Газета №27

Тебрик
Гьуьрметлу районэгьлияр!
Чна квез алукьнавай Сив хуьнин варз рикIин сидкьидай мубаракзава! Къуй алукьнавай пак тир Рамазандин варз исламдин руьгьдин ахлакьдин хъсан адетрин, ислягьвал кIанивилин, сабурлувилин, къвалав гвайбурун патахъай къайгъударвал авунин лишандик кваз фирай. Къуй ада гьар са районэгьлидин кIвализ хушбахтлувал, берекат гъурай, къени умудар кьилиз акъатдайвал авурай. Чаз вири районэгьлийрихъ мягькем сагъламвал, ислягьвал ва хушбахтлувал хьана кIанзава.
З. Азизов, "Кьурагь район" муниципальный тешкилатдин кьил;
С. Гьамидов, "Кьурагь район" муниципальный тешкилатдин администрациядин кьил.

-----------------------------------------------------------------------------------------

Райадминистрацияда
Са шумуд месэладиз килигна
30-июндиз райадминистрациядин актовый залда хуьрерин администрацийрин кьилерин, секретаррин, райадминистрациядин кьилин заместителрин, аппаратдин работникрин, райондин хуьрерин поселенийрин кураторрин, Росреестрдин территориальный органрин работникрин, райондин организацийрин, учрежденийрин руководителрин, школайрин директоррин ва ясли-бахчайрин заведующийрин, общественностдин векилрин иштираквал аваз совещание кьиле фена.
Совещание "Кьурагь район" муниципальный тешкилатдин кьил З.Азизова кьиле тухвана.
Анал кьуд месэладиз килигна:
1. "Кьурагь район арадал атайдалай инихъ 85 йис хьуниз талукь доклад".
2. "Хуьрерин поселенийри чилин ва эменнидин налог кIватIунин гьалдин гьакъиндай".
3. Чил ва эменни хсуси ихтиярда тунин карда государственный регистрация (зеленка) авун патал поселенийра тухузвай кIвалахдин гьакъиндай".
4. Жуьреба-жуьре месэлаяр.
Совещанидал алай сад лагьай месэладай "Кьурагь район" муниципальный тешкилатдин администрациядин кьил С.Гьамидова доклад авуна ва вирибуруз райондин 85 йис хьунин вакъиа мубаракна.
Кьвед лагьай месэладай С.Гьамидова информация гана.
Пуд лагьай месэладай "Кьурагь район" муниципальный тешкилатдин администрациядин кьилин 1-заместитель А.Фейзуллаева информация гана.
Кьуд лагьай месэладай С.Гьамидова газетарни журналар йисан кьвед лагьай пай патал подписка авунин кIвалах кьилиз акъуднавайди лагьана.
З.Азизова налог кIватI тавунвай поселенийрин кьилериз вахтунда кIватI хъувун, эменни, чил хсусиятдиз элкъуьрун патал гьукуматдин регистрация (зеленка) авунин кIвалахда гьар са хуьруьн кьили халкь гъавурда туна, тешкиллудаказ кIвалах вилик тухун тагькимарна.

---------------------------------------------------------------------------------------------

А.Рамазанова.
Кьурагь райондин 85 йис
3-июль Кьурагь район тешкилай югъ я
Кьурагь дере - им регьимлувал, михьивал, гуьрчегвал авай макан я. Чи райондиз мугьман хьайибуру адаз ам мугьмандал рикI алай уьлкве я лугьузва. Кьурагьвийри мугьманар хушвилелди кьабулда. Дагъларин уьлкведин агьалийри чпин ата - бубайрилай амай адетар хуьзва ва абур артухарзава. 3-июлдиз Кьурагь райондин 85 йис тамам хьанва.
Алатай девирдикай чин тийиз, гележег фикирдиз гъиз жедач. Гьавиляй, чна алатай девирдилай башламишда. Табасаранни Дербент районар квачиз, юкьван асирра, араб чIалан тарихдин ва географиядин литературада лезги чIалал рахазвай халкь яшамиш жезвай сергьятдиз "Лакз" лугьузвай. 13 -15 лагьай асирра хьиз, анлай кьулухъни и сергьятра са кьадар политический тешкилатар авай. Кьурагьа "Кьурагь" азад обществодин сергьятар тайинарнавай кхьинар ама. Абур 1356 - (757) - йисарик акатзава. И кхьинри шагьидвалзавайвал, Кьурагь, тайин сергьятдин, тайин кьадар халкь куьч хьанвай кьилин чка хьиз къалурнава. И политический объединенидиз Куьре лугьузвай. Гелхена жагъанвай къванцел кхьенвай кхьинри шагьидвалзавайвал, Куьрени Кьурагьрин хуьр 16 - асирдин сифте кьилера 1511- (917) - йисуз Шейх шагьди кукIварна. Шейх шагьвиле тайинарнавай Ширван шагь Ибрагьима 1502 - 1524 - йисара, Куьрени Кьурагь чукIурна. Кьурагьрин хуьруьн тарих михьиз къалурнавач. Хуьр халкьдин гафарай, Надир шагьди 1735 - йисуз кукIварай 7 хуьруькай арадал атанва.
Халкьдин кьисайра лугьузвайвал, исятда авай Кьурагьрин Кеферпатан дагъда еке хуьр Гияр авай. Адан екевиляй адаз Гияр шегьер лугьузвай. Кавказдин тарихда Гияр шегьердикай кхьенва. Ам 5 - асирда сасонидри кукIварна.
18 - асирдин 2 - паюна Куьредин ханлух арадал атана. Анин ханвиле Шагьмердан хандин стха Сурхай акъвазна. 1791 - йисуз Сурхай ханди Куьре кьуна ва ам Къазикъумух ханлухдик акадарна.
1811 - йисан эхирдай Турциядин тереф хуьзвай Дербентдин Шейх -Али хандини Сурхай ханди урус кьушунриз акси женг тухвана. Шейх Али ханни Нуьгьбег кукIварайдалай кьулухъ, генерал Хатунцев Куьредиз, Сурхай хандин аксиниз фена.
15 - декабрдиз урусри гьужумна, Кьурагь кьуна. Сурхай хан суьргуьн авун, лезгийри чеб феодальный эксплуатациядикай азад хьун яз гьисабна. Куьредин ханлух Россиядик акадарна. 1831 - йисуз имам Къазимегьамед Кьиблепатан Дагъустандиз гьахьна, Куьредин ханлух адахъ галаз сад хьана.
19 - асирдин 40 - йисара Шамилан кесердик кваз Куьре ханлухдин лежберрин женг къати хьана. Пачагьдин самодержавидихъ галаз Кьурагьай тир Алимегьамеда, ТIагьира, Ашай тир Исмайила, Усай тир Мегьамеда баркаллудаказ женг чIугуна.
1862 - йисан декабрдиз Куьре округ арадал атана. 1877 - йисан 12 - сентябрдиз Куьре округдин лезгияр къарагъна. Амма 1877 - йисан сентябрдин эхиррай ва ноябрдин сифте кьилерай Кьиблепатан Дагъустанда женгер секинарна. Пачагьдин векилри инсафсузвилелди къарагънавай халкь кукIварна. 1878 - йисуз Дербентда халкьдин вилик восстанидин регьберриз кьиникьалди жаза гана. Гьа и гьисабдай яз, Куьре округдин КьепIиррин хуьряй тир Гьажимурадазни. ЯтIани пачагьдин векилрин инсафсузвили, Дагъустандин халкьар руьгьдай вегьенач. Абур гьамиша женг чIугваз гьазур тир. Гзаф вахтара пачагьдин казнадиз налогар гуникай кьил къакъудзавай.Революциядилай вилик квай йисарани лезги литературадин векилри чпин яратмишунра яшайишдин рекьяй разисузвал къалурзавай. Машгьур шаир Кьуьчхуьр Саида вичин шиирар къанихвал, азгъунвал терг авуниз бахшна. Куьре округдин Цилингрин хуьряй тир лезгийрин чIехи шаир Етим Эмин пашманвиликай, инсандин гъамуникай кхьей шаир я. Адан яратмишунрани яшайишдин рекьяй разисузвал къалурзава.
Куьре округдин агьалийрин арада Кьурагь Сейфуллагь, Хпеж Къурбан, Кьурагь Абдул - Рашид машгьур тир.
19 - асирдин сифте кьилерай чIехи арабист, кьуьчхуьрви Магьарам - Эфендиди, адан машгьур "Къуръандин толковый словарь" яратмишуни еке гьуьрмет къазанмишна. Куьре округда хьайи урус алимарни писателар чкадин агьалийрин культурадин дережадал, просвещенидал, агьалийриз ийизвай инсафсузвилерал нарази тир.
Машгьур урус писатель - декабрист А.А.Бестужев-Морлинскиди Кьурагьа авайла, вичин стхадиз кхьенай: "Ингье кьве гьафте я зун Европада авачиз. Я газетар, я са хабар авач, гьатта урус са гафунин ван кьванни къвезвач", гьа са вахтунда Бестужев Кьурагьрин тIебиатдал, дагъларин иервилел гьейран тир. Сифте школа Кьурагьа 1912 - йисуз ачухна, Россиядик экечIна 100 йис алатна. Школадин сифте муаллимар урусар тир. 1905 - 1907 лагьай революциядин йисара лежберрин женгер йигин хьана.
1917 - йисуз Центральный Россияда хьиз, Дагъустандани кьве власть арадал атана. Бакудин рабочийри лежберрин къанажагъ хкажуник, самодержавидиз ва чкадин эксплуататорриз акси женгерик чпин пайни кутуна. ЧIехи пай рабочияр революцияди лигимарнавай. Ибур Агьмед Назаралиев, Ибрагьим Ибрагьимов, Мегьамед Сулейманов, Рамазан Мамедов, Али Мамедов.
Кьурагьви Ибрагьим Ибрагьимов 1905 - йисан 1 - майдин забастовкайрин иштиракчи тир. Куьре округдин Штулрин хуьряй тир Мегьамед Сулейманов ялавлу революционер тир. М. Лезгинцева Октябрдин яракьлу восстанидиз гьазур жедайла, Зимний дворец кьадайла иштиракна. 1919 - 1920 - йисара 11 - Красный Армиядин 7 - кавалерийский девизиядик кваз Деникинан полкариз акси женгера иштиракна. Революциядилай кьулухъ, райондин хуьрера сифте яз балкIанрихъни яцарихъ агалдай молотилкаяр акъатна. Ахпа герек техникани хьана, чилин магьсулрин арада кьетIен чка фини кьазвай. ЧIехи пай хизанри тайин майданда и магьсул цазвай. Адан тварар халкьдин жуьреба - жуьре хуьрекра ишлемишзавай, ам дагъвидин яшайишдин бине тир. Адакай парталар, тIурар, епер гьазурдай. Дагъвидин уьмуьрда еке чка картуфри кьазвай. Абуру ам са тIуьник ишлемишзавачир, картуфар абуру маса шейэрихъни дегишарзавай. Райондин са шумуд хуьре дагъвийри багълар кутуна. ГьакIни абуру калер, гамишар, балкIанар, хипер, цIегьер хуьзвай. КьетIен чка лапагри кьазвай. КIвалин къушарикай верчер хуьзвай. Гьа икI, чи майишат тIебии тир.
Вири кIвалахар дагъвийри чпи гьазурнавай тадаракралди ийизвай. Парталар сарикайни канабрикай гамар хразвай тарарал гьазурзавай. Райондин агьалийрин арада чатун, харат, къванцин устIарар авай. КьетIен чка гамар хрунин кIвалахри кьазвай. КьепIиррин, КIирийрин, Кьурагьрин гамариз еке тариф авай. СССР чкIидалди гамарин цехар КIирида, Кьурагьа, КьепIирдал амай. Абур ТIифлисдиз, регионрин выставкайриз, ракъурзавай.
Кьурагь район 1929 - йисан 3 - июлдиз ВЦИК - дин Президиумдин къарардал тешкилна. Райондин центр Кьурагь хьана. Район Дагъустандин Кьиблепата ава. Район 28 населенный пунктуникай ва 14 хуьруьн муниципальный тешкилатдикай ибарат я. Кьурагь районда 15 агъзурдалай виниз агьалияр яшамиш жезва. Ишлемишдай чилер Самурдин ва Калухдагъдин кукIушри арадал гъанвай Кьурагь - чай вацIун бассейндал ала. Республикадин районрикай чи районда хуьруьн майишатди ишлемишдай чилер тIимил авай, цадай чилер 4,4 агъзур га, яни авай вири чилерин 5 процент я. Багълар 190 га ава. Райондин агьалияр хуьруьн майишатдин продукт гьасил авунал, виридалайни чIехи пай малдарвилел машгъул жезва. Районда 112 хуьруьн майишатдин карханаяр, 15 СПК, 3 СПОК, 36 КФХ ва 4317 хсуси кIвалин майишатар кардик ква. Алай йисан 1 - январдин делилралди районда чIехи карч алай гьайванар 14138, гъвечIи карч алай гьайванар 53254 ава.
Районда лезгияр, агъулар, табасаранар, азербайжанар, урусар яшамиш жезва. Территориядин чIехи пай дагълари, векьери кьунва. Райондин дагъдин пай - гзаф маракьлу ва гуьрчег я. Живеди кьунвай, садавайни гатIум тежедай дагъларин кукIушар, дагъдин кIеви жинсер, инлай - анлай кулкусар, тарар, лап хъсан чуьллер, кьил элкъуьрдай тик рагар акурбурун гьич рикIелай алатдач. Кьурагь район Дагъустандин дагъдин паюник акатзава. Райондин са пай аранда ава. Каспий гьуьлуьн къерехда Кьурагь райондин Аладаш, Арабляр, Маллакент, Кумухъ ва Бугъдатепе хуьрер ава. Чи райондин агьалийри советрин гьукуматдин вахтундани хуьруьн майишат, экономика вилик финикни чпин пай кутунва.
Аквадай агалкьунар аваз абурун яшайиш вилик фена. Алай вахтунда къаварал шифер алачир тек - бир кIвал аквада, эцигзавай кIвалерни алай аямдин къайдада, вири регьятвилер аваз эцигзава. Винел патан акунралди райондин агьалияр шегьерэгьлийрикай чара ийиз жедач. Яни районда культурная революция хьанва лагьайтIа, чун гъалатI жедач.
Чи районэгьлийрин агалкьунрикай рахайтIа, чна Ватандин ЧIехи дяведин йисара чи бубайри чIугур зегьметар рикIел хкин.
ИкI, чи райондай фронтдиз 3300 - лай виниз агьалияр фена. Абурукай 1800 - лай виниз дяведай хтанач, абуру чпин чан Ватан патал гана, Ватандин азадвал хвена. 100 - лай винизбуруз орденарни медалар гана. Кьве районэгьли - Эсед Салигьовни Араз Алиев Советрин Союздин Игитвилин тIварариз лайихлу хьана. Чаз чизва, советрин гьукуматдин тарихда гьар жуьре девирар хьана. Чун патал инсанар барикадайра кьена, абуру гуьллейрин хурук чи азадвал хвена.
Дявейрилай гуьгъуьнин йисарани чкIанвай шегьерар туькIуьр хъийиз, экономика хкажиз еке зегьмет чIугуна. И кIвалахдикни чи районэгьлийри чпин пай кутуна. Архивдин документри шагьидвалзавайвал, 1949 - йисуз райондин колхозри агалкьунар аваз, чпин вилик эцигнавай вири кIвалахар кьиле тухвана. Зулун тумар кутунин план 3400 га яз, 3503 га кутуна. И кIвалахда Сталинан, Салигьован, 18 - партсъезддин, Дмитрован, Молотован колхозрихъ хъсан агалкьунар хьана.
Идалайни гъейри, абуру аванс яз гьукуматдиз 210 т. як, 419 кг. чIем, 549 кг. сар, 1081 кг. ниси гана. Гьа и йисуз райондин майишатри къуьл, мух, гергер, харар, гьажибугъда, картуфар, нехв цанвай.
И вахтунда районда 85 бригада, 333 звено кардик квай. Райондин майишатриз чIехи карч алай гьайванар 12250, гъвечIи карч алай гьайванар 81000, балкIанар 1070 авай.
80 - йисара хуьруьн майишатдин кархана хъсан вилик фена. Районда высокомеханизироватнавай гзаф карханаяр кардик кутуна. Совхозри ва колхозри продукция вири санал, виликан пулуналди, 3312 агъзур манатдинди гана. Майишатрихъ чIехи карч алай гьайванар 30653 авай, гьар са каликай, юкьван гьисабдалди 1027 литр нек ацана. Идахъ галаз алакъалу яз, хуьруьн майишатдин кIвенкIвечияр, Ленинан, Зегьметдин Яру пайдахдин орденрин кавалер рикIел хкиз жеда. Абурун арада дояркаяр тир Рамазанова Тамара, Гьамидова Гьуьруьпери, чубан Муьшкуьров Рамалдан, малдарар тир Идрисов Онзил, Ибеев Агьмедулагь, Алибекова Пери, Ибинаев Шабан ава.
Кьурагь дере машгьур инсанрин макан я. Райондай социализмдин зегьметдин игитар, илимрин докторар, кандидатар, культурадин лайихлу деятелар ва маса машгьур ксар акъатна. Халкьдин комиссаррин гъвечIи Советдин член, СССР - дин финансрин нарком хьайи Мегьамед Лезгинцевал, адан кьве хцел: писатель, илимрин доктор, чIехи руководитель Георгиял, Россиядин флотдин контрадмирал Михаилал, медицинадин илимрин доктор Аликберова ФатIимадал, филологиядин илимрин доктор Гьайдаров Ражидинал, Социализмадин зегьметдин игитар тир Османов Рамазанал, Ферзалиев Насруллагьал чна дамахзава. Абур чахъ гзаф ава, виридан тIварар чавай кьаз жедач.
Чи райондай акъатай литературадин, искусствойрин деятелри лезги халкьдин, вири Дагъустандин литература вилик фин патал, еке агалкьунар аваз, гзаф зегьмет чIугуна. Абурун арада шаир - классикар тир Кьуьчхуьр Саид, Етим Эмин, Хпеж Къурбан, Мемей Эфендиев, писатель Буба Гьажикъулиев, композитор Зейнал Гьажиев ава. Чна ашукь Рачаб Сафарован, Дагъустандин радиодин директор хьайи, шаир, артист Айдунбег Камилован, манидарар тир Гьабибуллагь Мансурован тIварар еке гьуьрметдивди рикIел хкизва. Абурун манияр Дагъустандин радиодин къизилдин фондуна ама. Алай вахтунда Дагъустанда ва Россияда чпин тIварар хкажнавай манидарар ава.
Райондин тIвар райондай акъатай спортсменри хкажзава. Абуру са Дагъустан ваъ, гьакI Россия, Европа ва дуьнья чпин агалкьунрал гьейранарна.
Алай вахтунда хъсан агалкьунар авай жегьилар чIехи жезва. Райондин спортдин секцийра гзаф аялар вердишарзава. Чна умудзава, абуру виликан чемпионрин, энтузиастрин рехъ давамардайди.
Эхиримжи йисара район яшайишдинни экономикадин рекьяй вилик фин патал райадминистрацияда еке тир кIвалах тухванва. ИкI, Кумухъа, Аладашда ва Кьурагьа центральный рекьериз къир цанва. Эхиримжи кьве йисан девирда КьепIир, КIири, Штул, КIутIул газифицироватнава. Ашага - СтIал - Штул магистральный газопровод тухунин кIвалах кьилиз акъатнава, райцентр газифицировать ийиз башламишнава.. "Касумкент -Курах" автомобилрин рекьин 13 км рехъ (31км-44,1) цIийикIа туькIуьр хъувуна, къир цазва.
Аша, Хвережа, Шимихуьре, Кьурагьа аялрин ясли-бахчаяр ахъайнава, КIирида, Маллакентда, КьепIирдал алава яз ясли-бахчайра группаяр ахъай хъувунва. КIирида, Уса ФАП-ар ачухнава. Райондин агьалийрин яшайишдин, дуланажагъдин шартIар хъсан хьун - райадминистрациядин вилик гьар йикъа акъвазнавай месэлайрикай сад я.
Милли проектар кардик акатайдалай кьулухъ, районда еке дегишвилер хьана. ИкI, ЦРБ - диз медицинадин цIийи тадаракар ахъайна. Образованидин хилез хейлин кабинетар, аквадай агитациядин такьатар, школайривай яргъал тир хуьрерай аялар школайриз гъун патал транспорт ахъайна. Саки вири хуьрерин школаяр интернетдик кутунва.
Районда 18 СПК ва 3 СПОК кардик кутунва. Анра 100-лай виниз районэгьлийри зегьмет чIугвазва. "Россельхозбанк"-дай 2013-йисуз районэгьлийриз 15 млн. манатдилай виниз кредитар ганва. Идалай гъейри, райадминистрацияда кардик квай микрофинансированидин банкдай 8815 агъзур манатдилай виниз кредитар чара авуна. Районэгьлийри 600 - лай виниз чIехи карч алай гьайванар къачунва. "Россиядин агьалийриз къулай шартIар авай яшайишдин кIвалер" тIвар алай милли проектдихъ галаз алакъалу яз, кIвалер эцигиз кIанзавайбуруз чил чара авунва.
Милли проектдилай гъейри, "Кьурагь район" муниципальный тешкилатдин кьил З.Азизова образованидин, сагъламвилин хилера, общественный хатасузвал хуьзвай органра кIвалахзавай хъсан пешекарриз райондин бюджетдай 15 агъзур манатдин кьадарда аваз Грантар гана.
Эхиримжи йисара районда гзаф эцигунар кьиле физва. Аладашрин хуьре 216 кIелдай чка авай школа эцигун давамарзава, Гелхена школа эцигзава. "Юг России" программадалди КIирида 320 кIелдай чка авай, спортзал, пищеблок, интернат галай школа ачухнава. Райцентрдин цин линия туькIуьр хъувун патал республикадин программадик кутунва. Районда жегьилринни аялрин спортдин кьуд школа кардик ква.
Жегьилриз кьетIен фикир гун - им гьукуматдинни райондин кьилин макьсадрикай сад я.
Гьа икI, эхиримжи йисара хейлин жегьил хизанри яшайишдин гьалар хъсанарун патал, субсидияр къачунва. Спортдизни районда кьетIен фикир гузва. Идахъ галаз сад хьиз, жегьилрин арада экстремистринни террористрин гьерекатар тешкил тахьун патал "Кьурагь район" муниципальный тешкилатдин кьил Замир Азизова, "Кьурагь район" муниципальный тешкилатдин администрациядин кьил С. Гьамидова, хатасузвал хуьнин рекьяй комиссияди тайин кIвалах тухузва, абурухъ галаз гьакъикъи исламдикай суьгьбетар ийизва, гуьруьшар тухузва. Райондин администрацияди республикадин министерствойрихъни ведомствойрихъ галаз санал, продукция гьасил авуналди, агьалийрин яшайишдин гьалар хъсанариз алахъзава.
Алай вахтунда районда 200 - лай виниз карчияр ава, кIанзавай виридаз яргъал вахтунда чилер киридиз вугузва.
Ингье 3-июлдиз райондин 85 йис хьанва. Райондин гьар са агьалидиз вичин гъвечIи тир Ватан, гьадахъ галаз Дагъустан ва вири Россия гьам экономикадин, гьам яшайишдин рекьяй вилик фена, Россиядихъ галаз сад тир стха халкьарин арада дуствиле ва ислягьвиле яшамиш жез кIанзава.

-------------------------------------------------------------------------------------------------

Извещение о проведении аукциона на право заключения договора аренды муниципального имущества:
Здание рынка в с. Курах, Курахский район, Республики Дагестан( Администрация муниципального образования «Курахский район» в лице уполномоченного органа - Комитета экономики, имущественных и земельных отношений Курахского района - проводит открытый аукцион на право заключения договоров аренды муниципального имущества муниципального образования «Курахский район» (далее - аукцион):
Наименование организатора аукциона - администрация муниципального образования «Курахский район» в лице Комитета.
Почтовый индекс и адрес: 368180, Курахский район, с. Курах., ул. Назаралиева, 1-а
Номер контактного телефона: 24-1-59
Объекты договоров аренды: смотреть здесь>>>

Прием заявок: с 26.06.2014 г. по 28.07.2014 г. до 10.00 ч. по адресу заказчика
Дата проведения аукциона: 28.07. 2014 г. 10.00 ч. по адресу заказчика: с. Курах, ул. Назаралиева, 1, Администрация МО «Курахский район».
Для участия в аукционе претендент должен в срок с 03.07.2014 г. по 04.08.2014г.внести задаток в размере 20% от начальной цены лота в рублях на следующие реквизиты:
Получатель: ИНН 0519001599 КПП 231001001 АУ «Комитет экономики, имущественных и земельных отношений Курахского района»
Банк получателя: Дагестанский РФ ОАО «Россельхозбанк», БИК 048209793,
расчетный счет 40703810404474000012,
к/с 30101810000000000793
Назначение платежа: Задаток за участие в аукционе на право заключения договора аренды муниципального имущества
Документом, подтверждающим поступление задатка на счет, является выписка с этого счета.
Задаток должен поступить на указанный счет не позднее 05.08.2014г.
Заявка на участие в аукционе подается в письменной форме.
Победитель аукциона вносит заявленную в ходе аукциона сумму, за минусом суммы ранее внесенного задатка, в пятидневный срок с момента проведения аукциона на счет Комитета.
----------------------------------------------------------------------------------------------- 

Чи газетдин алатай 26-нумрадиз акъатнавай кроссворддин жавабар:
Дуьз цIарара: 3. Ман. 7. Ифриз. 9.Ахвар. 10. Асант. 11.Аферин. 13.Куркур 17. Гъер.19. Буржи. 22. Гъереш. 224. Атлас. 26.Лахта. 28. Кал 31. Гватун 33. Къаткун. 36. Устад. 37. Тайин. 39.Исмет. 41. Ими.
Тик цIарара: 1. Афтафа. 2. Пи. 4.АтIам. 5. Ух. 6. Балдуз. 8. Зари. 9. Атлу. 12. Раиж. 14. Рипе. 15. Демагъаж. 16. Абдал. 18. Ашпаз. 20. Рул. 21.Ирс. 22.Гъул. 23.Рух. 25. Афат. 27.Алат. 29. Авадан. 30. Куплет. 32.Умун. 34. Арди. 35.Итим. 38 Ич. 40.Са
-----------------------------------------------------------------------------------------------

Гьуьсейн Рамазан.
Камаллу келимаяр
1. Алатай вахтарикай къана рахазвайдаз къенин къайивилерни аквадач.
2. Анжах тек са кимивилерикай рахазвайди лап пис душман я.
3. Вич затI туширдаз масад бегенмиш жедач.
4. КIунтI таквазвайдаз я дагъ, я дагъдин кукIушни аквадач.
5. Мидявилиз мидявал ийизвайди вич вичин душман я.
6. Хъсан касдиз къимет тагузвайдан рикIе агъу ава.
7. КIвалахзавайдаз мумкинвал тагузвайди вичини хев квачиз кIвалахзавайди я.
8. Кьил хвейида гележегда туьгьметар къачуда.
9. ГъвечIи агалкьун гележегдин хандакI я.
10.Са гъвечIи вахтунда жунгаввал авуна- уьмуьрлух кал хьана.
11.Сабур меци хуьда, масабур меци рекьида.
12.Намуслубуруз рехъ тагузвай коллективда аквадай хьтин агалкьунар жедач.
13.Михьи инсан патал Аллагьди къаюмвалда.
14.Игит инсан кьейилани баркалладик жеда.

-------------------------------------------------------------------------------------------
 

Комментарии (0)

Нет комментариев. Ваш будет первым!