Газета №31

 Райадминистрацияда
Нубатдин совещанидал
29-июндиз райадминистрациядин актовый залда идарайрин руководителрихъ галаз гьар ислен юкъуз кьиле тухузвай совещание хьана. Совещание "Кьурагь район" муниципальный тешкилатдин кьил З.Азизова ачухна ва кьиле тухвана.
"Кьурагь район" муниципальный тешкилатдин администрациядин кьилин везифаяр вахтуналди тамамарзавай М.Хариева налог кIватIунин гьал гьикI аватIа информация гана.
Газетар ва журналар йисан кьвед лагьай пай патал подписка авунин гьакъиндай совещание тухвайди, саки вири идарайри подписка хъувунвайди, райондиз ганвай план хьанвайди лагьана.
"Кьурагь район" муниципальный тешкилатдин администрациядин кьилин заместитель Э.Исаевади къейд авурвал, Ашарин хуьруьн администрацияди 54 агъзур чилин налог кIватIнава, эменнидин налог кадастровый счетар дуьз тахьуниз килигна, кIватIиз хьанвач, Гелхенрин хуьруьн администрацияди 10 агъзур чилин, эменнидин 5 агъзур налог кIватIнава, Усарин хуьруьн администрацияди чилин 70 агъзур эменнидин 8 агъзур налог кIватIнава.
Райондин образованидин отделдин начальник Р.Катибова ЕГЭ-яр вахкана куьтягь хьанвайди, гьеле резервный ЕГЭ-рин нетижаяр чир тахьанвайди, 10 аял къизилдин медаль гуниз къалурнавайди, амма са аял вири классра къецепатан чIалай предмет кIел тавунвайвиляй хкатайди, са аял ЕГЭ-дай кьве предметдайни хъсан нетижаяр тахьана хкатайди, амай 8 аялдиз къизилдин медалар гуниз гьазур жезвайди, 7 школа квачиз амай школайриз отпускной пулар ганвайди къейдна.
ЦРБ-дин кьилин духтур А. Азимова лагьайвал, больницади пландал асаслу яз кIвалахзава, майдин вацран мажиб вирибуруз ганва, гьар гьафтеда графикдал асаслу яз, хуьрериз диспансеризация ийиз физва, цин месэладин патахъай рахайтIа алай вахтунда яд ава.
Райондин бейкар агьалияр кIвалахал таъминардай Центрдин начальник Гь.Гьажиханова къейд авурвал, ЦЗН-дай бейкарриз гузвай пособие вахт-вахтунда гузва, амма Мегьарамдхуьруьн почтамтдин тахсиркарвал яз геж гузва.
Ветуправленидин начальник Н.Асланова лагьайвал, вахт-вахтунда графикдал асаслу яз профилактикадин кIвалах кьиле тухузва, и йикъара дагъда авай гьайванриз цIаяр атанваз рапар яна, агьалийрин малариз рапар ягъиз жезвач, кас галачирвиляй абур чIурай геж хквезва, я вири санал кIватIна, ядай чка авач, и кардиз хуьрерин администрацийрин кьилери гьич куьмек гузвач.
Райондин агьалияр яшайишдин рекьяй хуьдай управленидин начальник С.Жамалдинова къейд авурвал, вахт-вахтунда выплатаяр гуз алахъзава, амма Мегьарамдхуьруьн почтамптдихъ галаз гьамиша наразивилер арадал къвезва, алай вахтунда 6 млн.500 агъзур манат бурж ала, 6 млн манат коммунальный игьтияжриз вахкузвай пул я, 500 агъзур ЕДВ-дин кьве вацран пул я, ЕДВ и йикъара гуда лагьанва, коммунальный игьтияжриз вахкузвай пулдин такьатрин патахъай финасирование авач лугьузва.
Совещанидал винидихъ рахайбурулай гъейри, райондин Культурно-досуговый центрдин начальник А.Эмирбеков, пенсионный фондунин отделдин начальник А.Назаралиев, райондин казенный ва бюджетдин бухгалтериядин кьилин бухгалтер Р.Асланов ва масабур рахана.
З.Азизова совещанидал рахай гьар садахъ яб акална, кIвалахда авай кимивилер арадай акъудун тагькимарна, подпискадин патахъай тайин информация гун тIалабна.

-----------------------------------------------------------------------------------------

Алван Рамазанова.
Медалар вахкана
30-июлдиз "Кьурагь район" муниципальный тешкилатдин кьил З. Азизова вичин кабинетда райондин школайра вири "5"-ар аваз кIелай аяларив къизилдин медалар вахкана.
ЦIинин йисуз 8 аялдив: Шагьпазова Амина Исабековнадив (Аладашдин юкьван школа), Загьирова Лейла Надировнадив (Кумухърин юкьван школа), Назаралиева Карина Самировнадив (Кумухърин юкьван школа), Мевлютов Альберт Абзутдиновичав (Араблярдин юкьван школа), Батманова Карина Эдуардовнадив (КIирийрин школа-интернат), Эмирбекова Назиля Гьайдаровнадив (КIирийрин школа-интернат), Ибрамхалилова Селминаз Мурадовнадив (КьепIиррин юкьван школа), Рамазанова Залиха Назимовнадив (Шимихуьруьн юкьван школа) медалар вахкана.
З.Азизова лагьана:-"Куь кIелунин 11 йис акъатна, экзаменар куьне вахкана, куь вилик агъзур жуьредин рекьер ачух я. Куьне гьар сада са рехъ-са квез хуш тирди ваъ, гьукуматдиз гзаф хийир гъидайди хкяна кIанда. Алай вахтунда чирвилер авачиз гьич санани лазим туширди школьникриз чизва. Вири къуватар желбна, школа къизилдин медалдалди акъалтIарун патал куьне викIегьвална, чухсагъул квез.
Медалистриз мубаракар "Кьурагь район" муниципальный тешкилатдин администрациядин кьилин везифаяр вахтуналди тамамарзавай М. Хариева, райондин администрациядин кьилин заместитель Э.Исаевади, школайрин директорри, аяларин диде-бубайри авуна.
------------------------------------------------------------------------------------------

Райондин террористриз акси комиссиядин заседанидал
24-июндиз райадминистрациядин заседанийрин залда райондин террористриз акси комиссиядин заседание хьана.
Заседание "Кьурагь район" муниципальный тешкилатдин кьил З.Азизова кьиле тухвана.
Анин кIвалахда учрежденийрин, организацийрин руководителри, мискIинрин имамри, хуьрерин администрацийрин кьилери иштиракна.
Заседанидал кьуд месэладиз килигна:
1. "Гзаф ксар кIватI жезвай ва уьмуьрдиз важиблу тир объектар хуьнин гьалдин гьакъиндай";
2. "Терроризмдин ва экстремизмдин, радикальный диндин тереф хуьзвайбурун вилик пад кьунин карда, диндин общественный организацийрихъ галаз ихтиярар хуьдай, муниципальный тешкилатдин органри, санал тир кIвалахдин гьакъиндай";
3. "Муниципальный тешкилатда инсанар тухузвай, пар чIугвазвай транспортдин инфраструктурайрин гьалдин гьакъиндай";
4. Терроризмдин ва диндин экстремизмдин вилик пад кьун патал хуьрерин поселенийрин кьилери законодательство кьилиз акъудунин гьакъиндай тухузвай кIвалахрин ва ролдин гьакъиндай".
Заседанидал къарагъарай месэлайрай докладар Россиядин МВД-дин Кьурагь райондин ОВД-дин начальник А.Фатуллаева авуна. Гьа и месэлайрай "Кьурагь район" муниципальный тешкилатдин администрациядин кьилин общественный хатасузвал хуьнин рекьяй заместитель А.Исаев рахана.
-----------------------------------------------------------------------------------------

Дин
Сив хуьнин сирер
Пак Рамазандин варз мад сеферда къаршиламишуналди Аллагь-Таалади чаз хъсан крар гзафардай ва чIуру крар туба ийидай мумкинвал ганва. Сив хуьнин гьикмет вуч я, ам вуч патал чи хиве тунва?
Макъала:
Мугьаммад Гьажиев
Малум я хьи, инсан Аллагь-Таалади халкь авунвай лап тамам шейэрикай сад я. Ада чи хиве тунвай гьар са кардин къене чун патал еке гьикмет ва мергьяматлувал ава. Абур неинки руьгьдинни бедендин сагъламвилин, гьакIни эхиратдин югъ патал хийирар ва няметар я. Гьаниз килигна, чи хиве твазвай гьар са кардикай кьве жуьредин (и дуьньяда ва эхиратда) хийир ава.
Алатай, зиндикьрин девирда вич беден патал еке зиян ва ам барбатIун я лугьуз хьайи сив хуьн къачун чна. Исламдин лап сифте кьилера Аллагь-Таалади Къуръанда ихьтин гафар лагьанва: "Квез сив хуьн хъсан я, эгер квез хабар аватIа"( "аль-Бакъара",184).
Чаз алатай 1400 йисан муддатта вуч чир хьанач. Къуръандин кьетIенвал ам я хьи, адан аламатар вахт-вахтунилай дуьздал акъатзава. Къуръанда лагьанвай "Ахпа Чна Чи аламатар къалурда" гафар дуьшуьшдинбур туш.
"Эй иман гъанвайбур, гьа квелай вилик хьайи инсанриз хьиз квезни сив хуьн къалурнава, белки квез Аллагьдикай кичIе жен", -лугьузва Къуръанда. Сив хвейила, инсан вичин невсинин лукIвиляй акъатзава, адан иесидиз элкъвезва.
Каш гуникай инсандин бедендиз хийир авайди анжах ХIХ асирда малум хьана. РагъакIидай пата гьатта каш гуналди инсанар сагъар хъийидай духтурханаярни ачухна. Советрин алимар тир Николаевани Нилова "Недай-хъвадай шейэр" журналдиз ганвай "Каш сагъламвал патал" макъалада икI кхьизва: "Инсан сагълам хьун патал ада йиса пуд гьафтедилай тIимил тушиз ва кьуд гьафтедилай гзаф тушиз каш чIугуна кIанда".
Медицинадин доктор Роберт Бартлоуди субут авурвал, сив хуьниз кьак азардин (рак) тIурар тергдай аламатдин къуват ава. Кьилди къачуртIа, ада кхьизва: "Шак алач, сив хуьни микробар кьинин ва беден михьи авунин карда еке менфят гузва".
Доктор Билл Шернбера къейд ийизва хьи, йиса са сеферда сив хуьн -им уьмуьрдинни жегьилвилин бине я.
Америкадин алимри сив хуьникай авай азарар къалурунин мураддалди ихьтин са эксперимент кьиле тухвана. Абуру чара жез гьазур хьанвай папаринни гъуьлерин кьве десте къачуна. Са дестедихъ галаз психологди кIвалахна. Муькуь дестеда авайбурув сивер кьаз туна.Аламат жедай кар ам хьана хьи, гьа и эхиримжи дестеда авай гьич са хизанни чара хьанач. Психологдин гъилик хьайи дестедикай лагьайтIа, 65% хизанар чкIана.
Алимри къейд авурвал, сив ачухдай вахтунда инсандин беденда чими гьиссер гьатзава. Гьа ихьтин гьиссер адаз вичин мукьва кас акурлани къвезва, ам адаз генани мукьва жезва. Гьа икI, са вацра къене тухвай экспериментдин нетижада чара жез гьазур хьанвай гъуьлни паб чеб-чпиз генани мукьвал хьана.
Сив хуьзвайбурал гуьзчивал тухузвай алимриз каш гуни хамунин хейлин азарар хъсанар хъийизвайдини акуна. Идан себебни сив хуьзвайдан бедендик квай цин кьадар тIимил хьун я. Идалайни гъейри, ахтармишунри субут авуна хьи, сив хуьдайдан ивидик квай холестериндин кьадар ва рикIин азаррин хаталувал хейлин тIимил жезва.
Америкадин алимри генани субут авунва хьи, сив хуьдайла инсандин ивидик шекердин кьадар гьич са дарманни кьабул тавуна къайдадиз хквезва.
Сив хуьни инсан сагъар хъувунин къуват квекай ибарат я? Малум тирвал, бедендин вири къуват аниз атай недай затIар цIурурун патал серф жезва. Инсанди гьич са шейни тIуьн тавурла, адан вири къуват беден сагъар хъувунал ва адак квай герек авачир шлакар акъудунал желб жезва. Идалайни гъейри, гьа и вахтунда хуьрек цIурурдай хукадин ва ратарин системади лап зайифдиз кIвалахзава. Гьавиляй и вахтунда хуьрек тIуьникай гьатта зарарни ава.
Дагъустандин Медицинадин Академиядин доцент М.Мегьамедова лугьузвайвал, Рамазандин варз инсандин йисан биоритмаяр дегиш жезвай варз я, яни и вахтунда инсандин биоритмаяр къведай йис патал цIийи кьилелай туьхкIуьр хъижезва . Им акI лагьай чIал я хьи, инсанди вичи-вич и вацра гьикI тухвайтIа, гуьгъуьнлай къвезвай са йисан къенени гьакI тухуда. Ихьтин мисалар мад ва мадни гъиз жеда.
Гьадисди сив гвай чIавуз къалмакъалар авун къадагъа авунва.
Пайгъамбарди "Сив хуьх куьн сагълам жеда" гафар лугьун дуьшуьшдин кар туш. Гила 14 виш йис алатайла, экспериментальный илимди и кар субутарнава.
Субгьаналлагь! 1400 йис идалай вилик АллагьТаалади чи хиве тур везифа-сив хуьн чи хийирдиз я. Аллагьди чаз вири сивер хуьдай къуватар гурай! Амин!
Эхиратда гузвай няметрилай гъейри и дуьньядани сагъламвал гузвай Аллагь-Тааладиз шукур хьуй.
«Ас-салам» - газетдай къачурди я.

-------------------------------------------------------------------------------------

Ф.Абдурагьманова.
Заседанидал са шумуд месэла гьялна
24-июндиз яш тамам тахьанвай аялрин ихтиярар хуьдай ва абурун крарин рекьяй райадминистрацияда тешкилнавай комиссиядин заседание хьана.
Ам "Кьурагь район" муниципальный тешкилатдин администрациядин кьилин общественный хатасузвал хуьнин рекьяй заместитель А.Исаева кьиле тухвана.
Заседанидин йикъан повесткадал кьве месэла эцигнавай:
1. "Кьурагь райондин общеобразовательный школайра кIелзавай аялрин арадиз экстремизмдин идеяяр гьахь тавунин патахъай ва наркоманиядин вилик пад кьун патал кьиле тухванвай профилактикадин кIвалахрин нетижайрин гьакъиндай";
2. "Гатун вахтунда яш тамам тахьанвай аялриз ял ядай ва азад вахт кечирмишдай чкаяр тешкилунин гьакъиндай".
Заседанидал райондин образованидин отделдин методистар тир Н.Эмиралиева, И.Агьмедова, райондин яш тамам тахьанвай аялрин крарин рекьяй комиссиядин жавабдар секретарь З.Ибрагьимова, райадминистрациядин къаюмвилин ва къайгъу чIугвадай органдин кьилин пешекар З.Шабановади, ЦРБ-дин кьилин духтурдин заместитель О.Гьададова, райондин агьалияр яшайишдин рекьяй хуьдай управленидин начальникдин заместитель Ш. Рамазанова, райондин ЦЗН-дин начальник Гь.Гьажиханова, ОВД-дин тахсиркарвилерин вилик пад кьунин рекьяй участковый инспектор А.Цмиханова, агьалияр яшайишдин рекьяй хуьдай реабилитационный Центрдин пешекар З.Назаралиевади иштиракна.
Сад лагьай месэладай Нажмудин Эмиралиева доклад авуна. Ада чпи школайра кIелзавай аялрал райондин ОВД-дин участковый инспектордин куьмекдалди гуьзчивал тухузвайди, гьакIни школайра психологар, социологар галаз наркоманиядизни, экстремизмдиз талукь тир "элкъвей столар", "классный сятер" гьа и темайрай сочиненияр, шикилар чIугвадай конкурсар кьиле тухузвайди, райондин школайра авай химиядин кабинетра кардик квай лабораторийрин кIвалах ахтармишзавайди лагьана. Аялар наркотикрикай, экстремизмдикай яргъа авун патал диде-бубайрини чпин аялрал гуьзчивал тухун лазим тирди къейдна.
Кьвед лагьай месэладай анал Ш.Рамазанова ва Гь.Гьажиханова чпин докладар авуна. Ш.Рамазанова вичин рахунра къейд авурвал, гьар йисуз управлениди агакь тийизвай гзаф аялар авай, диде ва я буба авачир, кIвалахдик квачир хизанра авай 7-15 йис тамам хьанвай аялриз гатун вахтунда ял ядай чкайриз ракъурдай мумкинвал гузва.
Алай вахтунда и кIвалах вилик тухун патал Министерстводай ОЦ ООО "Южный" лагердиз 10 путевка ганвайди, анжах пулдин такьатар чара тавунмаз чпивай алай вахтунда и кIвалах вилик тухуз тежезвайди лагьана.
Гь.Гьажиханова гьукуматди кьабулнавай къарардалди гьар йисуз чIехи классра кIелзавай аялар кIвалахдал желб авун истемишзавайди лагьана. Амма эхиримжи 4 йисан къене и кIвалах, кризисдихъ галаз алакъалу яз, финансировать тийизвайди и кардиз килиг тавуна 10 йикъан къене аялар кIвалахдал желб авун лазим къвезвайди ва и карда аялрин диде-бубайрин чпин наразивал къалурзавайди къейдна.
Гуьгъуьнлай заседанидал рахай З.Шабанова, З.Ибрагьимов чпиз кьвед лагьай кварталда хтанвай административный протоколрин кар алай месэлайрал акъвазна. О.Гьададова алай вахтунда районда авай начагъ аялар ял ядай чкайриз ракъурунин кIвалах гьи къайдада тешкилнаватIа информация гана.
Заседанидал А.Исаева вири докладчикрихъ лап дикъетдивди яб акална, виридаз кIвалахда авай кимивилер арадай акъудун патал чпивай жедай куьмекар гудайди лагьана.

----------------------------------------------------------------------------------------

Р.М.Пашаев.
74 йисан яшда аваз са акьван яргъал чIугун тавур азардикди, 21-июндиз, Пашаев Рашид Магьарамович кечмиш хьана. Р.Пашаев 1941-йисан 6-майдиз Кьурагьа къуллугъчидин хизанда дидедиз хьана. 1960-йисуз школа акьалтIарна ва колхозда кIвалахиз хьана. 1962-1963-йисара армиядин жергейра къуллугъна. 1964-йисуз Дагъустандин хуьруьн майишатдин институтдиз гьахьна ва 1969-йисуз анин ветеринарный факультет акьалтIарна. Гьа и йисуз институтдин направленидалди Ленинграддин областдин "Винницкий" совхоздиз кьилин ветврач яз кIвалахал ракъурна. 1971-йисан августдилай совхоздай ахъай хъувуна ва Махачкъалада Дагъустандин илимдинни ахтармишунрин ветеринарный институтдиз кIвалахал акъвазна. Ина бруцеллездиз акси вакцина акъудунал машгъул хьана ва нетижаяр комиссияди кьабулна, 1979-йисуз адаз ветеринариядин рекьяй кандидатвилин тIварни гана.
1982-йисуз Пашаев Р. Кьурагь райондин исполкомдин председателвиле хкяна. Жегьил пешекарди вичин бажарагъвал сифте нубатда колхозрани совхозра, амай карханайра эцигунрин еришар йигинарун яз гьисабна ва гьакIа истемишин ийиз хьана. Мал-къарадиз бес кьадар алафар гьазурунни кьилинди яз гьисабуналди маса областрай алафар гьазурай дуьшуьшарни тIимил жедачир.
1990-йисуз Рашид вичин меслятни аваз тIебиат хуьнин идарадиз председателвиле хъфена.
1996-2005 йисара ада райондин ветуправленидин начальниквиле кIвалахна, адалай гуьгъуьнин йисара ва и мукьваралди агъсакъалринни ветеранрин Советдин председатель хьана.
Рашид Магьарамович Пашаева гьина кIвалахнатIани, вич жавабдар, зегьметдал рикI алай инсан яз къалурна. Илим ва экономика вилик тухуник ада вичин пайни кутуна. Гьукуматди адан зегьмет "Республикадин лайихлу ветеринарный духтур" лагьай тIвар гуналди, "республикадин вилик лайихлувилерай", "соцсоревнованидин гъалибчи" медалар, Гьуьрметдин Грамотаяр гуналди къейднава. Халкьдихъ галаз рафтарвилелди кIвалахдай кас тир.
Ада туькIвей хизан тербияламишна: авай 2 хцини кIелна, пешеяр къачуна, Москвада ва Махачкъалада намуслувилелди зегьмет чIугваз, чпин хизанрихъ галаз яшамиш жезва. Рашид Магьарамович Пашаеван экуь къамат ам чидай ва адахъ галаз санал кIвалах авур юлдашрин рикIера гьамиша амукьда. Чна рагьметлудан хизандиз, веледриз, стхайриз-вахариз, вири мукьва-кьилийриз, дериндай хажалат чIугунивди, башсагълугъвал гузва.
Дустарин, юлдашрин, танишбурун са десте.
----------------------------------------------------------------------------------------

Информация
Для граждан получающих ежемесячные денежные выплаты по оплате жилого помещения и коммунальных услуг
УСЗН В МО "Курахский район" информирует, что в связи с принятием постановления Правительства Республики Дагестан от 25 мая 2015 года №156 "О внесений изменений в Порядок осуществления ежемесячной денежной выплаты по оплате жилого помещения и коммунальных услуг отдельным категориям граждан в Республике Дагестан".
Отдельным категориям граждан, работающих и проживающих в сельской местности и ПГТ, указанных в статье 3 Закона Республики Дагестан от 30 декабря 2004 года №64 "О мерах социальной поддержки по оплате жилого помещения и коммунальных услуг отдельным категориям граждан в сельской местности и ПГТ", компенсация расходов на оплату жилых помещений и коммунальных услуг. Осуществляется в денежной форме в виде ежемесячной денежной выплаты по оплате жилого помещения и коммунальных услуг в размере 1000 рублей.
Размер ежемесячной денежной выплаты подлежит индексации один раз в год с 1 апреля текущего года исходя из установленного федеральным законом о федеральном бюджете на соответствующий финансовый год и на плановый период прогнозного уровня инфляции.
И.о начальника УСЗН В МО "Курахский район" Ш.Б.Рамазанов.
-----------------------------------------------------------------------------------------


 

 

 


 

 

Комментарии (0)

Нет комментариев. Ваш будет первым!