Газета № 15

Райадминистрацияда
Гьафтедин нетижаяр кьуна
11-апрелдиз райадминистраядин актовый залда гьар ислен юкъуз райондин идарайрин руководителрихъ галаз кьиле тухузвай совещание хьана. Совещание "Кьурагь район" муниципальный тешкилатдин кьил З.Азизова кьиле тухвана.
Совещанидал хейлин работникар рахана. Райондин образованидин отделдин начальник Р.Катибова къейд авурвал, и йикъара ЕГЭ-дин патахъайгьар са школада аялрин диде-бубайрихъ галаз собранияр кьиле тухузва, им кьуд лагьай сефер я диде-бубайрихъ галаз ихьтин собранияр тухуз, отличникрин слет тухун планламишнава, ана 50 аялди иштиракда, Аладашда Президентдин акъажунар кьиле фена, и йикъара Кьурагьрилай винидихъ галай школайрин арада КIирийрин школа-интернатда кьиле тухуда, субботникдин патахъай райондин образованидин вири учрежденийриз лагьанва.
Райондин Культурадин ва информациядинни печатдин центрдин директор А.Будаева лагьайвал, центрди пландал асаслу яз кIвалахзава, алатай гьафтеда СМИ-дин работникар аранда авай хуьрериз фена, информация кIватIна хтана, культурадин работникар 9-Майдин сувариз гьазур жезва, Культурадин центрдин вилик эцигнавай обелиск ремонт хъийиз гъиле кьунва.
Райондин физкультурадинни спортдин ва жегьилрин крарин рекьяй отделдин начальник Р.Рамазанова Изберг шегьерда "А ну-ка, парни!" спортдин мярекат кьиле физвайди, КIирийрин хуьре президентский состязанияр кьиле тухузвайди, кьуд командади иштиракзавайди лагьана.
ЦРБ-дин кьилин духтур А.Азимова къейд авурвал, алатай гьафтеда районда КТО авайвиляй ва духтурар отчетар гваз Махачкъаладиз фенвайвиляй диспансеризация ийиз хьанач, больницадиз дарманар тIимил хканва, авачир дарманар къачун патал арза ганва.
Райондин пенсионный фондунин отделдин начальник А.Назаралиева лагьайвал, пенсионный взносрин патахъай рахайтIа, алай вахтунда карчийри пенсионный взносар гун тавуна, абур судриз вуганва, ЦЗН-дай субсидияр къачуна карчивал ахъай авурбуру пенсионный бурж аламаз, вахкун тавуна 100 агъзур манат хьанвайбурни ава.
Совещанидал винидихъ рахайбурулай гъейри, финансовый управленидин начальник Б.Ибрагьимов, рекьерин участокдин начальник Л.Агъабалаев, райондин РЭС-дин мастер Р.Загьиров, ветуправленидин пешекар М.Сефералиев ва масабур рахана.
З.Азизова вири руководителрин кIвалахда авай кимивилериз анализ гана, кIвалахда авай кимивилер вахтунда арадай акъудун ва работникри кIвалахдин низам чIур тавун тагькимарна.
---------------------------------------------------------------------------------------------

Яш тамам тахьанвайбурун гьакъиндай заседание
11-апрелдиз райадминистрацияда "Кьурагь район" муниципальный тешкилатдин яш тамам тахьанвайбурун крарин ва абурун ихтиярар хуьнин гьакъиндай тешкилнавай комиссиядин нубатдин заседание хьана.
Заседание "Кьурагь район" муниципальный тешкилатдин кьилин общественный хатасузвал хуьнин рекьяй заместитель А.Исаева кьиле тухвана.
Заседанидин кIвалахда комиссиядин членар тир райадминистрациядин къаюмвилин ва къайгъу чIугвадай органдин пешекар З.Шабановади, агьалияр яшайишдин рекьяй хуьдай управленидин начальник С.Жамалдинова, райадминистрациядин яш тамам тахьанвайбурун крарин ва абурун ихтиярар хуьдай комиссиядин секретарь З.Ибрагьимова, физкультурадинни спортдин ва жегьилрин крарин рекьяй отделдин начальник Р.Рамазанова, ЦРБ-дин духтур А.Ляметова иштиракна. Анал 4 месэладиз килигна:
1. "Администрациядин къаюмвилин ва къайгъу чIугвадай органди къаюмвилиз къачуна кIанзавайбур винел акъудунин ва яш тамам тахьанвай ва законлу ихтиярар ва интересар хуьнин кIвалахдин гьакъиндай".
2. "Райондин общеобразовательный школайра учащийрин арада наркотикар пайда авунин, наркотикар ишлемишзавайбурун вилик пад кьунин кIвалах тешкил авунин гьакъиндай".
3. "Яш тамам тахьанвайбур тир 1999-йисан 19-июлдиз хайи, Кьурагь райондин Аладаш хуьре яшамиш жезвай Сеферов Раидин Агьмедулаховичалай, 1998-йисан 25-апрелдиз хайи, Кьурагь райондин Маллакент хуьре яшамиш жезвай Къурбанов Балакъардаш Иманулагьовичалай административный материал къарагъарнава. (РФ-дин КоАП-дин ст.11.1 п.5-далди вилик амаз тагькимарзава ва я 100 манатдин кьадарда аваз административный жерме къвезва).
4. Жуьреба-жуьре месэлаяр.
Анал алай сад лагьай месэладай райадминистрациядин къаюмвилин ва къайгъу чIугвадай органдин пешекар З.Шабановади доклад авуна.
Кьвед лагьай месэладай ЦРБ-дин духтур А.Ляметов рахана. Пуд лагьай месэладай комиссиядин секретарь З.Ибрагьимова информация гана. Заседанидал алай месэлаяр комиссиядин членри веревирд авуна.
А.Исаева райадминистрациядин руководителар вилик акъвазнавай месэлаяр арадай акъудиз гьамиша куьмек гуз гьазур тирди лагьана.
---------------------------------------------------------------------------------------------

А.Рамазанова.
Са шумуд месэла веревирд авуна
12-апрелдиз райадминистрациядин актовый залда гьар вацран кьвед лагьай саласа юкъуз кьиле тухузвай заседание хьана.
Заседанидин кIвалахда райондин прокурор Фируза Лагъметовади, Россиядин МВД-дин Кьурагь районда авай отделдин начальник А.Фатуллаева иштиракна.
Анал пуд месэла эцигнавай:
1. "Кьурагь районда 2016-йисуз аялрин сагъламвилинни абур машгъуларунин ва ял ягъунин месэлаяр тешкил авунин гьакъиндай"
2. "2016-йисан итоговый аттестациядиз гьазурвал акунин ва 2014-2015-кIелунин йисан ЕГЭ-рин нетижайрин гьакъиндай".
3. "Сельсовет Кутульский" муниципальный тешкилат яшайишдинни экономикадин рекьяй вилик фин патал муниципальный тешкилатдин кьили ийизвай кIвалахдин гьакъиндай".
Заседание "Кьурагь район" муниципальный тешкилатдин кьил З.Азизова кьиле тухвана.
Сад ва кьвед лагьай месэлайрай доклад райондин образованидин отделдин начальник Р.Катибова авуна.
Пуд лагьай месэладай райадминистрациядин поселенийрихъ галаз кIвалах тухунин рекьяй отделдин начальник А.Агъакеримова доклад авуна.
Докладрин винел КIутIулрин хуьруьн администрациядин кьил Р.Мурадалиев и хуьруьн ФАП-дин, школадин, культурадин кIвалин руководителар рахана.
Образованидин рекьяй къарагъарай месэлайрай Кьурагьрин сад лагьай нумрадин юкьван школадин директор Гь.Мисриев, райондин ОВД-дин начальник А.Фатуллаев ва масабур рахана.
З.Азизова заседанидал къарагъарнавай месэлайрай тайин тир къарар кьабулна, школайрин руководителри ЕГЭ вахкуниз фикир гун, 9-Майдин сувариз мукъаятвал хуьн тагькимарна.
---------------------------------------------------------------------------------------------

А.Мамедова.
Ясли-бахчайра
Къулай шартIар тешкилзава
Вахт-вахтунда газетдин работникар неинки райондин центрдал алай, гьакIни райондин хуьрера авай идарайриз физва.
И йикъара Маллакентдин хуьре авай "Ласточка" ясли-бахчада тербияламишзавай аялрин бажарагъ хкажун патал гьихьтин дегишвилер хьанватIа чирун патал анин заведующий Керимова Светлана Агьмедагъаевнадихъ галаз гуьруьшмиш хьана.
Чун акурла ада сивел хъвер алаз чаз вичин кабинетдиз теклифна, дегьлизда ван-сес авачир, бицIекар ксанвай вахт тир. Хабарар кьурдалай гуьгъуьниз С.Керимовади вичин кIвалахдикай суьгьбет авуна.
-Алай вахтунда чи ясли-бахчада 3 группа, гьар са группада 15 аял ава. Гьа и бицIекриз тербия гун патал 18 касди зегьмет чIугвазва. Квез аквазвайвал ясли-бахчадин дарамат лап тегьерсуз кьакьан я, мекьи йикъара лугьудай чимивал жезвач. Са патан дакIарар пластиковый дакIарал дегишарнава, муькуь патан дакIарарни лап куьгьне хьанва.
Аялриз вахт-вахтунда чими хуьрек гун патал тешкилнавай шартIарикай рахайтIа са дарвални авач, герек продуктар вири ава. Кухняда лазим тир вири къапар , мес яргъан виридаз бес кьадар ава. ЦIуз акси система са пата я авайди. Аялриз игрушкаяр бес кьадар авач, авайбурни диде-бубайри чпин такьатралди гъизва. Къеце патани, квез аквазвайвал, аялриз чка кьенят я, чаз беседка лап чарасуз я. Рагъ авайла аялар ацукьдай чка авач. ГьакIни, чаз кухнядин мебель авач ва сифте нубатда морозильная камера герек я.
Алай йисуз школадиз фидай 7-8 аял ава, амма ясли-бахчадиз кьабулна кIанзавай аялрин кьадар гзаф я. Чаз хьанайтIа са группа мад кIанзавай, амма помещение авачиз акъваз хьанва. Гьар гатуз чна косметический ремонт ийизва. Алай вахтни лап четинди хьанва, чи ясли-бахчадани гьа виринра хьиз сокращение физва.
Чи кIвалахзавай 4-тербиячи 0,9 ставкадал ва музработник 0,4 ставкадал ала. Хъсан кIвалахарни ава, гузвай вацран мажиб вахт-вахтунда гузва. Аялар, гьелбетда, чи гележег я. Ам бахтлуди хьун патал аялриз тербия гуниз кьетIен фикир гун, абуруз къулайвилер гуз алахъун чи кьилин везифайрикай сад я.
Акьалтзавай несилдиз тербия гун патал чи ясли-бахчадин коллективди чпин вири къуватар желб ийизва.
Лугьун лазим къвезва, заведующийди вичин суьгьбет ийиз-ийиз пуд йисан вилик чун арандин хуьрериз фейи вахтунда гьа и ясли-бахчада гьялна кIанзавай месэлаяр авайвал амайди тестикь хьана. Гьелбетда, алай вахт четинди я, четинвилериз дурум гана чпин кIвалах вилик тухузвай, ихьтин пешекарриз чухсагъул лугьуз кIанзава.
---------------------------------------------------------------------------------------------

Замина Саидова.
Кар алай проектар - уьмуьрдиз!
Багълар кутунва
Хуьруьн майишат галачиз райондин экономика фикирдизни гъиз жедач. Чи районэгьлияр майишатдин гьар хилерал машгъул я. Мал-къара хуьзва, салар-никIер цазва, багъ-бустандихъ гелкъвезва ва цIийи багълар кутазва. Хуьруьн майишат вилик фин патал гьукуматди хейлин программаяр тешкилнава, субсидияр гузва.
Чи райондик квай аранда авай хуьрера уьзуьмар, хутар, ичер, хурмаяр ва маса емишар авай багълар ава. Инра бегьер гузвай багъларилай гъейри цIийиз кутур багъларни ава.
И йикъара чун Бугъдатепедин администрациядин кьил Аскер Жабраиловичахъ галаз зулуз кутунвай цIийи багъдиз фена. Ина алатай йисан зулуз 8 гектарда хутун багъ кутунва.
И багъ кутун патал къелемар "Герейхановский" совхоздилай гьар са къелемдихъ 100 манат пул гана къачунвайди я.
Гьар са гектарда 416 къелем акIурнава, вири санлай 3300-лай виниз. Багъ кутадайла ина и хуьряй ва къунши хуьрерай рабочияр гъана кутуна. Багъдиз яд вахт-вахтунда гузвай касни ава, яд иниз "Бер" къубудай къвезва. Ина гьар са работникдиз йикъа 1000 манат гузва. Са 3-4 йисалай багъди бегьер гуда. Бегьер гузвай багълара тарарин араяр гьар йисуз эчIел тахьун патал трактордалди хъуьтуьларзава.

---------------------------------------------------------------------------------------------

РД-дин лайихлу духтур, Инфекционист-невропотолог Рамазанов Д.Н.
Полиомиелит азардин вилик пад кьан
Полиомиелит-им вири дуьньядин аялриз бахтсузвал гъизвай, садакай-масадак акатдай, фалуждин азар я.
Низ кIандач, къужахдиз атанвай велед, сагъ беден авайди хьун, ада дуьз камар къачун, сивер куркурдин хьтин хъвер алаз, гъилер яргъи авуна диде-бубадал вегьин.
Эгер квез къекъведайла, кьецIивалзавай аялар акуртIа, квез абур кьилел са дуьшуьш атана, кIвачин кIарабар ханвайбур хьиз жемир. Абур, аял вахтунда , полиомиелит азар акатна, гьадан нетижа я.
И азар галукьай аялрин центральный нервный система къайдадикай хкатда. Полиомиелит, асул гьисабдай, вад йисал къведалди яшар хьанвай аялрихъ галукьда. Аялдин бедендик вирус акатайла, кIвачер фалужди яда ва вири уьмуьрда ам инвалид яз амукьда. Бязи вахтара и азардик аялар кьиникьни мумкин я.
Азар акатунин асул рехъ инсандин сив я. Азарлудан сивяй цуькIуьндихъ галаз гьавадик и азардин вирус акатзава. Амни сагълам инсандин, нефес чIугвадайла, гьавадихъ галаз бедендиз физва.
Полиомиелитдин дарман кьабулнавай беденда вирус туьретмиш жедай шартIар авач.
Эгер вири дуьньяда авай аялриз и дарман гун хъсандиз тешкилайтIа, са вахтунда цIегьерин вирус терг хьайивал, полиомиелитдин вирус рекьида. КIанзавайди аялдин сивиз вакцинадин кьве стIал вегьин я!
Вири дуьньядин здравоохраненидин организацияди полиомиелит михьиз квадарунин месэла эцигнава. И кар кьилиз акъудун патал, дуьньядин гзаф уьлквейра хьиз, Дагъустандани, гьа жергедай яз чи райондани полиомиелитдиз акси яз гайи дарманрилай аслу тушиз, алава яз дарманар гунин кIвалах кьиле тухузва.
Гьуьрметлу районэгьлияр! Аялриз дарман гудай йикъар ибур я: 24 апрелдилай 30 апрелдалди.
Пуд вацралай пуд йисалди яшда авай вири аялрив полиомиелитдин вакцина агакьарун лазим я. Чна квез тади гьалда куь аялар гваз райбольницадин эпидемиологиядин кабинетдиз атун теклифзава, я чаз хабар ая, чун куь кIвалериз къведа. Аялриз дарманар гуникай кьил къакъудмир!

---------------------------------------------------------------------------------------------

МРИ ФНС России №2 по РД
К вниманию руководителей и главных бухгалтеров организаций и предприятий, Индивидуальных предпринимателей, а также физических лиц
МРИ ФНС России №2 по РД, напоминает, что:
20 апреля 2016 года заканчивается срок представления налоговой декларации за 1 квартал 2016 года по ЕНВД, водному налогу, НДС, 6 НДФЛ и по единой упрощенной декларации,
30 апреля 2016 года заканчивается срок представления налоговой декларации о доходах физических лиц (3НДФЛ), УСН для индивидуальных предпринимателей за 2015 год,
30 апреля 2016 года заканчивается срок представления авансового расчета по налогу на имущество организаций за 1 квартал 2016 года и по налогу на добычу полезных ископаемых (НДПИ) за апрель месяц 2016 года.
Просьба ко всем организациям, Индивидуальным предпринимателям и физическим лицам своевременно сдать налоговую отчетность.
Налоговая отчетность сдается по телекоммуникационным каналам связи (ТКС).
---------------------------------------------------------------------------------------------

Камалдин хазинадай
Гьакъикъи чирвилер авайди чирвилер авачир касдилай гьар гьи кIвалахда хьайитIани викIегьни жеда, чирвилери ам виликдини тухуда.
А. Дюрер.

Аквар гьаларай, духтуррин вири аламатар абуру начагъдаз фикир-дикъет гунин къуватдилай аслу я. Шаирри и къуватдалди тIебиатдин къешенгвал адаз жанлу руьгь авайди хьиз къалурда, духтурри лагьайтIа, начагъди меселай къарагъар хъийида.
М. Пришвин.

РикIин пичIивал еке хаталувилерикай сад я. Михьи, тавазвилин гьиссери рикI, руьгь гуьрчегарда, гьикI хьи, гьиссер гьар са уьмуьрдин чешме я.
В. Головина.

Инсандик вучтин азар кватIа тайинарун фикирдиз атай натурфилософиядин алверрал ваъ, начагъ кас вири терефрихъай кIевелай ахтармишна, адан бедендин тIебиат чирна, кIватIнавай гьакъикъи практикадин тежриба умумиламишунал бинеламиш хьана кIанда.
Гиппократ.
---------------------------------------------------------------------------------------------

М.Агьмедова.
Спорт
"Шад стартар" кьиле тухвана
6-апрелдиз райондин спортдин Дворецда Виридуьньядин сагъламвилин йикъан сергьятра аваз "Шад стартар" тIвар алаз спортдин акъажунар кьиле фена. Россиядин Федерациядин Гимн яна ва РФ-динни РД-дин пайдахар хкажуналди акъажунар ачухна.
Лагьана кIанда, им кьуд йис я акъажунрин тешкилатчи райондин физкультурадинни спортдин ва жегьилрин крарин рекьяй отдел яз.
Школьникрин арада ихьтин мярекатар кьиле тухунин кьилин макьсад районда спорт пайда авун, школайра авай аялрин сагъламвал мягькемарун, акьалтзавай несилди сагълам уьмуьр кечирмишун, гьар са аял ватанперес яз тербияламишун тир.
И юкъуз кьиле тухвай акъажунра Кьурагьрин 1-нумрадин юкьван школадин, КьепIиррин юкьван школадин ва КIирийрин юкьван школадин аялрин командайри иштиракна. И акъажунрин программа туп лишан кьуна ахъаюникай, цIил ялуникай, алай чкадилай яргъаз хкадаруникай, гьар жуьредин чукурунрикайни къугъунрикай ибарат тир.
Эхирдай лезгинка кьуьл авунин конкурсдалди и мярекат акьалтIарна.
ИкI, 3 сятда давам хьайи акъажунра, 1-чка Кьурагьрин 1-нумрадин юкьван школадин, 2-чка КIирийрин, 3-чка КьепIиррин юкьван школайрин аялрин командайри кьуна.
Сад лагьай чка кьур "Лидер" тIвар алай Кьурагьрин командадиз жюридин член, райондин образованидин отделдин начальник Рамазан Катибова, кьвед лагьай чка кьур "Орлята" тIвар алай КIирийрин командадиз Кьурагьрин 2-нумрадин юкьван школадин муаллим Юсуф Мисриева ва пуд лагьай чка кьур "Динамит" тIвар алай КьепIиррин командадиз Кьурагьрин 1-нумрадин юкьван школадин физкультурадин муаллим Герман Исаева грамотаяр, медалар ва кубокар гана.
Идалайни гъейри, ял язавай вахтунда командайрик квай гадайрин арада лишанар кьунай акъажунар кьиле тухвана.
И конкурсда иштирак авур аялриз рикIел аламукьдай пишкешар гана.

---------------------------------------------------------------------------------------------

Утерянный диплом серии КГ № 16805, выданный 23 декабря 2011 года Федеральным государственным бюджетным образовательным учреждением высшего профессионального образования "Дагестанский государственный педагогический университет" на имя Садиковой Назият Раджабовны, считать недействительным.

---------------------------------------------------------------------------------------------

Райондин Культурадин ва информациядинни печатдин центрдин работникри Эмирбегова Тайибатаз вахан хва ЭЛЬБРУС кечмиш хьунихъ галаз алакъалу яз, дериндай хажалат чIугунивди, башсагълувал гузва.

---------------------------------------------------------------------------------------------

Комментарии (0)

Нет комментариев. Ваш будет первым!