Газета №13

 Тебрикар
Гьуьрметлу районэгьлияр и йикъара кьуьдни гатфар чеб чпивай чара жезвай вахтунда чна Яран сувар къаршиламишзава. Гатфарин чимивилихъ галаз къвезвай и сувар чна сада-садаз рикIин михьивилелди мубарак ийин. Дуствилин камар гегьеншарин, районда секинвал, ислягьвал хьун патал чна чи вири къуватар желб ийин.
Къуй гатфар алукьунин тIебиатдал чан гъизвай и экуь суварихъ галаз санал куь кIвалериз хушбахтлувал, меслятвал атурай, берекатарни савкьватар бул хьурай!
З.Азизов, "Кьурагь район" муниципальный тешкилатдин кьил
С.Гьамидов, "Кьурагь район" муниципальный тешкилатдин администрациядин кьил.

--------------------------------------------------------------------------------------------

Гьуьрметлу ватандашар! Чаз пара кIани вахар ва стхаяр!
Яр - лап дегь девиррилай чи уллу бубайри гьисабайвал - им гатфарин эвел, лезги халкьдин хуьруьн майишатдин йис башламиш жезвай вахт я. ХъуьтIуьн аязрикай азад жезвай, чили мублагьдаказ цуьк, тара-таму пеш ахъайзавай вахт я. Яр- чи руьгь тухарзавай сувар я.
ХъуьтIуьн рагъу либасар гатфарин къацу рангари эвеззава. Мезрейрал, саларал, багъларал чан хквезва, куьгьне хьанвай цIамни хъач агудиз, анра цIаяр хъийизва. НикIерал чIулав хвалар къалин жезва ва абур тирвал гатфарин къушарини чпин авазрал илигзава. КIвалер къакъажиз, михьивилер ийиз, гатфарин хуьрекар ийиз башламишда. Яраз иллаки аялрик, жегьилрик хвеш акатда. Абуру чка-чкада Яран ялаврик цIай кутада, кьуд патахъ зуьрнейрин туьнт сесер чукIурда. Яран паяр гвай гуьзелрив мадни дамах, наз жеда.
Яран сувар - им бубайрилай жегьил несилдал къвезвай лап хъсан адетарни я: хайи чил кIан хьун, адаз къуллугъ авун, гьакъисагъ зегьметдалди берекатар артухарун, дуствал мягькемарун. Девирар къвез фена, чи бубайри чун патал и суварни хвена. Сагърай ихьтин халкь! Икьван хъсан адетрал чан гъана, асирра абур паквилелди хуьзвай.
Вири девирра шад хьурай чи халкьдихъ галаз Дагъларин уьлкведин вири халкьар! И гуьзел сувар гатфарин, шадвилин ва руьгь цIийи хъувунин лишан я. Яран сувари чаз гьамиша цIийи умудар, рикIин динжвал, ахлакьдин михьивал гузвайди я. Къуй гилани ада дагъустанвийрин гьар са хизандиз хушбахтвал гъурай, обществода меслятвал ва сад-садан гъавурда акьун мягькем хьуниз къуллугърай!
Заз ва захъ галаз Дагъустан Республикадин Халкьдин Собранидин депутатриз лезги халкьдихъ, вири дагъустанвийрихъ чи республика кIвачел ахкьалдарунин, ам авадан ва мублагь авунин рекье агалкьунар хьана кIанзава.
Сейфуллагь Исакьов, РД-дин Халкьдин Собранидин Председателдин заместитель.

----------------------------------------------------------------------------------------

Террористриз акси комиссиядин заседание хьана
18-мартдиз райадминистрациядин актовый залда райадминистрацияда тешкилнавай террористриз акси комиссиядин членрин, хуьрерин администрацийрин кьилерин, ихтиярар хуьдай органрин сотрудникрин, школайрин директоррин, Кьурагьрин хуьруьн мягьлейрин векилрин иштираквал аваз терроризмдиз акси комиссиядин заседание хьана.
Заседание "Кьурагь район" муниципальный тешкилатдин кьил З.Азизова кьиле тухвана.
Анал кьуд месэладиз килигна:
1. "2013-2019 -йисара Россиядин Федерацияда террроризмдин идеологиядиз акси Комплексный пландин серенжемар, НАК-дин ва АТК-дин решенияр кьилиз акъудунин, терроризмдиз акси информация пайда авунин, гьакIни радикалдин ва терроризмдин идеологиядин таъсирдик фад акатдай ксарихъ галаз кьилди профилактикадин кIвалах тухунин рекьяй "Кьурагь район" муниципальный тешкилатдин АТК-дин къайдадик квай кIвалах тешкилунин гьакъиндай (райадминистрациядин кьилин общественный хатасузвал хуьнин рекьяй заместитель М.Хариев)".
2. "Муниципальный тешкилатдин сергьятда террористрин ва экстремистрин жергейриз яш тамам тахьанвай аялар желб тавун патал кьабулзавай серенжемрин гьакъиндай" (яш тамам тахьанвай аялрихъ галаз кIвалах тухунин рекьяй райадминистрацияда тешкилнавай комиссиядин секретарь З. Ибрагьимов)
3." Халкьдин хатасузвал хуьнин кIвалахдин дережа хкажунин ва халкь гзаф кIватI жезвай чкаяр инфоструктурадин объектар террор ишлемишуникай хуьнин гьакъиндай" (Кьурагь райондин авай Россиядин МВД-дин отделдин начальник А.Фатулаев)"
4. "21-мартдин сувариз талукь мярекатар тухудай вахтунда гзаф инсанар кIватI жезвай объектар террор ишлемишуникай хуьн патал тухузвай серенжемрин гьакъиндай" ("Кьурагь район" муниципальный тешкилатдин администрациядин кьил С.Гьамидов).
Заседанидин нетижаяр З.Азизова кьуна 21-мартдин сувар тешкиллувилелди ва хатасуздаказ тухун, вири хуьрера дружинникар тешкил авун тагькимарна.
-------------------------------------------------------------------------------------------

"Са садан тIварар кьан" ктабдай гьазурайди А. Рамазанова я.
ЧIехи Гъалибвилин 70 йис
Чна абурал дамахзава
Ватандин ЧIехи дяведа гъалибвал къачурдалай инихъ 70 йис тамам жезва. Кьурагь райондай мобилизоватнавай аскерри вири фронтра иштиракна. Абуру чпин вилик акъвазнавай буржи тамамарна, викIегьвилелди душмандин хуруз экъечIна, жуван чил ва Ватан хвена. Абурукай гзафбур женгерин чуьллера телеф хьана, чIехи паяр хайи ватандиз набутар яз хтана. Вишералди ва агъзурралди Кьурагь райондай Ватандин ЧIехи дяведа къалурай дирибашвилерай ва викIегьвилерай медалриз ва орденриз лайихлу хьана.
Советрин Союздин Игитар тир Эсед Бабастанович Салигьовни Араз Къазимегьамедович Алиев райондин дамах я. Лап къати женгера пехъи душмандихъ галаз женг чIугуна, викIегьвал къалурунай абур чIехи тIварцIиз-Советрин Союздин Игитвилиз лайихлу хьана.
Эсед Бабастанович Салигьов 1919-йисан 15-майдиз чи райондин КIирийрин хуьре рабочийдин хизанда дидедиз хьана.
Ам хьайидалай кьулухъ буба рагьметдиз фена. Аял тербияламишунин вири къайгъуяр диде Ханбажидин хивез аватна. Хуьре муьжуьд йисан школа акьалтIарна Эсед Буйнакскийдин кооперативный техникумдиз гьахьна. Техникум акьалтIарай жегьил Кьурагьрин райпода счетоводвиле кIвалахал акъвазна. 1940-йисуз дидеди Эсед Яру Армияда къуллугъиз рекье туна. Эседаз командир жедай мурад авайди фикирда кьуна, ам Томскдин стрелково - пулеметный училищедиз рекье туна. Ина дагъустанвиди вири "5"-дар аваз кIелна.
1941-йисуз Эседа училище акьалтIарна, гьа и йисан июлдин вацралай армияда жегьил лейтенант яз къуллугъиз башламишна. Ам Советрин Армиядин оборонадин ва гьужум авунин операцийрин активный иштиракчи тир. 1943-йисан эхирриз адан хурал женгеррин наградайри: Яру Пайдахдин, Александр Невскийдин, Отечественный дяведин 1-дережадин орденри, Дирибашвиляй медалди нур гузвай.
1944-йис Эсед Салигьован батальонди Псковский областдин сергьятдал къаршиламишна. Гьа инал чи ватанэгьлиди, вичин чан гуналди, вичин женгинин тапшуругъ викIегьвилелди ва дирибашвилелди кьилиз акъудна. 1944-йисан 15-январдиз Салигьов 30 касдикай ибарат тир отряддин кьиле аваз-чинеба душмандин далупатаз гьахьна.
Абуру Заболотье хуьре авай душмандин пехотный полкунин штаб тергна, Драково-Сокольники тIвар алай важиблу тир ракьун рехъ атIана. 200-лай виниз гитлеран чапхунчияр кьена, хуьр аккупантрикай азад авуна. Немсери алава тир къуватар желб хъувуна, Салигьован отряд гьалкъада гьатна, женг чIугваз жедай 10 аскер амукьна, абуру эхирдалди женг чIугвадайдан гьакъиндай гаф гана.
Эседал кьве сеферда залан хер хьана. 1944-йисан 17- январдиз майор Салигьов кьена. Немсерин чапхунчияр тергдайла къалурай викIегьвилерай, дирибашвилерай 1944-йисан 4-июндиз СССР-дин Верховный Советдин Президиумдин Указдалди Э.Салигьоваз Советрин Союздин Игитвилин тIвар гана.
Советрин Союздин Игит муькуь чи районэгьли Араз Алиев чи райондин Цилингрин хуьре 1925-йисан 23-июлдиз дидедиз хьана. Жегьил вахтар Астраханда акъатна. Аниз ам диде-бубани галаз куьч хьанвай. 1942-йисуз Араз вичин хушуналди яш тахьанваз армиядиз фена. Сталинград патал кьиле фейи женгера активныйдаказ иштиракна, ахпа Карельский фронтда женг чIугуна.
1944-йисан гатуз Араза къуллугъзавай 98-гвардейский стрелковый дивизиядин 296 гвардейский стрелковый полк, Ленинградский областдин Лодейное Поле шегьердин Свирь вацIун къвалав гвай тама акъвазна. ВацIун муькуь пата душмандин кьушунар авай. Полкуниз женгинин тапшуругъ гана: кьушун вацIалай элячIун, душмандивай плацдарм вахчун, алава къуват къведалди хуьн. 1944-йисан 21-июндиз чи кьушунрин 10 луьткведикай сифте яз Аразан луьткве душман авай вацIун къерехдиз фена. Адалай гуьгъуьниз старшина Морозовни акъатна. Душмандин пулеметчикри абуруз гуьлейрин цIай гана, амма Алиевани Морозова, хирерай иви физ, кьве сятни зура душмандихъ галаз женг чIугуна, вири контратакаяр рум гана, чпин чил хвена.
Свирь вахчудайла къалурай дирибашвиляй ва викIегьвиляй 1944-йисан 21-июлдиз СССР-дин Верховный Советдин Президиумдин Указдалди Араз Алиеваз Советрин Союздин Игитвилин тIвар гана.
--------------------------------------------------------------------------------

М.Агьмедова.
Кар алай проектар
Виридалайни хъсанбур
10-мартдиз Кьурагьрин 2-нумрадин юкьван школада "Инсандин капитал" проектдин "Русскоязычный Дагестан" программа кьилиз акъудун ва еритмишун патал "Живая классика" темадай виридалайни хъсандаказ урус чIалалди шиир кIелунин конкурс кьиле тухвана.
Конкурс райондин хуьрерай 6-классра кIелзавай аялрин арада кьиле фена.
Гьа икI, конкурсда Кьурагьрин 1 ва 2-нумрайрин КIирийрин, КIирийрин школа-интернат, КьепIиррин, Хвережрин ва Усарин школайрин аялри иштиракна.
Мярекатдал аялри М.А.Шолохован, И.С.Тургеневан, А.П.Чехован, М.М.Горькийдин гьикаяяр, С.А.Есенинан, Р.Гьамзатован шиирар кIелна. Конкурсдин жюридик райондин образованидин отделдин методический центрдин начальник Кь.Абдулхаликьов, информационно-методический центрдин методист Р.Гьажиханова, Кьурагьрин 1-нумрадин юкьван школадин директор Гь.Мисриев, Кьурагьрин 2-нумрадин юкьван школадин урус чIаланни литературадин муаллим Г.Агьмедова ва КIирийрин юкьван школадин директордин заместитель А.Исмаилов квай. Нетижада жюриди шиир виридалайни хъсандиз кIелунин конкурсда гъалиб хьайи 3 аялдин тIварар кьуна: К.Абдуллаева, КIирийрин юкьван школадин ученица Исаева Регина, Кьурагьрин 1-нумрадин юкьван школадин ученица, Мирзоев Мирзе, КьепIиррин юкьван школадин ученик.
Гьа и гъалиб хьанвай 3 аялди республикада кьиле физвай конкурсда иштиракда.
--------------------------------------------------------------------------------------

Ф.Абдурагьманова.
РД-дин Кьили РД-дин Халкьдин Собранидиз ракъурнавай Чарчин веревирдер
Алай йисан 3-мартдиз КьепIиррин хуьре "Кьурагь район" муниципальный тешкилатдин администрациядин кьил С.Гьамидова анин школадин муаллимрихъ, хуьруьн агьалийрихъ, Культурадин, медицинадин работникрихъ, жегьилрихъ ва зегьметдин ветеранрихъ галаз гуьруьш кьиле тухвана.
Гуьруьшда гьакIни райбольницадин кьилин духтур А.Акимова, дагъдин зонада авай хуьрерин кьилерихъ галаз кIвалах тухунин рекьяй уполномоченный А.Агъакеримова, КьепIиррин юкьван школадин директор А.Жабраилова, иштиракна.
Инал С.Гьамидова РД-дин Кьили Дагъустан Республикадин Халкьдин Собранидиз ракъурнавай Чар веревирдна. Гуьгъуьнлай вири кар алай проектрал кьилди акъвазна.
ИкI, 2014-йисуз районда уьзуьмлухар, емишрин багълар кутунвайди, мал-къара артухарзавайди, образованидин хиляй ЕГЭ-яр вахкунин нетижаяр хъсанбур хьанвайди, КьепIиррин школа республикадин виридалайни хъсан школайрик акатзавайди лагьана.
ГьакIни С.Гьамидова алай вахтунда, санлай республикада экономика четин гьалда авайдакай, СССР чкIайдалай гуьгъуьниз Кьиблепатан Дагъустанда авай халкьарин кIвалахдал таъминардай чкаяр агал хьуникди колхоз, совхозар чукIуруникди къенин юкъуз гьалтзавай четинвилерикай, чи райондани жегьилриз кIвалахдай чкаяр тахьуникди гзафбур яргъариз куьч жезвайди, и кар себеб яз хуьрера са жуьрединни дегишвилер тежезвайди ва алукьнавай 2015-йисуз чи районда хуьруьн майишат хкажиз алахъдайди къейдна.
Мярекатдал С.Гьамидова 9-майдиз Ватандин ЧIехи дяве куьтягь хьайидалай инихъ 70 йис тамам жезвайди тестикьарна. Чи диде-бубайри и дяведа гъалибвал къазанмишун патал еке зегьметар чIугурди, абур чна садрани рикIелай ракъур тавуна кIанзавайди ва чун абуруз гьамишалугъда буржлу яз амукьдайди лагьана.
И жигьетдай чи районда авай 36 зегьметдин ветерандиз РФ-дин Президент В.В.Путинан Указдалди медалар гудайди къейдна. И юкъуз кьиле тухузвай гуьруьшдиз атанвай ветеранрив, гьакIни иниз къвез тахьанвайбуруз гьар садан кIвализ физ, абурувни медалар вахкана.
И гуьруьшдал рахай А.Акимова ва А.Жабраилова вири ветеранриз чпин патай мубаракар авуна ва 17- мартдиз КьепIиррин хуьре зегьметдин ветеранриз торжественный вечер кьиле тухудайди, гьакIни КьепIиррин юкьван школадин 100 йис жезвайди, и чIехи мярекат тешкиллудаказ кьиле тухудайди къейдна.
-----------------------------------------------------------------------------------------

2-мартдиз "Кьурагь район" муниципальный тешкилатдин хатасузвал хуьнин рекьяй заместитель М.Хариева райондин финотделдин, ЦЗН-дин ва образованидин отделдин работникрихъ галаз гуьруьш кьиле тухвана.
Гуьруьш кьиле тухунин кьилин макьсад РД-дин Кьилин Чар веревирд авун тир.
И пуд идарадани кьиле фейи гуьруьшда РД-дин Президент Халкьдин Собранидиз ракъурнавай Чарчин гьар са пунктунал кьилди акъвазна.
Идалайни гъейри, ада къейд авурвал, 2014-йисуз кар алай приоритетный проектрин арада чи райондин са кьадар кIвалахарни вилик тухуз хьанва. ИкI, райондин руководстводин куьмекдалди агъа зонада уьзуьмлухрин, гьар жуьредин емишрин багълар кутунва ва гьакIни мал-къара артухарзава.
Гуьгъуьнлай М.Хариева гьар са организациядин руководителривай ва работникривай чпин кIвалах къайдадик квайвал тухун тагькимарна.
 ----------------------------------------------------------------------------------------

Ф.Мегьамедова.
Оргкомитетдин заседание хьана
13-мартдиз райадминистрациядин актовый залда ЧIехи Гъалибвилин 70 йисан мярекатдиз гьазурвал акунин гьакъиндай оргкомитетдин заседание хьана.
Заседанидал оргкомитетдин членри, хуьрерин поселенийрин кьилери иштиракна.
Заседание "Кьурагь район" муниципальный тешкилатдин администрациядин кьил-оргкомитетдин председатель С.Гьамидова кьиле тухвана.
С.Гьамидова хуьрерин поселенийрин кьилериз дяведа телеф хьана, хтун тавурбурун кIвалерал дяведа телеф хьайибур лагьана кхьена мемориальный доскаяр гьазурна, алкIурун, дяведай хтана, алай вахтунда амачир ветеранар яшамиш хьайи кIвалерал, абуру кIвалахай организацийрал, учрежденийрал гъалибвал къазанмишай аскерар я лагьана кхьена мемориальный доскаяр гьазурна, алкIурун, обелискар ремонт авун, тIварар таганвай куьчейриз чи райондин ветеранрин тIварар гун, ветеранриз медицинадин рекьяй куьмек гун тагькимарна ва маса буйругъар гана.

-------------------------------------------------------------------------------------------

Ф.Мегьамедова.
Литературадин йисаз талукь яз
13-мартдиз райондин Центральный библиотекада Литературадин йисаз талукь яз мярекат кьиле фена. Мярекатдиз райондин Культурно-досуговый центрдин директор А.Эмирбековаз, адан заместитель Ш.Саруеваз, райондин "Дагъдин булах" газетдин кьилин редактор А.Рамазановадиз, Ашарин юкьван школадин лезги чIаланни литературадин муаллим, шаир, "Абукевсер" тешкилатдин председатель Гьуьсейн Рамазаназ, Кьурагьрин кьвед лагьай нумрадин юкьван школадин муаллим Гуьлуьзар Оружевадиз и школадин пионервожатая П.Мусаевадиз, сифтегьан классрин муаллим Г.Мегьамедовадиз ва адан гъилик 3-классда кIелзавай аялриз теклифнавай.
Мярекат тешкилайди райондин Центральный библиотека тир. Библиотекадин, Литературадин йисаз талукь стендралди туькIуьрнавай ва ачухнавай столар авай залдиз мугьманар атана кIватI хьана.
Сятдин 11 тамам хьайила, библиотекадин работникри мугьманриз столрихъ ацукьун теклифайдалай гуьгъуьниз библиотекадин заведующий Ш.Эмирбековади мярекат ачухна. Ада мугьманриз мярекатда иштирак ийиз атунай чухсагъул лагьана ва чи райондин шаирар абурун тIварар кьуналди рикIел хкана, Шамсудин Исаеван 80 йисан юбилей мукьва жезвайдан гьакъиндай лагьана.
Гуьгъуьнлай гаф Айнудин Эмирбековаз гана. Ада библиотекадин работникриз и мярекат тешкилунай чухсагъул лагьана. Аялар чи пакадин югъ, чи гележег тирди къейдна . Культура галачиз литература я тахьайтIа литература галачиз культура фикирдиз гъиз тежедайди лагьана. Аялар тербияламишунин кардик культурадин работникри чпин пайни кутун лазим я. И кардиз къенин мярекатди шагьидвал ийизва.
Гьуьсейн Рамазана вичин рахунра библиотекадин работникриз чухсагъул лагьана, литература руьгьдин культурадин кьилин такьатрикай сад тирди къейдна. Чи райондин культура вилик фин патал жегьил бажарагъар винел акъудун лазим тирди лагьана, Ш.Исаев хайидалай инихъ 80 йис тамам хьунин мярекат тешкиллувилелди тухвана кIанзавайди къейдна.
Гуьгъуьнлай Гевгьер Мегьамедовадиз гаф гана. Ада Литературадин йисан сергьятра аваз школада ачух тарсар тухвайди, алай йисуз Ш.Исаеван юбилей кьиле тухудайди къейдна ва ада вичи Ш.Исаеваз туькIуьрнавай шиир кIелна. Аялри "Кьурагь дагълар" манидалди кьуьлер авуна ва Ш.Исаеван, Зулфикъар Къафланован ва маса шаиррин шиирар визиндалди кIелна.
Мярекатдал рахай Ш.Саруева чирвилер чIехи девлет тирди, кIелай инсан садрани магьрум яз амукь тийидайди лагьана. Аялриз насигьатар гана. Библиотекадин работникриз, анин заведующий Ш.Эмирбековадиз чухсагъул лагьана.
Мярекатдин эхирдай Ш.Эмирбековади атай мугьманриз мад сеферда чухсагъул лагьана, мярекат акьалтIарна.
---------------------------------------------------------------------------------------------

М.Агьмедова.
Ахтармишунин ЕГЭ
Вирироссиядин регионра хьиз Дагъустандани ахтармишунин ЕГЭ кьиле тухвана.
ИкI, 13-мартдиз 9 ва 11-классра кIелзавай аялри урус чIалай ахтармишунин ЕГЭ вахкана. Кьурагьрин 1 ва 2-нумрадин юкьван школайра, КIирийрин юквьан школада КIирийрин, КьепIиррин школадин аялри ва Аладашрин юкьван школада Аладашдинни ва арандин школайрин аялри вахкана.
Вири санлай ахтармишунин ЕГЭ 234 ученикди вахкана. Абурукай 109 ученик 11-классда кIелзавайбур, 125 ученик 9-классда кIелзавайбур тир.

-------------------------------------------------------------------------------------------

М. Агьмедова.
Медалар вахкана
17- мартдиз Кьурагьрин 1- лагьай нумрадин юкьван школада Ватандин ЧIехи дяведин далупатан ветеранрив ЧIехи Гъалибвилин 70 йисан юбилейдин медалар вахкунин мярекат кьиле тухвана. Мярекатдиз гьа ихьтинбурун жергейрай тир Ж. Мусаеваз, Я. Сефералиеваз, Къ. Къарахановаз, А. Будаеваз, И. Салмановаз, Н. Мусаеваз, К. Гьамидовадиз, М. Гьажимурадовадиз, Р. Сефералиевадиз теклифнавай. Абур гьа и школадин муаллимри гьар са нямет алаз ачухнавай суфрайрихъ ацукьарна. Ветеранриз ЧIехи Гъалибвилин 70 йисан юбилей мубарак ийиз "Кьурагь район" муниципальный тешкилатдин администрациядин кьил С. Гьамидов, "Кьурагь район" муниципальный тешкилатдин администрациядин кьилин заместитель Э. Исаева атанвай. Мубаракар авурдалай гуьгъуьниз С. Гьамидова ветеранрив медалар вахкана. Мярекатдиз Культурадин гьевескар артист Р. Тагъиева лагьай манийри, Кьурагьрин 1- нумрадин юкьван школадин аялри лагьай манийрини кьуьлери кьетIен ранг гана.
-----------------------------------------------------------------------------------------

С.Шагьпазов.
Имам хкяна
26-февралдиз Гелхенрин хуьруьн жемятдин сход хьана. Ам хуьруьн администрациядин кьил Умалат Гьайдарова ачухна ва кьиле тухвана.
Сходда участковый уполномоченный, полициядин капитан В.Р.Юзбекова ва следователь, юстициядин старший лейтенант М.Абдулгъаниева иштиракна.
Анал хуьруьн мискIиндин имам хкягъунин меселадиз килигна.
-Им, гьелбетда, мискIинда тухвана кIанзавай мярекат я,-башламишна У.Гьайдарова. Сад лагьайди, мискIинда фадлай башламишнавай кIвалахар куьтягь хьанвач. Кьвед лагьайди, им ахьтин девир хьанва хьи, жемятдин иштираквал авачиз бязи меселаяр гьял авун четин жезва. Гьахьтин меселайрикай сад къе чи вилик акъвазнавай хуьруьн мискIиндин имам хкягъун я.
Сходдал рахай хуьруьн агьалийри бязи вахтара хийир-шийирдал кIелдай, никягь ийидай фекьи тахьайла кIевера гьатзавайди, паталай гъуниз мажбур жезвайди, диндин меселайрин кьил кьадай кас авачирди лагьана.
Сулейманов Сейфудина жемятдихъ элкъвена хуьруьн имамвиле Гьасанов Къазимегьамедан тереф хуьн тIалабна. Къазимегьамеда эхиримжи вахтунда суварар хьайила, кьейид секинардайла диндин шартIар кьиле тухузвайди къейдна.
Ачух сесер гунин нетижада Гьасанов Къазимегьамед Гелхенрин хуьруьн имамвиле хкяна.
-Чаз авайди са дин, са иман я. Пайи-паяр хьун виже къвезвач. Дуьньядин вири акьуллу къуватри терроризмдин завалдиз акси кIвалах тухузвай вядеда динэгьлийрин садвал, тупламишвал чарасуз тирди лагьана вичин рахунра участковый уполномоченный В.Юзбекова. Ада имамдиз мискIин 1-апрелдалди ДУМД-да (духовное управление мусульман Дагестана) регистрация авуна кIанзавайди лагьана.
Сходдин эхирдиз Умалат Гьайдарова, хуьруьн уьмуьрда кьиле физвай мярекатар, цIийивилер кваз кьунай ва къенин месэла гьялиз активвилелди иштирак авунай жемятдиз чухсагъул малумарна.
----------------------------------------------------------------------------------------

КьепIиррин юкьван школади 1975-йисуз Шевлиев Шевли Гаджимагамедовичан тIварунихъ ганвай 860304-нумрадин аттестат квахьнавай, ам ихтибарда амач.

----------------------------------------------------------------------------------------
 

Комментарии (0)

Нет комментариев. Ваш будет первым!