, чна Россиядин МВД-дин Кьурагь районда авай отделдин начальник А.Фатуллаевавай къачур интервью чи газетдиз чапзава.
-Кеферпатан Осетиядин Беслан шегьерда террористри школадал гьужумайдалай къулухъ 10 йис тамам хьанва, башламишна вичин суьгьбет А.Фатуллаева.
-2004-йисан 1-сентябрдиз террористри школадал гьужумайла 1300 кас есирда кьунвай. И вахтунда 334 кас телеф хьана, абурукай 180-далай виниз аялар тир. 2005-йисан 9-майдиз Каспийск шегьерда гъалибвилин суварин парад фидайла авур терракди са тахсирни квачир гзаф инсанар телеф хьана.
Шад жедай кар ам я хьи, эхиримжи йисара террористрин кьадар хейлин тIимил хьанва. Чна и татугай кIвалахар арадай акъудун патал школайра аялрихъ галаз, хуьрера жегьилрихъ галаз терроризмдизни экстремизмдиз акси гуьруьшар тухузва. Къени чи работникар ихьтин гуьруьшар тухуз фенва.
Алай вахтунда вагьабизмдин терефдарар муаллимарни ава, абуру аяларни и жергейриз тухун патал рекьелай алудзавай дуьшуьшарни ава. Ихьтин муаллимар чи райондин хуьрерин школайрани малум хьана. Ихьтин муаллимри чпи аялрихъ галаз вагьабизмдикай суьгьбетар тухузва. Къейд ийин хьи, сифте терроризмдин дестейриз гьахьзавайбур тамам яш хьанвайбур тир. Алай вахтунда и рекьиз физвайди 18-19 йис хьанвай жегьилар я. Вучиз лагьайтIа, жегьилар рекьелай фад алатда. ТIалабзава хуьрерин администрацийрин кьилеривай, школайрин директорривай и кIвалахдиз фикир гана, и татугайвилер арадай акъудун патал чпин пайни кутун. ГьакIни диде-бубайривай чпин аялрал гуьзчивал тухвана, аялар гьиниз физватIа, гьинай хквезватIа чирун, йифен вахтунда аялар куьчейриз ракъур тавун тIалабзава.
Гьайиф хьи, чи районда гьа и рекье авайбурни авачиз туш. Алай вахтунда чи учетда райондай 20 касдилай виниз ава. Абурухъ галаз чна гьар вацра гуьруьшар тухузва.
Эхиримжи вахтунда районда йифен ва йикъан патруль кардик акатнава. Къейд ийин хьи, патрулдин кIвалах кардик акатайдалай кьулухъ хуьре-кIвале къал-макъал тIимил хьанва.
Къуй чи уьмуьр секинди, дуьньяда ислягьвал , кIвалера берекат хьурай!
Чун чи халкьдиз секин уьмуьр хьун патал югъ-йиф лугьун тавуна къуллугъда акъвазиз гьазур я..
-Чухсагъул чахъ галаз суьгьбет авунай. Къуй куь четин кIвалахда квехъ генани еке агалкьунар хьурай.
-Куьнни сагърай.
--------------------------------------------------------------------------------------------------

Ф.Абдурагьманова.
Школайра сифте зенгер
Чирвилерин Югъ шад гьалара
Алай йисан 1- сентябрь, Чирвилерин Югъ, Кьурагьрин 2- нумрадин юкьван школада шад гьалара кьиле фена. Сятдин 9 тамам хьайила шадвилин мярекат и школадин ученикар тир З.Катибовадини Ф. Юсуповади виридаз и югъ мубарак авуналди ачухна. Гуьгъуьнлай 1- классдиз физвай аялар чпин классдин руководитель З. Гераевадихъ галаз линейкадал атана. РФ- дин Гимн яна.
Чирвилерин Югъ вири аялриз и школадин директор А. Гьажиева аялриз вичин патай мубаракар авурдалай кьулухъ ада алатай кIелунин йисуз школа хъсан къиметар аваз кIелна ва адан общесвенный уьмуьрда хъсан иштирак авур аялриз грамотаяр гана. Мярекатдал гьакIни и школадин завуч М. Исаева, тарихдин муаллим М.Ражабов, физкультурадин муаллим Ю. Мисриев рахана. Юсуф муаллимди спортдин рекьяй хъсан нетижаяр хьайи аялариз грамотаяр гана. Гуьгъуьнлай и школадин гъвечIи ва чIехи классрин аялри чпи гьазурнавай программа къалурна. 1- классдин аялри гъвечIи- гъвечIи бендер кIелна.
Мярекатдал 11- классдин аялри 1- классдиз физвай бицIекриз цуьквер ва " Букварь" ктабар гана. Эхирдай линейкадал 11- классдин ученик Н. Бабаевани 1- классдин ученица Ф. Сефералиевади школадиз эвер гудай сифте зенг яна.
Вири аялар чпин классрин руководителарни галаз ремонтар авуна, хъсан ухшардиз гъанвай школадиз цIийиз алукьнавай кIелунин йис давамарун патал гьахьна.
-------------------------------------------------------------------------------------------------

М. Агьмедова.
Чирвилерин Йикъаз талукь яз
1-сентябрдиз Кьурагьрин сад лагьай нумрадин юкьван школада Чирвилерин Йикъаз талукьарнавай мярекат шад гьалара кьиле фена.
Мярекат школадин вилик квай, суварин къайдада чIугурнавай гьаятда, сятдин 10 тамам хьайила башламишна.
ЦIийи кIелунин йисаз ва Чирвилерин Йикъан сувариз талукьарнавай шадвилин линейка, школадин муаллим Къазиева Шафигади вичин ва школадин педагогический коллективдин патай аялриз и сувар мубарак авуналди ачухна ва гаф школадин директор Мисриев Гьамид Гьажимисриевичаз гана.
-Гьуьрметлу муаллимар, аялар, диде-бубаяр ва атанвай мугьманар, - лагьана ада. Квез и Чирвилерин Югъ рикIин сидкьидай мубаракрай. Чи 1- школа гьамиша вири рекьерай 1-ди тирди школадихъ гьам чирвилерин, гьам общественный уьмуьрда жезвай агалкьунри тестикьарзава. Алатай йисуз 11- классдин 21 аялди ЕГЭ-яр вахкана школа акьалтIарна. Гьа и 21 аялдизни атестатар ганва, ибурукай 10 кас ВУЗ-риз, 8 кас СУЗ- риз кIелиз экечIнава. 9- классдин 30 аялди ГИА вахкана ва виридав аттестатар вахканва. ГьакIни чи школадин аялри спортдин рекьяйни хейлин агалкьунар къазанмишнава.
Шад жедай кар ам я хьи, 26- августдиз кьиле фейи муаллимрин конференциядал чи школадин 3 муаллимдив: Светлана Уьрдихановадив, Ирада Уьрдихановадив, Замина Гьажихановадив Гьуьрметдин грамотаяр вахкана.
Къе нубатдин сефер яз чи школади аялрин вилик вичин ракIарар хушвилелди ачухзава. За квез мад сеферда Чирвилерин Югъ мубарак ийизва. Гуьгъуьнлай аялриз Чирвилерин Югъ мубарак ийиз " Кьурагь район" муниципальный тешкилатдин администрациядин кьилин заместитель Э. Исаева атанвай.
Ада вири кIватI хьанвайбуруз и сувар мубарак авуна ва чирвилерин рекье агалкьунар хьурай лагьана. Куьне куь чирвилералди, куь хайи хуьруьн, райондин тIвар виниз хкажрай. Линейкадал диде-бубайрин патай гаф 1- классдиз физвай аялдин диде Гьасанова Луизадиз гана. Сифте зенг 1- классдин ученица Мегьамедова Аминади ва 10- классдин ученик Гьажиханов Насруллагьа яна.
Мярекатдин эхирдай директорди и школада хейлин йисара гьакъисагъвилелди зегьмет чIугур 3 муаллим: Бутаева Сефият Халидовна, Гьасанова Маиса, Къурбанова Светлана Мегьамедэминовна лайихлу пенсиядиз фенва. Къуй чпихъ чандин сагъвал, рикIин шадвал, уьмуьрдин бахтлувал хьурай.
-----------------------------------------------------------------------------------------

Ф.Мирзоев.
Сагърай чи пожарникар
Алай йисан 28- август цIай аватнавай лап чими йикъарикай сад тир. Сериндик 36 градусдилай виниз алатнавай. Манчаррин мягьледа Рамазанов Наруллагьан веледдин мехъерик музыкадин ван япара аваз адан мукьва-кьилийри, патарлай атанвай мугьманри ял язавай.
Садлагьана къунши Гьабибуллагьан кIвалерай туп-туп гум хкаж жезвай. " Кузва! КIвалери цIай кьунва",-лагьай гьарай акъатна къунши Мегьамедов Энверай. Вири жемят кIватI хьана тадиз пожарный частуниз зенг авуна, хабар гана. Са тIимил амай мягьледаллай хийирдин кIвалах шийирдиз элкъвез.
Амма «вил акьална ахъайдалди» ролдихъ Рамазанов Мадрид галаз пожарный машин чкадал агакьна. Пожарный командадин кьиле Кьурагьрин 18- нумрадин пажарный частунин начальник Мегьамедов Ибрагьим ва райондин цIаяр кьунрин рекьяй гуьзчивал тухудай отделдин начальник Эмирбеков Анзор акъвазнавай. Абурун пешекарвилин меслятралди пожарный командадин членри чпин дуьз гьерекатралди са куьруь вахтунда цIай хкадарна ва кIвалин иеси чIехи бедбахтвилин дуьшуьшдикай къутармишна. Пожарный частуниз хабар гана цIай хкадардалди вири 31 минут хьанвай. А вахт генани тIимил жедай эгер пожарникриз нубатсуз къалабулух акатнавай са бязибуру чпин гъавурда авачир теклифар таганайтIа.
КIвалин иеси Гьабибуллаев Гьабибулагь, адан мукьва-кьилияр ва гьакIни хуьруьн жемят пожарникрин кIвалахдилай рази яз амукьна. Лезги халкьдин кьегьал хва генерал Къазимегьамедова регьбервал гузвай вири чкайрал алай пожарный частари гьа икI кIвалахиз хьайитIа, ам гьадан кьилин винизвилихъ галаз вири лезги халкьдин кьилин винизвал жедай. Къуй абурухъ виридахъ чандин сагъвал ва кIвалахдин жигьетдай генани чIехи агалкьунар хьурай. Райондин информациядинни печатдин къуллугъчиярни гьа ихьтин фикирдин терефдарар я.
-----------------------------------------------------------------------------------------

Информационное сообщение.
Министерство печати и информации РД объявляют о проведении республиканского конкурса по антитеррористической тематике на лучшую теле- и радиопрограмму, телевизионный фильм, журналистскую работу. Конкурс проводится в соответствии с государственной программой Республики Дагестан "Информационное противодействие идеологии экстремизма и терроризма в Республике Дагестан на 2014-2016 годы».
Цель конкурса- усиление активности медиа - сообщества Республики Дагестан по освещению деятельности органов государственной власти РД, направленной на оздоровление духовно-нравственного климата в обществе, укрепление безопасности республики.
Участниками конкурса могут быть электронные и печатные средства массовой информации Республики Дагестан, а также отдельные авторы (авторские коллективы).
К рассмотрению принимаются работы, опубликованные в печати и прошедшие в эфире в 2014 году. Общий объем печатных работ - не менее одной полосы формата А3, видеоматериалы и аудиоматериалы представляются на дисках. К материалам на национальных языках должны быть приложены переводы на русском языке в печатном варианте.
Работы оценивают Конкурсная комиссия из представителей Министерства печати и информации РД, Министерства по национальной политике РД.
Итоги конкурса будут подведены до15 декабря 2014 г. и опубликованы.
Для победителей конкурса учреждаются премии.
Для электронных СМИ:
Первая- 25 тыс.рублей, вторая-17тыс.рублей, третья-12 тыс. рублей.
Для печатных СМИ:
Первая-20 тыс.рублей, вторая-13 тыс.рублей, третья -10 тыс.рублей.
Награды присуждаются за систематическое, глубокое и ясное освещение антиэкстремистской тематики, профессионализм и оригинальность подачи материалов.
Работы принимаются в срок до 15 ноября 2014г. по адресу:
г. Махачкала, ул. Оскара, 42, Министерство печати и информации РД, 5 этаж, отдел по взаимодействию со СМИ, тел.: 56 70 20.

------------------------------------------------------------------------------------------------

Ф.Абдурагьманова.
Субботник кьиле фена
30- августдиз Кьурагьрин хуьре райадминистрациядилай гатIумна вири идарайра, школайра, ясли-бахчайра субботникар кьиле тухвана. И вахтунда райондин руководство кьиле аваз вирида общественный зирзибил вегьезвай чкаяр, центральный куьчеяр, гьар са идарадин къенер ва къецел патар михьна, анагар гуьнгуьна туна.
Гуьгъуьнлай субботникдин нетижаяр гьихьтинбур хьанатIа чирун патал "Кьурагь район" муниципальный тешкилатдин администрациядин кьилин заместитель Э. Исаева обходар ийиз субботникар кьиле тухвай чкайрал фена. Лугьун лазим я хьи, санлай субботникрин нетижаяр писбур хьаначтIани и кIвалахда кимивилерни авачиз хьанач. Обходар авурдалай гуьгъуьниз Э. Исаевади къейд авурвал, кьиле тухвай субботникдин кIвалахда гзаф кимивилер тур идарайрин работникривай, идалай кьулухъ чпин кIвалахдин нетижаяр хъсанарун истемишда.
----------------------------------------------------------------------------------------------

Дагестанский РФ ОАО "Россельхозбанк" формирует кадровый резерв для дополнительных офисов городов и районов Республики

Дагестанский региональный филиал ОАО "Россельхозбанк" объявляет конкурс для формирования кадрового резерва дополнительных офисов филиала и приглашает присоединиться к успешной команде, настроенной на достижение наивысших успехов в бизнесе.
Резерв формируется по следующим специальностям:
-Экономисты, менеджеры
Основные требования к кандидатам:
-высшее образование (экономическое или юридическое)
-коммуникабельность
-опыт работы в банковской системе
-Уверенный пользователь ПК (Word,ExeI)

Перечень документов для соискателей:
-Личное резюме (в свободной форме)
-Портретное фото
-Копия документа о высшем образовании и трудовой книжки.

Материалы и вопросы можно направлять дистанционно на электронный адрес-
AbakarGadJimagomadov@rf/rshbank.ru
Или обращаться по тел. 55-09-59 (09:00 - 18:00)
-------------------------------------------------------------------------------------------------

Кьурагьрин 1- нумрадин юкьван школади 2002-йисуз Хсенбабаева Ширихан Мегьамедзагьировнадин тIварунихъ ганвай 9 246 181 нумрадин аттестат квахьнава. Ам ихтибарда амач.

-----------------------------------------------------------------------------------------------

Комментарии (0)

Нет комментариев. Ваш будет первым!