Газета №28

 Райадминистрацияда
Гьафтедин нетижаяр кьуна
15-июндиз райадминистрациядин актовый залда райондин идарайрин руководителри авунвай кIвалахдин нетижаяр кьадай ва абуруз анализ гудай совещание хьана.
Совещание "Кьурагь район" муниципальный тешкилатдин администрациядин кьилин заместитель М.Хариева кьиле тухвана.
М.Хариева къейд авурвал, урус чIалай ва математикадай ЕГЭ вахкайди, урус чIалай 93 процент аялри ЕГЭ вахкана, 3 аялдив вахкуз хьанач, математикадай 37 аялдив ЕГЭ-вахкуз хьанач, 9-классдин аялри ГИА хъсан вахкана, къе хкянавай предметрай ЕГЭ вахкузва.
Райондин Культурно-досуговый Центрдин директордин заместитель К.Фейзулаевади лагьайвал, работникри "Каспий гьуьлуьн къерехар" тIвар алаз кьиле фейи фестивалда иштиракна чи райондиз и фестивалда иштиракунай чухсагъул лагьана, 16-17-июндиз райондин Культурно-досуговый Центрда райондин хуьрерин культурадин кIвалерин фестиваль кьиле фида.
Райондин хуьруьн майишатдин отделдин пешекар М.Асланова къейд авурвал, аранда алаф кIватI хъийиз башламишнава, 150 гектар кIватI хъувунва, техникадин патахъай отчетар гьазурзава.
ЦРБ-дин кьилин духтур А.Азимова лагьайвал, больницади пландал асаслу яз кIвалахзава, чIехи яшарин агьалияр 12%, аялар 48% диспансеризация авунва, духтурривай кустовой совещанийра иштиракуниз килигна, диспансеризация активныдаказ ийиз жезвач.
Райадминистрациядин экономикадинни эменнидин алакъайрин отделдин начальник И.Муслимова къейд авурвал, чкадин бюджетдиз 70 процент налог атанва, майдин вацран мажиб гайила лазим кьадар жеда, бухгалтерри порученияр гъалатIар кваз кхьин себеб яз налогни вахтунда агакьзавач.
Райондин казенный ва бюджетный учрежденийрин централизованный бухгалтериядин кьилин бухгалтер Р. Асланова къейд авурвал, алатай гьафтеда 5 школадиз майдин вацран мажиб гана, 7 школадиз пулдин такьатар чара авуна, ясли-бахчайриз и йикъара гуда, алава чирвилер гудай учрежденийриз гьеле хтанвач.
М.Хариева совещанидал рахай вирибурухъ яб акална, авунвай кIвалахриз анализ гана. Дербентдин 2000 йисан юбилейдихъ галаз алакъалу яз чи районди Дербентда са куьче ремонт авуна кIанзавайди, гьавиляй бюджетный работникрин са йикъан мажиб гунин гьакъиндай "Кьурагь район" муниципальный тешкилатдин кьили къарар акъуднавайди лагьана, вири руководителри вахтунда пулдин такьатар кIватIун тIалабна.

------------------------------------------------------------------------------------------

П.Магьарамова.
Чи интервью
Райондин ЗАГС-да
Вахтар къвез алатда, гьадахъ галаз инсанрин уьмуьрарни фида, рикIера амукьдайди авур кIвалахар я. ЧIехи яшда авайбур чпин кIвалахар кьилиз акъудна, акьалтзавай несил кIвалахиз гьазуриз, чи гележег мягькем гъиле хьуник пай кутаз гьавалат жеда.
И йикъара чун центрдал алай ЗАГС-диз мугьман хьана. Райондин ЗАГС-да вахтуналди заведующийвилин везифаяр тамамарзавай, жегьил пешекаррикай сад тир Гьажиева Рукьижат Робертовнадивай вичин кIвалахдикай чаз суьгьбет авун тIалабна.
Куьруь къейд: Гьажиева Рукьижат Робертовна 1991-йисан 3-октябрдиз чи райондин Кьурагьрин хуьре дидедиз хьана. 2008-йисуз Кьурагьрин 2-нумрадин юкьван школа вадралди акьалтIарна. Махачкъаладин ДГТУ-дин финансы и аудит факультетдиз гьахьна. 2013-йисуз гьанаг куьтягьна, Рукьижат Гьажиевади 2014-йисан июндилай ЗАГС-дин заведующийдин везифаяр тамамарзава.
-Рукьижат Робертовна, эвленмиш жезвай жегьилри регистрация авун патал гьикьван вахт вилик амаз арза гана кIанзава ва абуруз вуч документар герек къвезва?
-Гатуз мехъерар гзаф хьуниз килигна, цIийи хизан арадал гъиз кIанзавай жегьилри са варзни кьве югъ вилик амаз арза кхьин, госпошлина яз 350 манат пул почтадиз гайи квитанция ва кьведанни паспортар гъун лазим я. Са бязи вахтара ахьтин дуьшуьшар жезва хьи, инсанар гъавурда акьазвач, закон виридаз сад тирди, фад, тадиз регистрация авун тIалабзавай вахтар жезва. Гьа ихьтин вахтара чаз, эгер эвленмиш жезвай дишегьли кIвачел залан яз хьайитIа, гада армиядиз физ хьайитIа, абурун садан багъри азарлу яз хьайитIа (вуч себеб аваз хьайитIа гьа чкадай) справка гъана абур фад регистрация ийидай ихтияр ава. ЦIийи хизан арадал гъанвайбурун кьадар алай йисан июндалди лагьайтIа, 26 хизан хьанва. И вахтуналди 14 хизан чарани хьанва.
-Са бязи вахтара чIехи хьайила аялдиз вичин тIвар бегенмиш жезвач, чIехи пай инсанриз мусурман тIварар кIан жезва. Ихьтин дуьшуьшра тIвар дегишардайла вуч документар герек къвезва? Чи районэгьлийри чпин аялриз гьихьтин тIварар гзаф хкязава?
-Алай вахтунда гзафбуру тIварар дегишар хъийизва. Мусурман диндал амал ийизвайбуру мусурман тIварар эциг хъийизва. Ихьтин дуьшуьшра тIвар дегишариз кIанзавай касди арза кхьида, паспортдин вири чинрин копияр, хайивилин гьакъиндай шагьадатнама, эвленмиш хьунин гьакъиндай шагьадатнама, аялар аваз хьайитIа, аялрин хайивилин гьакъиндай шагьадатнама, госпошлина яз 1600 манат пул гайи квитанция герек къведа.
Гзафни гзаф чал хайивилин гьакъиндайшагьадатнама гудайла рушариз Амина, Амира гадайриз Мухаммед, Мансур, Абдуллагь тIварар гьалтзава. И йисан июндалди хайи аялрин кьадар районда 94 хьанва.
-Регистрациядик квачиз хьанвай аялдиз куьне хайивилин гьакъиндай шагьадатнама гьи къайдада гузва?
-Ихьтин аял хьайи вахтунда хайивилин гьакъиндай шагьадатнама къачун патал бубавал тестикьарна кIанда, ада вич буба я лагьана адан фамилия, отчество кхьида. Бубавал тестикьарайла аялдиз хайивилин гьакъиндай шагьадатнама гуда. Эгер буба авачир дуьшуьш хьайитIа, дидедивай аялдиз вичин ва вичи хкягъай фамилия, тIвар, отчество гуз жеда.
-Алай вахтунин татугайвилериз килигна, вахтсуздаказ чIуру азаррик ва бедбахтвилерикди дуьньядалай фейибур чахъ тIимил хьанач. Кьиникьрин кьадар гьикьван я?
-Гьелбетда, ихьтин кIвалахар чаз пашман жедай кIвалахрикай сад я. Алай йисан июндалди чи районда кьейибур 45 кас хьанва.
-Чи районэгьлийри куь фикир гьихьтин суалрал желбзава?
-ЧIехи пай вахтара чи патав районэгьлияр документра гъалатIар аваз, тIварцIе, фамилияда гъалатI аваз, хайивилин гьакъиндай шагьадатнамада са къайда, паспортда маса къайда кхьенваз къвезва, месела: "а" гьарф кхьенвай чкадал "о" гьарф кхьенваз. Гьа ихьтин арзаяр гваз атайла, чавай дуьзар хъжедай документ туькIуьр хъийизва, чавай тежедай гъалатIар хьайила, суддин решенидин куьмекдалди туькIуьр хъийизва.
-Чухсагъул чахъ галаз суьгьбет авунай. Квехъ куь кIвалахда еке агалкьунар хьурай.
-Куьнни лап сагърай.

--------------------------------------------------------------------------------------------

Решения о назначении выборов депутатов Собрания депутатов муниципальных образований смотреть здесь

 

Ф.Абдурагьманова.
Спорт
Футболдай турнир кьиле тухвана
Алай йисан 8-10-июндиз Кьурагьа гьар йисуз адет хьанвайвал, Куквазрин хуьряй тир, 1999-йисуз Дагъустандал вегьей международный бандитрин дестеяр терг ийидайла телеф хьайи РД-дин МВД-дин ОМОН-дин капитан Султанов Закир Куругълиевичан кубок патал футболдай турнир кьиле фена.
Лагьана кIанда хьи, футболдин турнир чи районда иллаки жегьилрин арада лап магьшур спортдин турниррикай сад я.
Алай йисуз ам Россиядин Йикъан сергьятра аваз кьиле тухвана.
Турнирда иштирак авун патал и юкъуз Кьурагьрин хуьруьз хейлин мугьманар, жегьилар атана ацIанвай.
Футболдай ихьтин турнир кьиле тухунин кьилин макьсад чи районда спорт ва сагъламвилин къайдаяр вилик тухун, З. Султанован экуь къамат гьамишалугъда рикIера хуьн ва акьалтзавай жегьил несил ватанпересар яз тербияламишун тир.
Лагьана кIанда хьи, лап хцидаказ кьиле фейи акъажунра 1-чка ва турнирдин чемпионвилин тIвар "Курах1" командадиз ва 2,3-чкаяр "Гияр", "Беркут" тIварар алай командайри кьуна.
КIвенкIвечи чкаяр кьур командайриз кубокар, медалар, грамотаяр ва рикIел аламукьдай пишкешар гана.
ГьакIни, турнирдин виридалайни хъсан вратарь хьайи Фейзуллаев Шагьабудиназ, виридалайни хъсан защитник хьайи Мамедов Эмирбегаз, виридалайни хъсан нападающий Алибеков Эдгараз кьилдин пишкешар гана. Идалайни гъейри, турнирдин виридалайни хъсан игрок хьайи Бабаев Русланаз, Кьурагь райондин Казначействодин начальник Гьасанов Далгата вичин патай кьилдин пулдин пишкеш гана.
Турнирдин эхирдай спортсменриз чпихъ спортдай хьайи агалкьунар мубарак авун патал, инал рахай "Кьурагь район" муниципальный тешкилатдин администрациядин кьилин заместитель М.Хариев, райондин физкультурадинни спортдин ва жегьилрин крарин рекьяй отделдин начальник Р.Рамазанов ва РОВД-дин начальник А.Фатуллаев рахана.
Вири спортсменрихъ чандин сагъвал ва спортдин рекье гьар садахъ генани еке агалкьунар хьурай лагьана. А.Фатуллаева Кьурагьрин футболдин сборный командадиз вичин патай пишкеш яз пуд футболдин кIватI багъишна.
-----------------------------------------------------------------------------------------

 

Комментарии (0)

Нет комментариев. Ваш будет первым!