Газета №26

Гьафтедин нетижаяр кьуна
23-июндиз райадминистрациядин актовый залда райондин идарайрин руководителри авунвай кIвалахдин нетижаяр кьадай совещание хьана.
Совещание "Кьурагь район" муниципальный тешкилатдин администрациядин кьил С.Гьамидова кьиле тухвана.
Совещанидал хейлин руководителри гьафтеда авунвай кIвалахдикай информация гана.
Райондин образованидин управленидин начальник Р.Катибова къейд авурвал, ЕГЭ-дин нетижаяр кьазва, урус чIалайни математикадай проходной балар тахьай 8 аял хьана, ругуд аялди урус чIалай, 36 аялди математикадай резервный ЕГЭ-яр вахкана, гьар са школадин ЕГЭ-дин нетижаяр кьазва.
Райбольницадин кьилин духтур Р.Хидирова лагьайвал, больницада 36 азарлу ава, кIеви азарлуяр авач, дарманар бес кьадарбур алатай гьафтеда хканва, республикадай къвезвай духтуррин бригадани гьеле атанвач, больницадиз рангунин УЗИ аппарат ахъайнава, рентгендин аппаратдин частар Москвадиз ремонт ийиз тухванва.
Ветеринарный управленидин начальник Н.Асланова постериоздин очаг Шимихуьре акъатайди , гьайванриз сыворотка ягъайди, тайин тир вахт алат тавунмаз вакцина ийидай ихтияр авачирди лагьана.
Совещанидал винидихъ рахайбурулай гъейри, хуьрерин администрацийрихъ галаз кIвалах тухунин рекьяй райадминистрациядин отделдин заведующий А.Эмирбеков, рекьерин управленидин начальник Л.Агъабалаев ва масабур рахана.
С.Гьамидова кIвалах вилик тухунин карда хейлин руководителриз буйругъар гана.

----------------------------------------------------------------------------------------------
А.Мамедова.
Яш тамам тахьанвайбурун крарин рекьяй комиссиядин заседание
23- июндиз райадминистрацияда тешкилнавай яш тамам тахьанвайбурун крарин ва абурун ихтиярар хуьдай комиссиядин заседание кьиле фена. Анин кIвалахда "Кьурагь район" муниципальный тешкилатдин администрациядин кьилин общественный хатасузвал хуьнин рекьяй заместитель, комиссиядин председатель М. Хариева, райондин образованидин управленидин начальник Р. Катибова, комиссиядин секретарь З.Ибрагьимова, Кьурагь районда авай ОВД-дин тахсиркарвилерин вилик пад кьунин рекьяй инспектор А. Цимиханова, ЦРБ- дин кьилин духтурдин заместитель О. Гьададова, къаюмвилинни къайгъу чIугвадай органдин пешекар З. Шабановади иштиракна.
Анал кьве месэладиз килигна:
1. «Яш тамам тахьанвай аялар гатун вахтунда ял ягъиз тухунин гьакъиндай».
2. «Райондин общеобразовательный школайра бейгьуш ишлемишзавайбурун вилик пад кьунин нетижайрин ва кIвалах тешкилунин гьакъиндай».
Анал рахай райондин образованидин управленидин начальник Р. Катибова алай вахтунда аялрин са поток лагердиз тухванвайди, хъсан шартIар аватIани, фейи 20 аялдикай 4 аял хтанвайди, кьвед лагьай поток и йикъара тухудайди лагьана. ГьакIни ада къейд авурвал, аялар тухун-хкунин кIвалах школайрин директорри ва образованидин управленидин работникри тешкилзава. ГьакIни сад алай месэладай къаюмвилинни къайгъу чIугунай органдин пешекар З. Шабановади 7 йисалай 15 йисан яшда авай етим аялар тухун патал Крымда авай лагердай 5 путевка хтанвайди лагьана.
Кьвед лагьай месэладай ЦРБ-дин кьилин духтурдин заместитель О.Гьададова пIапIрус чIугуниз акси акция тухузвайди, алай вахтунда чпин учетда бейгьуш ишлемишзавай аялар авачирди къейдна. Гьа и месэладай Р. Катибова школайра гьамиша аялрихъ галаз гуьруьшар тухузвайди, жуьреба-жуьре суалар, суалриз жавабар гудай мумкинвилер гузвайди, массовый къайдада и кIвалах гьамиша рикIел гъайилани и карди акси таъсир авун мумкин тирди, гьавиляй и кардал машгъул тир аялрихъ галаз кьилди тухвайтIа хъсан аквазвайди лагьана.
Гьар са школада терроризмдинни бейгьуш ишлемишунин вилик пад кьунин кIвалах тухузвайди, районда школадиз техъвезвай кьве аялдин диде- бубадихъ галаз суьгьбет тухвайди анал рахай райондин ОВД-дин тахсиркарвилерин вилик пад кьунин рекьяй инспектор А.Цимиханова лагьана.
ГьакIни, школада каникулрин вахтунда генани аялрал гуьзчивал тухвана кIанзавайди, хуьруьн администрацийри и карда куьмекар тийизвайди, вирида сада садахъ галаз алакъа аваз кIвалахна кIандайди меслят авуна.

 ----------------------------------------------------------------------------------------------

А.Рамазанова.
Культурадин йисаз талукь яз
Кумухъа – «Кьурагь дагъларин авазар» фестиваль
24-июндиз чи райондин Кумухърин хуьре "Кьурагь райондин авазар" тIвар алаз республиканский фестиваль кьиле фена.
Фестиваль Россияда Культурадин Йисаз талукь яз Дагъустан Республикадин культурадин министерстводи, "Кьурагь район" муниципальный тешкилатдин администрацияди, райондин Культурадин управлениди тешкилнавайди тир.
"Кьурагь дагъларин авазар" фестиваль кьиле тухунин кьилин макьсад халкьдин манияр хуьн ва вилик тухун, цIийи манияр арадал гъун, цIийи талантар, самодеятельный композиторар винел акъудун, Махачкъалада кьиле фидай "Дагъларин мани" конкурсдин финалдиз иштиракчияр хкягъун тир.
Мярекатдиз гзаф мугьманар, РД-дин халкьдин Яратмишунрин кIвалин векилар, Кьиблепатан Дагъустандин районрай манидарар атанвай.
Фестиваль Кумухърин юкьван школадин патав гвай тамун юкьва кьиле тухвана.
Фестивалдин сифте нумра Кьурагьрин Искусствойрин школадин хореографический "Гияр" группади кьуьл авунилай башламишна. Мярекатдин ведущий тир Марат Тимохина "Кьурагь район" муниципальный тешкилатдин администрациядин кьил С.Гьамидоваз гаф гана.
-Гьуьрметлу фестивалдин иштиракчияр, гьуьрметлу мугьманар, квез "Кьурагь район" муниципальный тешкилатдин кьил З.Азизован патай къенин сувар мубаракрай,-лагьана С.Гьамидова. -Гьуьрметлу юлдашар, 2014-йис Россиядин Федерациядин Президент В.Путина Культурадин Йис яз малумарнава, РД-дин Кьил Р.Абдулатипова Дагъустандин Халкьарин Культурадин Йис тирдан гьакъиндай Указ акъуднава.
Къенин фестиваль Культурадин Йисаз талукь яз кьиле тухузвай мярекатрикай сад я. И фестивалдиз Кьиблепатан Дагъустандай хъсан манидарар атанва. РД-дин Кьили лагьайвал, экономикадин, яшайишдин хилерихъ галаз сад хьиз культурадини кьилин чка кьазва. Культурадин Йисахъ галаз алакъалу яз вири районра хьиз чи райондани культура вилик тухудай Центр кардик акатнава. Къе чи райондин чилел тIвар-ван авай манидарар, хизандин ансамблияр кIватI хьанва. Чухсагъул чи райондин чилел атанвай мугьманриз.
Инал и йикъара Дербентда кьиле фейи "Дагъвияр" фестивалда хъсандаказ иштиракунай РД-дин культурадин министерстводин патай "Кьурагь район" муниципальный тешкилатдин кьил З.Азизоваз ганвай Чухсагъулдин чар вахкана.
Майдандал райондин Культурадин управленидин "Кьурагь дагълар" хорди халкьдин мани тамамарна.
Фестивалда Агъул райондай Роза Агьмедовади, Ахцегь райондай Фикрет Баширова, Таира Мустаховади, Докъузпара райондай Къагьир Балакишиева, Мегьарамдхуьруьн райондай хизандин ансамбль Улубековри, Билал Эскендерова, Назиля Саидалиевади, Сулейман-Стальский райондай Тофик Мегьамедова, Дербент райондай Ашукь Шемшир Мегьамедовади ва адан хизандин ансамблди, Афият Арзуманова, Рамазан Ризаева, Табасаран райондай Рустам Рамазанова, Индира Абдуллаевади, Дербент райондай Рустам Къарибова, стхаяр тир Шарифоври иштиракна.
Абуру чпин ширин сесералди Кумухърин тамук билбилрин ван кутуна. Фестиваль кьиле тухвай майдандин патав Мегьарамдхуьруьн райондай Касбуба Къазиева (пагьливан) симинал са шумуд нумра къалурна.
Фестивалрин вири иштиракчийриз РД-дин Культурадин министерстводин ва Кьурагь райондин администрациядин патай дипломар ва рикIел аламукьдай пишкешар гана.
Дербентда кьиле фейи "Дагъвияр" фестивалда хъсан иштирак авунай РД-дин культурадин министерстводи ганвай райондин Культурадин управленидин начальникдин везифаяр тамамарзавай К.Фейзулаевадив диплом вахкана.
"Село Кумук" муниципальный тешкилатдин администрациядин кьил Р.Улубекова атанвай мугьманриз, манидарриз хуш келимаяр лугьуналди Кьурагь районда 3-сефер яз кьиле тухвай "Кьурагь дагъларин авазар" республиканский фестиваль агал хъувуна. Атанвай мугьманриз гьар са нямет алай суфраяр ачухнавай.
Лагьана кIанда, фестиваль тIимил-шимил нукьсанар кваз кьиле фенатIани, Кьурагь районда культура вилик финиз фикир гузвайди неинки чи районэгьлийриз, гьакIни вири дагъустанвийриз тайин хьана.
За умудзава чи Кьиблепатан Дагъустандин районрин арада культура вилик тухунин рекье агалкьунар, дуствал жедайди.

-------------------------------------------------------------------------------------------

М.Агьмедова.
«Касумкентское лесничество» ГКУ-дин 80 йис тамам хьанва
Эгер тарихдиз вил вегьейтIа, Дагъустандин сергьятра тамариз килигдай органар 19 асирдин эхирдай арадал атана.
1888-йисан 14-июндиз акъуднавай "Кавказда гьукуматдин эменни дибдай дегишарунин гьакъиндай" Гьукуматдин советдин къарардал асаслу яз, Дагъустандин область 4 лесничестводиз пай хьана: Темир Хан Шура, Дербент, Гуниб, Кюринский. Гьа и лесничествояр чилерин управленидин ва Дагъустанда авай Бакудин губерниядин гьукуматдин эменнидик акатзава.
Лесничествойри тамун Уставдал асаслу яз кIвалахзава. Лесничестводин управленида тамун Совет, тамун культурадин комиссия, тамарин къимет эцигзавай кьетIен комиссия авай. Лесничийдин кьилин везифа тамар хуьн, тумар кIватI хъувун, тарар маса гун, тамун Устав кьиле тухунал гуьзчивал тухун тир.
Кьасумхуьруьн лесхоз 1934-йисуз бине Агъул, Хив, Кьурагь, Кьасумхуьр, Рутул, Ахцегь, Докъузпара административный районрин тамарин бинедаллаз арадал атана ва Кьасумхуьруьн межрайлесхоз лагьана тIвар гана.
1935-йисуз Кьасумхуьруьн межрайлесхоздин къурулушдикай Рутул, Ахцегь, Докъузпара районрин тамар чара авуна. Гьа и кIвалахдин бинедаллаз Рутул межрайлесхоз тешкилна. 1936-йисуз Кьасумхуьруьн межрайлесхоздикай Хивский лесхоз, Рутулриндакай Ахцегьрин лесхоз хьана.
2008-йисан 1-январдилай лесхозар дибдай дегишарна, абурукай гьукуматдин учрежденияр ва гьукуматдин сад тир кархана хьана. Алай вахтунда "Касумкентское лесничество" ГКУ Кьасумхуьруьнни Кьурагьрин участковый лесничестводикай ибарат я.
Тамар арадал гъизвай тарарин кьилин жинсер мегъуьн, пипин, гийин тарар я. "Касумкентское лесничество" ГКУ -дин вири тамар 1-группадин тамарик акатзава.
Алай 2014-йис "Касумкентское лесничничество"- ГКУ дин юбилейдин йис я.
Ам арадал атайдалай инихъ 80 йис тамам хьанва.
----------------------------------------------------------------------------------------------

Х. Агьмедов
Са тIимил хъвер
КIуьдакай муьжуьдаз салам
Атем къал-макъалдик квай инсан тушир. Вичин чанда гьатай ажугъ ада винелди акъуддачир, рикIе хуьдай. Са сеферда Атемни хиперин бригадир Абдурагьман уьруьшар патал герек авачир рахунар хьана. И кIвалах рикIелай ракъурдай вахт алатнавачир. И кардилай гуьгъуьниз са пуд югъни алат тавунмаз хьиз, Атем фермадилай, вичин дерди аваз, хуьруьз хкведа. Хуьруьн кимел и чIавуз Абдурагьманни алай. Абдурагьман акурла, Атеман гуьгьуьлар михьиз чIур хьана. Адет тирвал, Атема, са кьилихъай гатIумна, кимел алай итимриз гъилер яна кIанзавай. Абдурагьманан-накьан душмандин гъил гьикI кьада? Итимрин патав агакьдалди фикир-хиял авур Атема кимел алайбуруз: "Инал алай кIуьд касдикай муьжуьд касдиз салам!"-лагьана, колхоздин конторар галай патахъ рекье гьатна.

----------------------------------------------------------------------------------------------

Кроссворд инай килигиз жеда
----------------------------------------------------------------------------------------------