Газета №34

П.Магьарамова.
Кар алай проектар-уьмуьрдиз
Зегьметдиз къиметни жеда
Гатуз кат-калтугиз салара, багълара, никIера, чуьллера кIвалах бул жеда. Хуьруьн майишатда чIугур зегьметдин бегьер кIватI хъийидай вахт алукьнава. Эхиримжи йисара вири районра хьиз чи райондани хуьруьн майишатдиз кьетIен фикир гузва. РД-дин Кьил Рамазан Абдулатипован Дагъустан вилик финин кар алай проектрал амал авуна Кьурагь райондин Бугъдатепе хуьруьн майишатра вуч кIвалахар тухузватIа чун ахтармишиз фенвай.
Бугъдатепедин хуьруьн администрациядин кьил Аскер Жабраиловахъ галаз гуьруьшмиш хьайидалай кьулухъ, ада чаз чпи кутунвай емишрин тарар авай багълариз килигун теклифна.
Багълар акурла чаз малум хьайивал, цIи бегьер гудай мублагь йис жеда. Гьелбетда, им еке тир зегьмет чIугурла арадал атанвай бегьер я.
Аскер Жабраилова чаз чпин хуьре агъзурдалай виниз инсанар яшамиш жезвайди ва халкьдиз кIвалахдай чкаяр хьун, хуьруьн майишат хкажун патал ина кьуд СПК-ни, кьуд КФХ кардик квайди къейдна.
-Жабраилов Эмиргьамзадин "ЮГ" СПК къачуртIа, ина 50 гектар уьзуьмрин багъ, 5 гектар хутарин багъ, 95 гектар къуьл ва кьуд гектар люцерна кутунва. И никIера 10 касди гьамиша, 50- дав агакьна ксари сезондин кIвалахар башламишайла зегьмет чIугвазва,- лагьана А. Жабраилова.
-Алай вахтунда хутарин багъ чранва, хуьруьн бригадади кIватIиз башламишнава, къачудай (реализоватдай) ксар кIанзава.
Къуьл цанвай ник къе комбайн атайтIани гвен гуьдайвал ава, комбайн къведалди акъвазнава, амай техника кIвалахиз гьазур я.
"ЮГ" СПК-ди серкер 200 тонна, цирияр 200 тонна, уьзуьмрин пешер 20-30 тонна, 100 тонна къацу помидорар,15-20 тонна гьажикIаяр гьазурзава.
Жабраилов Эминан "Бумеранг" СПК-да 17 гектар хутарин багъ кутунва, жегьил багъ яз гьеле бегьер ганвач.
Жабраилов Шалбузан "Нептун" СПК-да 2 гектар къарпузар, 2 гектар кулар, 3 гектар вире балугъар кутуна гьабурал машгъул я.
"Берекат" СПК-дин директор тир С.Сайидова 50 гектар уьзуьмрин, 4 гектар хутарин багъ кутунва, 20 гектар техил цанва. Техил кIватI хъийиз гъиле ава, гьар са гектардай 22 центнер техил къачузва.
Виридалайни хъсан бегьер хутари ганва, чун рази я, реализовать авуна кIанзава.
Чуьлдин кIвалахар арадал гъизвайди вири чи хуьруьнвияр я. Гьамиша кIвалахзавай инсанриз 15 агъзурав агакьна, гьар юкъуз кIвалахзавай бригададиз са касдиз йикъа 700 манат гуз меслят хьанва.
Амма лугьун лазим я хьи, абур кIвалахал желб ийиз чаз са тIимил четин жезва. Вучиз лагьайтIа, инсанар вилик вахтара хьиз никIерин, чуьлдин кIвалахрив вердишзамач. ЦIи кьурагь йис хьуниз килигна, салариз гудай цин патахъай чаз са тIимил четинвал ава.
Хуьруьн майишатра 200 тоннадив агакьна векьер кIватI хъувунва. Вири чпин гад агудунин кIвалахрал машгъул я.
Зегьмет гьамиша къимет авай шей я, гьаниз килигна чун авай кимивилер арадай акъудна хуьруьн майишат хкажиз чалишмиш жезва.

--------------------------------------------------------------------------------------------

З. Саидова.
Зегьметни чIугвазва-хийирни къачузва
Ингье гатун чими ва гуьлуьшан йикъари арандин майишатрин зегьметчийрин вилик жавабдар везифаяр эцигна, абурун къайгъуяр артухарзава. Алай вахтунда амай вири районра хьиз, аранда авай чи райондин СПК-рани гатун кIвалахар ийиз, яни гьам техил, гьам майва, гьамни яр-емиш кIватI хъийиз гьерекатзава.
ИкI, Кумухърин Улубеков Руслана регьбервал гузвай "Кумук" тIвар алай СПК-дини чпин кIвалахар ийиз гьерекатзава. Ина пуд теплицада гьар са теплицада са сорт помидорар "Пикмеджик", "Белли" ва "Белли F-1" цанва. Гьар са теплицада яд кIватIдай бак эцигнава, абурукни турбаяр кутуна помидордин гьар са кулуниз йикъа 0,5 литр яд фидайвал туькIуьрнава. Герек тир гьава (30 градус) хуьз алахънава.Чкадал агроном тахьуниз килигна, гьафтеда кьве сеферда Дербентдай агроном гъизва. Помидоррилай гъейри ина 1,5 гектар къарпузар, 3,5 гектар келемар, гатун халияр, гьажибугъдаяр, буранар цанва ва 2 гектар шуьмягъдин багъ кутунва.
Зегьмет чIугурла арадал шейни къведа лугьудайвал, ина, дугъриданни, зегьметни чIугвазва, хийирни къачузва лагьайтIа чун гъалатI туш. Алай вахтунда ина 8 рабочийди кIвалахзава. Абуру ина помидорар ва къарпузар кIватI хъийизва, келемар цаз ва абуруз ятар гузва. Лугьун лазим я хьи, кIвалахзавай рабочийриз ина яшамиш жедай кIвалер, чими ва къайи яд, са гафуналди яшамиш жедай вири шартIар тешкилнава. Гьар са рабочийдиз вацра 15 агъзур манат мажиб гузва. Мад ина кIватI хъувур майва маса гудалди хуьдай еке складни ава. Алай вахтунда ина кIватI хъувур помидорар хкиз ящикра тваз маса гуз гьазурзава. КIватIай помидорар оптовикриз меслятдин къиметдай маса гузва. Помидорар твадай ящикар гьазурдай картонар, гьар садахъ 35 манат гуз, Махачкъаладай гъизва.
Чна винидихъ лагьайвал, зегьмет чIугурла я хийирни къачузвайди, ина чилелай хийир къачун патал Руслан Улубеков вични экуьнахъ фад иниз атана кIвалахзавайбурал гуьзчивал тухуз, гьар са кар ахтармишзава. Помидорар кIватI хъувунилай гъейри, ина алай вахтунда 12 тонна къарпузар кIватI хъувуна, маса ганва. Гатун халияр, буранар гьеле агакьнавач. ЦIийиз кутунвай келемар ноябрдин вацра кIватI хъийида.
Чаз, хайи чилиз икрамзавай, зегьмет чIугуна кар вилик тухузвай квехъ генани еке агалкьунар хьана кIанзава. Идалай кьулухъдини куьне гьа икI зегьмет чIугуна халкьдиз къуллугъдайдахъ чун инанмиш я.

---------------------------------------------------------------------------------------------

П. Магьарамова.
Гад гьарай я!
Хуьруьн майишатра йигиндаказ кIвалах кьиле физва
Чи райондин кьилин хилерикай сад хуьруьн майишат я. РД-дин Кьил Р. Абдулатипован Дагъустан вилик финин кар алай проектрал асаслу яз, эхиримжи вахтара хуьрерин администрацийри хуьруьн майишатдиз кьетIен фикир гузва. Хейлин йисара ишлемиш тийиз гадарнавай чилер гъиле хкьуна, цаз башламиш хъувунва. Чун и йикъара Маллакентдин хуьруьн майишат вилик финин карда вуч кIвалахар тухузватIа килигиз аранда авай хуьрериз фенвай.
Арандавай хуьрерин уполномоченный представитель тир Ибрагьим Меликовни галаз чун "Кутульский" СПК-дин складрал фейила, анал хуьруьн майишатдин, ихтияррин алакъайрин отделдин начальник Селимов Слава кьиле аваз рабочий бригадади къуьл михьи ийизвай машиндал кIвалахзавай.
Слава Селимова "Кутульский" СПК-да гад агудунин кIвалахар вилик физвайди, цанвай 250 гектар къуьлуьникай Арабляр пата авай никIяй 80%, Маллакентдин пата авай никIяй 20% техил кIватI хъувунвайди, алай вахтунда гьа и кIвалахрал машгъул тирди къейд авуна. -Гьар са гектардай Арабляр пата авай никIяй 16 центнер, Маллакентдин пата авай никIяй 28 центнер кIватI хъувунва,-лагьана С.Селимова.
-Арабляр пата авай никIерай бегьер тIимил хьунин себеб ам я хьи, хуьруьн агьалийри чпин мал-къарадин иесивал тавуна, малар никIера туна, гатун магьсулриз кIур гун тир.
КIвалахдай техникадикай рахайтIа, кьве комбайндини прессди кIвалахзава. Самар прессовать ийиз башламишнава. КIани инсанривай къачузни жеда, са туьк 40-50 манатдай маса гузва. Мадни С.Селимова кIватI хъувур 49 гектар векьерикай 12 агъзур туьквер хьайиди къейдна. Хуьруьн майишатда гад агудзавайбур вири хуьруьн агьалияр я. Рабочийриз чпин кIвалахдин гьакъи техилдал, векьерал эвеззава. Къе инал къуьлуьникай ригеяр хкудиз кIвалахзавай дишегьлийри чпиз йикъа кIвалахайла са шешел къуьл гуда лагьана меслят хьанвайди лагьана.
Гуьгъуьнлай чун фейи Маллакентдин никIера комбайндал гвен гуьзвай.
Анал вичин хуьруьн майишатдин кIвалахин нетижаяр кьаз атанвай "сельсовет Маллакентский" муниципальный тешкилатдин кьил Минетулагь Алиевавай гад агудунин кIвалахар гьикI кьиле физватIа хабар кьуна.
Ада сифтени-сифте кицIер, балкIанар галаз хуьруьн агьалийрин мал къарадивай никIер хвена еке тир зегьмет чIугур анин къурухчи Сейфулагь бубадиз чухсагъул лагьана.
-ЦIи кIватI хъийизвай техилдал чун рази я, - лагьана М. Алиева.
-И чун алай 130 гектар СПК-дин чил зегьметдал рикI алай А. Рамазановав, И. Адамовав, С. Рамазановав арендадиз ганвай. Къачур бегьердикай 15% гьабуруз гуда лагьана меслят хьанвай. И никIера кIвалахзавайбур чи хуьруьнвияр я, кIвалахиз ашкъи авай ксар буюр ша, кIвалахар авазва.
Чуьлдин вири кIвалахар йигиндаказ кьилиз акъудзава, векьер кIватIна куьтягьнава.
Хуьруьн агьалийриз, чалай алакьдай вири къулай шартIар тешкилиз чун чалишмиш жезва.
Мумкинвал хьайи арада заз чухсагъул лугьуз кIанзава чи спонсор Мирзе Мирзехановичаз, адан куьмекдалди хуьруьн хейлин кIвалахар вилик фенва. Хуьруьн центрдал алай, халкьдин межлисар ийизвай ким цIийи авунва, хуьруьн къене авай рекьериз кьир цанва. ГьакIни халкь хъвадай целди таъминариз куьмек гунай чи райондин кьил З. Азизоваз чухсагъул.

---------------------------------------------------------------------------------------------

И.Гьададов, Хвережрин хуьр.
Хидир Рамазанован 90 йис
Ватандин ЧIехи дяведин иштиракчи Рамазанов Хидир Хидировичан алай йисуз 90 йис тамам хьанва. Рамазанов Хидир Хидирович 1925-йисан 1-июлдиз чи райондин Усарин хуьре лежбердин хизанда дидедиз хьана.
Адан атабубаяр арабистар тир. Адан буба Рамазан, арабист, фекьи Кьурагь райондинни Агъул райондин хуьрера, гьакI вири Куьреда гьуьрмет авай кас тир.
Вадар аваз Гелхенрин ирид йисан школа акьалтIарай Хидир Рамазанов Бакудин нафтIадин техникумдик экечIна.
Ватандин ЧIехи дяве башламишайла ам 16 йисан яшда аваз, вичин хушуналди фронтдиз фена. Фашистрин Германия кукIварунин женгера активныдаказ иштиракна. Гьукуматдин Кеферпатан Военно-морской флотда къуллугъна, кьетIен чкайриз тайинарнавай военно-морской пар авай гимийрихъ галаз физвай.
Къейд ийин хьи, абуру 4 стхадикай пуд стхади Ватандин ЧIехи дяведин фронтда женг чIугуна, са стха Гьарун Ленинград шегьер хуьдайла, игитвилелди телеф хьана, ЧIехи стха Мегьамед-Эфендиди Иранда советрин кьушунра къуллугъна, кьуд лагьай стха Гьажирамазана Кьурагь ва Агъул районра финансрин органра кIвалахна.
1948-йисуз, ирид йисуз гьукуматдин военно-морской къуватра къуллугъ авурдалай гуьгъуьниз, хайи Дагъустандиз хтана пединститутдик экечIна. Ам Усарин хуьряй кьилин заведенидин сад лагьай студент хьиз, агъул миллетдин арадани ам сад лагьай студент хьана.
Х.Рамазанова вири "5"-дар аваз кIелиз, Сталинан стипендия къачуна. Ам гьана Комсомольский организациядин комитетдин секретарвиле хкяна. Институт агалкьунар аваз куьтягьайдалай гуьгъуьниз аспирантурадик экечIна, ахпа Москвадани Ростовда кандидатский ва докторский диссертацияр хвена. 200-лай виниз научный кIвалахар чапна. Ам РФ-дин ва РД-дин илимдин лайихлу деятель я. Адаз 20 орденни медалар ава.
Алатай асирдин 50-йисара КПСС-дин Дагъустандин обкомдин сад лагьай секретарь А.Д.Даниялова Х.Рамазанов СССР-дин, КГБ-дин органриз рекомендоватна ва 60-70-йисара КПСС-дин Дагъустандин обкомдин сад лагьай секретарь М-С.И.Умаханова са шумудра ДАССР-дин просвещенидин министрвал авунал кIевивал авунай. Гьар сеферда абуруз ада и къуллугъар авунин гьакъиндай ваъ лагьана.
Ам илимдиз фена, тIвар-ван авай историк, Дагъустандин ва Кеферпатан Кавказдин тарихдин патриарх хьана.
Ада СССР-дин илимрин академиядин Дагъустандин филиалда кIвалахдайла, 1961-йисуз ДГУ-дин ректор А.Абилован тIалабуналди тарихдинни филологиядин факультетдин деканвиле кIвалахиз хъфена. Ана ада 25 йисалай виниз кIвалахна.
Ада кIвалахдайла тарихдин факультет вири патарихъай сад лагьайди хьана. КIелунай, жавабдарвиляй, мировоззренидай ва маса хилерай.
Адан уьмуьрда кьилинди руьгьдин инсандин, тарихдин гьахълувал къалурун тир. Къейд ийиз кIанзава хьи, гьина ва гьихьтинди кIвалахар авуртIани ада вичин сергьят авачир зегьмет, Ватан, адан халкь кIан хьун, дуствилиз вафалувал, бажарагълу пешекарвал къалурдай. Гьа ибур мерд дагъвидиз 200-лай виниз илимдин кIвалахар кхьей автордиз хас къилихар я.
Монография, "Шамилан девир" ("Эпоха Шамиля") ктаб 1825-1859-йисара Кеферпатан Кавказдин ва Дагъустандин дагъвийрин женгер гьахълудаказ къалурнавай еке метлеб авай вегьенвай кам я. Яни, нубатдин сеферда Дагъустандин тарихдикай кхьенвай илимдин еке кIвалах я. Тарихдин илим лап вине эцигнавай. ТIвар -ван авай историкдин хьиз, Хидир Рамазанован лайихлувилер Дагъустандин ва Чечнядин тарихдин гьакъикъи делилар дуьздал акъудуналди я.
Историядин патриарх лагьай тIвар адаз дамахдивди лугьуз жеда. "Шамилан девир" ктабди Дагъустандин халкьарин руьгьдин дережа ачухнава. Адаз шейх-имам Шамилан фикир, дагъустанвийрин руьгьдин къанажагъ чидай. Эхир хьи, имам Шамила лугьудай: "Вири халкьар-са Дагъустандин рухваяр, са гъилин тупIар я. Гъуд арадал атун патал гъилин вири тупIар санал кIевиз кьуна кIанда". И гафарихъ кьетIен метлеб ава. Дагъустандин халкьар дегьзаманайрилай инихъ дуствилелди яшамиш жезва, уртах дибар ава. Абуруз дагъустанвияр сад тир халкь тирди чизва. Дагъустандин халкьарин арада мидявал авайди туш ва хьунни мумкин туш. Халкьарин векилрин арадани къал-макъал тек-бир жезвайди я.
Чун, дагъустанвияр, са халкь я. ЧIалаз, культурадиз, адетриз, гьакI къилихриз, уьмуьр тухунин къайдайриз уртах дувулар ава ва абурун арада са акьван тафаватни авач. Чна ва чи ата-бубайри Дагъустандин вири халкьариз викIегьвиляй, дирибашвиляй, гьахълувиляй гьуьрмет авурдини я ва ийизвайдини я.
Россиядин ва дуьньядин вири халкьари дагъустанвийриз и кардин гьакъиндай хъсан къимет гузва, абурун руьгьдин гуьзелвилел гьейран жезва.
Мад сеферда къейд ийиз кIанзава, Х.Рамазанова вичин кхьенвай кIвалахра Дагъустандин халкьарин садвал кьетIендаказ къейдзава. Абур садрани провокацийриз фейиди туш.
Хейлин йисара исторический факультетдин декан яз кIвалахдайла, ада вич гьахъвал гвай, михьи, намуслу кас яз къалурна.
Гьи месэла гьялиз хьайитIани, ада сифте чкадал инсандин бахт эцигдай. Са студентни, абурун садан диде-бубани ада вичелай нарази яз рахкурдачир, абуру адаз гьуьрметдай.
Х.Рамазанован илимдин дережа завай михьиз къалуриз жезвач, амма кхьин тавунани завай жедач, зи рикIи зун секиндиз тазвач.
Х.Рамазанован илимдин кIвалахрикай ва адан инсандиз хас къилихрикай Дагъустандин машгьур профессор, историк, ДГПУ-дин муаллим РФ-дин ва РД-дин илимдин лайихлу деятель Мегьамед Гьасанова мукьвал-мукьвал газетриз ва журналриз акъудзава.
Гьа и кардай адаз усувийри, дустари, мукьва-кьилийри чухсагъул лагьана.
Х.Рамазановаз Дагъустандилай къеце, Москвада, Санкт-Петербургда, уьлкведин вири пипIера дустар ава.
Ростовдин госуниверситетдин ректор, химиядин илимрин доктор, СССР-дин Ленинграддин КПСС-дин обкомдин сад лагьай секретарь А.А.Жданован хва Ю.Жданов Махачкъаладиз атайла, Х.Рамазановаз мугьман жедай.
Хидир Рамазанов гьамиша гьуьрметлу кас яз амукьда. Адаз РД-дин Кьил Р.Абдулатипова, ДГУ-дин ректор М.Х.Рабаданова чпин учитель ва насигьатчидиз хьиз гьуьрмет ийизвайди я.
Зун гзаф шад я, Хидир Хидировичахъ къуват, руьгьдин гужлувал ама, ада ДГУ-да вичин кIвалах давам хъийизма.

---------------------------------------------------------------------------------------------

З. Саидова.
Дин
Кукваза мискIин ачухна
Советрин властдин вахтунда дин къадагъа авуна, хуьрера авай мискIинарни чкIурай чкаяр хьана, гьатта капI-тIеат ийидай ксарни лап тIимил тир. Амма чи чIехи бубайри гьа вахтундани капI авун акъвазарнач. Советрин власть чкIайдалай гуьгъуьниз диндиз кьетIен фикир гана капI-тIеат ийидайбурун кьадарни къвердавай гзаф жезва. МискIинар авачир хуьрерани шегьерра мискIинар эцигзава, куьгьне мискIинар ремонт хъийизва.
ИкI, 25-июлдиз Куквазрин хуьре цIийи мискIин ачухна. МискIин ачухдайла иниз Дербент шегьердай, Кьурагьрин хуьряй, чи райондин амай хуьрерайни мугьманар атанвай. МискIин ачухдайла инал сифте нубатда райондин имам Шамил-гьажи рахана. Ада инал кIватI хьанвайбуруз и вакъиа мубаракна, им еке шадвал тирди лагьана ва мискIиндин имамвиле Рагьимханов Сейфулагь хкяна. Гуьгъуьнлай вирида "Зикр" кIелна. Мад инал КьепIиррин мискIиндин имам Бугъаев Рамазан, Дербентдай атанвай Магьди-гьажи ва масабур рахана. Къейд ийин хьи, "Кьурагь район" муниципальный тешкилатдин кьил З. Азизован патайни мискIиндиз пишкеш гана. Мад мискIиндиз "сельсовет Ашарский" муниципальный тешкилатдин кьил Гьажиев Ражидинани пишкеш яз Аллагьдин келимаяр авай цлал алкIурдай рамка багъишна.
Нисинин капI авурдалай гуьгъуьниз мискIиндин къвалав гвай багъда суфраяр ачухна, садакьадин тIуьнар дадмишна.
Къуй чи акьалтзавай несилди дуьз рехъ хкяна, арада гьуьрмет ва берекат аваз яшамиш хьурай! Къуй виридан рикIера ислам, кIвалера садвал, гьуьрмет ва берекат хьурай!

---------------------------------------------------------------------------------------------

Сивер хуьникай гьакъикъи гьадисар
(Эхир. Эвел кьил 32-нумрада)
7. Имам Агьмада ва Байгьакъиди гьадис агакьарнава: "Сив хуьн-къалхан ва жегьеннемдин цIукай хуьдай къачуз тежер къеле я".
8. Агьмада, ТIабараниди, Ибн Аби-д-Дуньяди Умаран хва Абдуллагьалай Пайгъамбардин гьадис агакьарна: "Сив хуьни ва Къуръан кIелуни лукIран тереф хуьда. Сив хуьни лугьуда: "Я Аллагь, за ам тIуьникайни бедендин къизгъин гьевесрикай хвена, гьавиляй зи шафаат кьабул". Къуръанди лугьуда: "За ам йифен ахварикай магьрумна, кьабул зи шафаат". Ахпа абурун тIалабунар кьилиз акъудда" (Гьаким).
9. Байгьакъиди, ТIабараниди, Агьмада ва масабуру Саламат бин Къайсара ахъайнавай гьадис агакьарна: "Аллагьдин разивал къазанмишун патал са юкъуз сив хвейи инсан Ада жегьеннемдивай акьван яргъаз акъудда хьи, гьатта а мензил пехъревай вич хайи йикъалай кьуьзуь жедалди атIуз жедач".
10. Ибн Мажагьа Абу Гьурайрадилай Пайгъамбардин гьадис ахъайна: "Гьар са шейинихъ вичин михьивал ава. Бедендин михьивал сив хуьн я. Сив хуьн сабурдин са пай я".
11. Имам Агьмада ва Исфагъаниди Абу Гьурайрадилай агакьарна: "Аллагьдин разивал къазанмишун патал сив хвейи ва гьа юкъуз кечмиш хьайи кас женнетдиз фида".
12. Гьузаймади ва Насаиди Абу Усаматалай агакьарна: "За Пайгъамбардиз лагьана: "Эй Аллагьдин Расул! Заз са шей чира". Пайгъамбарди жаваб гана: "Вуна гзаф сивер хуьх, сив хуьнихъ галаз гекъигиз жедай затI авач". И гьадисдин якъинвал Гьакима тестикьарна. Гьадисда мад лугьузва хьи, Усамата вичин суал кьве сеферда тикрар хъувуна ва Расулуллагьди вичин жаваб тикрар хъувуна.
13. Бухариди, Тирмизиди, Насаиди Абу Саидалай агакьарнавай гьадисда лагьанва: "Аллагь патал са юкъуз сив хвейи кас Аллагьди гьар гьикI хьайитIани, жегьеннемдивай ирид виш йисан мензилдин яргъаз акъудда".
14. Якъин цIиргъ авай гьадис ТIабараниди Абу Дардадилай агакьарна: "Са йикъан къене сив хвейи инсандинни жегьеннемдин арада чилинни цавун арада авай кьван мензилдин сенгер ийида".
---------------------------------------------------------------------------------------------

Информационное сообщение
Уважаемые руководители районов, населенных пунктов и сельхоз предприятий Южного региона Дагестана
Руководство государственного профессионального образовательного бюджетного учреждения "Республиканский сельскохозяйственный колледж №1". Дагестанские Огни РД извещает Вас о том, что наш инженерно-педагогический коллектив с этого года по указанию руководства республики активно включился в работу по реализации главного приоритетного президентского проекта "Эффективный агропромышленный комплекс". Нами разработана целевая Программа, охватывающая все направления и идеи по внедрению проекта в жизнь. В соответствии с утвержденным нашим учредителем МОН РД и согласованным с аппаратом президента Программой мы обязаны дважды в году информировать Аппарат президента и Учредителя о результатах реализации Программы.
Наша основная задача заключается в подготовке квалифицированных сельскохозяйственных и других необходимых для сельских местности специалистов, а так же переподготовка и повышение квалификации с/х работников.
С сентября этого года мы начинаем подготовку специалистов среднего звена на базу 9 кл. (3г 10 мес) и на базе 11 кл. (2г 10мес) на бюджетной основе по следующим профессиям:
-механизация с/х хозяйства (техник- механик, водитель категории "ВС", тракторист с/х производства кат. "ВСЕF");
-агрономия (агроном, старший агроном);
-ветеринария(ветеринарный фельдшер);
-экономика и управление (бухгалтер по отрасли, специалист по налогообложению);
-банковское дело;
-техносферная безопасность и природоустройство (пожарная безопасность).
Мы так же продолжаем подготовку специалистов по рабочим профессиям на бюджетной основе (на базе 9 кл. -г 10 мес, на базе 11 кл.- 10 мес ):
-тракторист-машинист (слесарь по ремонту с/х машин и оборудования, водитель категории "ВС", тракторист с/х производства "BCEF":
В - гусеничные и колесные машины двигатель мощн.до 25,7 кВТ
С- колесные машины двигатель мощн. от 25,7 кВТ до 110,3 кВТ
Е-гусеничные машин двигатель мощн. вышн 25,7 кВТ
F - самоходные с/х машины комбайны);
-автомеханик (слесарь по ремонту, водитель автомобиля кат. "ВС");
-сварщик (газо-, электро-сварщик);
-портной (швея, портной);
-электромонтер (электромонтер, водитель категории "ВС");
-мастер по обработке цифровой информации (оператор ЭВМ и ВМ);
-мастер по ТО и ремонту МТП (мастер по обслуживанию МТП, слесарь по ремонту, водитель автомобиля кат. "ВС", тракторист кат. "BCEF").
Поступавщие на базе 9 кл. получают также среднее полное образование без ЕГЭ.
Кроме того на базе колледжа функционирует платное отделение по ускоренной (от 2 до 10 мес) подготовке по следующим профессиям:
-водитель автомобиля кат. "В" - 13000р.
- кондитер- 6200р.
-водитель автомобиля кат. "С" - 15000р.
-парикмахер-6200р.
-водитель автомобиля кат."ВС"-20000р.
-повар - 10000р.
-оператор швейного оборудования -6000р.
-портной-6000р.
-слесарь по ремонту автомобилей-10000р.
-оператор ЭВМ-10000р.
-электрогазосварщик-20000р.
- мл.мед.сестра-20000р.
Обобщая вышеизложенное и на основании ранее заключенного с Вами договором приглашаем Вас к тесному сотрудничеству по совместной по реализации приоритетного президентского проекта "Эффективный агропромышленный комплекс". К этому призывает нас с Вами и руководство республики. К концу сентября 2015 г мы должны представить первую информацию в Аппарат президента об обучающихся в колледже по всем районам Южного Дагестана.
Мы готовы принять на учебу любого Вами направленного абитуриента без вступительных испытаний, в т.ч. и по профессиям СПО и организовать для них обучение по устраиваемой вашего подопечного форме: очно, заочно, очно- заочно, экстернат.
Колледж располагает необходимой учебно-материальной базой, кадровым составом, помещениями для культмассовых, спортивных, воспитательных мероприятий, общежитием, всем обучающимся выплачивается стипендия.
Руководителям районов просим раздать наше к Вам обращение всем руководителям населенных пунктов и с/х предприятий.
По возникшим вопросам обращаться по моб.тел.:8(960)4201875
С уважением директор ГПОБУ "РСХК №1" А.С.Абасов.

---------------------------------------------------------------------------------------------

Утерянный сертификат на материнский капитал серии МК-4№0385862, выданный УФО ПФР по Курахскому району РД 19.10.2011 г. на имя Халиловой Диляры Рамазановны, считать недействительным.

---------------------------------------------------------------------------------------------




 

Комментарии (0)

Нет комментариев. Ваш будет первым!