Газета №25

 Райадминистрацияда
Нубатдин совещанидал

16-июндиз райадинистрациядин актовый залда нубатдин совещание хьана.
Совещание "Кьурагь район" муниципальный тешкилатдин администрациядин кьил С.Гьамидова кьиле тухвана.
Совещанидал хейлин идарайрин руководителри авунвай кIвалахдикай информация гана.
Райондин образованидин управленидин начальник Р.Катибова къейд авурвал, урус чIалай ЕГЭ-дай 14 аял квачиз амай аялриз проходной балар хьана, 18-19-июндиз резервный ЕГЭ кьиле фида, математикадай къе нянихъ чир хьун лазим я, 20 аял гатун лагерриз ял ягъиз фенва, гатуз лагерра ял ягъун патал 90 аялдин арза ганва.
Райондин Культурадин управленидин начальникдин везифаяр тамамарзавай К.Фейзуллаевади лагьайвал, Россиядин Югъ Культурадин работникри концерт гуналди къейдна, районда кьиле тухузвай фестивалдиз гьазур жезва, фестивалдин патахъай вири районриз зенгер авунва, Шарвилидин сувариз гьазурвал аквазва.
Районда финансовый управленидин начальникдин заместитель П. Бабаевади алай вахтунда муаллимриз отпускнояр ахъаюнал машгъул тирди, гьеле муькуь идарайрин мажибрин пулар хтанвачирди лагьана.
Бейкар агьалияр кIвалахдал таъминардай Центрдин директор Гь.Гьажиханова школаяр ремонт авунин кIвалахда школьникар желб авун патал директоррихъ галаз икьрар кутIуннавайди, алатай йисуз ремонтдин кIвалахар финансировать тавунвайвиляй алай йисуз школайрин директорри иштирак тийизвайди, шаз больницада стажировкадиз ракъурай 6 касдиз пулдин такьатар гун тавунвайди лагьана.
Агьалияр яшайишдин рекьяй хуьдай управленидин ребиалитационный центрдин директор А.Катибова отделди пландал асаслу яз кIвалахзавайди, стол, стулар бегьем авачирди лагьана. Совещанидал винидихъ рахайбурулай гъейри райондин пенсионный фондунин отделдин начальник А.Назаралиев, рекьерин управленидин начальник А.Агъабалаев, ва масабур рахана.
С.Гьамидова кIвалах вилик тухун, кIвалахдавай кимивилер вахтунда арадай акъудун вири руководителриз тагькимарна.

-----------------------------------------------------------------------------------------

З.Саидова.
Бейгьуш ишлемишунин вилик пад кьазва

Чаз виридаз чизвайвал, эхиримжи са шумуд йисуз неинки маса гьукуматра, гьакIни Россиядани, Дагъустандани, гьатта чи райондани секинсуз уьмуьр хьанва. Терроризмдини экстремизмди кьил хкажна, жегьилар дуьз рекьелай алудиз алахънава.
Гьайиф хьи, чи секинсузвал са и кардални акъваззавач. Идалай гъейри, алай вахтунда жегьилри ички ва бейгьуш ишлемишзавай дуьшуьшарни авачиз туш.
И крарини чак къенин йикъуз еке къалабулух кутазва.
Алай вахтунда бейгьуш ишлемишунин вилик пад кьунин карда чи районда кIвалах гьикI кьиле физватIа суьгьбет авун патал чун Россиядин МВД-дин Кьурагь районда авай оперативно-розыскдин хилен уголовный розыскдин отделдин начальник Бабахваев Абакар Юрфалудиновичахъ галаз гуьруьшмиш хьана ва адаз
шумуд суал гана.
-Абакар Юрфалудинович, алай вахтунда чи районда бейгьуш ишлемишзавай шумуд кас ава?
-Алай вахтунда чи районда бейгьуш ишлемишзавай са кас ава, маса гуз кьур дуьшуьшар пуд хьана.
-Ибурук яш тамам тахьанвай аялар квани?
-Ваъ, абур вири яш тамам хьанвайбур я. Ибур вири чи учетдиз къачунвайбур я. Абур участковыйрин гуьзчивилик квайди я.
-Абакар Юрфалудинович, и бейгьуш ишлемишзавайбуруз, ам маса гузвайбуруз гьихьтин жаза гузва?
-Абуруз кьур бейгьушдин кьадардиз килигна суддалди жаза гузвайди я.
-Алай 2014-йисуз бейгьуш гваз кьур дуьшуьшар хьанани?
-Алай, яни 2014-йисуз, Штулрин хуьряй, вичиз ишлемишун патал бейгьуш гваз са кас, жегьил гада кьуна. Ам суддалди 15 агъзур манат пул жерме авуна.
-Куьне и татугайвилер арадай акъудун патал гьихьтин кIвалахар кьиле тухузва?
-Чна участковыярни галаз райондик квай хуьрерин ва центрдал алай школайра кIелзавай аялрихъ галаз бейгьуш ишлемишуниз, маса гуниз ва гьасилуниз акси гуьруьшар тухвана, видеофильмаяр къалурна.
-Эхиримжи вахтара бейгьуш гьасилзавай чкаяр (цанвай чилер) винел акъудай дуьшуьшар хьанани?
-2013-йисуз бейгьуш гьасилзавай са шумуд чкадай Бахцугърин ва КIирийрин тамарай, Хъукъваза финин кулар тергна.
Алай 2014-йисуз лагьайтIа, 12-майдилай 31-октябрдалди чна и кардин патахъай кIвалах тухузва. Эгер мад ихьтин чкаяр дуьшуьш хьайитIа, чна абур мад тергда.
-Абакар Юрфалудинович, квез чи райондин газет кIелзавайбуруз вуч лугьуз кIанзава?
-Гьуьрметлу районэгьлияр, эгер квез шак къведай кас, шей акуртIа, полициядиз атана, я тахьайтIа зенг авуна хабар авун тIалабзава.
Чи телефондин нумра: 22-1-84. ТIвар раиж тавун заминвалзава.
Гьар са диде-бубадивай вичин аялдал гуьзчивал тухун, йифен вахтунда аял куьчедиз ракъур тавун тIалабзава. Гьар са диде-бубадиз вичин аял гьина аватIа, ада вуч ийизватIа чир хьун лазим я. За умудзава, зи тIалабунриз халкьди фикир гудайди.
-Чухсагъул квез чахъ галаз суьгьбет авунай. И татугайвилер арадай акъудна, халкьдин секинвал патал куьн чи къаравулда ян тагана акъваздайдак чна умуд кутазва.

--------------------------------------------------------------------------------------------

М.Агьмедова.
Дин

Аша гурлу межлис

14-июндиз чи райондин Ашарин хуьре Гьажи Абдуллагь Эфенди рикIел хкунин лишан яз гурлу межлис кьиле тухвана. Иниз Къизляр райондиз куьч хьанвай ашарвияр, Къайтагъ райондай, Костекдай, чи райондин вири хуьрерай агьалияр атанвай, гьакIни Россиядай ва Россиядин къеце патан гьукуматрай ашарвияр хтанвай.
Межлис Кьурагьрин хуьруьн мискIиндин имам Омаров Шамил Гьажидини ва Гьажи Абдулалагь Эфендидин мукьва-кьили Магьмудов Гьасана кьиле тухвана. Мугьманар вири Гьажи Абдуллагь Эфендидин пIир алай майдандал кIватI хьанвай. Инал Гьажи Абдуллагь Эфендидин уьмуьрдикай ва адан аламатрикай адан мукьва-кьили Абдурагьманов Къурбана ахъайна. Лагьана кIанда, чи районда ихьтин тешкиллу, икьван халкь кIватI хьанвай межлис сад лагьай сеферда хьанвайди я.
Мавлиддин чIехи пай харжияр Гьажи Абдуллагьан багъри Гьажи Мегьамедшафиди авунвай ва гьакIни пата къерехда авай ашарвийрини чпивай жедай харжияр кутунвай. Атанвай мугьманриз инал тIуьнар алай столар тешкил авунвай.
Къизляр райондин Сарсардай, Черняевкадай, Къайтагъ райондай, Костекдай, Хпуькьай, Кьурагьай, Усарин хуьряй атанвай мугьманри нашидар, Къуръандин аятар Дагъустандин вири чIаларалди кIелна.
Гьа и мавлиддал алай кьван жемятдикай садни садакьа гвачиз рахкурнач.

----------------------------------------------------------------------------------------------

"Лезги газетдай" къачурди я.
«Шарвили» эпос –чи дамах

Малум тирвал, тарихдин гзаф девирра чи халкьди хайи чилер, хайи къул, Диде-Ватан хуьн паталди гзаф ягъийрихъ акси женгер тухвана, пара дявейра иштиракна ва гьа дявейрай ам гьамиша гъалиб яз акъатна.
Гьелбетда, гьамиша къецепатан чапхунчийрихъ галаз женгера хьайи, гзаф дявейра иштиракай халкьдихъ вичин кьегьал рухваяр хьун ва ада вичин фольклорда гьахьтин игитрин художественный къаматар арадал гъун тIебии кар я. Чи фольклорда ахьтинди Шарвилидин къамат я.

"Шарвили" эпос ахтармишунин тарихдай.
"Шарвили" эпосдикай сифте яз малумат гайиди чи лап зурба фольклористрикай сад хьайи Агъалар Гьажиев (1907-1943-йисар) я. Ада 1941- йисуз вичи акъудай "Лезгийрин фольклор" ктабда Шарвилидикай халкьдин арада машгьур тир са риваят чапнава. Эсер ада вичи 1941-йисан январдиз хкемви Магьмудов Загьиравай кхьейди къейднава. Ктабдин эхирда машгьур фольклорист Александр Назаревича (1903-1985) гьа риваят урус чIалаз элкъуьрна чапнава. Ина А.Назаревича гьакIни Шарвилидикай вичиз малум тир маса малуматарни ганва.
1959-йисуз машгьур литературовед ва философ Агьед Агъаеван (1924-2003) "Лезгийрин литература" ктаб чапдай акъатна. Ана алимди "Шарвили" эпосдикайни вичин фикирар лагьанва…
"Шарвили" эпос илимдин бинедаллаз чирунин карда филологиядин илимрин кандидатар-Фируза Вагьабовадин, Айбике Гъаниевадин, профессор Гьажи Гашарован зегьметар екебур я.
Эпос ахтармишунин, кIватIунин ва халкьдин арада таблигь авунин карда Бакудин алимрини са кьадар кIвалахар кьиле тухвана. Ватандин ЧIехи дяведилай виликан девирда Азербайжандин Илимрин Академиядин аспирант хьайи, миллетдал гьалтайла лезги тир Хузеймет Къадимова (1904-1993) Азербайжандин лезги районрай кIватIай "Шарвили" эпосдин са вариант гьа академиядин гъилин хатIарин кхьинрин фондуниз вахканай. Гуьгъуьнай а вариантдин кьисмет гьикI хьанатIа чаз малум туш.
Алатай асиррин 80-йисарилай Бакудин алимрикай филологиядин илимрин доктор Мавлуд Ярагьмедова "Шарвили" эпос ахтармишиз эгечIна. Адан "Лезгийрин эпос "Шарвили" тIвар алай макъала сифте яз "Азербайжан ССР-дин Илимрин Академиядин хабарра" (1980, №4) азербайжан чIалал чап авунай. Гуьгъуьнай М.Ярагьмедова 1985-йисуз акъатай вичин "Азербайжандинни Дагъустандин литературадин алакъаяр" монографияда «Лезги дастан» "Шарвили" ва "Корогълу" тIвар алаз са кьилни чапнай. Амма, гьайиф хьи, Мавлуд Ярагьмедован "ахтармишунар" илимдилай гзаф сиясатдиз къуллугъзавайбур хьана. Ада Азербайжанда авай туьрк миллетчийриз хуш атун патал, са себебни, са фактни авачиз, "Шарвили" эпос Азербайжандин XVIII асирдин фольклордин имарат тир "Корогълу" дастандин таъсирдалди арадал атайди субутиз алахъна. И кар, гьелбетда, илимдин рамкайра гьакьдай кар туш.
"Шарвили" эпос кIватIунин ва ахтармишунин кардик бажарагълу шаир ва фольклорист Абдул Фетягьани (1948-2012) вичин пай кутуна. Ада 1991-йисуз Махачкъалада "Шарвили: риваятар, махар" тIвар алаз ктаб акъудна. И ктабни, эпосдикай адалай вилик акъатнавай маса ктабар хьиз, гзаф къиметлу са эсер хьана.
"Шарвили" эпос ахтармишунин, чап авунин ва урус чIалаз таржума авунин карда машгьур публицист ва таржумачи, тарихдин илимрин кандидат Ризван Ризванован зегьметни чIехиди я. Алимди 1999-йисуз, З.Ризванова ва Б.Салимова кIватIна литературадин кIалубдиз хкай вариант, сифте гаф кхьена, чапдай акъудна. 2008-йисуз ада и вариант урус чIалаз элкъуьрна, сифте гафни галаз Махачкъалада чапна.
"Шарвили" эпосдикай акъатнавай эхиримжи эсердин автор публицист Дашдемир Шерифалиев я. Ада 2008-йисуз Махачкъалада "Шарвили" эпос цIийи: риваятар ва делилар" тIвар алаз ктаб акъудна. Ам "Шарвили" эпос ахтармишунрин рекье вилик къачунвай са кам ва къиметлу очерк хьанва.
"Шарвили" эпос машгьур авунин карда Имам Мизамудинович Яралиевани гзаф зегьмет чIугуна. 2000-йисалай гьар йисуз Ахцегьа кьиле тухузвай суварин йикъари "Шарвили" эпос тек са Дагъустанда ваъ, гьакI вири Россияда машгьур авуна. "Шарвили" эпос гьам лезги ва гьакIни урус чIалал чап авунин харжарни Имам Мизамудиновича вичин хивез къачурди я.
Эпос, гьелбетда, идалай кьулухъни ахтармиш хъийида ва ада идалай кьулухъни яратмишдай гзаф авторриз илгьам гуда. Абурук и темадай цIийи эсерар арадал гъидай руьгь кутада.

Пагьливан Шарвили дуьньядал атуникай

Чи фольклорда Шарвили дуьньядал атуникай рахазвай са шумуд версия ава. Чи фикирдалди, виридалайни гзаф халкьдин арада чкIанвайди виридалайни машгьурди "Пад яру ич" махуна ганва. И версияда Шарвилидин буба Дагъларани диде Цуьквера ирид йисуз чпиз аял хьун вилив хуьзва. Амма абуруз аялар авач. Садлагьана абурун кIвализ чина нур авай агъсакъал Касбуба къвезва ва ада абуруз пад яру ич гузва. Гьа ич тIуьрдалай кьулухъ абуруз аял жезва ва гьа аялдал тIварни Шарвили эцигзава.
Ф.Вагьабовади вичин "Лезги литература арадал атун"" монографияда маса мисал гъанва. Гьада къалурнавайвал, диде Насперидин нериз тIветI финалди, ам кIвачел залан хьана ва и кардилай кьулухъ Шарвили дуьньядал атана.
Шарвили дуьньядал атуникай публицист Дашдемир Шерифалиева кхьизва: "ТIури шегьердин патав гвай Шткан тIвар алай яйлахда авайла, тIуриви руш Гъедварзни адан адахли-викIегь жегьил чубан Дагълар гьаялу мукьвавилин легьзеда цIайлапанди яна: дуьньядиз Шарвили акъатна".
Чеб дуьньядиз атуникай чара-чара версияр хьун эпосдин къагьриманриз хас къилихар я. И кар чаз дуьньядал машгьур эпосрин къагьриманрин биографийрайни аквазва.

Шарвили тарихда хьайи кас яни?

Илимдин ва тарихдин чешмейрай аквазвайвал, Шарвили тарихда яшамиш хьайи кас я. И месэладикай сифте яз кхьейди профессор Агьед Агъаев я. "Халкьдин, иллаки Ахцегьрин жемятдин сивера авай рахунриз килигна, Шарвили гьакъикъатда хьайи кас тир. Ам зурба пагьливан, Ахцегьрин душманрихъ галаз дявейра еке игитвилер къалурай кас тир лугьуда",-кхьизва алимди.
Гуьгъуьнай и месэладал Фируза Вагьабовадини фикир желбна. Алимди "Шарвили" эпос арадал атай вахт Алпан гьукуматдихъ галаз алакъалу ийизва.
Чи фикирдалди, винидихъ эцигнавай суалдиз виридалайни дуьз жаваб эпосди вичи гузва. Эпосда са чкадал Шарвилиди чапхунчи Луклулаз акси дяве ийизвайди къалурнава. Фольклористри Луклул римвийрин полководец Лукулл Луций Лициний тирди къейдзава. Амни чи эрадилай вилик 1 асирда яшамиш хьайи, Алпан гьукуматдал кьушунар чIугуна, алпанвийрихъ-лезгийрихъ галаз дяве авур кас я. И кардини Шарвили гьа девирда гьакъикъатда хьайи кас тирди инанмиш жедай ихтияр гузва ва винидихъ ганвай Ф.Вагьабовадин фикирар дуьз тирди субутзава.
"Кьегьал рекьида, тIвар амукьда" лугьуда бубайри, Шарвилидин игитвилер чи халкьдин манийра, махара, кьисайра, риваятра яшамиш жезва.

"Шарвили" эпосдин кьетIенвилер

Филологиядин илимрин кандидат Айбике Гъаниевади Шарвилидикай арадал атанвай фольклордин эсерар пуд патал пайзава: 1) къагьриманвилин махар; 2) кьисаяр ва риваятар; 3) манияр.
Чи фикирдалди, Шарвилидикай малум тир эсеррикай сифтени-сифте майдандал атанвайбур манияр я. А маниярни жуьреба-жуьре я: лирикадин ва хордин манияр, манияр- ишелар ва масабур. И манийриз кьилдин, чпиз хас тир сюжетар авач: абура чара-чара тарихдин вакъиаяр ваъ, Шарвилидин уьмуьрдай чара-чара дуьшуьшар, адан игитвилер,къуччагъвилер къалурна, пагьливандин гьунаррин тариф ийизва.
Шарвилидикай манияр адакай арадал атанвай прозадин эсеррани гьатнава. Вири и манийра Шарвилидин къагьриманвилин къамат ва ада тухвай женгер къалурнава.
Шарвилидикай туькIуьрнавай манийриз, мисал яз, чавай "Вад йиса авай Шарвили гьайванрив финикай мани", "Шарвилиди гиярвияр кускафтаррикай азад авуникай мани", "Шарвилидиз Гиярдин дишегьлийри лагьай мани" ва масабур къалуриз жеда.
Шарвилидикай туькIуьрнавай махарани, манийра хьиз, адан игитвилерикай, кьегьалвилерикай, ада къецепатан чапхунчийриз ва чIулав къуватриз акси кьиле тухвай женгерикай, ада иштиракай дявейрикай ихтилатзава. И махара ам чIехи къуват, зурба беден, иер буй-бухах авай са пагьливан хьиз къалурнава. Ада Ватан гьар са чIавуз жуьреба-жуьре къуватрикай: девлерикай, кускафтаррикай, чинеррикай, чапхунчийрикай, халкьдин душманрикай хуьзва. Ихьтин махариз, мисал яз, чавай "Пад яру ич", "Аламатдин гада", "КIеви ахвар", "Надир-шагьдин кьушун тергун" ва масабур къалуриз жеда.
Шарвилидикай арадал атанвай кьисайрин ва риваятрин кьилин тема къецепатан чапхунчийрикай Ватан хуьнин тема я. Абуруз, мисал яз, чавай "Къуват", "Турни гуьрз", "КIелед хев" ва масабур къалуриз жеда. "Шарвили" эпосдин масштаб чIехи я. Ина лезгийрин уьмуьрдин гзаф терефар къалурнава, инсанрин майишатдин къайгъуйрилай гатIумна, лап пак мурадралди вири халкьдин руьгь экуь, художественный рангаралди ганва.
"Шарвили" эпосда кьилин игитдилай гъейри маса образрини кьетIен чка кьазва. Абуруз, мисал яз, чавай эсерда чIехи гьуьрметдалди ва муьгьуьббатдалди яратмишнавай Дагъларан, Цуькверан, Касбубадин ва маса къаматар къалуриз жеда. Абур гьар сад эпосда рикIел аламукьдай художественный рангаралди, кьетIенвилералди ганва.
Къецепатан чапхунчийриз ва чIулав къуватриз акси женг "Шарвили" эпосдин лейтотив я. Вичин къилихрин къенивилелди, игитвилелди, викIегьвилелди, жумартвилелди Шарвили халкьдин рикIиз кIани, сейли образ я. Халкьди вичиз акуна кIанзавай хъсан жигьетар вири адан къилихра ганва.
Санлай къачурла, "Шарвили" эпос халкьдин мурадрин, азадвиликай, аслу туширвиликай фикиррин, хиялрин энциклопедия я. Ам оптимиствилин нотайралди акьалтIзава: "Зи халкь, эгер куьн са вядеда кIевера гьатна, квез куьмек герек атайтIа, гьа чIавуз КIелед хивез, зи сурун кьилихъ атана, куьне пуд сеферда "Шарвили, Шарвили, Шарвили!" лагьана эвера. Гьа чIавуз зун куь куьмекдиз къведа". Им халкьдин руьгьдин чIехивилин, адан экуь гележегдихъ авай чIехи умуддин лишан я.
"Шарвили" эпос лезги литературадани илгьамдин чешмейрикай сад я. Эсердин бинедаллаз лезги шаирри, прозаикри ва драматургри гзаф эсерар яратмишнава ва алай вахтундани яратмишзава. Шарвилидиз алай девирдин гзаф шаирри шиирар ва композиторри гьаваяр бахшнава. Абуруз, мисал яз, чавай шаиррикай Алирза Саидован, Ибрагьим Гьуьсейнован, Забит Ризванован, Байрам Салимован, Исмихан Къадимован, Фейзудин Нагъиеван, Седакъет Керимовадин, Гуьлбес Асланхановадин, Арбен Къардашан, композиторрикай Асеф Мегьманан, Мегьамед Гьуьсейнован, Къагьриман Ибрагьимован, А.Гьамзатован ва масабурун тIварар кьаз жеда.
Девирар, несилар къвез-алатда. Гьар са девирдиз, гьар са несилдиз вичин къилихар, вичин хиялар, мурадар, дуьнья акунар жеда.
ЯтIани "Шарвили" эпос ва адан кьилин игит тир пагьливан Шарвили вири девирра чи халкьдин дамах ва даях яз амукьда.
-----------------------------------------------------------------------------

Гь.С.Гьажиханов, райондин ЦЗН-дин директор
Райондин бейкарар хабардарзава

И мукьвара чи райондин ЦЗН-дин директор Гьажиханов Гь.С. чаз районда авай бейкарар кIвалахдал таъминарун патал, чпи кьиле тухузвай кIвалахдикай ихьтин малумат гана.
-Лугьун лазим я, лагьана ада, алай вахтунда районда кардик квай ЦЗН-да авай бейкаррин кьадар гзаф хьуниз килигна чи тIалабуналди Москва шегьерда авай чи районэгьли, предприниматель Ф.Г.Мамедова вичин ООО "Фер Эль-Гам" тIвар алай фирмада жуьреба-жуьре кIвалахрал таъминардай мумкинвилер гузва. И фирмади кьиле тухузвай кIвалахдикай рахайтIа, ам алай вахтунда, хуьруьн майишатди гьасилзавай гьар жуьредин продуктар консервировать авунал ва абур супермаркетриз агакьарунал машгъул жезва.
-Къенин юкъуз и фирмадиз кIвалахун патал гьихьтин рабочияр лазим къвезватIа ва кIвалахдай чкаяр аватIа, чна агъадихъ сифтени-сифте районда авай бейкаррин фикирдиз гъизва.
Рабочияр (фасовщикар, комплектовщикар, формировщикар); истемишунар: итимар ва дишегьлияр 45 йис яш тамам тахьанвайбур, чпихъ кIвалахда тежриба авай ва медицинадин книжка хьайитIа хъсан я.
КIвалахдин шартIар: Московский областдин шейэр гьасилзавай базадин сергьятда, экуьнин 8-далай нянин 8-далди, 6 йикъа кIвалахиз, 1 йикъа ял яда. Вацран мажиб 25000 манат ва авур кIвалахдиз килигна гузвай пулдин кьадар гьадалай виниз хьун лазим я.
Соцпакет ва документар ТКРФ-дин къайдайрал амал авуна кьабулда. КIвалахзавай вахтунда яшамиш жедай чка ва 3 чIавал тIуьн пулсуз гузва.
Водителар-экспедиторар;
истемишунар: В,С ва В,С,С, Е-категориядин водителвилин удостоверение, 2 йисалай виниз тир водителвилин стаж ва медицинадин книжка.
КIвалахдин шартIар: Москвада ва Московский областда, 2013-йисан иномаркайрин цIийиз хъувунвай автопаркуна 5 йикъа кIвалахиз, 2 йикъа ял яда. Вацран мажиб 40000 манат, соц.пакет ва документар ТКРФ-дин закондал, къайдайрал амал авуна кьабулда.

---------------------------------------------------------------------------------------------

Хуьрехуьруьн юкьван школади 1913-йисуз Грейханова Диана Динамудиновнадин тIварунихъ ганвай 05 БВ 00117770-нумрадин аттестат квахьнава. Ам ихтибарда амач.

---------------------------------------------------------------------------------------------