Газета №12

М.Агьмедова.
Райадминистрацияда
Республикадин Кьилин Чар райондин активдихъ галаз веревирд авуна
11-мартдиз райадминистрациядин актовый залда райондин активдихъ галаз республикадин Кьили Халкьдин Собранидиз ракъурнавай Чар веревир авуна ва администрациядин заседание хьана. РД-дин Кьилин Чар веревирд авун патал райондиз РД-дин Халкьдин Собранидин Председателдин заместитель Сейфулагь Исакьов атанвай. Ана райондин администрациядин работникри, хуьрерин администрациядин кьилери, организацийрин, учрежденийрин руководителри, райондин агъсакъалринни ветеранрин Советдин председателди, майишатрин руководителри иштиракна. Заседание "Кьурагь район" муниципальный тешкилатдин администрациядин кьил С.Гьамидова кьиле тухвана. Заседанидин йикъан повесткадал кьве месэла алай.
"Районда гатфарин чуьлдин кIвалахар тешкиллувилелди кьиле тухунин ва гьазурвал акунин рекьяй серенжемрин гьакъиндай" (С. Селимов- райадминистрациядин хуьруьн майишатдин чилеринни ихтияррин алакъайрин отделдин начальник).
"Кьурагь райондин организацияр, учрежденияр ва агьалияр ери авай электроэнергиядалди вахт- вахтунда таъминарунин кIвалах вилик тухун патал кьабулнавай серенжемрин гьалдин гьакъиндай" (И. Муслимов - райадминистрациядин эменнидин алакъайрин ва экономикадин отделдин начальник).
Заседанидал алай сад лагьай месэладай хуьруьн майишатдин чилеринни ихтияррин алакъайрин отделдин начальник С.Селимов рахана. Ада 2015-йисуз авунвай ва хъувуна кIанзавай кIвалахрикай информация гана. Кьвед лагьай месэладай эменнидин алакъайрин ва экономикадин отделдин начальник И.Муслимов рахана.
Ада Кьурагьрин Яргьахъ мягьледиз цIийи трансформатор кIанзавайди, идарайрин руководителри электроэнергия ишлемишунин карда гуьзчивал тухун тавуниз килигна буржни жезвайди лагьана.
Гуьгъуьнлай РД-дин Кьилин векил яз РД-дин Халкьдин Собранидин Председателдин заместитель С. Исакьова РД-дин Кьилин Чарчихъ галаз актив танишарна. Россиядин вири регионрикай Дагъустан сифте 56 лагьай чкадал ва 2014-йисалай 34-чкадал алайди лагьана.
Им акI лагьай чIал я хьи, Дагъустан экономикадин, яшайишдин, культурадин, образованидин ва здравоохраненидин рекьяй вилик фенвайди, 2014-йисуз школайра ЕГЭ кIеви гуьзчивал аваз тухванвайвиляй, алай йисуз ЕГЭ аялрин чпин зигьиндалди вахкудайдак умуд кутаз жедайди, 2015-йис багълар кутунин йис малумарнавайди лагьана. Кьурагь районда виликдай уьзуьмлухар, емишрин багълар хкатнавайди, гила гьа чилерикай векьин никIер хьанвайди ва абур къайдадик кухтуна кIанзавайди лагьана.
Кьурагь районда мал, хеб кутуниз фикир гузвайди хьиз, балугърин промышленностдизни фикир гана кIанзавайди къейдна.
И кардиз гьукуматдини куьмек гуда. Чаз чи райондай инвесторар герек я. Абуру карханаяр кардик кутуна кIанзава, яни чIугур зегьметдик хийир жедайвал.
ГьакIни РД-дин Кьилин кар алай проектрин хейлин маса месэлайрал кьилди акъвазна.
Гуьруьшдин эхирдай С. Исакьова район вилик фин патал руководителри датIана кар алай проектрин хилерай кIвалах тухвана кIанзавайди, газ тухунин ва рехъ куьтягьунин кIвалахдин патахъай куьмек гун патал активдин тIалабун республикадин Кьилив агакьардайди лагьана.

------------------------------------------------------------------------------------------

З.Саидова.
Ветерандиз пишкеш гана
6-мартдиз Штулрин школада Ватандин ЧIехи дяведин ветеран Халидов Халид Агьмедуллаевичан 94 йис тамам хьуниз талукьарнавай мярекат кьиле фена. Мярекатдал "Кьурагь район" муниципальный тешкилатдин администрациядин кьил С.Гьамидова, райондин администрациядин работникри, Штулрин хуьруьн администрациядин работникри, Ватандин ЧIехи дяведин далупатан иштиракчийри, муаллимри ва школьникри иштиракна.
Мярекатдал С.Гьамидова вичин рахунра Ватандин ЧIехи дяведин йисара Советрин халкьарин ва Дагъустандин халкьарин игитвиликай лагьана ва ветеран Халид Халидоваз хайи югъ мубаракна, чун ихьтин инсанриз кьил агъузна икрам ийиз гьамиша гьазур тирди къейдна ва къиметлу пишкеш гана.
Къейд ийин хьи, и мярекатдал далупатан иштиракчияр тир Расулова Гуьлселемав ва Муртазалиева Гуьляятав Ватандин ЧIехи дяведин 70 йис тамам хьунин медалар вахкана. Абуру С. Гьамидоваз чпин зегьметар рикIелай алуд тавунай еке тир чухсагъул лагьана.
Лугьун лазим я, Штулрин хуьре далупатан фронтдин иштиракчи, алай вахтунда вич азарлу яз месел алай Халидова Абукевсер Мирзоевна яшамиш жезва. Сагъламвал себеб яз адавай и кьиле фейи мярекатдал иштирак ийиз тахьуниз килигна, "Кьурагь район" муниципальный тешкилатдин администрациядин кьил З.Азизова адан кIелиз фена Ватандин ЧIехи дяведин 70 йис тамам хьунин медаль вахкана ва адаз хуш келимаяр лагьана.
-------------------------------------------------------------------------------------------

З.Саидова.
Республикадин Кьили РД-дин Халкьдин Собранидиз ракъурнавай Чар КIирийрин хуьре веревирд авуна
3-мартдиз КIирийрин хуьруьн администрациядин идарада республикадин Кьилин Чар веревирд авун патал хуьруьн активдихъ галазсобрание кьиле фена. Собрание "Кьурагь район" муниципальный тешкилатдин администрациядин кьилин общественный хатасузвал хуьнин рекьяй заместитель Махач Хариева ачухна ва кьиле тухвана.
Собранида иштирак авун патал иниз КIирийрин юкьван школадин муаллимар, медицинадин работникар, хуьруьн администрациядин работникар ва масабур кIватI хьанвай.
М.Хариева кIватI хьанвайбур республикадин Кьилин Чарчихъ галаз танишарна ва "Хатасуз Дагъустан", "Агропромышленный комплекс", "Точка роста" кар алай проектрал гегьеншдаказ акъвазна, "Хатасуз Дагъустан" пункт веревирд ийидайла, ада эхиримжи йисара Дагъустанда секин уьмуьр хьанвайди, эхиримжи йисуз Дагъустанда са террактни тахьанвайди лагьана, "Агропромышленный комплекс" проект веревирд ийидайла, ада 2014-йисуз Бугъдатепе хуьре 4 гектар семечкаяр, КIирийрин хуьре 6 гектар цил авай емишрин ва 6 гектарни кIерецин къелемар акIурнавайди къейдна, М.Хариева вичин рахунра РД-дин Кьил Рамазан Абдулатипова 2015-йис "Багълар кутунин йис" яз малумарнавайди лагьана. Идахъ галаз алакъалу яз Кьурагь районда алай йисуз 50 гектар багълар кутадайди къейд авуна, "Точка роста" проект кечирмишунин карда райондик квай арандин хуьрера 0,5 гектар теплицаяр эцигнавайди алава хъувуна.
Инал мад республикадин Кьилин Чар веревирд авун патал КIирийрин юкьван школадин лезги чIаланни литературадин муаллим Къайиб Къайибов рахана. Ада вичин рахунра ибур вири уьмуьрдин важиблу месэлаяр тирди, чун чи уьлкведин ватанпересар хьана кIандайди ва РД-дин Кьилин эвер гун кьабулнавайди ва зегьмет чIугуна, кIвалах генани вилик тухудайди къейдна.
--------------------------------------------------------------------------------------------
 А.Рамазанова.
Кар алай проектрай алай йисуз пландик квай кIвалахар веревирд авуна
10-мартдиз "Кьурагь район" муниципальный тешкилатдин администрациядин кьилин кабинетда Дагъустан Республика вилик финин рекьяй республикадин Кьилин кар алай проектар 2015-йисуз кечирмишунин гьакъиндай совещание кьиле фена. Совещание "Кьурагь район" муниципальный тешкилатдин администрациядин кьил С.Гьамидова кьиле тухвана.
Аниз кар алай проектрихъ галаз алакъалу тир вири идарайрин руководителриз теклифнавай.
2015-йисуз гьар са проектдай тухвана кIанзавай кIвалах веревирд авуна, руководителри чпин кIвалахдин практикада ишлемишун патал абурун вилик хейлин фикирар гъана.

------------------------------------------------------------------------------------------- 

А.Рамазанова.
Чи интервью
Жермеяр чIехи хьанватIани, закондал амал тийизвайбур гзаф я
Югъ-къандавай транспортдин такьатар гзаф жезва. Гьатта гъвечIи хуьрерин куьчейрани бязи вахтара машиндин гъиляй яхдиз эъвез жезвч. Чи районда 2861 транспорт регистрация авунва. Абурукай 2301 гъвечIи машин, 424 пар чIугвадай машин, 118 автобус, 13 мототранспорт я. Районда кардик квай ОГИБДД-дин 148 км рехъ гуьзчивилик ква, адакай 44 км республикадин, 104 км чкадин рехъ я. Чи районда алатай йисан ноябрдин вацралай ОГИБДД-да цIийи начальник хьанва. Чи газет кIелзавайбурун са шумуд суалдиз чаз Кьурагь районда авай ОГИБДД-дин начальник Мусаев Рамалдан Рамазановича жаваб гана.
Куьруь къейд: Мусаев Рамалдан Рамазанович 1978-йисуз Гелхенрин хуьре чIехи хизанда дидедиз хьана. Гелхенрин юкьван школа акьалтIарна 1996-1998-йисара Пограничный кьушунра къуллугъна, 1999-йисуз Дагъустан Республикадин къенепатан органра кIвалахал акъвазна, 2010-йисалди ада Махачкаладин УВД-да ППС М 2 полкунин батальондин командир яз къуллугъна. 2010-йисалай 2014-йисалди Ахцегь районда авай ОГИ БДД-дин начальник яз кIвалахна, 2014-йисан ноябрдин вацралай чи районда авай ОГИ БДД- дин начальникдин везифаяр тамамарзава. Адахъ уьмуьрдин юлдаш ва аялар ава.
-Рамалдан Рамазанович, куьне куь кIвалах квелай башламишна. Жерме авурбур гзаф хьанвани?
-Сифте нубатда чна документар къайдадиз гъана. Рекьерал рейдер ийиз башламишна.
-Алай вахтунда ички ишлемишна, машин гваз кьуртIа, гьикьван жерме ийизва?
-Эгер ички ишлемишна, транспорт гьализ хьайитIа, РФ-дин КоАП-дин 12,8 ст.1.ч. асаслу яз, суддин къарардалди 1,5-2 йисуз праваяр вахчузва ва 30 агъзур манат жерме ийизва, эгер къвед лагьай сеферда мад тахсиркарвал авунваз хьайитIа, пуд йисуз праваяр вахчузва ва 50 агъзур манат жерме ийизва.
-Куь сотрудникриз транспортный такьат гьалзавай касди ички ишлемишнавайди гьикI чир жезва? Махсус аппарат гвани абурув?
-Сад лагьайди, ички ишлемишнавайдан сивяй эрекьдин ял къведа, чинин хам яру жеда, кIвачел дуьз акъвазиз жедач. Кьвед лагьайди, чи сотрудникдив махсус аппарат-алкотектор гва. Къейд ийин хьи, алкотектордихъ махсус свидетельствони гала. Гьа свидетельство гьар йисуз цIийи хъийизва. Свидетельстводал алай нумраяр аппаратдал алай нумрайрихъ галаз сад хьана кIанзава.
-Транспорт гьализ, телефондай рахазвайди, хатасуз чIул (ремень) алукI тавунвайди, кьилди аял эцигдай махсус тадарак авачирди ийизвай жермеяр гьикьванбур я?
-Эгер транспортдин такьат телефондай рахаз гьализ хьайитIа, а кас закондал асаслу яз 1500 манат жерме ийизва, хатасуз чIул вегьин тавунваз хьайитIа, 1000 манат жерме ийизва. Машинда аял эцигдай махсус тадарак авачиз хьайитIа, 3 агъзур манат жерме ийизва.
Лагьана кIанда хьи, бязи диде-бубайри аял эцигдай махсус тадарак авачиз аял къужахда кьазва. Эгер рекьера хаталувал хьайитIа, къужахда авай аял дуьшуьшдик акатзава. Махсус тадарак къачун патал пулдин такьатар гзаф акуникди, абуру аялдин уьмуьр хаталувилик кутазва.
Диде-бубадиз чпи къужахда кьурла, аял хаталувиликай хуьзвайди хьиз жезва. Амма абур гъалатI я.
-Праваяр вахчун патал вуч авун лазим я?
-2003-йисан сад лагьай сентябрдилай инихъ акъатнавай закондал асаслу яз праваяр вахчурдалай кьулухъ судди къалурнавай вахт алатайла межрайонный регистрационный экзамен вахкана лагьай чар, медсправкадин копия, права вахчур суддин къарардин копия, арза ОГИБДД-диз гъун лазим я.
-Транспортдин такьатар права гвачиз , яш тамам тахьанвайбур машин гьализ кьур дуьшуьшар хьанани? И вахтара жерме гьикьван я?
-Алатай йисара праваяр гвачиз машин идара авурбур 2500 манат жерме ийизвайтIа, гила 5 агъзурдалай 15 агъзур манатдал кьван жерме ийизва. ЦIинин йисуз аялри машин гьализ кьур 2 факт хьана, алатай йисуз сад хьанвай. Абур 5 агъзур манат жерме авуна.
-ЦIинин йисуз рекьерал хьайи аварияр хьанани?
-Алай йисан кьве вацра са ДТП хьана. И ДТП-ни машин кIевиз гьалунин дуьшуьшда хьайиди я.
-ОГИБДД-дин сотрудникриз рекьерин гьерекатрал амал тавуна, закон чIурдай ихтияр авани? Аваз хьайитIа, гьихьтин дуьшуьшра ава?
-ОГБДД-дин ва я полициядин гьич са сотрудникдизни гьакIни кьилди касдизни рекьерин гьерекатрал амал тийидай ихтияр авач. Эгер ДТП хьанваз ва гьакIни маса вахтара сифте куьмек ийиз больницадиз тухуз хьайитIа, абуруз ихтияр ава. Амай вахтара ваъ.
-ЧIехи пай гъвечIи машинрин гуьзгуьяр чIулаварна (тонироватна) гьалзава. Алай вахтунда закондал асаслу яз гьихьтин жерме ийизва?
-Виликдай гуьзгуьяр чIулаварна гьалзавай машинрин нумраяр алудзавай, гила 500 манат административный жерме ийизва ва абуруз къалурнавай тахсиркарвал дуьзар хъийидай вахт гузва, эгер сотрудникдин истешишунрал амал тийиз хьайитIа, 15 сутка дустагъ гудай ихтияр ава.
-Рекьерал, куьчейрал машин акъвазарна рекьерин гьерекатриз манийвал гуз хьайитIа, жерме ийизвани?
-Эгер машин чIуру чкадал акъвазарнаваз хьайитIа жерме 500 манат я, эгер машин чIуру чкадал акъвазарна, транспортдин такьатриз манийвал гуз хьайитIа 2000 манат жерме ийизва, набут ксариз фин патал гьазурнавай махсус чкайриз манийвал гуз хьайитIа 3-5 агъзур манат жерме ийизва.
Къейд ийин хьи, административный жерме авуна, жерме гун тавунвайбур РФ-дин Кодексдал асаслу яз кьве сеферда гзаф жерме хъийизва. Мисал яз, эгер жерме 1,5 агъзур яз хьайитIа, ам 3 агъзур манатдин жерме хъийизва ва я 15 сутка дустагъ ийизва, ва я50 сятда кIвалахиз тазва.
-Куьне рейд авурла, гьихьтин тахсиркарвилер винел акъатзава?
-Рейд авурла страховка, документар гвачирбур, ихтияр авачир пар тухузвай машинар, гуьзгуьяр чIулаварнавай машинар, ички ишлемишна гьалзавайбур, транспортдин йигинвал хкажна гьалзавайбур.
-Алай вахтунда куьне гьихьтин кIвалах кьиле тухузва?
-Алай вахтунда чна районда оперативно-профилактический мярекат яз "Маршрутка" тIвар алаз 9-мартдилай 10-мартдалди ва 7- мартдилай 17-мартдалди "Автомобиль" тIвар алаз мярекатар кьиле тухузва.
2007-йисан 7-январдин 20-нумрадихъ акъатнавай РФ-дин Правительстводин къарардин истемишунрал асаслу яз аялрин тешкилнавай группаяр автобусра аваз тухунин гьакъиндай ГИБДД вахтунда 10 югъ амаз хабардар ийин, аялрин тешкилнавай группаяр технический рекьяй чIуру гьалда авай автобусра аваз, хатасузвал хуьдай чIулар (ремень) алачиз, транспортный рекьяй низамсуз водителди автобусда аваз тухун къадагъа авунва.
2015-йисан 1-июлдилай аялрин тешкилнавай группаяр 10 йисалай виниз гьалнавай автобусра аваз тухуз тазвач.
-Квез райондин агьалийрихъ элкъвена лугьудай гьихьтин тIалабунар ава?
-Гьуьрметлу районэгьлияр, ички хъвана рулдихъ ацукьмир, куьне куь уьмуьр хьиз масадан уьмуьрни хаталувилик кутазва. Аялар машиндин рулдихъ ацукьармир, рекьера машинрин гьерекатрал амал ая, транспортдин йигинвал агъуз ая. ОГИБДД-дин сотрудникди акъвазарайла, акъвазун тIалабзава.
-Чухсагъул чахъ галаз суьгьбет авунай.
-Куьнни лап сагърай.
-------------------------------------------------------------------------------------------

Ф.Мегьамедова.
Виридуьньядин дишегьлийрин югъ къейдна
6-мартдиз райондин Культурно-досуговый центрда Виридуьньядин дишегьлийрин йикъаз талукьарнавай торжественный концерт кьиле фена. Концертдин торжественный пай "Кьурагь район" муниципальный тешкилатдин администрациядин кьил С. Гьамидова райондин дишегьлийриз райондин вири итимрин патай сувар мубарак авуналди ачухна ва гаф "Кьурагь район" муниципальный тешкилатдин администрациядин кьилин заместитель Э.Исаевадиз гана. Э. Исаевади вири дишегьлийриз сувар мубарак авурдалай гуьгъуьниз, вичин рахунра Виридуьньядин дишегьлийрин югъ гьикI арадал атанатIа танишарна, район вилик финин карда чпин пай кутазвай дишегьлийриз чухсагъул лагьана. Ватандин ЧIехи дяведин йисара ва дяведилай гуьгъуьнин йисара дишегьлийрал акьалтай азиятар ва абуру чIугур зегьметар къейдна, кIвалахда кIвенкIвечи хьайи ветеран дишегьлийрин тIварар кьуналди, абуруз чухсагъул малумарна. Дишегьлийрин югъ гьакI "Кьурагь район" муниципальный тешкилатдин кьил З.Азизова мубаракна ва далупатан зегьметдин ветерандив ЧIехи Гъалибвилин 70 йисан юбилейдин медаль вахкана ва пишкеш гана.
Гуьгъуьнлай концертдин программа райондин Культурно-досуговый центрдин директордин заместитель Ш.Саруева райондин дишегьлийриз сувар мубарак авуналди ачухна. Сувар гьакI чпин гьевеслу манийралдини кьуьлералди Культурадин работникри, Кьурагьрин сад лагьай нумрадин юкьван школадин аялри ва искусствойрин школадин аялри мубаракна. Суварин мярекатдиз Ш.Саруева тамамарай халкьдин манийрини Кьурагьрин сад лагьай нумрадин юкьван школадин ученицаяр тир Абдурагьманова Алинади, Салманова Роксанади ва Жемиева Алинади тамамарай дидейриз бахшнавай манийри кьетIен ранг гана.

---------------------------------------------------------------------------------------------

А.Мамедова.
Сувар къейдна
6-мартдиз райондин яшайишдин рекьяй къуллугъдай Комплексдин центрдин отделди Виридуьньядин дишегьлийрин югъ шад гьалара къейдна.
Аниз райондай набут аялрин, яшайишдин рекьяй четин гьалда авай хизанрай дидейриз теклиф авунвай.
Анал атанвай дидейриз КЦСОН-дин вахтуналди директордин везифаяр тамамарзавай Назим Мусаева ва отделдин заведующий тир Саида Абдуллаевади и гуьзел гатфарин сувар мубаракна. ГьакIни атанвай дидейриз и отделдин работникри гьар жуьре ширинлухар алай столар ачухнавай. Кьурагьрин сад лагьай нумрадин юкьван школадин аялри дидейриз бахшнавай шиирар кIелуналди, кьуьлер авуналди дидейриз сувар мубаракна.
Мярекатдин эхирдай КЦСОН-дин отделдин работникри атанвай дидейриз ва и мярекатда иштирак авур аялриз чпин патай пишкешар гана.
--------------------------------------------------------------------------------------------

А.Рамазанова.
«Радуга» ясли-бахчада «8-Март-дидедин югъ»…
5-мартдиз Ашарин "Радуга" тIвар алай ясли-бахчада "8-Март-Дидедин югъ" тIвар алаз утренник кьиле фена. Утренникдин программа бахчадин заведующий Рамазанова Зульфияди ва Желилова Муьгьуьббата гьазурнавайди тир.
8-Мартдин сувар ясли-бахчада виридалайни рикIел аламукьдай сувар я. "Радуга" ясли-бахчадин залда гатфари агъавал ийизвай. Цларал гьар жуьре цуьквер, шикилар ва чIехидаказ кхьенвай «8» алкIурнавай ва аялриз виридалайни рикI алай гьар жуьредин шарар кутунвай. Адет тирвал, 8-Мартдин утренникар ясли-бахчайра кьуьлералди, дидейриз туькIуьрнавай манийралди, шиирралди девлетлу я. И утренникда иллаки, гъвечIи артистар хьиз аялар къугъвай, "ЧIурун къугъ", "Чи дидеяр гьихьтинбур ятIа" сегьнеяр бегенмиш хьана.
Аялривай гзаф шейэр ийиз алакьзавайди акурла чун гзаф шад хьана. Утренник, аялри чпин гъилералди гьазурнавай пишкешар дидейриз багъишуналди, акьалтIарна.
----------------------------------------------------------------------------------------

Ф.Абдурагьманова.
Чи райондин рушарин команда сад лагьай чкадал
2015-йисан 1-мартдиз Дербент шегьерда Кьиблепатан зонадин рушарин командайрин арада волейболдай турнир кьиле тухвана.
Вири санлай и турнирда 2000-2001-йисара хайи рушарикай ибарат тир командайри иштиракна.
Чи райондай и турнирда тренер Э.Алибековахъ галаз рушарин команда фена. Геждалди кьиле фейи и турнирдин эхирдай Кьурагь ва Къайтагъ районрин, Дербент шегьердин командайри кIвенкIвечи чкаяр кьуна. Чи райондин рушарин волейболдин команда 1-чка кьуниз лайихлу хьана. Чи райондин командадиз турнирда сад лагьай чка кьунай дипломар ва мукьвара волейболдай Махачкъалада кьиле фидай чемпионатда иштирак авун патал путевкаяр гана.

--------------------------------------------------------------------------------------------

Ф.Абдурагьманова.
Кьурагьа 8-Мартдиз талукьарнавай волейболдай турнир кьиле фена
6-мартдиз райондин Спортдин дворецда, 8-Мартдин сувариз талукьарнавай волейболдай турнир кьиле тухвана.
И турнирда иштирак авун патал Белиж поселокдин, Ахцегь, Мегьарамдхуьруьн районрин виридалайни хъсан 3 команда атанвай.
Мярекатдал чпин, райадминистрациядин, муаллимрин, районэгьлийрин патай мубарак авун патал сифте Кьурагьрин 2-нумрадин юкьван школадин муаллим Ю.Мисриев, райондин образованидин отделдин начальник Р.Катибов рахана.
Виридаз 8-Мартдин сувар мубаракна, спортда еке агалкьунар хьурай лагьана. Гуьгъуьнлай турнирдал РФ-дин Гимн яна ва РФ-дин, РД-дин пайдахар хкажна.
Кьурагь районда и мярекат кьиле тухунин кьилин макьсад: РД-да дишегьлийрин арада волейбол машгьур авун, физкультура ва спорт пайда авун, акьалтзавай несил ватанпересар яз тербияламишун, дуствилин алакъаяр мягькемарун тир.
Лап хцидаказ кьиле фейи и турнирда 1-чка Мегьарамдхуьруьн, 2-чка Ахцегь ва 3-чка Кьурагь районрин командайри кьуна. Белиж поселокдин команда 4-чкадиз лайихлу хьана.
Иштирак авур вири командайриз кубокар, медалар, грамотаяр, спортивный формаяр гана.
Мярекатдин эхирдай рахай райондин физкультурадинни спортдин ва жегьилрин крарин рекьяй отделдин начальник Р.Рамазанова мад сеферда виридаз алукьзавай сувар мубаракна. Ихьтин турнир къведай 2016-йисузни районда кьиле тухудайди къейдна.
--------------------------------------------------------------------------------------

 

Комментарии (0)

Нет комментариев. Ваш будет первым!