Газета №36

Райадминистрацияда
Нубатдин совещание хьана
10-августдиз райадминистрациядин актовый залда райондин идарайрин руководителри гьафтеда авур кIвалахдин нетижаяр кьадай нубатдин совещание хьана.
Совещание "Кьурагь район" муниципальный тешкилатдин кьил З.Азизова кьиле тухвана.
З.Азизова Кумухъа "Кьурагь дагъларин авазар" фестиваль кьиле фейиди къейдна, иштиракчийриз чухсагъул малумарна .
"Кьурагь район" муниципальный тешкилатдин администрациядин кьилин везифаяр тамамарзавай М.Хариева "Кьурагь дагъларин авазар" фестивал 3-сеферда тухвайди и фестивал тухун адетдиз элкъвенвайди, фестивалдиз Кьиблепатан Дагъустандин районриз теклифайди, вирида хъсандаказ иштиракайди къейдна. Ада гьакI районда налог 106 процент кIватIнавайдан гьакъиндайни лагьана.
Райадминистрациядин хуьруьн майишатдин ихтияррин алакъайрин отделдин начальник С.Селимова лагьайвал, магьсулар кIватIна куьтягьнава, бегьер хъсанди хьанва, КьепIиррин майишатдиз гвен гуьдай чкаяр ама.
Ветеринарный управленидин начальник Н.Асланова пландал асаслу яз кIвалахзавайди, гьайванриз цIаяр атай дуьшуьшарни авайди, малар чIуруз кас галачиз ракъурун себеб яз чIурай 2-3 йикъалай хквезвайвиляй вахтунда абуруз чара жезвачирди лагьана.
Райондин образованидин отделдин начальник Р.Катибова къейд авурвал, алатай гьафтеда КьепIирдилай виниз авай хуьрериз фена, учебный заведенияр ахтармишна. Ашарринни Гельхенрин заведенияр квачиз амайбуру ремонтар авуна куьтягьнава. Аранда авай зонадиз пака фида.
Информацийрин технологийрин ва печатдин центрдин начальник А.Будаева цIийи устав гьазурнавайди, работникри "Кьурагь дагъларин авазар" фестивалда иштиракнавайди, адан гьакъиндай информация сайтдиз гайиди ва газетдизни гудайди лагьана.
Совещанидал гьакI ЦРБ-дин кьилин духтур А.Азимов, субсидийрин отделдин начальник Б.Батманов рахана.
З.Азизова гьар са месэла веревирд авуна ва кимивилер арадай акъуддай рекьер къалурна.

--------------------------------------------------------------------------------------------

З.Саидова.
Кар алай проектар – уьмуьрдиз
Чун агьалийриз къуллугъиз чалишмиш жезва
Чи райондин хуьрерин администрацийрин кьилери гьихьтин кIвалахар тухузватIа ахтармишун патал чун чкайрал физ, абурухъ галаз гуьруьшар кьиле тухвана.
ИкI, "сельсовет Капирский" муниципальный тешкилатдин кьил Агьмедов Алимурад Агьмедовича чна вилик эцигай са шумуд суалдиз жаваб гана.
- Алимурад Агьмедович, алай вахтунда КьепIиррин хуьре шумуд агьали яшамиш жезва?
-Алай вахтунда чи хуьре кьве агъзурдалай виниз агьалияр яшамиш жезва.
-Эхиримжи вахтунда куьне хуьре гьихьтин цIийивилер арадал гъанва?
- ЦIинин йис марфар тахьана кьурайди хьуниз килигна булахра, кIамара авай ятар кьуразва. И кар себеб яз алай вахтунда хуьряй винел акъатайла са киллометрдин яргъай хуьруьз цIийи булах гъунин кIвалах гъиле ава. И булах гъайила хуьре хейлинбуруз яд жеда. Мад чи гъиле авай кIвалахрикай лагьайтIа, чна хуьруьн куьчейра авай экверал гьамиша гуьзчивал тухузвайди я.
Куь хуьре гьихьтин идараяр кардик ква?
-Чи хуьре алай вахтунда 9 туьквен, аптека, школа, ясли-бахча, больница, музыкальный школа, почтадин отделение ва пластикдин рак-дакIар ийидай цех кардик ква.
-Приоритетный программадик "Обеление экономики" пункт ква, и пунктунал асаслу яз куьне гьихьтин кIвалахар кьиле тухузва?
-"Обеление экономики" пунктунал асаслу яз ийизвай кIвалахдикай лагьайтIа, чаз кьве СПК: "Чатунар" ва "Кабир" ава. Алай вахтунда и кьве СПК-дини векьер кIватIзава. Мад чна цIинин план тир чилин налогдин 220 агъзур манатдикай 180 агъзур манат ва эменни- дин 90 агъзуракай 75 агъзур манат налогар кIватIнава. Амайди йисан эхирдалди кIватI хъийида.
-Алимурад Агьмедович, куьне хуьруьн агьалийрихъ галаз терроризмдиз акси гьихьтин кIвалахар тухузва?
-Чна участковыйни галаз хуьруьн агьалийрихъ галаз терроризмдиз акси гуьруьшар кьиле тухузва. Шад жедай кар ам я хьи, чи хуьре секин я, къал-макъал авач.
-Куь патав хуьруьн агьалияр гьихьтин арзаяр гваз къвезва, квез абурун арзайриз килигдай мумкинвилер жезвани?
-Чи патав агьалияр чилин патахъай арзаяр гваз къвезва .Чун чавай жедайвал и арзайриз килигиз чалишмиш жезва.
-Квез мад кIвалахда авай четинвилер авани?
-Чаз са четинвал ава. Чи хуьруьн агьалийриз зирзибил гадардай бакар авач . Бакар эциг тавунин себебни чахъ а зирзибил тухудай машин тахьун я. Иниз килигна чна халкьди гадарзавай зирзибил гадарун патал фурар эгъуьнзава, ахпа гьа зирзибил машинра аваз гьа фурариз гадарзава. Хъсан жедай чаз са машин хьанайтIа. Мад ахьтин четинвилер чахъ авач. Чун халкь патал кIвалах ийиз чалишмиш жеда.
-Чухсагъул квез, чахъ галаз суьгьбет авунай.
-Куьнни сагърай
---------------------------------------------------------------------------------------------

Литературадин йисаз талукь яз
Гьуьсейн Рамазан
Бейтер
Кьифре хайида атIуда ман кIатI,
Темягькардини чуьнуьхда ви кьатI.

Хьайи вахтунда кьве падни къизгъин,
Дяве жеда ман, къарагъна къиргъин.

Гумир, дуст кас, на масадаз сарфа:
Куьтягьда ада ацIурай суфра.

Вичав гьатайди тухуда гару,
Акьван зиянар гудач гьич хару.

Ичин тарцелай жедач машмашар,
Гьар тарцини чаз гудач емишар.

Муьгьуьббатдин диде язва кIанивал,
Гьуьрметсузвал галаз къведа къайивал.

Йиферихъ яб акалайтIа, рагъ хквеч,
ЧIулаввилел рикI алайдаз агъ хквеч.

Кьве рельсинлай фидай тегьер поездар,
Муьгьуьббат за хъвазва гьа ви терездай.

Тама авай гьа тек тар хьиз хьана зун,
Муьгьуьббатди чIух авуна кана зун.

Рагъ хтайла мекьер вири катдайвал,
Веревирдер кIватIзава за гватдайвал.

Ручка гвачиз гьикI кхьида цIарар за?
Электрон почта хьана вич таза.

Тарихдин сериндик хъфена кимер,
Герексуз макъамда жеда чаз чIимер.

Гьиллебазрин жергеда тахьун патал жув,
Аран хкажзава, саймиш ийиз сув.

ЭкъечIдалди вилик вун са сефердиз,
Кьибле рикIеллаз, килиг кефердиз.

Мектебар-кьулухъ, мискIинар-вилик,
Ахпа вуч жедатIа, вуч хъсан килиг.

Къачудалди тIур, вучнатIа тамаш,
Луту луту я, кIамашди-кIамаш.

Гьар чуьнгуьр гвайди хьанайтIа ашукь,
ЧIалар ни кхьидай ламариз талукь?

Гьайванарни кваз жезва дуьз вердиш,
Фасад вилик ква, алцуриз девриш.

Дустар галай суфрадин дад дадлу я,
Гзаф дустар авайдан тIвар адлу я.

Гьар са бармак алайди итим жедач,
РикI авайди садрани етим жедач.

ЯнаватIа вуна ламраз чIура хак,
Мягькем жеда зиянривай кIвалин рак.

Гьар затIунал вичин рангни дад жедач,
Авачирди гьисабналди къад жедач.

Вун кIаниди четин юкъуз чир жеда,
КIанибурун рекье цIалцIам къир жеда.

Гаф акатдач -вун а касдив рахамир!
Гьар кткайди инсан яз ваз аквамир.

Машгьур ксар-инсанвилин куьлегар
Яз амукьда, алуд ийиз чапхун гар.

Гезет кIелдач, ктаб кIелдач вун вуж я?
Гьа ихьтинди начальник хьун хупI гуж я?

Нивай хьайтIан ийиз жедач хъсанвал,
Шит хьанва вич гьалтнани а Гьасан вал?

Тар рекьирла, кIвачелламаз рекьида,
Инсан фирла, кIвачерилай рекъида.

Тухмачиди тIур гудайвал къелемриз,
Сала тIурар гуз жедай туш келемриз.

Садра кIасай свах акъудур иландин:
КIан хукудур адан чIуру пландин.

Зунжурдаваз кицI хуьзва на герексуз:
Ахъа жеда-сад рекьида куьмексуз.

Экв аламаз малар хкиз фенач вун:
Малар кьена, жанавурди-кьенач вун.

Тум кьацIанвай дана туна нехирдик-
Хажалатар кутуна на эхирдик.

Сада яхцIур йисуз сана кIвалахна,
Муькуьда ам ктIай кьуьк хьиз патахъна.

Цаваризни чилериз гуз на пулар,
Гила буш я, шалмар амаз ви чIулар.

Хала-хатур авай чка чIур жеда,
Вазни ана дерин мичIи сур жеда.

Рази хьанач вун авазвай тIимилдал,
Хтана вун бушдиз амай цIимилдал.

---------------------------------------------------------------------------------------------

Суьгьуьр гвани ва я?
Ви вилери зал гадарна гатфар,
РикIин дегьнеда квадарна гафар.
Хиялра къугъваз рангарин шарфар,
Суьгьуьр гвани вав ва я тилисим?

Артисткавилиз я вун ярашугъ,
Кат хъийир яргъаз, кьаз тежедай къугь,
ЦIуруцIумар фена сивяй къвезва угь
Суьгьуьр яни вун ва я тилисим?

Ви шикил авай хуьз багьа журнал,
Яргъи жезва зи гьиссерин къанал.
Ширин шиирар кхьизва гьанал
Суьгьуьр яни вун ва я тилисим?

Женнетдин къуш хьиз ава къе заз зун,
Зегьем беденда гьатзава зурзун.
СакIани фикир жезвач гьа къазун:
Суьгьуьр яни вун ва я тилисим?

*** *** ***
Ручка квачир рак хьтинди,
КIвенкI алачир хак хьтинди,
ЦIуьрнуьгъ недай вак хьтинди
Гьалт тавурай вал!

Гадардайдан диде-буба
Кьилиз фидач авур туба.
Акьулсузди тир вич "зурба"
Гьалт тавурай вал!

Акьахна иблисдин шивцел,
Гафар рахаз ширин ванцел,
Зегьер алай терс кас мецел
Гьалт тавурай вал!

Чин кIеви тир гьулдан хьтин,
Сир ачухдач зиндан хьтин,
Гаф жирафдин гардан хьтин
Гьалт тавурай вал!
--------------------------------------------------------------------------------------------

ХъуьтIуьхъай кьуьд хьун
Вафасузди накь кьенайтIа хъсан тир,
Бахтсуз югъни фад фенайтIа хъсан тир.
Пехил касдал мекь къванайтIа хъсан тир,
Кузвай хуьрек гьакI хьанайтIа хъсан тир.

Бегьерсуз зегьметар гьич такурай чаз,
Нефсер гвай регьберар мад тахьурай чаз.
Ирид патал пайна хуьр хаш хьиз туькьуьл,
Такурай ам вилериз, ажуздал жез кьуьл.

ХъуьтIуьхъай кьуьд хьун туш хьи им къанун,
Пехъер чIередал жедани къавун?
Гала лугьуз далудихъ ви итим, гьаким,
Бугъади хьиз къудур къарсурзава ким.
-------------------------------------------------------------------------------------------

Сарин арза
Рахазва Арза:
-КIвачел ала чун.
Эхдани пар за:
Чизмач хьи къачун!

Сарин костюмар
Герекзамачни?
КIватI хьана гъамар
Куьмекзавач хьи…

Сиясатди чун
Авуна юхсул.
Чкадал къачун,
Квахьнава асул.

Хамарни чун хьиз
Хьанава хьи паф.
Дагълар аскIаниз,
Ийизвач инсаф.

Кавказда кьван са
Амач фабрика.
Девир я маса,
ЗатI тийиз чакай…

Са эркек хва бес
Амазмачни чахъ?
Кьурана нефес,
Рехъ хьана патахъ.

Я депутатар,
Къвезвачни чи ван?!
ИкI жедани кар?
Мус жеда дуван?

Гадарнава чун
КIамузни тамуз…
Арза кьабулун
ЖедатIа чахъ мус?!
---------------------------------------------------------------------------------------------

Хажалат
Хажалатдин ранг-чIулав йиф,
На зи рекьер какадарна.
Ам туш хъел кваз недай хъикьиф:
Вал дарвилер авадарда.

Кьуркьушум хьиз я ам агъур
Парци ви юкь алгъурда гьа.
Яргъа ая адан гъургъур:
Ваз дердияр жагъурда гьа.

Ажалдин дуст я хажалат,
ЧукIул я ам атIур уьмуьр.
Туькьуьлвал гваз жез гьавалат,
Гуз гьавая чIулав куьмуьр.

Хвешивили чукIурда ам,
Ракь акунвай шейтIан хьана.
Гьуьм хьиз рикIяй цIрада ам,
КьатI-кьатI хьайи галтIам хьана

Мани, макьам агуд жував,
Яб акалмир гьар иблисдихъ.
Гатут бегьем гьар йифен къав,
Агат мийир пис силисдихъ.

Сагърай шадвал! Гатфарин хва:
Чна межлис туькIуьрзава.
Яб це вун я гьа ви арха:
За чIагъандик хуькуьрзава.
---------------------------------------------------------------------------------------------

Газет
Авайвал за лугьун къе квез
Чирвал гуз мектеб я газет.
Муаллим хьиз вич тарсар гуз къвез,
Чирвилин метлеб я газет.

Авам касдиз такIан я вун,
Я экв, я чим такваз цавун,
Гаф лагьайла жеда къавун,
Машгъулиз ажеб я газет.

Салам гана, къведа кIвализ,
Вахт-вахтунда къведа гъилиз.
Дуьнья акваз мад ваз чимиз,
Руьгь кутаз себеб я газет.

Чи кьатIунриз яда уьтуь,
Гегьеншарда улам шуькIуь.
Гьар са хабар ийиз экуь,
Инсандиз эдеб я газет.

РикIевай къаст тежез давам,
КъатIунриз вич тир кими лам,
Чирвал такIан касдиз авам
Са бейниван хеб я газет.
---------------------------------------------------------------------------------------------

Рубаияр
Жуван ктаб патарна,
Кун, къайгъусуз гадарна,
Жув кун лагьай чIал я ман:
Гъейри ксар шадарна.

Сифте ахвар такуна,
Квар хадач хьи акуна.
Гагь гьакъикъат рахада,
Мез авайд хьиз шакуна.

Акур кьадар ахварар
Гьатдач хьи ваз махарай.
Вуна тацай бегьерар,
КIватIдалда гьакI чархарай.

Гьар ахварин тедбир гун
Ваз адет я, дуьз лугьун.
Гару тухвай хиялрихъ
Галтуг мийир викIегь вун.

Са бендина са фикир
Гьакьрай ийиз на зикир.
Дигмиш тахьай метлебди
Гудайди туш чаз хийир.

Чна ийир крарик
Йифен пай ква чарарик.
ШейтIан вуна гатIуммир
Хийир квазвай гарарик.

Мукьва жез терс уламар
Ийиз гьарна малумар,
Станокри кIвалахиз,
Зарб ийизва авамар.

Хийир гун ви ивидик
КвачтIа, жедач ви гъилик.
АскIанзавай майданар
Четин кар я авун тик.

Ви сагъвилин а бегьер,
Ви рагъвилин а сегьер
Нетижа я экверин
Чаз аквазвай а тегьер.

Гзаф кIан яз ерисуз,
ЗатI гьасилна гъерисуз.
Къаст бушарна еб хьиз на,
Чубан хьана суьруьсуз.

Кьуьзуь кьилихъ акьуллу
Хьун мумкин я фагьумлу.
ТIимил ава мисалар
Геж атанвай регьимлу.

Яд гзаф яз луз ви чIур
Жеда, фикир жез галчIур.
ТIвар иерди ятIани,
Вал гьалтайди хьана мур.

Мисалрихъни гъалатIар
Жезва, гьикIда, чан устIар?
Яд уьлкведи садбуруз
Гудач келле, гьакI мастIар.

АхцIур авун вич бушвал
Бязибуруз туш хушвал,
Лап багьа яз акъвазна
Кимивални а рушвал.

Кьве рельс хьиз а поезддиз
Герек я ман уьмуьр дуьз.
А рехъ гадар авурла,
Жакьвамир на а гуьндуьз.

Жуьтбурун сан харжзава,
Муд я лугьуз яржзава.
ГьакIни шезвай дидейрин
Накъварив гвай парзава.

 --------------------------------------------------------------------------------------------

М.Агьмедова.
Кумухъа-фестиваль
И йикъара чи райондин Кумухърин хуьре "Кьурагь дагъларин авазар" тIвар алаз 3-Республиканский фестиваль кьиле фена. Ина Кьиблепатан Дагъустандин вири районрай манидарри иштиракна.
Мярекат ведущий тир Кумухърин юкьван школадин директор З.Абдулкеримова атанвай мугьманриз хуш келимаяр лугьуналди ачухна ва кьиле тухвана.
Райондин руководстводин ва вичин патай ихьтин мярекат тешкилунай "Кьурагь район" муниципальный тешкилатдин администрациядин кьилин заместитель Э.Исаевади чухсагъул лагьана.
-Гьуьрметлу тир районэгьлияр ва атанвай мугьманар! Квез виридаз и пуд лагьай Республиканский фестиваль мубаракрай. Мярекат тухунин кьилин макьсад Кьиблепатан Дагъустандин халкьарин адетар, халкьдин манияр хуьн, акьалтзавай несилрал чи халкьдин адетар, манияр агакьарун ва машгьур тушир, бажарагъ авай ксар винел акъудун я,-лагьана ада.
ГьакIни мярекатдал "село Кумук" муниципальный тешкилатдин кьил мярекатдин тешкилатчи Р.Улубеков рахана.
Фестиваль "Зи Кьурагь" халкьдин мани тамамаруналди ачухна.
Мярекатдал Рутул райондай В.Шагьпазован, Хив райондай К.Кулиеван, ашукь Айдынан ва Седакъет Саидовадин, Мегьарамдхуьруьн райондай Б.Эскендарован, агъул райондай А.Алиевадин, Ахцегь райондай Т.Мустахован, Сулейман Стальский райондай А.Ризаеван, Белиждай Н.Нежвединован, Кьурагь райондай М.Гуьлметован, Ш.Гьасретован, С.ТIаибован, С.Тагъиеван манияр гурлу капар ягъуналди къаршиламишна. КIватI хьанвай виридаз Бугъдатепедин Культурадин кIвалин хордин коллективди тамамарай манияр "Перизада", "Загъадур-загъа", "Иранда савдада авай яр" иллаки бегенмиш хьана.
Мярекатдин эхирдай "Кьурагь район" муниципальный тешкилатдин администрациядин кьилин везифаяр вахтуналди тамамарзавай М.Хариева тафаватлу хьайи манидарриз дипломар ва пишкешар гана.

---------------------------------------------------------------------------------------------

КьепIир Селимбег
Маншаллагь!
(Къаравили)
Гададинни сусан амалар эхиз тахьай дидеди, эхир кефли яз лугьуда.
-Я хва, ваз свас гъана гьикьван вахт хьанва?
-Кьве йисалай артух жезва ман. ГьикI хьанва, диде?-гайи суалди мягьтеларна гада.
-Хьанвай ахьтин са кар авач. Вав чна кIелиз туна, мехъерар авуна. Генани са кьадар харжияр акъудна кIвалахдални тайинарна. Гьахъ яни?
-Лап дуьз я, диде, гьавиляй за квел дамахни ийизвачни бес?!
-Чал вуна дамах ийиз хьайила, вал чнани авун лазим тушни?
-Я, гьелбетда,-хкяй хьана гада.
- Зини ви бубадин пенсиядилай ви мажиб санбар я. Чун шад я, гьелбетда, мадни хьуй! Чаз къвезвай кепекрихъ хизанни хвена кIанзава, къерех-бажахдин дердияр тавунани жезвач. Бес ви рекьиз акъудна хьанвай буржар элягъун патал са фикир гун лазим тушни?
-Къенин йикъалди бурж вахкун тавуна аламайди яни? Абуру вуч лагьана?-вичизни хабар авачиз туьнт хьана, ван хкажна гадади.
-Гьинай вахканай? Вунани куьмек авун лазим тушни?-гададин туьнт хьун акуна, пагь атIай дидеди.
-За вуч куьмек авуна кIанзава?
-ГьикI вуч?! Пулдин.
-Пулдин?!-сив алахьна гададин.-Заз бес тежезвай квев вуч вахкуда?
-Ви квез бес жезвач? Ви акьван кIевевай кар аватIа лагь, белки чнани ваз… .
-Квез я лугьун. Жуван свас хуьн.
-Я бала, амайбуру чпин сусар хуьн тавуна гадарзавани? Чна ам яру цуьк, цIару цуьк лугьуз хуьзвачни?
-АкI ваъ-е…
-Бес мад гьикI?
-Ада, эгер вич рикIивай кIанзавайди ятIа, вичив са карни ийиз тун тавун, вахтунин импортный пудра-мудра, виридалай дадлу шоколад-мармелад гуз хвейитIа, аквада лугьузва. Заз ам кIанзава эхир.
-А кар гьакI хьанва ман?!-тажуб хьана диде. -АкI хьайила, ада ишлемишай пудрайрин ичIи къапар, тIуьр ширинлухрин коробкаярни чарар гадрай чкаяр кьванни аквадач хьи?
-А кардин ам гъавурда ава, диде. ГьикI лагьайтIа, масадаз такун патал кIвале кIватIиз, мичIи хьайи арада тухвана зирзибил кIватIзавай ящикдиз вегьезва.
-ГьакI я ман? А кIвалах алакьзаватIа, хва, еке кар я! -тIуб сара кьуна, лугьуда дидеди
Маншаллагь!

---------------------------------------------------------------------------------------------

Муниципальное образование "Курахский район" приглашает к участию в открытом аукционе....смотреть здесь

---------------------------------------------------------------------------------------------

 Утерянный сертификат на материнский капитал серии МК-6 № 0008620, выданный Управлением ПФР в Красногвардейском районе г.Санкт-Петербурга 21.05.2014 года на имя Кухмазовой Ирены Магамедовны, считать недействительным.

---------------------------------------------------------------------------------------------

Утерянный аттестат серии Б № 804206, выданный Икринской СОШ Курахского района РД в 1982 году на имя Алиевой Якут Алискендаровны, считать недействительным.

---------------------------------------------------------------------------------------------

Утерянный аттестат серии В № 473993, выданный Икринской СОШ Курахского района РД в 1979 году на имя Рамазанова Тажира Казиевича, считать недействительным.

---------------------------------------------------------------------------------------------

Комментарии (0)

Нет комментариев. Ваш будет первым!