Газета №11

 Райондин вири дишегьлийриз Виридуьньядин дишегьлийрин Югъ тир 8- Мартдин суварин тебрик
Играми дидеяр, вахар! Виридуьньядин дишегьлийрин югъ тир 8-Мартдин сувар гатфарин сифте сувар я. Дишегьлийри хизандин къул хуьнин карда лап кьетIен чка кьаз ва инсандиз уьмуьр хьиз абуру аял тербияламишунин кардани чпин вири къуватар желбзава. Гьавиляй Къуръандани лагьанва: женнет дидедин кIвачерик ква. Лагьана кIанда, чи райондин дишегьлийри район вилик финин карда чпин зегьмет гьар са хилез серфзава. Гзафбуру чпин агалкьунралди райондин майишатдин вири хилер хкажна. Медицинадин, образованидин, илимдин рекьяйни хъсан нетижаяр къазанмишнава. Райондин муаллим-дишегьлийри образованидин хилера жезвай жуьреба-жуьре конкурсра иштиракуналди, чпин агалкьунар къалурзава. Илимдин чIехи кукIушриз хкаж жезвайбурун жергеярни йис-йисандавай гзаф жезва.
Чна къе, суварин юкъуз, Ватандин ЧIехи дяведин йисара, гуьгъуьнлайни Ватан абад авун патал, зегьмет чIугур дишегьлияр рикIелай ракъур тийин, чна абурун баркаллу крарал акьалтзавай несил тербияламишзава ва дамахзава.
Чун умудлу я, инлай къулухъни райондин дишегьлийри чпин агалкьунралди райондин тIвар хкаждайди.
Гьуьрметлу дидеяр, вахар! И лишанлу Югъ мубарак авуналди, чаз квехъ чандин сагъвал, уьмуьрдин бахтлувал, и четин девирда сабурлувал хьана кIанзава.
Къуй куь сивелай садрани бахтлувилин хъвер кими тахьурай!

"Кьурагь район" муниципальный тешкилатдин кьил З.АЗИЗОВ,
"Кьурагь район" муниципальный тешкилатдин администрациядин кьил С.ГЬАМИДОВ.

--------------------------------------------------------------------------------------------

Райадминистрацияда
Гьафтедин нетижаяр кьуна
2-мартдиз райадминистрациядин актовый залда райондин идарайрин руководителри гьафтеда авунвай кIвалахдин нетижаяр кьадай совещание хьана.
Совещание "Кьурагь район" муниципальный тешкилатдин кьил З.Азизова кьиле тухвана.
"Кьурагь район" муниципальный тешкилатдин администрациядин кьил С.Гьамидова къейд авурвал, З.Азизован буйругъдалди Маллакент, Арабляр, Аладаш хуьрериз фена, административный рекьиз килигна, Маллакентда хуьруьн активдихъ ана авай идарайрин работникрихъ галаз совещание кьиле тухвана, ана яд гъун патал 2 км 300 метрдиз къанав янавай, амай линиядиз къанав яна, яд гъун патал 450-500 агъзур манат пулдин такьатар лазим къвезва.
Райондин счетный палатадин ревизор С.Сайдумова лагьайвал, алатай гьафтеда ганвай буйругърал асаслу яз кIвалах кьиле тухвана, йисан отчетрал машгъул я.
Райондин чилеринни ихтияррин алакъайрин ва хуьруьн майишатдин отделдин начальник С.Селимова къейд авурвал, алай вахтунда райондин майишатрин отчетар кьабулзава, Маллакентда яд гъунин кIвалахдал гуьзчивал тухузва.
Райондин образованидин отделдин начальник Р.Катибова лагьайвал, алатай гьафтеда районда муаллимриз урус чIалай олимпиада кьиле тухвана, республикадин олимпиадайрин этап куьтягь хьанва, Ашарин ясли-бахчадиз цIивин бес жезвач.
Райондин пенсионный фондунин отделдин начальник А.Назаралиева къейд авурвал, пенсияр перерасчет хъувуна, мартдин вацран пенсияр хтанва.
ЦРБ-дин кьилин духтур А.Азимова больницади пландал асаслу яз кIвалахзавайди чIехи яшарин агьалияр ва аялар 95 процент диспансеризация авунвайди, набутриз гузвай дарманар хтун тавунвайди лагьана.
Совещанидал мадни гьакI райондин Культурно-досуговый центрдин начальник А.Эмирбеков, финансовый отделдин начальник Б.Ибрагьимов ва масабур рахана.
З.Азизова кар алай проектар лазим къайдада ва вахтунда кьилиз акъудун тагькимарна.
---------------------------------------------------------------------------------------------

А.Рамазанова.
Республикадин Кьили РД-дин Халкьдин Собранидиз ракъурнавай Чар Хпуькьрин хуьре веревирд авуна.
Республикадин Кьилин Чар веревирд авун патал "Кьурагь район" муниципальный тешкилатдин кьилин векилвал гваз райондин информациядин технологийрин ва печатдин отделдин начальник А.Будаев Хпуькьрин хуьруьз фена. Хпуькьрин хуьре хьайи гуьруьшда Хпуькьрин хуьруьн муниципальный тешкилатдин администрациядин аппаратдин работникри, юкьван школадин муаллимри, Культурадин кIвалин, фельдшерско-акушерский пунктунин работникри, агьалияр яшайишдин рекьяй хуьдай комплексный Центрдин работникри иштиракана. А.Будаева мярекатдин иштиракчияр республикадин Кьилин Чарчихъ галаз танишарна, 2014-йисуз районда кар алай проектрай гьихьтин кIвалах тухванватIа лагьана.
Анал "село Хпуькь" муниципальный тешкилатдин администрациядин кьил Гь.Харгушев, юкьван школадин директор К.Гьуьсейнов, райондин комплексный Центрдин работник Эмирбег Юзбеков ва масадбур рахана. Анал рахайбуру республикадин Кьилин Чарчин тереф хвена, иллаки кар алай проектрал рази хьана. "Кьурагь район" муниципальный тешкилатдин кьил З.Азизова школадин чими ийидай система ремонт авуниз, коридордин пол дегишариз пулдин такьатар чара авуниз куьмек гун, Хпуькьрин хуьре ясли-бахча эцигун, цифровой телевидение кардик кутун, "Билайн" ва я "Мегафон" мобильный сигнал кьун патал релейка эцигун тIалабна.
-----------------------------------------------------------------------------------------

А.Рамазанова.
Кар алай проектар
План кьилиз акъуднава
Республикадин Кьилин кар алай проектар кьилиз акъудунин карда чи районда авай вири мумкинвилерикай менфят къачуна, проектар уьмуьрдиз кечирмишиз алахъзава.
"Сагълам Дагъустан" тIвар алай проект кьиле тухуникай чна чи газетдиз са шумуд сеферда макъалаяр кхьена.
Алатай йисуз диспансеризация авунин план чи райондин больницадивай 100 процентдин кьилиз акъудиз хьанач, и кардиз себебар гзаф ава: больницада лазим тадаракар, бес кьадар духтурар авач, диспансеризация ийиз геж башламишнавай.
Шазан кьве вацрахъ галаз гекъигайла, цIинин кьве вацра диспансеризация 106 процент авунва. ЧIехи яшарин 464 кас авун план яз 492 кас диспансеризация авунва. Диспансеризация ийиз райондин хуьрериз духтуррин бригадаяр физва. Алатай гьафтеда Кумухърин ва Аладашдин хуьруьз фенвай, и гьафтеда Бугъдатепедиз фида. Диспансеризация авун патал хуьрерин агьалийри хъсан иштиракзава.
--------------------------------------------------------------------------------------------

З.Саидова.
Чи ватанэгьлияр гьар сана
Вичин пешедал рикI алайди
Кьурагь райондай машгьур алимар, спортсменар, духтурар, писателар ва муаллимар акъатнавайди садазни сир туш. Ихьтин инсанрал акьалтзавай несилди дамах авуна чешне къачун хъсан кар я. Уьлкведин гьи пипIе кIвалах ийиз хьайитIани инсандиз пуд шартI герек я: сад лагьайди, инсанвал квадар тавун, кьвед лагьайди, кар алакьун ва пуд лагьайдини, юлдашрин арада гьуьрмет къазанмишун я. Зегьметдал рикI алай инсандиз са кIвалахдани четин жедач, эгер четинвилер гьалтайтIани ада а четинвилериз рум гуда.
Заз чиз четин пешейрикай сад лагьайди муаллимвал я. Гьикьван еке я муаллимдин зегьмет? Ада гьеле гъиле къелем кьаз тежезвай аялриз зурба алимар, духтурар ва маса пешейрин иесияр жедай мумкинвилер гузва. Къенин зи макъалани вич Кьурагь райондин Кьурагьрин хуьряй тир, алай вахтунда Дербент шегьерда яшамиш жезвай Абдулмажидова (Къурбанова) Шкуфат Халидовнадикай я. Ада вичин уьмуьр аялриз чирвилер гун патал бахшна. Шкуфат муаллим 1952-йисан 14-январдиз Кьурагьрин хуьре къуллугъчидин хизанда дидедиз хьана. Хизанда абур 8 аял: 4 рушни, 4 гада авай, Шкуфат муаллим хизанда кьвед лагьай аял я. Ам 1958- йисуз Кьурагьрин 1-нумрадин юкьван школадиз фена, и школада 3-классдал кьван кIелна, гуьгъуьнлай Дагестанские Огни шегьердин юкьван школада кIелун давамар хъувуна. 1969-йисуз ада и школа хъсан къиметралди акьалтIарна. Гьа и йисуз ам Дербентдин педучилищедик экечIна. Училище кIелна куьтягьайдалай гуьгъуьниз адаз вичи сифте классра кIелай Кьурагьрин 1-нумрадин юкьван школада кIвалахун кьисмет хьана. Сифте пионервожатый яз, ахпа 5 йисуз гъвечIи классрин муаллим яз кIвалахна. И йисара ам школадин дирекциядинни комсомолдин комитетдин грамотайриз лайихлу хьана.
ГъвечIи чIавалай муаллимвилел рикI алай жегьилди вичин чирвилер 1976-йисуз Махачкъалада ДГУ-дин тарихдин факультетдик экечIуналди давамар хъувуна. Бегьер гъидай тарцин хилер агъуз жеда лугьудайвал халкьдин мисалда, Шкуфат муаллимни, вичихъ хъсан чирвилер аватIани, фурс гвачир дагъви дишегьли я. Гегьенш чирвилер хьуниз килигна, ДГУ акьалтIардалай гуьгъуьниз адаз Огни шегьердин интернат "Горянок" -да кIвалахун къалурна. 1982-йисалай-1989 -йисалди Шкуфат Абдулмажидовади интернат "Горянок"-да тербиячивал ийизни тарихдин тарсар гуз кIвалахна.
Интернатда музейдин кIвалахда еке куьмек гунай адаз, гьана регьбервал гузвай Георгий Малкина Гьуьрметдин грамота гана, коллективдин патай еке чухсагъул малумарнай.
Ина кIвалахай йисара Шкуфат муаллимди еке гьуьрмет къазанмишна. 1989-йисуз ам вичин хизанни галаз Дербент шегьердиз яшамиш жез куьч хъхьана. Инани Ш.Абдулмажидовади вичин муаллимвилин рехъ 21- нумрадин школада кIвалахуналди вилик тухвана. Сифте йисара тарихдин муаллим яз кIвалахна. Алай вахтунда ам технологиядин муаллим я. Хъсан муаллим хьиз ам виридаз хъсан дерзичи язни машгьур я. Вичи кIвалахзавай школада адахъ вичин тарсуниз лазим тир вири тадаракар авай гуьрчег кабинетни ава. Ада вичин тарсара рушар цваз, илигунар, тIуьнар ийиз ва чраз гъавурда твазва.
Гьар йисуз шегьердин школайрин арада технологиядай жезвай выставкайра ада кIвенкIвечи чкаяр кьуна. Гьа и лайихлувилерай адаз хейлан грамотаяр, пулдин пишкешар ганва. 2011-йисуз адан гъилик чирвилер къачузвай и школадин ученицади республикада технологиядай хьайи олимпиадада сад лагьай чка кьуна.
И чIугур зегьметдайни Шкуфат муаллим дипломдиз лайихлу хьана. Гуьгъуьнлай Махачкъалада кьиле фейи "Лоскутная техника" конкурсда парчадин кIусарикай цвайи яргъандай ада сад лагьай чка кьуна. И агалкьунрай школадин патай адаз мад сеферда грамотаярни гана, хъсан пишкешар багъишуналди генани руьгь кутуна. Гьар йисуз Шкуфат муаллимди вичи кIвалахзавай школада "Выставка детских поделок" тIвар алаз, аялри чпин гъилералди авунвай, цванвай, хранвай шейэралди выставкаяр, конкурсар тешкилзава.
Школадин, муаллимрин аялрин диде-бубайрин патай ада, дерин чирвилер авай муаллим яз кIвалахиз еке гьуьрмет къазанмишна, коллективдин арада вичин хъсан педагог яз къалурна. Шкуфат муаллимдиз уьмуьрдин юлдаш, пуд аял ава. Вичин аялар ада дуьз рекьел акъудна, виридаз кьилин образование гана. ЧIехи гада Ренат вичин хизан галаз Карачаево -Черкесияда кIвалахзава, руша Ульянади дидедин пеше -муаллимвал хкяна, гъвечIи гада Марата Москвада университетда кIелиз, гьана кIвалахзава.
Къейд авун лазим я, Шкуфат Абдулмежидова вичи гузвай гьар са тарс метлеблуди хьун патал алахъзава. Аялрин патай гьуьрмет муаллимди вичин дерин чирвилералди, хъсан къилихралди къазанмишзавайди я.
Къуй гьар са муаллимдихъ ВУЗ-рин студентар, уьмуьрдин рехъ акьуллудаз тухудай инсанар жедай ученикар хьурай. Къуй гьар са ученикдини муаллимдин зегьмет гьич садрани рикIелай алуд тавурай!
--------------------------------------------------------------------------------------------
А.Мамедова.
Далупатан зегьметчияр
Зегьметрин сагьиб хьайиди
Чун чи райондин хуьрериз фейила, са чIавузни чна яшлу инсанар рикIелай ракъурзавач. Инсандин яшар-адан девлет я. Яшлубурун яшариз чна гьуьрметни ийизва.
Чун и йикъара Хвережрин хуьруьз мугьман хьана. Ина чна суракь авуна, Рамазанова Перизат Хидирнабиевнадин кIвализ мугьман хьана. Эвер гайила къецел экъечIай адан гадади чаз буюр, кIвализ ша,- лагьана. КIвале пичина цIай аваз чими гьава авай. Дивандал ацукьай чкадилай кIвачел къарагъна кьелечI якIарин, рикIиз чими дишегьлиди чун къаршиламишна. Хваш-беш авурдалай гуьгъуьниз, чна чун атунин себеб вуч ятIа лагьана, Перизат дидедивай вичин уьмуьрдикай суьгьбет авун тIалабна.
Вичин уьмуьрдин са кьадар вакъиаяр хъсан рикIел аламачир Перизат дидедиз суьгьбет ийиз гадади куьмек гана.
-Зун, чан бала, 1933-йисуз Усарин хуьре дидедиз хьана. Зи дах хуьре чIехи фекьи тир, амма дах кулак я лагьана хуьряй акъуднай. Зи аял вахтар лап гьа четин дяведин вахтарал гьалтна. Са яш тамам жедалди Хвережрин хуьруьз кьисмет хьана. Ина зи уьмуьрдин юлдашдиз 6 велед: 3 рушни 3 гада авай. Абур чпин хизанрин иесияр хьанва. Зазни и хизанда 2 аял хьана. Руш Сижарат вичин хизан кутуна Кьурагьа яшамиш жезва, гада Девриш вичин хизанни галаз зи патав гва. Гада Девриша хуьре почтальонвиле кIвалахзава. Адан кьве руш чпин хизанрин иесияр хьанва, 3 лагьай руша 7-классда кIелзава.
-Ватандин ЧIехи дяведин йисара, чан балаяр, чна балугъар кьуна, ветеграл кIвалахна ва танкариз акси хандакIар яна,-лагьана Перизат дидеди. Лап гъвечIи чIавалай зегьметдин сагьиб Перизат дидеди хейлин йисара дояркавиле кIвалахна. -Эхь, чан балаяр, хурухъ галай аялни гваз, гьакI кIвалахдин йикъар хьун патал векьерин шала, ярма кIула кьуна "Фуртик" лугьудай дагъдиз хкаж жедай.
КIвализ хкведайлани гъил ичIиз хкведачир, купIар ял хъийидай,- рикIел хкана Перизат дидеди.
Гьа икI, четин вахтар алатна. 1988-йисуз уьмуьрдин юлдашни рагьметдиз фена. Чунни уьмуьр кечирмишиз Дружбадал, ЦIелегуьндал фенай. Амма виридалайни хайи Ватан, хайи чил, дагълар гьахъ я. Эхир чун хуьруьз хтана. Перизат диде "Ватандин ЧIехи дяве куьтягь хьайидалай инихъ 60 йис тамам хьунин", "Ватандин ЧIехи дяве куьтягь хьайидалай инихъ 65 йис тамам хьунин" юбилейрин медалрин сагьиб хьана ва "Зегьметдин ветеран" я лагьай удостоверенидиз лайихлу хьана.
Сагърай куьн Перизат диде! Куьн куь веледринни хтулрин кьилел сагъ ва саламат хьурай.
-----------------------------------------------------------------------------------------

Ф.Абдурагьманова.
Гьазурвилер аквазва
Виридаз малум тирвал, 2015-йисан 9-майдиз Ватандин ЧIехи дяве куьтягь хьайидалай инихъ 70 йис тамам жезва. И кардал асаслу яз, сувариз дибдилай гьазур хьун патал, чи райондин ЦЗН-ди са кьадар кIвалах вилик тухузва.
Чпи кьиле тухузвай кIвалахдикай чаз ЦЗН-дин кьилин инспектор Р.Сефералиевади агъадихъ галай информация гана.
Ада къейд авурвал, алай вахтунда ЦЗН-ди кьилди тешкилнавай военно-профориентационный пландал асаслу яз, анин работникри райондин школайра авай аялрихъ галаз, абуру "Ватандиз къуллугъ авун виридалайни намуслувал я" тIвар алаз са кьадар мярекатар кьиле тухуда. Центрди ихьтин мярекатар кьиле тухунин кьилин метлеб акьалтзавай жегьил несилдиз, военный рекьяй къуллугъ авунин кардин ери-бине дибдилай чирун ва и рекьяй кIелиз физ кIанзавайбуруз и кIвалахда авай кьетIен шартIарикай хабардар авун я.
-------------------------------------------------------------------------------------------

З.Саидова.
Хуьрерин идарайрин гьалар ахтармишна
19-февралдиз "Кьурагь район" муниципальный тешкилатдин администрациядин кьилин заместитель Э.Исаева Гелхенрин ва Ашарин хуьрериз фена, анра авай санитариядин гьал идарайрин кIвалахар, идараяр авай гьал ахтармишна.
Э.Исаева и хуьрерин администрацийрин, Ашарин ФП-дин, Гелхенрин идарайриз, врачебный амбулаториядиз , ясли-бахчайриз фена анра кIвалах вилик фин патал авай гьалар ахтармишна, кIвалах вилик фин патал авай кимивилер арадай акъуддайди, ремонтар авуна кIанзавай идарайриз ремонтар авун патахъай къайгъу чIугвадайди ва Ашарин хуьруьн ясли-бахчада алава яз са группа ахъай хъийидайди лагьана.
Ада гьакIни и кьве хуьруьнни администрацийрин кьилериз ЧIехи Гъалибвилин 70 йис тамам хьунин сувар алукьдалди вилик обелискар ремонт авун, администрацийрин вилик квай куьчеяр михьна, къайдадиз гъун чарасуз тирди лагьана.
------------------------------------------------------------------------------------------
ТуькIуьр хъувун
Чи газетдин алатай 8-9-нумрада "Измененные статьи Устава муниципального района "Курахский район" Республики Дагестан" материалда 23-статьядин 1-пунктуна гъалатI хьана, депутатрин кьадарар дуьз кхьенвач. Чна агъадихъ депутатрин лазим кьадарар аваз и пункт чап хъийизва.
Статья 23. Собрание депутатов муниципального района
1. Собрание депутатов муниципального района состоит из глав поселений, входящих в состав муниципального района, и из депутатов Собраний депутатов указанных поселений, избираемых Собраниями депутатов сельских поселений из своего состава в соответствии со следующей нормой представительства:
от сельского поселения "сельсовет "Гельхенский" - 1 депутат;
от сельского поселения "сельсовет "Икринский" - 1 депутат;
от сельского поселения "село Кабир" - 1 депутат;
от сельского поселения "сельсовет "Кочхюрский" - 1 депутат;
от сельского поселения "сельсовет "Курахский" - 2 депутата;
от сельского поселения "сельсовет "Кутульский" - 1 депутат;
от сельского поселения "сельсовет "Усугский" - 1 депутат;
от сельского поселения "сельсовет "Шимихюрский" - 1 депутат;
от сельского поселения "село Хпюк" - 1 депутат;
от сельского поселения "сельсовет "Штульский" - 1 депутат;
от сельского поселения "сельсовет "Ашарский" - 1 депутат;
от сельского поселения "село Аладаш" - 1 депутат;
от сельского поселения "село Кумук" - 1 депутат;
от сельского поселения "сельсовет "Моллакентский" - 1 депутат.
Общая численность депутатов Собрания депутатов муниципального района составляет 29 человек. Срок полномочий Собрания депутатов муниципального района составляет 5 лет.
Срок полномочий Собрания депутатов муниципального района составляет пять лет.
-------------------------------------------------------------------------------------------
 

Комментарии (0)

Нет комментариев. Ваш будет первым!