Газета №14

Райадминистрацияда
Яран суварин нетижаяр кьуна
23-мартдиз райадминистрациядин актовый залда Яран суварин нетижаяр кьадай ва кIвалахда вилик акъвазнавай кимивилер арадай акъуддай совещание хьана.
Совещание "Кьурагь район" муниципальный тешкилатдин администрациядин кьил С.Гьамидова кьиле тухвана.
Анал С.Гьамидова районда Яран сувар кьиле тухунин нетижаяр кьуна, мярекатдин тешкилатчийриз чухсагъул лагьана.
Райондин Культурно-досуговый центрдин начальник А.Эмирбекова къейд авурвал, районда Яран суварин мярекатар шад гьалара кьиле тухвана, райцентрдал концерт гана, амма халкьдин иштираквал зайиф тир, тIалабзава и кIвалахдиз фикир гун.
"Кьурагь район" муниципальный тешкилатдин администрациядин кьилин заместитель Э.Исаевади лагьайвал, райцентрдал сятдин кьведан зуралай ругудалди концерт гана, руководителар сад-кьвед квачиз садни атанвачир, ихтияррар хуьдай органри хъсан кIвалах тухвана, СМИ-дин векилри вири мярекатра иштиракна.
Райондин физкультурадинни спортдин ва жегьилрин крарин рекьяй отделдин начальник Р.Рамазанова къейд авурвал, 21-мартдиз волейболдай ва халкьдин милли жуьрейрин акъажунар хьана, алатай йисаз килигайла, акъажунриз иштиракчияр гзаф атанвай, амма тамашачияр авачир.
Райондин финансовый отделдин начальник Б.Ибрагьимова муаллимриз мартдин вацран мажиб ахъайнавайди, муькуь идарайризни и вацран эхирдалди ахъайдайди лагьана.
Райондин ветеринарный управленидин начальник Н.Асланова къейд авурвал, районда ветеринариядин рекьяй плановый кIвалах кьиле тухузва, ивияр къачузва, и йикъара калара авай гьайванар ахтармишиз фида.
С.Гьамидова совещанидин нетижаяр кьуна, районда и гьафтеда субботник тухун ва 1-апрелдилай 1-майдалди районда михьивилерин варз яз малумарун тагькимарна.
-----------------------------------------------------------------------------------------

Редактордин колонка
Россияда вучиз продуктрин къиметар хкаж жезва
Алатай йисалай башламишна продовольственный товаррин къиметар хкаж жезвайди чаз малум я.
Инфляция хьунин кьилин себеб экономический кризис хьун, 2015-йисуз доллар ва евро хкаж хьун я ва гьакIни РагъакIидай патан гьукуматри чи гьукуматдал эцигнавай санкцийрилай аслу жезва. 2015-йисуз туьквендай къиметар 15 процентдин хкаж хьана, продуктар маса гуз башламишна. Чи гьукуматди къецепатан гьукуматрай продуктар гъун акъвазарна.
И кIвалахдин хъсан падни ава. Къецепатан гьукуматрай продуктар гъиз, яр-емиш гъиз Россияда гьассилзавай продуктрин къимет агъуз тир. Россияда, Дагъустанда гьасилзавай продуктар маса гуз четин жезвай. Чи гьукуматди маса гудай чкаяр кардик кутуниз фикир гузва. И мукьвара Кьиблепатан Дагъустанда яр-емиш маса гудай чка кардик кутаз фикирдик ква. Къейд ийин хьи, хуьрера шумуд йис я сар маса гудай чка авачирвиляй, халкьди чпин сар гадаруниз мажбур жезва. Зегьмет чIугуна гьасилай як маса гун патал четин акъваззава. Сад-кьве йисуз четин хьайитIани, гьар са регионда, районда гьасилай продукция маса къачудай чкаяр кардик акатда, ахъаюникди кIвалахдай чкаярни жедай.
Къейд ийин хьи, бязи продуктрин къиметар карчийри чпи хкажзавай вахтарни жезва. И кIвалахдал ихтиярар хуьдай органри гуьзчивал тухун лазим я. Инлай виликни РФ-дин Президентди, Правительстводи пенсияр ва мажибар хкажнава лагьанмазди, инра къиметар хкаж жезвай. Къецепатай гъизвай продовольствие доллардихъ галаз алакъалу яз хкаж хьанватIани, чкадал гьасилзавай гъуьр хкаж авун дуьз яни? И кIвалахди халкьдик гьамиша къалабулух кутазва.
Чи гьукуматдин Правительстводи гайи прогнозрай кьве йисуз Россиядиз кризисдай экъечIиз четин жеда. Чна чи производство вилик кутада. Чна умудзава Россия экономикадин рекьяй дуьньяда гужлу гьукуматрин жергеда жедайди, Россиядин душманриз виликан Советрин Союздин вахтунда хьиз кичIе жедайди.
Заз чиз и кар гьар са россиянвидин зегьметдилайни, халкьдин тупламиш хьунилай аслу я.
------------------------------------------------------------------------------------------

А.Рамазанова.
Кьве вакъиа санал къейдна
18-мартдиз Кьурагьрин 2-нумрадин юкьван школада кьве вакъиа-Крым Россиядин Федерациядик экечIна са йис хьун ва далупатан зегьметдин ветеранрив Ватандин ЧIехи дяведа Гъалибвал къачуна 70 йисан медалар вахкунин - санал кьиле тухвана.
Мярекат Кьурагьрин 2-нумрадин юкьван школадин директор Али Гьажиева мярекатдин иштиракчийриз Крым Россиядик экечIна са йис хьун ва Ватандин ЧIехи дяведа Гъалибвал къачуна 70 йис хьун мубарак авуналди ачухна. Мярекат тухун патал гаф школадин 9-классдин ученицаяр тир Рагьимханова Самирадиз ва Мусаева Аминадиз гана. Абуру Ватандин ЧIехи дяведикай кIватI хьанвайбуруз информация гуналди дяведикай жуьреба-жуьре шикилар экрандилай къалурна.
Райадминистрациядин патай атанвай векил, "Кьурагь район" муниципальный тешкилатдин администрациядин кьилин заместитель Эльмира Исаевадиз гаф гана.
Э.Исаевади Россиядик Крым экечI хъувуна са йис хьун ва ЧIехи Гъалибвилин 70 йис хьун мубаракна.
-Гьуьрметлу аялар, гьич садрани куьне чи ватанэгьлийрин игитвилер, абуру гьихьтин четинвилериз дурум гана, чаз гъалибвал мукьва авунатIа, чаз ислягьвал ганатIа гьич рикIелай алудмир,- лагьана ада. Советрин Союздин Игитар тир чи районэгьлияр - Эсед Салигьовални Араз Алиевал куьне дамах ая, чешне къачу, ватанпересар хьухь. Чи гьукумат Россия виридалайни къудратлу гьукумат я. Гьич садрани провакациядиз яб гумир. Жуван Ватан кIан хьухь, куьн россиянвияр хьунал дамах ая!
Э.Исаевади далупатан зегьметдин ветеранар тир Гьамидов Гьамидав, Хизриев Агъаларав, Рамазанов Нибидив, Рамазанова Сижаратав, Хидирнабиева Набисатав, Мегьамедов Ниязав Гъалибвилин 70 йисан юбилейдин медалар вахкана.
Мярекатдиз атанвай ветеранри дяведин йисара чпел акьалтай азабрикай, чпин дидейрихъ галаз гишиндаз фронтдиз продовольствие гьазурдайла хьайи четинвилерикай суьгьбетар авуна, ва чеб рикIел атана чпиз фикир гайи РФ-дин Президент В.В.Путиназ ва мярекат тешкилай Кьурагьрин 2-нумрадин юкьван школадин муаллимрин коллективдиз чухсагъул лагьана. Аялри Ватандикай, дяведикай визинлудаказ шиирар кIелна ва манияр тамамарна. Мярекатдин иштиракчияр гьевеслу авуна.
-----------------------------------------------------------------------------------------
М.Агьмедова.
Кар алай проектар – уьмуьрдиз!
Йисан хъсан тербиячи
20-мартдиз Кьурагьрин "Гияр" ясли-бахчада райондин цIусад ясли-бахчадин тербиячийрин арада республикадин образованидин министерстводи 468-нумрадихъ акъуднавай къарардал асаслу яз "2015-йисан хъсан тербиячи" тIвар алай конкурс кьиле тухвана. И конкурсдиз райондин вири ясли-бахчайрин заведующияр атанвай ва гьар са ясли-бахчадай са тербиячиди конкурсда иштирак авуна.
Конкурсдин жюридин членар райондин образованидин отделдин ИМЦ-дин (информационно-методический центр)начальник Кьасум Абдулхаликьов, ИМЦ-дин методист Раиса Гьажиханова, Кьурагьрин 1-нумрадин юкьван школадин директор Гьамид Мисриев, Кьурагьрин 2-нумрадин юкьван школадин тешкилатчи Гуьлуьзар Оружева тир. И конкурс ИМЦ-дин начальник Кь.Абдулхаликьова конкурс тухунин кьилин макьсад тербиячийрин кIвалах ахтармишун, четинвилериз ян тагана чи акьалтзавай несилдиз гузвай тербиядин дережадиз фикир гун тирди лагьана.
Конкурсда иштирак ийиз Кьурагьрин, КIирийрин, КьепIиррин, Кумухърин, Аладашдин, Моллакентдин, Кьуьчхуьррин, Ашарин, Гелхенрин, Хвережрин, Шимихуьруьн ясли-бахчайрин тербиячияр атанвай.
Конкурсда атанвай гьар са тербиячиди экъечIиз чпин кIвалах къалурна. Дугъриданни, чаз абуру аялрал чIугвазвай зегьмет екеди тирди къалурай кIвалахдай акуна.
Амма и конкурсдал кьур нетижайрал асаслу яз КIирийрин "Мечта" ясли-бахчадин тербиячи Селимат Гьажимурадова гъалиб хьана, 2-чка-2 тербиячидиз- КьепIиррин "Улыбка" ясли-бахчадин тербиячи Маизат Хариевадиз, Аладашдин "Аленушка" ясли-бахчадин тербиячи Рафият Селимовадиз, 3-чка-3-тербиячидиз, Кумухърин "Кард" ясли-бахчадин тербиячи Индира Мегьтихановадиз, Шимихуьруьн "Орленок" ясли-бахчадин тербиячи Зарема Эмиралиевадиз ва Маллакентдин "Ласточка" ясли-бахчадин тербиячи Сабина Рамалдановадиз хьана.
Конкурсдин эхирдай Кь. Абдулхаликьова гъалиб хьанвай тербиячи Селимат Гьажимурадовади республикадин региональный этапда иштиракдайди лагьана.

Шикилда: КIирийрин "Мечта" ясли-бахчадин тербиячи С.Гьажимурадова, конкурсда аялрихъ галаз тарс тухузвай вахтунда.

---------------------------------------------------------------------------------------

М.Агьмедова.
Кьилинди яшайишдин рекьяй къуллугъ авун я
Эхиримжи йисара яшайишдин рекьяй къуллугъ авунин жигьетдай гьукуматда законар дегиш жезва.
2014-йисан 28-декабрдиз "Россиядин Федерацияда агьалийриз яшайишдин рекьяй къуллугъ авунин бинейрин гьакъиндай" акъатнавай къарардал асаслу яз гьихьтин кIвалахар кьиле тухузватIа ва гьи жуьреда гьихьтин куьмекар гузватIа чирунин макьсаддалди чун агьалияр яшайишдин рекьяй хуьдай комплексный Центрдин директордин везифаяр тамамарзавай Мусаев Назим Багьаудиновичан патав мугьман хьана ва адан вилик са шумуд суал эцигна.

Куьруь къейд:
Мусаев Назим Багьаудинович 1954-йисуз Кьурагьрин хуьре дидедиз хьана.
1972-йисуз Кьурагьрин сад лагьай нумрадин юкьван школа хъсан къиметар аваз акьалтIарна. Гьа и йисуз ДГУ-дин физикадин факультетдик экечIна ва 1977- йисуз акьалтIарна. 1977-йисалай 1990-йисалди Кьурагьрин 1-нумрадин юкьван школада физикадин тарсар гана. 1992- йисалай 1995-йисалди статистикадин отделдин кьилин экономиствиле, 1996- йисалай 2000-йисалди райондин экологиядин комитетдин председателвиле кIвалахна. 2001-йисалай агьалийриз яшайишдин рекьяй къуллугъ ийидай Центрда кIвалах ийиз башламишна ва 2014-йисан апрелдин вацралай КЦСОН-дин директордин везифаяр тамамарзава.

-Назим Багьаудинович, агьалияр яшайишдин рекьяй хуьнин бинейрин гьакъиндай цIийи закон акъудунин чарасузвал вуч я? Гьа сифте амал ийизвай законри алай вахтунин истемишунриз жаваб гузвачирни?
-Чна рикIел хкана кIанда, алай вахтунда чна амал ийизвай ФЗ-дин 195-нумрадихъ акъатнавай "Россиядин Федерацияда агьалийриз яшайишдин рекьяй къуллугъ авунин бинейрин гьакъиндай" закон 1995-йисуз кьабулна. Гьа вахтунда яшайишдин рекьяй къуллугъ авуниз федеральный центрди ва регионри жаваб гузвай. 2005-йисан 1-январдилай яшайишдин игьтияжрин рекьяй векилвал субъектрин ихтиярда туна ва гьар сада чпихъ авай мумкинвилериз килигна кIвалахиз башламишна. Зи фикирдал цIийи закон вахтунда къуватда гьатнава ва вичихъ еке метлеб ава, ада гилан аямдин гьакъикъат тамамвилелди къалурзава, тежриба фикирдиз къачузва, алатай законар ишлемишна, агьалийриз яшайишдин игьтияжар артухаруниз мумкинвилер ихтияр ганва, и организацийрин жавабдарвал тайинарзава.
-ЦIийи закондин гьакъикъатдин гъавурда гьатун патал гьихьтин цIийивилер виридалайни метлеб авайбур ва важиблубур я?
-Ина кьилинди яшайишдин рекьяй къуллугъ авун я. ЦIийи законда абур ихьтин къайдада ачухнава: "Агьалийрин яшайиш хъсанарун ва жува-жув асул тир яшайишдин игьтияжрал таъминарунин мумкинвилер гегьеншарун". Гьаниз килигна, "яшайишдин четин гьалда авай агьали" мана "яшайишдин рекьяй тIимил таъмин тир агьали" манадал дегишарнава.
ИкI, яшайишдин рекьяй куьмек гудай са шумуд жуьре тайин я: яшайишдин, яшайишдинни медицинадин, яшайишдинни психологиядин, яшайишдинни педагогикадин, яшайишдинни ихтияррин, кIвалах алакь тийизвай начагъ инсанрин коммуникативный потенциал хкажунин мураддалди яшайишдин рекьяй куьмек гунин.
КIвалахдал таъминарунин ва зегьметдихъ галаз вердишарунихъ алакъалу маса месэлаяр гьялунин куьмек авун кьилди къалурнава.
-ЦIийи закондал асаслу яз яшайишдин рекьяй пулсуз къуллугъ гьихьтин агьалийриз ийизва?
-Сад лагьайди, яш тамам тахьанвай аялриз, кьвед лагьайди, кьетIен гьаларин ва я халкьарин арада яракьралди хьайи къал-макъалрин нетижайра зиян хьайибуруз ва пуд лагьайдини, къвезвай къазанжидин юкьван гьисабдин кьадар яшайишдин кIанин кьадардилай садни зуран тIимил къвезвайбуруз.
-Абуруз куьмек гьикI ва гьина гузва?
-ЦIийи законда яшайишдин рекьяй къуллугъ авунин формаяр ачухдаз тайинарнава: полустационарный къайдада кIвализ физ къуллугъзава, яни йикъан тайин тир вахтунда, стационарный форма им лагьай чIал я хьи, яшайишдин рекьяй къуллугъ ийизвай учрежденида гьафтеда вад йикъуз яшамиш хьун.
-Лугьуз жедай туш, жезвайди я вахт садлагьана яшайишдин рекьяй куьмек авуна кIандай. Ихьтин вахтунда вуч авун герек я?
-ЦIийи законда ихьтин дуьшуьшарни гьисабдиз къачунва. Абур икьрар кутIун тавуна, индивидуальный программа туькIуьр тавуна гузва. Гьа и жуьредин куьмекни кIанзавай касдиз вичиз кIани вахтунда гежел вегьин тавуна гуда. Гьа ихьтин вахтунда месела яз, пулдин, алукIзавай парталдин, сифте нубатдин герек шейэралди, пулсуз тIуьн гуналди таъминарда.

-------------------------------------------------------------------------------------------

З.Саидова.
Медалар вахкана
Чна алай йисан 9-майдиз нубатдин сефер яз фашистрин винел Гъалибвал къазанмишай багьа сувар къейд ийида. ЦIи Гъалибвилин 70-йисан юбилей къейд ийида.
Дяведин йисара гьам къати цIаяра женг чIугуна гъалибвал къазанмишай, гьам далу- патан фронтда йиф-югъ лугьун тавуна зегьмет чIугуна, алай вахтунда чпин яшар хьанвай ветеранризни чна къе еке тир чухсагъул лагьана икрамзава.
Алатай гьафтеда Ашарин юкьван школада "Кьурагь район" муниципальный тешкилатдин администрациядин кьил С.Гьамидова Ашарин хуьре яшамиш жезвай далу- патан фронтдин иштиракчияр кьабулна.
Лугьун лазим я хьи, мярекат шад гьалара кьиле фена. Иниз школадин муаллимар, аялар, далу- патан ветеранар кIватI хьанвай. Мярекатдал С.Гьамидова ветеранриз хуш келимаяр лагьана ва кIватI хьанвайбуруз чи аскеррин кьегьалвилерикай суьгьбет авуна. Дяведин йисарин аялрив: Мегьамедов Мегьамедав, Кьасумова Александрадив, Мегьамедова Айишатав, Ханагьмедова Секинатав, Гьарунова Эрзидив ва Абдуллаева Шагьсенемав Гъалибвилин 70 йисан юбилейный медалар вахкана.
Мярекатдал Ашарин юкьван школадин директор Будайчиев Эмируллагь далупатан ветеран тир Мегьамедов Мегьамед, хейлин йисара муаллимвиле кIвалахай Кьасумова Александра рахана. Школада кIелзавай аялри шиирар кIелна, "Периханум" сегьнедай са чIук кьалурна.
---------------------------------------------------------------------------------------
Фашистрин Германиядин винел Гъалибвал къазанмишна 70 йис тамам жезва. Гъалибчияр гзаф четинвилерайни азабрай акъатна. Дяведи гьар са кIвализ бедбахтвал гъана. Дяведин йисара далупатан фронтда зегьмет чIугуналди чпин пай кутурбурни чи районда гзаф ава.
16-мартдиз "Кьурагь район" муниципальный тешкилатдин администрациядин кьилин заместитель Э.Исаева Гелхен ва Квардал хуьрериз мугьман хьана.
Инриз финин кьилин макьсад Ватандин ЧIехи дяведин далупатан ветеранрив ЧIехи Гъалибвилин 70 йисаз талукьарнавай медалар вахкун тир.
Э.Исаева Гелхенрин хуьруьз фейила сифте анин администрациядин кьил У.Гьайдаровахъ галаз гуьруьшмиш хьана. Гуьруьшмиш хьайидалай гуьгъуьниз Э.Исаевани У.Гьайдаров Квардалрин хуьруьз фена ана Аллагьвердиев Мусадивни Бегеева Хадижатав, Гелхена Рамазанова Саиматав, Мегьамедрасулова Бесенав, Камалдинова Иминатав ва масабурув медалар вахкана.
Къейд ийин хьи, медалар вахкун паталди Э.Исаева гьар са ветерандин патав кIвализ фена, абурун дуланажагъдикай хабар кьуна, абурун гуьгьуьл къачуна, алукьзавай Гъалибвилин сувар рикIин сидкьидай мубаракна.
Ветеранри вирида Э.Исаевадиз чпин патав атана, чпел кьил чIугунай ва вахкай медалрай чухсагъул лагьана.
---------------------------------------------------------------------------------------

Райондин хуьрера Яран суварин мярекатар шад гьалара
Ф.Мегьамедова.
Яран сувари гатфар алукьун лишанламишзавайдан гьакъиндай и суварин 21-мартдин йикъан рагъ авай, шагьвар квай гьавади шагьидвалзавай.
Кьурагьа Яран сувар сятдин цIудаз суварин йикъаз талукьарнавай спортдин мярекатрилай башламишна.
Мярекатар "Кьурагь район" муниципальный тешкилатдин администрациядин кьил С.Гьамидова сувар мубарак авуналди ачухна. Мярекатра кьиле фейи волейболдай, армрестлингдай, 50 кг заланвал авай шешел хкажунай, цIил ялунай, къван гадарунай акъажунра райондин хуьрерай жегьилри иштиракна.
Гъалиб хьайи иштиракчийриз гайи пулдин пишкешар, медалар, грамотаяр, спортивный футболкаяр С.Гьамидовани райадминистрациядин кьилин общественный хатасузвал хуьнин рекьяй заместитель М.Хариева вахкана.
Спортдин мярекатрилай кьулухъ Кьурагьрин майдандал концертдин программа башламишна. Ам "Кьурагь район" муниципальный тешкилатдин администрациядин кьилин заместитель Э.Исаевади, райондин агьалийриз сувар мубарак авуналди, ачухна. ДГТУ-дин таможенный делодинни правоведенидин кафедрадин заведующий, профессор, РД-дин лайихлу экономист Идрис Оружевани ватанэгьлийриз Яран сувар мубаракна.
Концертдин тешкилатчи райондин Культурно-досуговый центрдин, райондин хуьрерин Культурадин кIвалерин работникри лагьай гьевеслу манияр нисинилай акъатай кьезил гаралди хуьруьз чкIуникди, хуьруьк ван акатна ва суварин йикъан ранг гужлу авуна.
Нянихъ гьар мягьледа цIаяр хъувуна, лезгийрин рикI алай хуьрекар алай столар ачухна шадвилер давамарна.
Хуьруьн куьчейра нунуяр кIватIзавай аялрин шад ванери суварин йифез кьетIен тав гузвай.
С.Гьамидова гьар мягьледиз физ агьалийриз сувар мубарак авуна.
Сувар йифен кьуларалди, бязи мягьлейра гьатта экуьндалди давам хьана.
--------------------------------------------------------------------------------------                  
А.Рамазанова.
Эгер чна чи аял вахтара Яран суварар гьикI къаршиламишзавайтIа рикIел хкайтIа, эхиримжи йисариз килигайла, лап маракьлудаказ къейдзавай. Кьуд-вад югъ вилик кумаз, хуьруьн куьчейра авай синерин кьуд чкадал: гуьне пата авай Шимихуьруьнни чи сергьятдал, Ашагъул лугьудай чкадал, хуьруьн вини мягьледихъ галай дагъдал ва хуьруьн юкьва авай хуьруьн администрациядин идарадин кьилихъ галай дагъдал, чархар ялдай.
Анрал яру пайдахар къядай,барбияр ийидай, гьатта чархар гъиз патав гвай хуьреризни фидай. Йифиз чархар авадарунай акъажунар жедай. Гьибурун чарх яргъаз фидатIа ва цIай экуьндалди амукьдатIа лугьуз гьуьжетар жедай. Нянихъ хуьруьн жегьилар далдам- чIагъан ягъиз, гьар са кIвализ физ Яран сувар мубаракдай ва гайи ширинлухар, какаяр гваз хтана, кимел шад мярекат башламишдай. Сифте яш хьайибуру кьуьлердай, ахпа жегьилри башламишдай. Гьайиф хьи, гила халкьдин иштираквал зайиф хьанва. ЯтIани, бязи хуьрериз килигайла Ашарин хуьре шад гьалара кьиле физма.
ЦIинин йисуз Яран сувар Ашарин хуьре жегьилрин, аялрин иштираквал аваз кьиле фена. Адет тирвал, экуьнахъ Ашаринни Куквазрин жегьилрин ва школьникрин командаяр футбол къугъвана. Сад лагьай чка Ашарин жегьилрин командади, кьвед лагьай чка Куквазрин жегьилрин командади кьуна. Гъалиб хьайибуруз хуьруьн администрацияди 1-чкадиз 2 агъзур манат, 2-чкадиз 1500 манат, пуд лагьай чкадиз 1000 манат пул гана. Няниз Ашарин хуьруьн юкьвал цIай хъувуна, аялри барбияр ягъиз, чпин шадвилер ийиз, цIаялай хкадариз хьана. Культурадин кIвалин работникри концерт гана. Халкьдин милли акъажунар башламишна: цIил ялна, гъилер кьуна, гираяр хкажна, лямкадал къугъвана ва масабур.
И акъажунра гъалиб хьайибуруз хуьруьн администрациядин патай 500 манат пулдин пишкеш гана. Мярекатдиз килигиз хуьруьн жегьилар, дишегьлияр атанвай. Гьайиф хьи, и сеферда хуьруьн вилик квай дагъдилай вацIуз чархар ахъайнач.
-------------------------------------------------------------------------------------
Ф.Абдурагьманова.
Яран сувар неинки чи Дагъустанда, гьакI РагъэкъечIдай патан уьлквейрани дегьзаманайрин виридалайни рикI алай суварикай сад я.
Ам кьиле тухунин жигьетдай гьар са халкьдихъ вичин адетар ава.
Чи районда гатфарин Яран сувар адет яз, саки вири хуьрера кьиле тухузва.
ИкI, Гелхена, Шимихуьре, КIутIула, Хпуькьа, Штула сувариз тешкилнавай майданрал цIаяр хъувуна, суфрайрал милли хуьрекар аш, какаяр, яр-емиш ва гьар жуьредин ширинлухар алай столар ачухна. Чкайрал кIватI хьанвай хуьруьнвийриз, чкадин манидарри, школадин аялрин коллективри тешкилнавай концертар, агъсакъалрин куьмекдалди фадлай гьар са хуьруьн халкьдин фольклордихъ авай девлетлувал къалурна, гьакIни зарафатдин, шадвилин майданар къурмишна. Лагьана кIанда, гатфарин милли манияр лагьана, адетрин кьетIенвал къалурна ва жегьилар патал гьар жуьредин къуватар алцумдай спортдин мярекатар кьиле тухвана.
-------------------------------------------------------------------------------------
З.Саидова.
Март. Гатфарин сифте варз. ТIебиатди чилерал чан гъизвай варз. Гатфарин и вацра лишанлу югъ-Яран сувар къейдзава.
Алай йисузни и сувар амай районра ва хуьрера хьиз чи райондани ва гьар са хуьрени шад гьалара кьиле фена.
ИкI, 21-мартдиз Маллакент ва Арабляр хуьрери санал и сувар Араблярдин хуьре кьиле тухвана. Сувар тешкилайди Арабляр хуьруьн Культурадин кIвалин директор Асланов Межид тир. И сувар тешкилуник Арабляр хуьруьн Культурадин кIвалин пешекар Мегьамедов МутIалибани гьа и хуьруьн школадин директор Юсупова Саяда чпин пайни кутуна. Югъ няни хьайила, ина пуд чкадал цIаяр хъувуна, жемят кIватI хьана, сада-садаз сувар тебрикиз шадвилер авуна. Аялар нунуяр вегьез хуьре экъвена. Абурун шадвилерин ванери хуьруьк ван кутунвай. Шадвилер мадни артух хьун патал инал Культурадин кIвалин гьевескарри манияр лагьана. Суварар жемятди кьуьлер авуналди яргъалди давам хьана.
Хуьрерин жемятри и сувар тешкилайбуруз чухсагъул лагьана.
-------------------------------------------------------------------------------------
З.Саидова.
21-март. Яран суварин югъ. Лугьун лазим я хьи, и сувар чи райондин хуьрерикай виридалайни гурлудаказ Кумухърин хуьре кьиле тухузвайди я.
И сефердани Кумухърин хуьруьн администрациядин кьил Улубеков Руслана и сувар лап хъсандиз тешкилна. Югъ няни жезмазди хуьруьн жемятди сувар кьиле тухузвай куьчедихъ тади авуна. Жемят кIватI жедалди анал столар ачухнавай, цIаяр хъувунвай.
Сувар башламишайла хуьруьн администрациядин кьил Улубеков Руслана кIватI хьанвай жемятдиз сувар тебрикна, столрихъ ацукьун теклифна.
Мярекат шаддаказ кьиле фин патал иниз манияр лугьудай пуд группадиз теклифнавай. Мярекат нянин сятдин ругудалай сятдин цIусадалди кьиле фена. Инал кIватI хьанвай вирибуру кьуьлер ийиз, шадвилер авуна. Аялар нунуяр кIватIиз хуьрел элкъвена.
Лугьун лазим я, ина Яран сувариз талукьарна волейболдай Ахниг, Белиж, Хпеж ва Кумухъ хуьрерин арада акъажунар кьиле фена. Суварал жемят вири рази хьана ва и сувар тешкилунай хуьруьн администрациядин кьил Улубеков Русланаз чухсагъул лагьана.
-----------------------------------------------------------------------------------                                  
А.Мамедова.
Райондин вири хуьрера хьиз 21-мартдиз Кьуьчхуьррин хуьруьн жемятдини Яран сувар къейдна. Гуьзел гатфарин сувар Кьуьчхуьррин хуьруьн администрацияди тешкилна. Хуьруьн Культурадин кIвалин гьевескарри ва Кьуьчхуьррин юкьван школадин аялри чпин Яран сувариз талукьарнавай концертдин программа къалурна.
Мярекатдал атанвайбуруз и гуьзел гатфарин сувар хуьруьн администрациядин кьил Жабраилов Аскера, хуьруьн депутат, Кьуьчхуьррин юкьван школадин директор Хизри Мамедова чпин патай хуьруьн жемятдиз сувар тебрикна.
Нянихъ сятдиз 7-даз башламишай шадвилин мярекат лап геждалди давам хьана.
Хуьруьн майдандал алай ялаврилай гъейри, хуьруьн 7 мягьледа цIаяр хъувунвай.
-----------------------------------------------------------------------------------                     
А.Мамедова.
ХъуьтIуьн аязрикай азад жезвай, чили мублагьдаказ цуьк, тара таму ахъайзавай вахт, яр-гатфар виридан вил жедай вахт я. Яран суварин адетар, крар, тIуьнар, алукIунар несилрилай несилралди давам жезва.
Яран сувар 21-мартдиз чкайрал, хуьрера 22-мартдиз халкьдин иштираквал аваз кьиле тухузва.
Вири хуьрера хьиз КIирийрин хуьрени Яран сувар шад гьалара кьиле тухвана. Ана йикъан сятдин 12 тавам хьайила суварик аялри, жегьилри, яшлу ксари иштиракна.
Къайибов Рамазана, Мамедов Алаудина, Батманов Батмана, Абдуллаев Закира хуьруьн жемятдиз Яран сувар мубаракна. Мегьралиев Аскера, Саидов Абулкерима,ТIаибов Жамрудина ва масабуру Яран суварин цIаяр тешкилна. Лагьана кIанда,цIаярал сифте кьилелай эхирдалди медицинадин работник Руслан Батманова гуьзчивал тухвана. Яран суварин мярекатда КIирийрин хуьруьн Культурадин кIвалин работникри чпи гьазурнавай суварин концертдин программа къалурна.
Йикъан сятдин 12-лай нянин сятдин 5-далди давам хьайи мярекатди хуьруьн жемятдин рикIерик гьевес кутуна.
Гуьгъуьнлай хуьруьн къене авай 11 мягьледа Яран ялавар хъувуна, абур экуьнин сятдин 4-дал кьван давам хьана.
-----------------------------------------------------------------------------------

Прокурор района
старший советник юстиции Н.У.Байрамов.

Проверка прокуратуры выявила отсутствие лицензий
Прокуратурой района в текущем месяце проведена проверка соблюдения законодательства об образовании. Проверкой установлено, что муниципальные казенные дошкольные образовательные учреждения "Гельхенский детский сад "Родничок", "Ашарский детский сад "Радуга", "Аладашский детский сад "Аленушка", "Кучхюрский детский сад "Заря", "Курахский детский сад №3 "Гияр", "Курахский детский сад №2 "Аленушка", "Шимихюрский детский сад "Орленок", "Моллакентский детский сад "Ласточка", "Кумукский детский сад "Кард", "Хвереджский детский сад "Сказка" и музыкальная школа с.Кабир осуществляют образовательную деятельность без соответствующего разрешения (лицензии).
В соответствии ч.1 ст.91 Федерального закона от 29.12.2012 № 273-ФЗ "Об образовании в Российской Федерации", пункта 40 части 1 статьи 12 Федерального закона от 04. 05.2011г. "О лицензировании отдельных видов деятельности" образовательная деятельность подлежит лицензированию.
Наличие у образовательного учреждения лицензии на осуществление образовательной деятельности удостоверяет выполнение работ, оказание услуг при ее осуществлении надлежащего качества в соответствии с установленными законодательством лицензионными требованиями и условиями. Отсутствие лицензии нарушает права несовершеннолетних обучающихся в данном образовательном учреждении на получение качественного, соответствующего всем требованиям и стандартам образования.
По данным фактам прокурором района в суд направлены исковые заявления о понуждении муниципальных казенных дошкольных образовательных учреждений района и музыкальной школы с.Кабир получить лицензии на осуществление образовательной деятельности.

---------------------------------------------------------------------------------

Ф. Абдурагьманова.
Кьурагьа Яран сувариз талукьарнавай спортдин мярекатар
21-мартдиз чи районда Яран суварин йикъаз талукьарна волейболдай, армрестлингдай, 60 кг заланвал авайбурун арада ярх хьана штанга хкажунай, къван гадарунай, 50 кг заланвал авай шешел хкажунай, цIил ялунай, спортдин мярекатар кьиле тухвана.
И мярекатра чи райондин 12 хуьряй 130 спортсменди иштиракна. Районда спортдин мярекатар кьиле тухунин кьилин макьсад: районда спорт пайда авуна ихьтин, спортсменрин арада дуствилин алакъаяр мягькемарун, республикада спортдин рекьяй кьиле тухудай мярекатра иштиракиз жедай алакьунар авай спортсменар винел акъудун ва спортдин рекьяй алатай несилди чаз тунвай адетрал амал авун, абур артухарун тир.
Вири санлай акъажунрин призовой фондунин кьадар 120 агъзур манатдив агакьнавай.
Яран сувариз талукьарнавай и спортдин мярекатра кIвенкIвечи чкаяр кьур ва иштирак авур спортсменриз пулдин пишкешар, медалар, грамотаяр, спортивный футболкаяр гана.
ГьакIни, и йикъуз кьиле фейи волейбольный турнирда иштирак авур спортсменриз ва кIвенкIвечи чкаяр кьур командайрин иштиракчийриз и суварин мярекатрин спонсорвал авур, Москва шегьерда яшамиш жезвай кьурагьви-бизнесмен Бабаев Имам Бубахановича "микаса" тIвар алай волейболдин кIватIар багъишна.
-----------------------------------------------------------------------------------------

Начальник УСЗН
В МО "Курахский район" Джамалдинов С.М.

Информация
Для граждан получающих ежемесячные денежные выплаты по оплате жилого помещения и коммунальных услуг
УСЗН в МО "Курахский район" информирует, в связи с принятием постановления Правительства Республики Дагестан от 24 февраля 2015 года №51 "О внесении изменений в некоторые постановления Правительства Республики Дагестан".
Согласно указанному постановлению Правительства Республики Дагестан меры социальной поддержки по оплате жилого помещения и коммунальных услуг работающим и проживающим в сельской местности и поселках городского типа, с 1 января 2015 года предоставляется в денежной форме в виде ЕДВ и в размере 1000 рублей.
Если по одному месту проживания зарегистрировано несколько граждан, имеющих право на меры социальной поддержки ЕДВ предоставляется каждому гражданину (специалисту).
Меры социальной поддержки педагогическим работникам образовательных учреждений предоставляются, если учебная нагрузка составляет не менее 75 процентов от полной ставки (за исключении случаев, когда невозможность распределения учебной нагрузки в указанном размере подтверждается справкой из соответствующего образовательного учреждения).
---------------------------------------------------------------------------------------

Вниманию организаций – юридических лиц!
Организации, являющиеся юридическими лицами (кроме банков, страховых, религиозных организаций и бюджетных учреждений) независимо от системы налогообложения обязаны до 1 апреля представить в органы государственной статистики на местах годовую бухгалтерскую отчетность в соответствии со ст.18 Федерального закона Российской Федерации от 6 декабря 2011 года № 402-ФЗ "О бухгалтерском учете».
Подробную информацию о сдаче годовой бухгалтерской отчетности и аудиторских заключений (по перечню организаций, подлежащих обязательному аудиту) можно получить в городском (районном) отделе государственной статистики и на сайте Дагестанстата.
Не предоставление или несвоевременное представление бухгалтерской отчетности, а ровно представление в неполном объеме или в искаженном виде, влечет наложение административного штрафа на юридических лиц - от трех тысяч до пяти тысяч рублей.
--------------------------------------------------------------------------------------

Гьуьрметлу хуьруьн майишатдин карханайра (МСП-яр, СПК-яр, ЛПХ-яр) кIвалахзавай зегьметчияр!
Хуьруьн майишат вилик тухунин карда кIвалахзавайбурув 2015-йисуз вахкузвай субсидийрин гьакъиндай чна Кьурагь райондин администрациядин МО-kurah.ru официальный сайтдин "экономика-субсидирование сельского хозяйства по РД" разделдиз ганва.
КIандай ксаривай лазим информация ОСХ-дин отделдиз, телефондин 55-06-52 нумрадиз зенг авуна чириз жеда.
--------------------------------------------------------------------------------------


 

Комментарии (0)

Нет комментариев. Ваш будет первым!