Газета №22

 Алван Рамазанова.
Республикадин рабочий делегация Кьурагьа

22-майдиз Кьурагь райондиз Республикадай къир цазвай рехъ ва Хпежа эцигнавай муьгъ, Хпежрин хуьруьн рехъ ахтармишун патал РД-дин рекьерин агентстводин руководитель Хучбаров Загьид Гьажиевич, РД-дин Халкьдин Собранидин Председателдин заместитель, РД-дин халкьдин Собранидин депутат Исакьов Сейфуллагь Бейдулагьович, РД-дин алакъадинни транспортдин ва промышленностдин рекьяй комитетдин Председатель Гьашимов Михаил Фатулахович, РД-дин алакъайрин, транспортдин ва промышленностдин комитетдин Председателдин заместитель Гьамзаев Агьмед Мегьамедкьадиевич, рекьер ремонт авунин ва территориальный рекьер хуьнин РД-дин рекьерин агентстводин отделдин начальник Гьажибеков Гьажибег Эминович, "Югагропромдорстрой" ООО-дин подрядный организациядин руководитель Рамазанов Насир Алиевич квай делегация атана.
Абур атунин кьилин макьсад "Кьасумхуьр-Кьурагь" рекьин "Штул-Кьурагь" участокдиз къир цунин кIвалах гьикI кьиле физватIа ахтармишун тир.
Сифте "Кьурагь-Штул" рекьин участокда куьлуь муькъвер эцигунин, атай селдин яд фин патал турбаяр кутунин кIвалах ахтармишна.
Ахпа атай рабочий делегация Хпежрин хуьруьн кIамал эцигнавай муькъуьз, гуьне пата авай рекьиз килигиз фена.
Гуьгъуьнлай "Кьурагь район" муниципальный тешкилатдин администрациядин кьилин кабинетда совещание кьиле фена.
Анал З.Хучбарова алай вахтунда 6 км рекьиз къир цун планламишнавайди, жедай мумкинвилерикай менфят къачуна Кьурагьиз кьван къир цун патал вири къуватар эцигна, чалишмиш жедайди лагьана.
С.Исакьова ва С.Гьамидова къир цаз башламиш авур вахтуниз килигайла, подрядный организацияди хъсан кIвалах авурди, абуруз вири районэгьлийрин патай чухсагъул лагьана ва район тешкил хьайидалай инихъ 85 йис хьунин юбилей жедалди Кьурагьиз кьван къир цун тIалабна. Атанвай делегациядиз чухсагъул лагьана.

 

Гьафтедин нетижаяр кьуна

26-майдиз райадминистрацияда актовый залда нубатдин совещание хьана. Совещанидал райондин руководителри авунвай кIвалахдихъ "Кьурагь район" муниципальный тешкилатдин администрациядин кьил С.Гьамидова яб акална.
ЦРБ-дин кьилин духтур Р.Хидирова алатай гьафтеда райондин больницадин духтурри Махачкъалада, Дербентда кьиле фейи совещанийра иштиракайди, алатай гьафтеда кIеви азарлуяр аваз Дербентдиз, Махачкъаладиз рекье турди, больницада хирургдин, акушер-гинекологдин патахъай четин жезвайди, диспансеризация ийизвайди, мартдин вацран мажиб ганвайди лагьана.
Райадминистрациядин хуьруьн майишатдин управленидин начальникдин везифаяр тамамарзавай Н.Мисриева къейд авурвал, аранда гатун-чуьлдин кIвалахриз гьазур жезва, Бугъдатепеда векьер язава, Маллакентда, Бугъдатепеда, Кумухъа къацар хъсанзава, "Курахский" МСП-дин "Шам", "Куба" майишатри цанвай магьсулар кьуранва.
Райондин Культурадин управленидин начальникдин заместитель К.Фейзуллаевади работникри Кьурагьрин 1-нумрадин юкьван школадин эхиримжи зенгинин мярекатда иштиракайди, алай вахтунда районда кьиле тухузвай фестивалдиз гьазурвилер аквазвайди, и фестивалда гьар са райондай кьве номер: са мани ва я макьам халкьдинди, муькуь номер ватанпересвилин мани хьана кIанзавайди лагьана.
"Сельсовет Курахский" муниципальный тешкилатдин кьил С.Къурбанова 24-майдиз Хуьрехуьруьз фейиди, анин булахдин турбаяр чIур хьанвайди, аниз лазим турбаяр тухвайди, цин линия дуьзар хъувун патал гьазурвилер аквазвайди, Кьурагьа Къурбалийрин мягьледин цин линия дуьзар хъувуна кIанзавайди, Вилен кIама авай яд михьзавай чка михьи авун гъиле кьунвайди, Вилен кIама цин линия дуьзар хъувун патал 600 метр турбаяр герек къвезвайди лагьана.
Совещанидал винидихъ рахайбурулай гъейри, райУО-дин кьилин бухгалтер Р.Асланов, райондин эцигунринни ЖКХ-дин управленидин начальник Ш.Мисриев, Райондин физкультурадинни спортдин ва жегьилрин крарин рекьяй комитетдин отделдин начальник Р.Рамазанов рахана.
С.Гьамидова Кукваза кайи кIвалерин иесидиз куьмек яз райондин идарайрин работникрин са йикъан мажиб гунин гьакъиндай къарар акъуднавайди лагьана.

 

Мярекатар тешкиллувилелди кьиле тухунин мураддалди

Райадминистрациядин кьилин кабинетда "Кьурагь райондин авазар" халкьдин манийрин республиканский конкурсдиз ва лезгийрин халкьдин игитвилин эпос Шарвилидин суварриз гьазурвал акунин ва кьиле тухунин гьакъиндай райадминистрацияда тешкилнавай оргкомитетдин сад лагьай заседание хьана.
Заседание "Кьурагь район" муниципальный тешкилатдин администрациядин кьил С.Гьамидова кьиле тухвана.
Анал 22-майдиз "Кьурагь район" муниципальный тешкилатдин администрациядин кьил С.Гьамидова "Кьурагь райондин авазар" халкьдин манийрин республикадин конкурс ва лезги халкьдин игитвилин эпос Шарвилидин сувариз гьазурвал акунин ва кьиле тухунин гьакъиндай 57-нумрадихъ акъуднавай къарар веревирд авуна.
Сифте Кьурагьа конкурсдин хкязавай тур жедайвал, ахпа Кумухърин хуьре конкурс кьиле тухудайвал меслятна.
И конкурсдиз гьар са райондай 2-3 манидин нумра гъун, манийрин нумраяр анжах халкьдинбур ва ватанпересвилинбур хьун кьилин макьсад тирди лагьана.
Конкурс тешкиллувилелди тухунин гьакъиндай тайин тир руководителриз буйругъар гана.
Лезгийрин эпос Шарвилидин сувариз гьазур хьунин гьакъиндай, суварин майдан, сцена, аниз тухузвай концертдин программа маракьлуди авуниз фикир гун тагькимарна.

 

Санал тир заседание

27-майдиз райадминистрациядин актовый залда "Кьурагь район" муниципальный тешкилатдин администрациядин ва депутатрин Собранидин санал тир заседание хьана.
Заседанидин кIвалахда " Кьурагь район" муниципальный тешкилатдин кьил З. Азизова, "Кьурагь район" муниципальный тешкилатдин аппаратдин работникри, Собранидин депутатри, хуьрерин поселенийрин кьилери, организацийрин, учрежденийрин, хуьруьн майишатдин руководителри иштиракна.
Заседание "Кьурагь район" муниципальный тешкилатдин администрациядин кьил С. Гьамидова кьиле тухвана.
Заседанидал агъадихъ галай месэлайриз килигна:
1 "Хуьруьн майишатдин карханаяр гад агудуниз ва алаф гьазуруниз гьазур хьунин гьакъиндай".
2 " Кьурагь район" муниципальный тешкилатдин Уставда алававилер ва дегишвилер хтунин гьакъиндай".
3 "Кьурагь район" муниципальный тешкилатдин бюджетда дегишвилер хтунин гьакъиндай".
4. "Кьурагь райондин алава чирвилерин учрежденийрин кIвалах вилик фин патал кьабулзавай серенжемрин гьалдин гьакъиндай" "Кьурагь район" муниципальный тешкилатдин кьили 43-нумрадихъ акъуднавай къарардин гьакъиндай".
5. "Гьукуматдин игьтияжар кьилиз акъудун, шейэр къачун патал Кьурагь райондин организацийрин кIвалах авай гьалдин гьакъиндай".
6. "Кьурагь район" муниципальный тешкилатдин администрациядин кьилин заместителвилин къуллугъдал Э. Исаева тайинарунин карда разивал гунин гьакъиндай".
7. "Кьурагь район" муниципальный тешкилатдин кьил З.Азизов отпускадиз финин гьакъиндай".
8. "Кьурагь район" муниципальный тешкилатдин депутатрин Собранидин 2008-йисан 25- апрелдиз акъатнавай "Кьурагь район" муниципальный тешкилатдин сергьятда кIвалахдин кьилдин жуьрейрин вмененный къазанжидал къвезвай сад тир налогдин гьакъиндай" 10-нумрадин решенида дегишвилер хтунин гьакъиндай" .

Сад лагьай месэладай доклад райадминистрациядин хуьруьн майишатдин управленидин начальникдин везифаяр тамамарзавай Н. Мисриева авуна.
Кьвед лагьай месэладай райадминистрациядин юридический отделдин начальник С. Селимов рахана.
Пуд лагьай месэладихъ галаз райондин финансовый управленидин начальник Б. Ибрагьимова танишарна.
Кьуд лагьай месэладай райондин РайУО-дин начальник Р. Катибова доклад авуна.
Вад лагьай месэладай "Кьурагь район" муниципальный тешкилатдин администрациядин кьилин 1-заместитель А.Фейзуллаев рахана.
Ругуд ва ирид лагьай месэлайрихъ галаз "Кьурагь район" муниципальный тешкилатдин кьилин заместитель М-П. Будаева танишарна.
Муьжуьд лагьай месэладай А.Фейзуллаева информация гана.
Заседанидал къарагъарнавай месэлайрай З.Азизов, С.Гьамидов, КьепIиррин, Къумухърин, КIирийрин хуьрерин администрацийрин кьилер, хейлин майишатрин руководителар рахана.
Гьар са месэла депутатри рейсадвилелди сесер гуналди кьабулна, тайин тир къарар акъудна.

 

Ф. Абдурагьманова
Эхиримжи зенгер

ЦIийи уьмуьрдиз кам вегьезвайбурун суварик

24-май, цавал са цифни алачир, чими рагъ авай, гуьлуьшан гатфарин югъ хьана.
И юкъуз вири Россияда ва Дагъустанда хьиз чи райондани вири школаяр акьалтIарзавай аялриз эхиримжи зенгинин мярекатар кьиле фена.
ИкI, Кьурагьрин 2-нумрадин юкьван школадин вилик квай гьаят школадин муаллимри, аялрин куьмекдалди суварин къайдада шарарални, лозунгралдини пайдахрал лап кьетIен къайдада чIагурнавай.
Экуьнахъ школадин гьаятдиз, хуьруьн хейлин агьалияр, райондин жавабдар къуллугъчияр, аялрин диде-бубаяр, муаллимар, школадин парталар алукIна, гъилера атирлу цуькверин кIунчIар аваз чIехи ва гъвечIи классрин аялар атана ацIанвай.
Сятдин 10 тамам хьайила, эхиримжи зенгиниз талукьарнавай шадвилин линейка и школадин ученикар тир М.Нурмегьамедовани З.Катибовади вири школа акьалтIарзавай аялриз мубарак авуналди, гуьгъуьнлай РФ-дин Гимн ягъуналди ачухна ва гаф школадин директор А.Гьажиеваз гана. Вичин рахунра ада школадин тарихдикай, хейлин йисара ина чирвилер къачур аялрикай хуш келимаяр рахана.
Ада алай кIелунин йисуз школа акьалтIарзавай аялриз чIехи уьмуьрдиз вегьезвай камар рикIин сидкьидай мубарак авуна, виридахъ сад тир госэкзаменрай хъсан нетижаяр хьана, хайи хуьруьз, жуван Ватандиз, диде-бубадиз вафалу веледар жедайдак умуд кутазвайди лагьана. Гъуьгъуьнлай А. Гьажиева чпин школадин ва райондин спортдинни жегьилрин крарин рекьяй отделдин начальник Р.Рамазанован патай, райондин къене спортивный рекьяй кьиле фейи жуьреба-жуьре акъажунра кIвенкIвечи чкаяр кьур аялриз медалар ва грамотаяр, гьакIни школадин общественный уьмуьрда хъсан иштирак авур, райондин ва республикадин олимпиадайра хъсан нетижаяр хьайи, школада хъсан къиметар аваз кIелай аялриз грамотаяр гана.
Аялриз сувар райадминистрациядин патай райадминистрациядин кьилин заместителдин везифаяр вахтуналди тамамарзавай Э. Исаевади диде-бубайрин патай хейлин йисара Кьурагьрин 1-нумрадин юкьван школада НВП-дин муаллим яз кIвалахай М.Къурбанова, аялриз сифтегьан классда тарсар гайи Л.Къадировади, 11-класс акьалтIарзавай аялрин классдин руководитель Ж.Бутаевади, 10-классдин аялри хуш келимайралди мубарак авуна, аялрихъ гележегда кIелунра еке агалкьунар хьана кIанзавайди лагьана.
И школадин 5-классдин ученица Алиева Мальвинади гъвечIи малаикдин къайдадин парталар алаз, школа акьалтIарзавай аялриз ЕГЭ-ра хъсан нетижаяр патал Аллагьдивай тIалабна, ва и классдин рушарин дестеди чпин муаллим Д.Къурбановадихъ галаз гьазурнавай кьуьл тамамарна.
Шадвилин мярекатдал 11-классдин аялри гьазурнавай программадин метлеблувал къейд ийиз жеда. ИкI, 11-классдин аялри хейлин манияр лагьана, абурун арадай школадикай мани тамамарай Алина Къурбановадин сесиниз кьетIен къимет гуз жеда. Гуьгъуьнлай школа акьалтIарзавай аялри чпин классдин сифте руководитель, вахтсуздаказ арадай акъатай Ибрагьимова Фазина Къазимегьамедовна рикIел хкана, аялрин ва вири кIватIхьанвайбурун вилер пашман яз накъваривди ацIана. Гуьгъуьнлай и аялри чпел зегьмет чIугвазвай муаллимриз гъвечIи шиирар лугьуналди, цуьквер багъишна, школадин вири техперсоналдиз чухсагъул малумарна.
Алай кIелунин йисуз сифте яз школадиз кам къачунвай гъвечIи классрин аялри, 11-классдин аялриз гъвечIи-гъвечIи шииралди суварин югъ тебрикна. ЧIехи классрин аялри гъвечIи аялриз рикIел аламукьдай пишкешар багъишна. Са гъвечIи декьикьадилай музыкадин ванцелди 11-классдин аялри 10-классдин аялрив школадин пайдах вахкана. Алатзавай кIелунин йисуз школа акьалтIарзавай аялриз эхиримжи зенг 11-классдин ученик Т.Эмиргьамзаеваз ва 1-классдин ученица А.Мегьамедовадиз кьисмет хьана. Къейд авун лазим я хьи, и школадихъ са вичиз хас тир хъсан адет ава. ИкI, гьар йисуз школа акьалтIарзавай аялрикай сада 1-классдин аялрикай садан куьмекдалди школадин вилик квай гьаятда цIийи тар арадал атун патал, адан къелем цазва. Алай йисуз и кар кьилиз акъуддай мумкинвал 11-классдин ученик А.Керимовазни ва 1-классдин ученица М.Абдуллаевадиз гана. Абуру и кIвалах хушвилелди кьилиз акъудна. Суварин эхирдай аялри, диде-бубайри, муаллимри кьуьлер авуна, вирида санал аманат яз амукьдай шикилар яна. Еке агалкьунар хьурай квехъ, гьуьрметлу аялар!

 

А.Рамазанова.
Эхиримжи зенг – сагърай школа

Вири Россиядин ва гьакIни СНГ-дин са бязи гьукуматрин школайра 23-майдиз эхиримжи зенг ягъунин мярекатар кьиле фена. Дагъустанда вири санлай 26 агъзур школьникдиз эхиримжи зенг яна.
Эхиримжи зенг- вири школайрин тарихдиз физвай, аялрин рикIе амукьзавай шад вакъиа я. Муаллимрини аялри чпи 11 йиса кIватIнавай чирвилерин бегьер кIватI хъийизвай югъ я...
Ашарин Султанов Закиран тIварунихъ галай юкьван школадин, жуьреба-жуьре тарари чIагурнавай, гуьзел гьаятда, экуьнлай, шад макьамрин ванцелди, школьный формаяр алай аялар, абурун диде-бубаяр, муаллимар ва мугьманар кIватI хьана.
Закир Султанован памятникдин вилик эхиримжи зенгинин мярекатдин линейкадал 11-класс акьалтIарзавай аялриз ученицаяр-ведущияр тир Будайчиева Маринадини Агьмедова Айзади кIватI хьанвайбурун гурлу капаралди теклифна. Мярекат школадин тешкилатчи С.Вагьабова ачухна Россиядин Гимн яна. Адет хьанвайвал, 11-классдин ученица Мусаева Ираята 10-классдин ученица Агьмедова Айзадив школадин пайдах вахкана. "Ашарин мектеб" школадин Гимн Нежвединова Араза кIелна. 11-классдин аялрин патай И.Мусаева рахана.
Школа акьалтIарзавай аялриз тебрик авун патал гаф школадин директор Э.Будайчиеваз гана.
-Гьуьрметлу аялар, диде-бубаяр, къе чи школадин уьмуьрда мад са шад вакъиа тарихдиз хъфизва,-лагьана ада. -Гьуьрметлу аялар и 11 йисан къене квез чирвилер гун патал зегьмет муаллимри хьиз, технический работникрини чIугуна.
Гьуьрметлу аялар, чи школа еке тарих авай школа я. И школадай тIвар-ван авай алимар, шаирар, ватанперес ксар акъатайди я. За умудзава куьнни гьабурун жергеда жедайди.
Нубатдин гаф РайУО-дин векил яз атанвай М. Къазиеваз гана.
-Гьуьрметлу школьникар, диде-бубаяр, муаллимар, квез къенин югъ райондин администрациядин, райондин образованидин управленидин патай мубаракрай! Квехъ ЕГЭ-яр вахкуна еке агалкьунар хьурай. Куь вилик ачух рекьер хьурай,- лагьана ада.
Гуьгъуьнлай анал школадин завуч С.Муртузалиева рахана.
-Гьуьрметлу мугьманар, муаллимар, диде-бубаяр ва ученикар,-лагьана ада. Къе чи школада нубатдин шад сувар я. Къе чна нубатдин сеферда чи школадай 11-класс акьалтIарзавай аялар ахъайзава. Заз куьне и школа акьалтIарна чпин агалкьунралди школадин, хуьруьн тIвар хкажай викIегь рухвайрилайни рушарилай чешне къачуна кIанзава. Къуй квехъ ЕГЭ вахкуна агалкьунар хьана, куь мурадар кьилиз акъатна, куьн гьукуматдиз вафалу хьурай. С.Муртузалиевади 9-классдин аялри ГИА ва 11-классдин аялри ЕГЭ вахкун патал акъуднавай школадин директордин Приказ кIелна.
Школадин тешкилатчи С.Вагьабова аялриз, диде-бубайриз и шад суварин югъ тебрикна. Аялри ЕГЭ вахкана, кIелзавай чкайриз фена, пешеяр къачуна, абурукай хъсан пешекарар хьана, хайи райондин ва гьакIни Россиядин идарайра къуллугъ авун вичин мурад тирди лагьана.
Мярекатдал гуьгъуьнлай Ашарин хуьруьн администрациядин патай И.Мегьамедалиев, диде-бубайрин патай Л.Мусаева, 11-классдин классный руководитель Э.Рамазанов, и классдин сифте учительница М. Юсупова рахана.
11-классдин аялри школадин предметар гузвай муаллимриз шиирар кIелна. Школадин директор Э.Будайчиева спортда ва олимпиадайра агалкьунар хьайи аялриз, завуч С.Муртузалиевади школа вадар аваз кIелай аялриз, тешкилатчи С.Вагьабова школадин общественный уьмуьрда агалкьунар аваз иштиракай аялриз Гьуьрметдин грамотаяр гана. 1-классдин аялриз 11-классдин аялри рикIел аламукьдай пишкешар гана. 1-классдин аялри чпин чIехи юлдашриз шиирар кIелна. Эхиримжи зенг 11-классдин ученица Жасмина Рамазановади ва 1-классдин ученик Абдурагьман Рамазанова яна.
11-классдин аялриз эхиримжи зенг ягъуналди, уьмуьрдин четин рекьер ачух хьана.
Гила абурун вилик уьмуьрдин четин имтигьанар ва ЕГЭ вахкун ква.
За умудзава, абуру четинвилериз дурум гана, хайи Ватандин тIвар хкаждайди.

 

Чи корр.
Эхиримжи зенг – Хвережрин школада

Эхиримжи зенгерин мярекатар чи райондин вири школайра хьиз Хвережрин юкьван школадани шад гьалара кьиле фена.
Хвережрин юкьван школади алай 2013-2014-кIелунин йисуз 4 выпускник ахъайна.
Эхиримжи зенгиниз талукь шад мярекатдал выпускникриз тебрикдин гафар гваз райадминистрациядин патай райондин Информациядинни печатдин управленидин начальник А.Будаев, школадин директор С.Ражабов, классдин руководитель М.Гьададов рахана. Школадин гьаятдик эхиримжи зенгинин ван акатна. Школадин тарихдиз мад са кIелунин йис хъфена.

 

А.Мамедова.
Шад гьалара кьиле фена

Ингье акваз-такваз аялрин кIелунин са йис мад куьтягь хьана. 25-май ял ядай югъ хьуниз килигна шад мярекат вири Россияда 24-майдиз тухвана.
Гьа икI, 24-майдин сятдин 10 тамам хьайила Кьурагьрин 1-нумрадин юкьван школадин гьаят школадин формаяр алай, цуькверин кIунчIар гъиле аваз атанвай аялар, абурун диде-бубаяр, муаллимар ва хуьруьнвияр атана ацIанвай.
Мярекат райондин искусствойрин школадин аялри Культурадин кIвалин музыкантри язавай макьамдалди кьуьл авуналди, ачухна. Эхиримжи зенгиниз талукьарнавай шадвилин линейка школадин муаллим Исакьова Эльвиради кьиле тухвана ва сифте гаф школадин директор Мисриев Гьамидаз гана.
-Гьуьрметлу выпускникар, муаллимар, диде-бубаяр, квез къенин югъ мубарак хьуй!-лагьана ада. Школада кIелзавай 11 йис, инсандин уьмуьрда виридалайни хъсан йисар я, къенин югъ куь рикIик къалабулух кутадай югъ я. Чи школадин аялриз кьиле фейи олимпиадайра, общественный уьмуьрда ва гьакIни спортдин рекьяй хъсан нетижаяр хьана. ГьакIни еке чухсагъул лугьуз кIанзава диде-бубайриз чаз вири патарихъай куьмек гайи. Квез куь вилик квай ЕГЭ-ра еке агалкьунар хьурай.
Шад мярекатдал гьакIни райондин образованидин управленидин начальник Р.Катибов рахана.
-Гьуьрметлу муаллимар, аялар, диде-бубаяр-лагьана ада,-ихтияр це заз райондин администрациядин , райондин образованидин управленидин работникрин, вири муаллимрин патай къенин югъ квез виридаз мубаракдай. Куь рикIе вуч мурадар, фикирар аватIа кьилиз акъатрай. Республикадин олимпиадайра ва гьакIни общественный уьмуьрда активныдаказ иштирак авур аялриз ва абурун муаллимриз чухсагъул лугьуз кIанзава. Алай йисуз квез виридаз малум я, ЕГЭ кIеви серенжемралди тухузвайди. ГьакI хьайила, квез чан аялар кичIе тахьана, куьне 11-йисан къене къачур чирвилер викIегьвилелди къалура. ГьакIни тIалабун я диде-бубайриз, куьне куь аялар психологически гьазурун, гьевес кутун, къейд ийиз кIанзава, школадин муаллимри аялри ЕГЭ-яр вахкун паталди кьилди тухвай кIвалах екеди я. Мадни квез къенин югъ мубарак хьуй, экзаменра еке агалкьунар хьурай.
Выпускникриз хуш келимаяр абуруз сифте тарс гайи, сифте муаллим Мирзоева Жавизата лагьана.
Инал 11-классда авай аялри сад лагьай классдин аялриз талукьарнавай насигьатар кIелна. ГьакIни школадин гуьрчег сесер тир Абдурагьманова Алинадини Рамазанова Каринади "Детство-детство" мани хуш сесералди тамамарна.
Мярекатдал школадин кIелунинни тербиядин рекьяй школадин директордин заместитель Эмиргьамзаева Валентинади, 11-классдин руководителар тир Будаева Нифизата, Исаева Тамаради, диде-бубайрин патай рахай Алиева Ларисади, Урдиханова Диларади выпускной классрин гьакъиндай хуш келимаяр лагьана, насигьатар гана, абурухъ ЕГЭ-ра, гележегда, пешекарвилин рехъ хкягъунин карда еке агалкьунар хьана кIанзавайди лагьана ва чпин аялрал зегьмет чIугур муаллимриз еке тир чухсагъул лагьана.
11-классдин аялри гьар муаллимдиз, предметриз, талукьарнавай манияр, шиирар кIелна, тарс гайи муаллимриз чухсагъул лагьана ва цуькверин кIунчIар багъишна. Выпускной классдин аялри сад лагьай классда кIелай аялриз рикIел аламукьдай пишкешар ва аялри абуруз цуьквер багъишна.
Гуьгъуьнлай шадвилин линейкадал школадин директор Гь.Мисриева кIелунра, спортда тафаватлу хьайи ва школадин общественный уьмуьрда активныдаказ иштирак авур 9-11-классрин са жерге аялрив РайУО-дин, школадин патай Гьуьрметдин грамотаяр вахкана. Шад жедай кар ам я хьи, 11- классдин выпускница Будаева Аидади дагъустандин литературадай Махачкъалада кьиле фейи дагъустандин литературадай Республикадин олимпиадада 3- чка кьуна. Адаз диплом ва грамотаяр гана: дагъустандин литературадай Республиканский олимпиадада 3-чка кьунай адаз РД-дин илимдинни образованидин Министерстводай 3-дережадин диплом, хъсандаз кIелунай, школадин общественный уьмуьрда иштирак авунай, гьакIни райондин образованидин управленидин патай грамотаяр гана.
ГьакIни инал дагъустандин литературадай Республиканский олимпиададиз гьазурунай РД-дин илимринни образованидин Министерстводай Будаева Аидадиз тарс гайи муаллим Исаева Тамарадиз грамота гана.
Ингье вирида, гуьзлемишзавай школа акьалтIарзавай аялриз эхиримжи зенг ягъунин декьикьа алукьна. 11-классдин ученик Сулейманов Рамизани ва сад лагьай классдин ученица Рамазанова Гуьлуьшана эхиримжи зенг яна.
Эхирдай выпускной классдин аялри чпин дидейрихъ галаз кьуьлер авуналди, искусствойрин школадин гадайри чпин кьуьлуьналди шад мярекат акьалтIарна.