Газета №35

 Райадминистрацияда
Гьафтедин нетижаяр кьуна
3-августдиз райадминистрациядин актовый залда райондин идарайрин руководителри гьафтеда авунвай кIвалахдин нетижаяр кьадай совещание хьана.
Совещание "Кьурагь район" муниципальный тешкилатдин кьил З.Азизова кьиле тухвана.
"Кьурагь район" муниципальный тешкилатдин администрациядин кьилин везифаяр вахтуналди тамамарзавай М.Хариева "Шарвили" эпосдин суварик Ахцегьиз чи райондай делегация фейиди, вирида хъсан иштирак авурди, 6-августдиз Кумухъа "Кьурагь райондин" авазар фестиваль кьиле тухуз гьазур хьанвайди, районда 104 процент налог кIватIнавайди лагьана.
Райондин образованидин отделдин начальник Р.Катибова къейд авурвал, отделди гьазурнавай пландал асаслу яз кIвалах кьиле тухузва, муаллимар отпускрай хтайла школаяр косметический ремонт ийида.
Райондин информацийрин технологийрин ва печатдин Центрдин начальник А.Будаева лагьайвал, нубатдин газет акъуднава, гад агудиникай сайтда ва газетда материалар ганва.
Райондин финансовый управленидин начальник Б.Ибрагьимова къейд авурвал, июлдин вацран мажиб вирибуруз ганва, июлдин вацран мажиб гун тавунвай хуьрерин поселениярни кьвед лагьай паюна отпускдиз фенвай муаллимар ама.
Ветеринарный управленидин пешекар М.Сефералиева лагьайвал, бугъмадиз, цIаяриз акси рапар язава, мал-къарадиз алаф гьазурунал машгъул я.
Райондин рекьерин участокдин начальник Л.Агъабалаева къейд авурвал, Шимихуьр дереда сел къвана рехъ чIур хьанвай, анаг дуьзар хъувуна, амай хуьрериз фидай рекьер къайдадик ква, къир цазвай чкадални рабочияр бес кьадар тахьун себеб яз кIвалах явашдиз кьиле физва.

---------------------------------------------------------------------------------------------

З.Саидова.
Кар алай проектар-уьмуьрдиз!
КIвалах вилик тухуз чалишмиш жезва
Сагъламвал-им инсандиз виридалайни герек шей я. Эхиримжи вахтара гьам Россияда, гьам Дагъустанда ва гьакIни чи райондани сагъламвилиз кьетIен фикир гузва. Са шумуд йис я "Диспансеризация" тIвар алаз цIийи проект кардик кутуна. Диспансеризация авунин метлебни инсандиз авай азарар вахтунда чирунин кар комплексный къайдада гуьзчивилик кутун я.
И кардин ва маса месэлайрин гьакъиндай чна райбольницадин кьилин духтур Азимов Азим Акимовичавай чахъ галаз суьгьбет авун тIалабна.

-Азим Акимович, диспансеризация авунин кIвалах районда гьикI кьиле тухузва?
-Диспансеризация авунин кIвалахдин гьакъиндай чавай икI лугьуз жеда: Кьурагь районда 2015-йисуз диспансеризация авуна кIанзавайбурукай 2556 кас яш тамам хьанвай агьалияр ва 1949 кас аялар я.
Диспансеризациядиз пуд группа ава: кIвалах ийизвай яш тамам хьанвай агьалияр, кIвалах тийизвай яш тамам хьанвай агьалияр, техникумра ва училищейра очныдаказ кIелзавай студентар.
-Къенин юкъуз чи районда диспансеризация авунвай агьалийрин кьадар квевай лугьуз жедани?
-Къенин юкъуз чи районда яш хьанвай агьалийрикай 1330 кас, яни 52 процент диспансеризация авунва, аялрикай лагьайтIа, 840 аял ахтармишна, яни 43 процент. Йисан эхирдалди диспансеризация тавунвай вири агьалияр диспансеризация ийида. Къенин йикъалди диспансеризация авунвай яш хьанвай агьалийрин сад лагьай группадик начагъвал авачирбур- ибурун кьадар 32 процент, кьвед лагьай группадик рикIин тIалар авайбур- ибурун кьадар 20 процент ва пуд лагьай группадик датIана духтуррин гуьзчивилик квай агьалияр ибурун кьадарни 40 процент акатзава.
И чна винидихъ лагьай диспансеризация авунвай агьалийрикай 11 процент агьалияр азарар аваз акъатна. Абурукай стенокардия, артериальная гипертония 4,4 процентдиз, 1 кас рак азар кваз, 3 кас сахарный диабет кваз ва 1 кас глаукома азар аваз акъатнава.
Аялрин арадай лагьайтIа, ахтармишунар авурла анемия, пищеварительный системадин азар, вилерин тIал ва нервный системадин азарар винел акъатнава.
И азарар винел акъатнавай вири агьалияр сагъар хъувун патал чна абуруз вахтунда амаз лечение авун чарасуз тирди лагьанва.
-Азим Акимович, алай вахтунда больницада начагъ яз къатканвай шумуд кас ава ва абурукай аялар шумуд я?
-Алай вахтунда чи больницада вири санлай къачурла начагъ яз 40 кас къатканва, ибурукай къвед аял я.
Начагъбур сагъарун патал болницада вири раб-дарман авани?
-Алай вахтунда раб-дарман вири ава лугьуз жедач. Чал раб-дармандин 4 млн.500 агъзур манат бурж ала. Раб-дарман чаз алай буржариз килигна, тIимил ахъайнава.
Сифте куьмекдиз герек вири шейэр чахъ ава.
-Чаз чизвайвал, чи больницада хейлин вахт я, вири рекьерай духтурар авачиз, алай вахтундани гьа гьал амани?
-Эхь, алай вахтундани чаз рентгенолог, венеролог, фтизиатр, лор, анестезиолог, кьве акушер-гинеколог, инфекционист- невропатолог ва онколог авач. Гьа иниз килигна чун чIехи пай вахтара начагъ инсан Дербентдин райондин ва я Махачкъаладин болницайриз ракъуруниз мажбур жезва.
Куьне инай Дербент ва я Махачкъаладин больницайриз ракъурай начагъбур сагъар хъийидайла абуруз авур раб-дармандин пул куьне вахкузвани?
Начагъ инсан сагъар хъувун патал "Маршрутизация" программа кардик кутунва. И программадал асаслу яз чун начагъ инсан чкадал сагъар хъийиз чалишмиш жезва, эгер чкадал сагъар хъийиз тахьайтIа, чна абур Дербент ва Махачкъала шегьеррин больницайриз рекье твазва. Ибур инра пулсуз сагъар хъийизва. Анжах диагностика, лаборатория ва монография авурла чна пул вахкузва.
-Азим Акимович, чаз чизвайвал, чи райондин больницада аял хадай ихтияр авач, яни родильное отделение агалнава и кардин патахъай квевай вуч лугьуз жеда? И отделение кардик акат хъийидайвал яни?
Алай вахтунда чи райондай медакадемияда кIелзавай кьве студент министрдин гуьзчивилик ква. Са йисан къене абуру ординатура кIел хъувурла, абур чи больницадиз кIвалах ийиз хкведа. Ахпа чна умудзава и отделение чавай кардик кухтаз жедайдак.
-Азарлуйриз гузвай питание гьи гьалда ава? Вири продуктар авани?
-Питание вахт-вахтунда гузва. ТIуьн йикъа вад сеферда гузва. Продуктар мукьвал-мукьвал вахт алайбур гъизвайди я.
-Работникриз мажибар вахт-вахтунда гузвани?
-Эхь, алай вахтунда мажибар вахт-вахтунда гузва.
-Чухсагъул квез чахъ галаз суьгьбет авунай. Квехъ куь кIвалахда еке агалкьунар хьурай!
-Квезни чухсагъул!

 -------------------------------------------------------------------------------------------

З.Саидова.
Аваданламишуниз- шегьре рехъ
Къир цана куьтягьзава
Кьурагь-Кьасумхуьр автомабилрин рекьиз къир цана куьтягьиз 4,5 км амай. Алай вахтунда и рекьизни къир цун патал рехъ сифте гьяркьуь авуна, чиргъ чукIурна гьазурнавай. Алай вахтунда и къир цаз гъиле авай 4,5 км-дикай, къенин йикъуз 3 км-диз сад лагьай къат ва гьа и 3 км-дикай 1 км-диз кьвед лагьай къат къир цанва.
Инал къир цаз Мегьарамдхуьруьн райондин Ярагъ-Къазмайрин хуьруьн ООО "Юг агропромстрой"-дин рабочийри кIвалахзава. Вири санлай къачурла инал прораб тир Абдуллаев Зейдуллагь кьиле аваз 30 пешекарди зегьмет чIугвазва.
Са йикъан къене абуру 300-350 тонна къир цазва. Инал кIвалах авун патал 10 "КамАЗ" машинди, яд авай цистерна галай тракторди, автогрейдерди ва 3 катокди кIвалахзава.
КIвалах башламишдайла къир цана 1-августдиз куьтягьда лагьанвайди тир, "МуькъуьтI" ва "Мухак кIам" кIамарал алай муькъвер ремонт авуниз килигна къир цунин кIвалах алай йисан 1-сентябрдиз куьтягьдайвал я.

---------------------------------------------------------------------------------------------

А.Рамазанова.
Ахцегьа «Шарвили» эпосдин сувар тешкиллувилелди
1-августдиз Ахцегьрин хуьре, гьар йисуз адет хьанвайвал, "Шарвили" эпосдин сувар кьиле фена.
Суварик чи райондай "Кьурагь район" муниципальный тешкилатдин администрациядин кьилин везифаяр тамамарзавай М.Хариев кьиле аваз райондин идарайрин руководителар, хуьрерин администрацийрин кьилер, Кьурагьрин, КIирийрин, КьепIиррин школайрин аялар квай делегация фенвай. Чи райондин майдан, амай йисарани ачухай чкадал, муькъуьн патав ачухна. Майдандал лезгийри вилик заманада ишлемишзавай тадаракар, шейэр эцигна, столрал халкьдин хуьрекар эцигна ачухнавай.
Культурадин работникри майдандик чпин манийралди шадвилин гьиссер кутуна. Атай мугьманар ачух суфрайрихъ кьабулна. Чи районэгьлийри кьурагьвийриз хас тир къайдада сувар кьиле тухвана.
Чеб Шарвилидин невеяр тирди субутарна.
---------------------------------------------------------------------------------------------

З. Саидова.
Ясли-бахчайрай хабарар
«Мечта»-ясли-бахчадин кIвалахдикай
И мукьвара чун КIирийрин хуьруьн "Мечта" тIвар алай аялрин бахчадиз мугьман хьана.
Чун бахчадиз фейи вахт аялриз тIуьн гузвай вахтунал гьалтна. Рак ахъайна, чун къенез гьахьайла, кухнядай къаб-тIурунин ван атайла чун кухнядин ракIарал фена. Чун акур ашпазри чаз: «Ша, буюр»- лагьана, чпикай сада заведующийдиз чун атайдакай хабар гуз фена. Заведующий Фазина Мирзаевади чаз вичин кабинетдиз атун теклифна, хваш-беш авурдалай кьулухъ чна гайи са шумуд суалдиз жаваб гана.
-Фазина Такабудиновна, квевай куь ясли- бахчадин коллективдикай вуч лугьуз жеда?
- Коллектив чи гьар сад вичи авуна кIанзавай кIвалахдин гъавурда авайбур я.
- Куь ясли-бахчада шумуд группа ава ва шумуд аялдиз тербия гузва?
- Алай вахтунда чи ясли-бахчада пуд группа кардик ква гьар са группада15 аял тербияламишзава, яни вири санлай къачурла 45 аял ава.
- И аялриз ина герек вири шартIар тешкилнавани?
- Квез акурвал, гьаятдиз гьахьайла ина аялар къугъвадай тадаракар вири ава. Гьаятдилай гъейри аялар къугъвазвай залдани игрушкаярни ава. Питанидин патахъай лагьайтIа, вахт-вахтунда продуктар агакьарзава. Мес-яргъан къайдадик ква. ЦIуз акси система кардик ква.
- Гатун вахтунда косметический ремонтар авуна кIанзавайди чаз виридаз чизва. Куь бахчада ремонтар мус ийидайвал я?
- Чи бахчадани и йикъара са гьафтеда ремонтар кьиле фида. Дарамат куьгьнеди ятIани, чна ам шир яна, асунар авуна, чавай жедайвал хуьзва. Са кар четинди хьанва, чаз ина яд авач.
- Фазина Такабудиновна, алай йисуз куь бахчада школадиз фидай шумуд аял ава?
- Алай йисуз чи бахчадай школадиз кIуьд аял фида. Лугьуз кIанзава, гьа и школадиз физвай аялриз слогралди кIелиз ва кхьиз чизва. Им чи тербиячияр чпи тамамарна кIанзавай везифайрин гъавурда авайбур я лагьай чIал я.
- Квез аялар бахчадиз кьабулунин патахъай арзаяр авани?
- Эхь, арзаяр гзаф ава, гьа иниз килигна чи пландик са группа мад ачухун ква.
- Бахчада аял хуьнин гьакъи вацра шумуд манат я?
- Бахчада аял хуьнин гьакъи вацра 300 манат я. Льготар авай хизанривай вацра 150 манат къачузва. Льготрик аялар гзаф авай хизанар, диде ва я буба авачир аялар, дидени буба авачир аялар, хизанда набут авай хизанар акатзава.
Чухсагъул квез чахъ галаз суьгьбет авунай. Сагърай!

--------------------------------------------------------------------------------------------

П. Магьарамова.
БицIекриз къулай шартIар гуз чалишмиш жезва
И мукьвара чун, газетдин корреспондентар райондин ясли - бахчайра кIвалах гьикI кьиле физватIа, аялриз гьихьтин къулай шартIар тешкилнаватIа ахтармишиз фенвай.
КьепIиррин "Улыбка" тIвар алай ясли- бахчадиз гьахьайла, ана тербия къачузвай бицIекар алай йис кьурагь йис хьуниз килигна, хъипи хьанвай ясли - бахчадин вилик квай сала, тербиячияр кьилел алаз садбур, перпилаграл, муькуьбур кат- калтугиз шаддиз къугъунар ийизвай.
Ясли- бахчадин заведующий тир Ремиева Солмаз Назировнадихъ галаз гуьруьшмиш хьайидалай кьулухъ чна адавай бахчадикай суьгьбет авун тIалабна.
-"Улыбка" тIвар алай ясли- бахчада пуд группа кардик ква, гьа и аялар патал 20 касди зегьмет чIугвазва, -лагьана Солмаз Ремиевади. Аялриз питание хъсанзава, арза гайила вири продуктар вахт- вахтунда гъизва. Шад жедай кар ам я хьи, чи ясли- бахчадай цIи школадиз физвай аялриз кIелизни кхьиз чирнава, гьелбетда, им чи чIехи группадин тербиячи Хариева Маизат Садировнади аялрал чIугунвай еке зегьметдин гьунар я. Тербиячияр чи аялрал вири хъсандиз алахъзава, Маизатан аялрал иллаки рикI ала. Ада алатай йисуз районда кьиле фейи тербиячийрин конкурсдани 2 - чка кьунай, чун адан кIвалахдал гзаф рази я.
Ремонтдин ва михьивилерин кIвалахар лагьайтIа, и вацра кьиле тухун фикирдик ква. Чи бахчадин полар куьгьне хьуниз килигна, цIийи авунайтIа ва месин агъар (постельное белье) цIийибур хьанайтIа кIандай. Гатун вахтунда чавай аялар ракъиник гьаятдиз акъудиз жезвач, аялриз къугъвадайла серин жедайвал кьур авуна кIанзава.
Чи бахчадихъ террористриз акси паспорт, цIуз акси сигнализация, лицензия авазва, амма са зеленка туькIуьриз гъиле ама.
Эхирдай захъ мад са тIалабун ава, чи ясли - бахчадихъ аялриз менфят къачун патал интернет хьанайтIа кIандай.
-Чухсагъул квез чахъ галаз сугьбет авунай.

-------------------------------------------------------------------------------------------

П.Мисриева.
Спортсменар кьабулна
4-августдиз "Кьурагь район" муниципальный тешкилатдин кьил З.Азизова вичин кабинетда Ахцегьа "Шарвили" эпосдиз талукьарна кьиле тухвай акъажунра иштирак авур спортсменар кьабулна. Акъажунар гъилер кьунай, гиря хкажунай (толчок 32 кг) ва къван гадарунай кьиле фена. Акъажунар халкьдин арада гзаф машгьур спортдин жуьреяр пайда авунин, спортдин рекьяй чирвилер артухарунин, Дагъустандин спортсменрин арада дуствал мягькемарунин мураддалди кьиле тухвана.
ИкI, кьиле фейи акъажунра сад лагьай чка Сулейман-Стальский райондин командади, кьвед лагьай чка Кьурагь райондин командади, пуд лагьай чка Мегьарамдхуьруьн райондин командади кьуна.
ГьакIни 8 кг заланвал авай къван гадарунай сад лагьай чка Рамиз Рамазанова, пуд лагьай чка Замир Бабаева, гиря хкажунай пуд лагьай чка Абдулазиз Мисриева кьуна. Гьелбетда, им чи гъвечIи райондиз еке тир агалкьун я.
З.Азизова абуруз и агалкьунар хушвилелди мубаракна, къведай йисуз генани еке агалкьунар къазанмишдайдак умуд кутазвайди лагьана ва спортсменриз пулдин пишкешар гана.
--------------------------------------------------------------------------------------------

Начальник УСЗН
в МО "Курахский район" С.М.Джамалдинов.

Информация для граждан, получающих ежемесячные денежные выплаты по оплате жилого помещения и коммунальных услуг
УСЗН в МО "Курахский район" информирует, что в соответствии с Постановлением Республиканской службы по тарифам РД от 31 марта 2015 года за № 6 "Об установлении цен (тарифов) на электрическую энергию для населения и приравненным к нему категориям потребителей по Республике Дагестан на 2015 год".
Цена за электрическую энергию для населения, проживающее в сельских населенных пунктах и приравненные к ним с 01 июля 2015 года установлено в размере -1,56 руб./кВтч.
С 1 июля 2015 года установлены розничные цены на природный газ по различным наборам направлений:
1. На приготовление пищи и нагрев воды с использованием газовой плиты (в отсутствие других направлений газа)-4,77 руб/куб.м.
2. Отопление с одновременным использованием газа на другие цели-4712,81 руб/тыс,куб,м.
Розничная цена на сжиженный газ реализуемый населению с 1 июля 2015 года установлено в размере-16,28 руб.кг.
В связи с изменениями цен (тарифов) с 01 июля 2015 года сумма ежемесячных денежных выплат по жилищно-коммунальным услугам изменится.

--------------------------------------------------------------------------------------------

Атлухан Рагьимханов.
Михьиз ремонтнайтIа хъсан тир
КIирийринни КьепIиррин хуьруьн арада авай "Кьуру муьгъ" тIвар алай муьгъ фадлай бубайри авунвай имарат яз ишлемишзавай, къвез-къвез ам куьгьне хьана, ферер атанвай. Идалай гъейри алатай йисуз са "пагьливанди" адан тумбаяр машиндал яна гадарна. И крар вири фикирда кьуна Кьурагь районда ГИБДД-дин цIийиз хтанвай начальник Рамазанов Рамалдана и кардал ОАО "Курахский ДЭП № 23" фикир желбна.
Нетижада муьгъ ремонт авун гъиле кьуна, устIарарни Ашай гъана, са куьруь вхтунда гьавадин татугайвилеризни килиг тавуна кIвалах кьилиз акъудна.
Муькъуьн агъа пад 6 м кьакьанвал аваз, 6 м яргъивал аваз ва 2 метридилай артух гьяркьуьвал авай монолит хьиз туькIуьрнава.
Инал устIар Апаев Рафидина ва адан куьмекчи Агьмедов Агьмеда еке зегьмет чIугуна, мукьуфдивди авунвай кIвалах аквазва.
Чун анал алайла ОАО "Курахский ДЭП №23"-дин начальник Л.Агъабалаев анал атана. Малум хьайивал пулдин такьатар хьайитIа, муькъуьн муькуь падни гьяркьуь авуна ва тагъни цIийи хъийидайвал я. Къейд ийин хьи, михьиз муьгъ ремонтна, гьяркьуь муькъвелай шоферризни регьятвилер хьана, мад хата балани хьаначиртIа хъсан жедай.
Чаз и кардик умуд кутаз кIанзава ва устIарриз еке чухсагъул лугьуз кIанзава.

---------------------------------------------------------------------------------------------

Чир хьун хъсан я
Ахвар тахьай йифелай гуьгъуьниз беден зайиф жезва. И кар себеб яз азаррини кьил хккажзава. Вуч ийин?

Ксудалди вилик сейр ийин
Чи ата-бубаяр ахварив тух жезвай, вучиз лагьайтIа электричество авачир: рагъ акIанамаз ксузвай,сифте кIекери гьарайнамаз, рагъ акьурла, ахварикай кватзавай. Бес чна ксудалди вуч ийизвай? Ял ядай багъда сейр ийизвани? Къуръан кIелзавани? Мад вуч? Чун боевикриз килигзава, кIвалин крар хъийизва, ахпа садлагьана ахвариз фена, кьилни беден секин хьана кIанзава. Амма абурун кьил чпивай вуч кIанзаватIа акъатзавач. Ахвардалди вилик 2-3 сят амаз кьилиз, бедендиз гуж гудай кIвалахар акъвазарун герек я эхир.

Ксузвай чка анжах ахвар патал!
Квез чидани таза аялриз хур ( тIуьн) кроватдал гун вучиз меслят къалурнавачтIа? Герек аял гъавурда акьан:кровать анжах ксун патал я, тIуьн-хъун, къугъунар маса чкадал авуна кIанда. Амма чун ксузвай чкайра телевизор, телефон ва, Аллагьдиз чир хьуй, мад вуч жезватIа. Ихьтин чкада мефтIеди гьикI кьил акъудрай,ксудани, гуьгьуьлар шад яз къугъвадани?

Гьикьван ксуда?
Кьилди куьн ксун патал шумуд сят герек ятIа, гьикI чирда? Ирид сят герек ахвар авунилай башламиша. Эгер пакамахъ куьн лап фад ахварай аватзаватIа, няниз 15 декьикьадин геж ксус. Себеб хьанач ман? Са гьафтедилай ахвар мад 15 декьикьадин тIимилар ая. Эгер куьне юкъуз ахвар галайди гьисс ийизвайтIа, квез ахвар бес жезвайди туш. Ихьтин дуьшуьшда 15 декьикьадин фад ксус. Гьа икI гьафтеда 15-15 декьикьадин ахвар ийидай вахт алава хъувурла, куьне йифиз секинвал, юкъузни хъсан гуьгьуьл гьисс ийида. Жуван организмдиз яб це, ахвар тартибдик кутаз квез гьада вичи куьмек гуда.

--------------------------------------------------------------------------------------------

Малумат
Белиж поселокдин "Заготзерно" фирмади лапагдин ва малдин як кьабулзава.
Лазим информация агъадихъ галай телефондин нумрадиз зенг авуна, Дадашев Даниял Энверовичавай къачуз жеда.
тел: 8-928-570-35-08
---------------------------------------------------------------------------------------------

Утерянный аттестат о среднем общем образовании за № 05 АА 000 1344, выданный в 1999 году Хвереджской СОШ Курахского района РД на имя Ахедадова Рамазана Раджабовича, считать недействительным.

---------------------------------------------------------------------------------------------

Информацийрин технологийрий ва печатдин работникри Мамедова Адинатаз къари ГЬАМИЯТ рагьметдиз финихъ галаз алакъалу яз башсагълугъвал гузва.

---------------------------------------------------------------------------------------------
 

 

Комментарии (0)

Нет комментариев. Ваш будет первым!